የባቦጋያ መድኃኒዓለም የመሬት ጉዳይ ፍርድ ቤት ለባለሀብቱ ወሰን

(አንድ አድርገን ግንቦት 4 ፤ 2004ዓ.ም)፡- በባቦጋያ መድኃኒዓለም የቦታ ጉዳይ ለተከታታይ ጊዜያት ቦታው ያለበትን በቅርበት በመከታተል ሁኔታውን መዘገባችን ይታወቃል ፤ ከቀናት በፊት አቶ ጌታቸው ዶኒ ቤተክርስትያኑን ዘግቶ ከአካባቢው ለመሰወርና ቤተክርስትያኒቱ እንዳይቀደስባትና አገልግሎት እንዳይሰጥባት ለማድረግ የቤተክርስትያኒቱን እቃ ቤት ሀላፊ ቁልፍ በጉልበት ሊቀበላቸው እንደነበረ ነገር ግን ሳይሳካለት እንደቀረ በጊዜው ዘግበን ነበር ፤ ይህ ሁኔታ ሲፈጠር የእቃ ቤቱ ሀላፊ የሆኑት አባት በጊዜው አካባቢው ላይ ለሚገኙ ክርስትያኖች ስልክ በመደወል አቶ ጌታቸው ዶኒ እየሰራ ያለውን ነገር ከተናገሩ በኋላ በርካታ ምዕመኖች ሁኔታውን በመቃወም በቤተክርስትያኒቱ መሰብሰብ ችለው ነበር ፤ እነዚህ ክርስትያኖች ተግባሩን ለመቃወም ቢወጡም ፤ ቤተክርስትያኒቱ አትዘጋም ቢሉም በወቅቱ የሰማቸው ህጋዊ አካል አልነበረም ፤ ይህ በእንዲህ እያለ አቶ ጌታቸው ሰው መሰብሰቡን በመመልከት ለፖሊስ ኃይል ስልክ በመደወል ለአመጻ የመጡ ሰዎች በማስመሰል 16 የሚያህሉ ክርስትያኖችን ለቀናት ማሳሰር ችሎ ነበር ፤ ከቀናት በኋላ በዋስ ቢፈቱም አንዱን ታሳሪ ግን ፖሊሶች ክፉኛ ዱላ ስላሳረፉበት ጉዳት ደርሶበት ነበር ከእስር የወጣው፡፡

ይህ የባቦጋያ መድሀኒአለም ጉዳይ ለሁለተኛ ጊዜ ፍርድ ቤት ቢቀርብም ለቤተክርስትያኒቱ የማይጠቅም ውሳኔ ከፍርድ ቤቱ ተሰምቷል ፤ በህገወጥ መንገድ የተወሰደውን ከ10ሺህ በላይ ካሬ ቦታ ‹‹ቤተክርስትያኒቱ ትጠይቅ እናንተ የእሷ ህጋዊ ተወካዮች አይደላችሁም ፤ እናንተ አትወክሏትም ፤ ይዞታው የባለሀብቱ ነው›› የሚል መልስ ከፍርድ ቤቱ ተሰምቷል ፤ ይህ ጉዳይ ደግሞ ነገሩን አጥብቀው ለያዙት ምእመናን መልካም ወሬ አይደለም ፤ በዚህ ሁኔታ አቶ  ጌታቸው ዶኒ እና የሪዞርቱ ባለቤት እስከ ወድያኛው የማያዛልቅ ደስታ አግኝተዋል ፡፡ ቤተክርስትያን ማለት የቤተክህነቱ ማለት አይደለችም ፤ ቤተክርስትያኒቱ የእምነቱ ተከታዮች ሁላ ናት ፤ ቤተክህነቱ ቦታውን እንዲሸጥ ሲደረግ እያየ እንዳላየ ቢያልፍ እንዴት ምዕመኑ ጥያቄ እንዳያቀርብ በሩ ዝግ ይሆናል ?  እንደ እነ ጌታቸው ያለ ሰው ቤታችንን በገንዘብ እየቀየሩ እየተመለከትን እንዴት ዝም በሉ እንባላለን ? ፤ አቶ ጌታቸው ዶኒ የሚናገረው ነገር ምዕመኑ ጥያቄ መጠየቅ እንደማይችሉና ከጠቅላይ ሚኒስሩ ጀምሮ እስከ ታችኛው የስልጣን ተዋረድ በሀላፊነት ላይ የሚገኙት ሰዎች ነገሩን ለሪዞርቱ ባለቤት ለአቶ ታዲዎስ እንደወሰኑለት ዲስኩሩን እየነፋ ይገኛል ፡፡

አካባቢው ላይ ያለው ክርስትያንም ተስፋ ሳይቆርጥ ጥያቄው መፍትሄ እስኪያገኝ ድረስ ከእግዚአብሔር ጋር በመሆን መጠየቅ ያለበትንና መሄድ ያለበትን ርቀት ለመሄድ በጽናት ቆሞ ይገኛል :: ይህን ጉዳይ ጉዳያችን ብለው ከአጽራረ ቤተክርስትያን ጋር የሚያደርጉት ትግል እንደ ቀላል የምናየው አይደለም ፤ ለነገ ለልጅ ልጆቻቸው ቤተክርስትያቱን ከስርዓቷ እና ከትውፊቷ ጋር አንድ ላይ ለማስረከብ ዛሬ ላይ የተበላሸውን ነገር ለማስተካከል በአላማ ቆመዋል ፡፡

እነዚህ ክርስትያኖች እንዴት በእምነትና በጽናት መቆም እንዳለብን ያስተምሩናል ፤ እኛ ትክክሎች እና እውነት እኛ ጋር እስካለ ድረስ ማንኛውም የቤተክርስትያን ጉዳይ ላይ ተስፋ መቁረጥ የለብንም ፤ እውነትን መቅበር እና እስከ ወዲያኛው ቀብሮ የሚያስቀር ምንም ነገር የለም ፤ ጥያቄዎቻችን መልስ እስኪሰጣቸው ድረስ በጽናት ልንቆም ይገባናል ፤ ሰዎች መልስ ባይሰጡን ጊዜ መልስ ይሰጠናል ፤ ጊዜ መልስ ባይሰጠን አንድ አምላክ መልስ እንደሚሰጠን ማመን መቻል አለብን ፡፡

እንደ ጌታቸው ዶኒ ያለን መሰሪ ሰውን እንደ አመጣጡ ለመጋፈጥ ለምናውቀው ሰዎች ከበድ ያለ ይመስለናል  ፤ ጌታው ዶኒ ምን አይነት ሰው ቢሆን ነው እንደዚህ በየቦታው እየሄደ የሚያምሰው ? የሚል ሰውየውን ከማያውቁት ሰዎች ጥያቄ ይነሳል ፤ ይህን ሰው በህግ መጠየቅ አይቻል ሆይ ? የሚሉም አልጠፉም ፤ የኛ መልስ ‹‹ይቻላል›› ነው ፤ ነገር ግን  ጥያቄዎቻችንን መሰረት በማድረግ እርስ በእርስ በመማከር ፤ ባለሙያን በማማከር ልንታገለው ይገባል ፤ መነሻውንና መድረሻውን ሳያውቁ ውጊያውን ቢጀምሩት ትግሉ በርካታ ዋጋዎችን ያስከፍላል ፤ ሰውየው ህጋዊም ሆነ ህገወጥ ሆኖ መስራትን ተክኖታል ፤ እሱን ለማስረዳት ጥሩ ምሳሌ ሆኖ ያገኝሁት ቢኖር ፤ ዘወትር ረቡዕ በኢቲቪ የሚተላለፈው ‹‹ሰው ለሰው›› ተከታታይ ሳምንታዊ ድራማ ላይ ‹‹አቶ አስናቀን›› ሆኖ የሚሰራው አበበ ባልቻ የተላበሰውን የድራማው ገጸ ባህሪ በትክክል ጌታቸው ዶኒን ይመስለዋል ብለን እናምናለን ፤ ከእንዲህ አይነቱ ሰው ጋር ነው በጽናት የበረቱት ሰዎች ገትረው እየተሟገቱት ያሉት ፡፡ በሚፈልግበት ሰዓት ከቤተክህነቱ አቡነ ጳውሎስ የፈረሙበትን ማህተብ ያረፈበትን ህጋዊ ደብዳቤ ይዞ አውደ ምህረት ላይ በማንበብ እመኑኝ የሚያስብል ፤ ሰዎች በሌሉበት ሰዓት በጉልበት ተጠቅሞ ቁልፍ ለመቀማት የሚሞክር ሰው ፤ ቀን ቀን ጉዳዩን ለማስፈጸም ከክልሉ ባለስልጣናትና ከኦህዲድ ቢሮ የማይጠፋ ፤ በቀጣይ ቀናት ስለሚሰሩት ህጋዊ መሳይ ህገወጥ ስራዎች ከሪዞርቱ ባለቤት ጋር ማታ ማታ እያገኝው የሚወያየው ሰው ፤ ምዕመናን ያለቀለት እና ይግባኝ የማያስብል ጉዳይ መሆኑን እንዲያውቁት ከጠቅላይ ሚኒስትሩ ጀምሮ እስከ ከፍተኛ የመንግስት ደህንነት ሰዎች ስም በመጥራት ሰው ላይ ሳይኮሎጂካል ጫና ለመፍጠር የሚጥር ፤ የቤተክርስትያኒቱን አባቶች  በማስገደድና ጫና በማድረግ ያላነበቡትንና ያልተስማሙበትን ቃለ ጉባኤ ለማስፈረም ቀና ደፋ የሚል ሰው ነው አቶ ጌታቸው ዶኒ ማለት ፡፡ ይህ በድራማ ከምታቁት ሰው ቢብስ እንጂ የሚያንስ ባህሪ የለውም ፤ ጌታቸው ዶኒ ማለት ሰይጣን ስጋ ለብሶ ማለት ነው ፡፡

ወደፊት እኛ በጽሁፍ ያሰፈርናትን በድምጽ የምናቀርብላችሁ መሆኑን ቃል እንገባለን ፤ እስከ አሁንም ያላቀረብነው የቦታው ጉዳይ ጫፍ ስላልደረሰ የምናወጣው መረጃ የባጋያ መድሀኒዓለምን ቦታ ማስመለስ ሂደት ላይ አሉታዊ ተጽህኖ እንዳይፈጥር በመፍራት እንጂ ከአንባቢዎቻችን የምደብቀው መረጃ ኖሮን አይደለም፡፡

ይህ በእንዲህ እያለ ትላንት በደረሰን መረጃ መሰረት  መድሀኒአለም ቤተክርስትያን ላይ የተመደቡት አዲስ አስተዳዳሪ እና አቶ ጌታቸው ዶኒ በመመካከር ክስ ፍርድ ቤት አቅርበዋል ፤ ለቤተክርስትያን ተቆርቋሪ ወንድምና እህቶቻችን የፍርድ ቤት መጥሪያ  አምጥተውላቸዋል ፤ የክሱ ጭብጥ‹‹አስፈራርተውናል›› የሚል ሲሆን ከሳሽ የባቦጋያ ቤተክርስትያን አስተዳዳሪ ሲሆኑ አንደኛ ምስክር ደግሞ አቶ ጌታቸው ዶኒ ሆኖ ቀርቧል ፤ ለተከሳሾች የክስ ቻርጅ የደረሳቸው አርብ 03/09/2004 ዓ.ም መሆኑን አውቀናል ፡፡ ወደ ፊት ምን እደሚፈጠር አብረን የምናየው ነገር ይሆናል፡፡ ሰው እንዴት እድሜ ልኩን ቤተክርስትያኒቱን ለማፍረስ ተግቶ ይሰራል ፤ ከዚህ በላይ ግልጽ ነገር የለም ፤ ይህን የእሱን ስራ  ከጠቅላይ ቤተክህነት አንስቶ እስከ  ጠቅላይ ሚኒስትሩ ድረስ መረጃው እጃቸው ላይ እንዲገባ ተደርጓል ፤ ሁሉም የመፍትሄ አካል መሆን ቢያቅታቸው እንኳን ፡፡

አሁን ግን እዚህ ብሎግ ላይ የማይጻፍ ነገር ቦታውን አስመላሽ ኮሚቴ የተወሰደውን የመድሀኒዓለምን ቦታ ለማስመለስ አዲስ አካሄድ መርጠው  መንገዱን እየሄዱን እንደሆነ ሰምተናል ፤ መንገዱንም ውጤቱንም ወደፊት እንነግሮታለን፤ ለጊዜው አምላክ ቸር ወሬ ያሰማን፡፡

‹‹እግዚአብሔር ከእኛ ጋር ነው በሁኔታዎች ተስፋ አንቆርጥም ፤ ቦታው እንደሚመለስም አንጠራጠርም ፤››