ዝምታም ያስጨንቅ ኖሯል?

ኢትዮጵያ ውስጥ ብሎጋችንን ለማንበበብ ይህን ሊንክ ይጠቀሙ

http://www.andadirgen.blogspot.in

ለ:- ማህበረ ቅዱሳን ጽ/ቤት
አዲስ አበባ

ጉዳዩ :- የማህበሩ ሚዲያ ክፍልን በተመለከተ ይሆናል

በዋልድባ አካባቢ መንግስት ያቀደውን ግዙፍ የስኳር ፋብሪካን በማስመልከት በዋልድባ ይዞታ ላይ ያደረሰውን ተጽህኖ መኖር አለመኖር የሚያጣራ ኮሚቴ ተቋቁሞ ከሚመለከታቸው አካላት ጋር ሁሉ ተፈላጊውን የማጣራት ስራ አከናውኖ መመለሱ ይታወሳል::

ይህንንም መነሻ በማድረግ በቅርቡ ሁሉንም የመገናኛ አውታሮች ያሳተፈ ጋዜጣዊ መግለጫ መሰጠቱንና ይህንንም ጋዜጣዊ መግለጫም የማህበረ ቅዱሳን ጋዜተኞች መከታተላቸውን መሳተፋቸው እና የሚፈልጉትን ጥያቄ ሁሉ በይፋ አቅርበው ምላሽ መሰጠቱ ይታወቃል::

ስለሆነም ማንኛውም ጋዜጠኛ በተለይም ደግሞ የቤተክርስትያኒቱ ልሳን የሆነው የማህበሩ ጋዜጣ እና መጽሄት መረጃ ከወሰደ በኋላ መግለጫውን አለማውጣቱ አግባብነት የሌለው ከመሆኑም በላይ የሚዲያ ስነ ምግባርንም ያልተከተለ ስለሆነ በመምሪያችሁ በኩል ዘገባው የቀረበት ምክንያት በጽሁፍ እንዲገልጹ መመሪያ እንዲተላለፍ እንጠይቃለን፣  በማለት ለህዝብ ግንኙነት መምሪያ በቁጥር 234/2004 በቀን 10/08/04 የተጻፈ ደብዳቤ ለመምሪያችን ቀርቦ ተመልክተነዋል::

ስለዚህም ምንም እንኳ ከላይ የተጠቀሰው ሁሉ ሲከናወን ማደራጃ መምሪያው የሚያውቀው ባይሆንም ቅሉ እንደተባለው ጋዜጣዊ መግለጫውን በሚዲያ ለማውጣት ተስማምታችሁ ሪፖርት እንድታደርጉ ከወሰናችሁ በኋላ ዘገባው የቀረበትም ምክንያት በጽሁፍ ለማደራጃ መምሪያው እየገለጽን ከጠቅላይ ቤተክህነት የህዝብ ግንኙነት መምሪያ የተጻፈውን አንድ ገጽ ማስታወሻ አያይዘን ልከናል፡፡

ግልባጭ

 የሚመለከታቸው

• ለቅዱስ ሲኖዶስ ጽ/ቤት
• ለብጹእ ቅዱስ ፓትርያርክ ልዩ ጽ/ቤት
• ለመንበረ ፓትርያርክ ጠቅላይ ጽ/ቤት
• ለህዝብ ግንኙነት መምሪያ
• ለህግ አገልግሎት መምሪያ

ü  የማይመለከታቸው መስሪያ ቤቶች

o   ለፌደራል ጉዳዮች ሚኒስቴር

o   ለብሔራዊ ደህንነት አገልግሎት

o   ለፌደራል ፖሊስ ኮሚሽን

(አንድ አድርገን ግንቦት 9 ፤ 2004ዓ.ም)፡- ይህ ደብዳቤ በጣሙን አስገርሞናል ፤ ለምን ስለ ዋልድባ አልዘገባችሁም ተብሎ እንዴት ደብዳቤ ይጻፋል ? ደብዳቤው ተገቢ ነው የሚል እምነት የለንም ፤ መጀመሪያ ቤተክህነቱን የምንጠይቀው ጥያቄ አለን ፤ ለምን ዋልድባ ሲታረስ ተመልክታችሁ አልታረሰም የሚል መግለጫ ለመገናኛ ብዙሀን ሰጣችሁ ? ዓለም የተቃወመውን ስራ እናንተ ብቻ በመደገፋችሁ አፍረንባችኋል ፤ እናንተ ከመንግስት ጎን ብትቆሙ ብዙም አይገርመንም ፤ ግን ገዳሙ ላይ የሚሰራውን ስራ መቃወም ቢያቅታችሁ እንኳን ደጋፊ ባትሆኑ መልካም ነበር ፤ መጀመሪያ መቃወም ያለባችሁ እናንተ ሆናችሁ ሳለ ፤ ለምን ስለዋልድባ አልዘገባችሁም?  ማለታችሁ ለሰሚም ግራ የሚያጋባ ነገር ነው ፤ እንዴት አንድ ማህበር  አልዘገብክም ተብሎ ደብዳቤ ይጻፍለታል ፤ በቅርቡ በስራ ላይ የዋለው ህግ ጋዜጠኞችን ለምን ጻፋችሁ እያለ ነበር ዘብጥያ የሚያወርዳቸው ፤ በብእር አማካኝነት ሽብርተኛ የሚባልበት ዘመን ላይ ደርሰናል ፤  አሁን ደግሞ መልኳን ቀይራ መጣች መሰል ፤ ዝምታም ይህን ያህል ያስጨንቃቸው ኖሯል ? ሰው ለምን ተናገርክ ማለት ይቻላል ለምን አልተናገርክም ? ለምንስ አቋምህን አልገለጽክም ? ብሎ ደብዳቤ ሲጻፍ ዘንድሮ አየን ፤ ይህ 2004 ዓ.ም ገና ብዙ ነገሮች ያሳየናል ፤ ከአሁን አሁን ማህበሩ በዋልድባ ገዳም ጉዳይ ላይ አቋሙን እንደ ማህበር እስከ አሁን ባይገልጽም ይቃወማል ብለው የገመቱ ይመስላሉ ፤ ለካ ዝምታም ያስፈራል ? እኔ ጩህት ብቻ ይመስለኝ ነበር ::

ይህ ሀሳብ ከቤተክህነቱ ብቻ የመጣ ሀሳብ ነው ብሎ የሚያስብ ካለ ተሳስቷል ፤ ይህ አቋም የቤተክህነቱ ብቻ ቢሆን ኖሮ ግልባጭ ለማይመለከታቸው መስሪያ ቤቶች ባልተላከ ነበር ፤ለፌደራል ጉዳዮች ሚኒስቴር ፤ ለብሔራዊ ደህንነት አገልግሎትና ፌደራል ፖሊስ ኮሚሽን ቤተክህነቱ እና ማህበሩ ማህል የሚደረግን የደብዳቤ ልውውጥ የቱ ጋር የቆሙ ተቋማት ናቸው ? አሁን አሁንማ ሰዎቹ ጤነኞች መሆናቸውን እስከመጠራጠር ደርሰናል ፤ እንዴት ይህን የመሰለ ይዘት ያለው ሀሳብ ከቤተክህነቱ ይወጣል?  ለነገሩ አቡነ ጳውሎስ በወንበሩ እስካሉ ድረስ ከዚህም የባሰ እንደማይወጣ እርግጠኛ ሆነን መናገር አንችልም ፤ የሚያስቀምጥ እግዚአብሔር የሚነቅልም እርሱ ፤ ጽዋው እስኪሞላ መጠበቅ ብቻ ነው ፡፡ የእኛ የመከራ ጽዋ  ሞልቷል ነው የሚባለው ገንፍሏል? መንግስትም ሆነ የቤተክህነቱ ሰዎች ዝምታን ተቃውሞ አድርገው ወስደውታል ፤ ቢገባቸው መቃወም ራሱ መብት ነው ፤ ሀገሩ ኢትዮጵያ ሆነ እንጂ ፤ ህገመንግስቱ ሀሳብን የመግለጽ መብት ብሎ ያስቀመጠው አንቀጽ አለ ፤ አዚህኛው ውስጥ ግን ያለመናገርም መብት እንዳለ ዘነጋችሁት ፤  

የተጻፈው ደብዳቤ ላይ ‹‹የሚዲያ ስነ ምግባር ›› የሚል ቃል አለው ፤ ይህ ደግሞ ስነ ምግባሩን ያላወቁት ወይንም እያወቁ ‹‹በዜና ቤተክርስትያን›› የጣሱትና ያጣሱት ሰዎች አጠገባቸው እያሉላቸው ዘለው ስለ ስነ ምግባር ሊያስረዱ ይሞክራሉ ፤ እኔ ጥያቄ አለኝ ፤ የሚዲያ ስነምግባር ማለት ምን ማለት ነው ?  እናንተ ስለ ሚዲያ ስነምግባር ለማውራት እውቀቱም ሆነ ብቃቱ የላችሁም ፤ የቤተክርስትያኒቱን  ድምጽ የሆነችውን ‹‹ዜና ቤተክርስትያን ›› ላይ ያወጣችሁት ከስነምግባር ውጪ የሆነ ጽሁፍ ስነምግባር ካለው ሰው እና ስለ ‹‹ሚዲያ ስነምግባር›› ማስረዳት ከሚችል ተቋም የሚጠበቅ አይደለም፡፡  እኛ ግን እንላለን ማህበሩ ቦታው ላይ በላካቸው ልኡካን ቡድኖች አማካኝነት ያጠናውን ጥናት ትክክለኛ ሪፖርት በትእግስት እንጠብቃለን፡፡

ይህን ደብዳቤ እንደዚህው አይተን የምናልፈው መሆን መቻል የለበትም ፤ ቤተክህነቱ ውስጥ ያለውን የነቀዘን አሰራር የሚቃወመው ማህበረ ቅዱሳን  እነርሱ ሊቋቋሙት ስላልቻሉ ከተራራ ጋር ሊያላትሙት መንገድ ጠራጊ ሆነው በአንዲት ደብዳቤ ብቅ ብለዋል ፤  የዚህን ደብዳቤ መልስ ግን ማስተዋል ያሻዋል ፤ ለምን ? ብሎ መጠየቅም ይገባል እንላለን፡፡

‹‹ኢያሪኮም ከእስራኤል ልጆች የተነሣ ፈጽማ ተዘግታ ነበር ወደ እርስዋ የሚገባ ከእርስዋም የሚወጣ ማንም አልነበረም። እግዚአብሔርም ኢያሱን አለው። ተመልከት፥ ኢያሪኮንና ንጉሥዋን ጽኑዓን ኃያላንዋንም በእጅህ ሰጥቼአለሁ። ሰልፈኞቻችሁ ሁሉ ከተማይቱን አንድ ጊዜ ይዙሩአት እንዲሁም ስድስት ቀን አድርጉ።ሰባትም ካህናት ሰባት ቀንደ መለከት በታቦቱ ፊት ይሸከሙ በሰባተኛውም ቀን ከተማይቱን ሰባት ጊዜ ዙሩ፥ ካህናቱም ቀንደ መለከቱን ይንፉ።ቀንደ መለከቱም ባለማቋረጥ ሲነፋ፥ የመለከቱንም ድምፅ ስትሰሙ፥ ሕዝቡ ሁሉ ታላቅ ጩኸት ይጩኹ የከተማይቱም ቅጥር ይወድቃል፥ ሕዝቡም ሁሉ እያንዳንዱ አቅንቶ ይገባባታል። ›› መጽሐፈ ኢያሱ ወልደ ነዌ 6፤  1-6

በዚህኛው ታሪክ እንደምንረዳው እግዚአብሔር እያሱን ተናገረው ቃሉ የማይታጠፍ አምላክ የከተማይቱን ቅጥር በጩህት እንዲፈርስ አደረገ ፤ አሁን እናንተ በማይገባችሁ ቦታ ላይ ተቀምጣችሁ ህዝበ ክርስትያኒን እና ቤተክርስትያኒቱን ወላጅ እንደሌለው ልጅ የምትጫወቱባል እግዚአብሄር ሲናገር የተቀመጣችሁበት ወንበር ይሸሻል መግቢያ ቀዳዳም ታጣላችሁ ፤ በዝምታ ብቻ ይጥላችኋል ፤ እናንተ ጩሁ እኛ ግን ዝም እንላለን ፤ ዝምታን የሚሰማ አምላክ ሁሌም ከጎናችን ነው ፤ እያሪኮ በጩህት ነው የፈለሰችው የእናንተን ደግሞ በዝምታ እግዚአብሔር እስከወዲያኛው ያፈርሳችኋል ፤ እስኪ ዝምታችን እንቅልፍ እንዲነሳቸው በርትተን ስለ ዋልድባ እንጸልይ  ፤ ‹‹አንደበትህ ዝም ይበል ልብህ እንዲናገር ፤ ልብህም ዝም ይበል እግዚአብሔር ይናገር ›› ይላሉ አባቶቻችን ፤ እስኪ ዝም ብለን ወደ ላይ  እናመልክት እርሱ ይናገራቸው ፡፡