የዋልድባ ገዳም ጉዳይ እንደ አጀንዳ አለመያዙ እያነጋገረ ይገኛል

(አንድ አድርገን ግንቦት 5 2004 ዓ.ም)፡- የርክበ ካህናት ቅዱስ ሲኖዶስ መደበኛ ስብሰባ ፣ ግንቦት 2 ቀን 2004 ዓ.ም ጠዋት በጽርሐ መንበረ ፓትርያርክ ተጀምሯል ፤ ስብሰባው ቀናትን አስቆጥሯል ፤ በመጀመሪያ ቀን ከ20 የማያንሱ አጀንዳዎችን በአርቃቂ ኮሚቴው አማካኝነት ተሰናድቶ ስብሰባው ተጀምሯል ፤ የተያዙትን አጀንዳዎች በአጽንኦ ለመመልከት ችለን ነበር ፤ በርካታ መልካም የሆኑ እና የቤተክርስትያኒቱን ችግር ያማከሉ አጀንዳዎች ተቀርጸዋል ፤ ውሳኔዎቻቸው ተግባራዊ ከተደረጉ መሰረታዊ ለውጥ ይመጣል ብለን እናምናለን ፤ ነገር ግን መንግስት ዋልድባ ገዳም ላይ እየሰራ ያለውን የሥኳር ልማት በሚመለከት ገዳሙ አሁን ያለበትን ሁኔታ መሰረት አድርገው የሚነጋገሩበት  አጀንዳ አለመያዙ በሰዎች ዘንድ አግራሞትን ፈጥሯል ፤ ቀጥሎም ስለ አቡነ ጳውሎስ ‹‹እመቤታችን ላይ ጥንተ አብሶ አለባት›› ብለው የጻፉት የመመረቂያ ጽሁፍ እንደ አጀንዳ አለመያዙም እንደዚያው ፡፡ በተራ ቁጥር 19 ላይ  ልዩ ልዩ ጉዳዮች በማለት የተያዘ አጀንዳ አለ የዋልድባ ጉዳይ እዚህ ውስጥ ይነሳል ብለው የሚያስቡ ሰዎችም አሉ ፤ ነገር ግን ዋልድባ ገዳሙንና የገዳሙን አባቶች የሲኖዶስ አባላት በተጣለባቸው ኃላፊነት መሰረት ተነጋግረው መፍትሄ ባያመጡ እንኳን የመፍትሄ አቅጣጫ ማስቀመጥና ማመላከት ይጠበቅባቸዋል ፤ በተጨማሪም እስከ አሁን ዝም ያሉት አባቶች አቋማቸውን ያንጸባርቃሉ ተብሎም ይጠበቃል ፤ ይህን ጉዳይ በዋና አጀንዳነት ይዘው መነጋገር ካልቻሉ የእነርሱም ሰልፍ ከወዴት እንደሆነ ይታወቃል ፤ ይህ ደግሞ ምዕመኑ ከእዚህ በፊት  በቋፍ  ላይ የነበረውን ለአባቶች ያለውን እይታ እስከ ወዲያኛው ገደል ሊከት ይችላል ፡፡

አሁን እንዴት በዚህ ወቅት ዋልድባ ገዳም ጉደይ እንደ ዋና አጀንዳ መያዝ የለበትም?  ወይንስ ጉዳዩ ለአጀንዳነት አይመጥንም ?  ፤ ይህ የሚያሳየው አንድም መነጋገር አልፈለጉም ፤ አልያም ደግሞ የመንግስት ተጽህኖ አለ ማለት ነው ፤ ‹‹ቄሱም ዝም መጽሀፉም ዝም›› ማለት መቻል የለበትም ፤ ዛሬ ላይ ሆኖ ይህን ጉዳይ መቃወም ካቃታቸው ነገ ከተወቃሽነት አይድኑም ፤ ‹‹ የእግዚአብሔርን ቤተ ክርስቲያን ትጠብቁአት ዘንድ መንፈስ ቅዱስ እናንተን ጳጳሳት አድርጎ ለሾመባት ለመንጋው ሁሉና ለራሳችሁ ተጠንቀቁ። . . ." የሐዋሪያት ሥራ  ፳ ፥ ፳፰  እስኪ ብዙ ሳንል የጉባኤውን ፍጻሜ እንጠብቅ ፤

በሌላ በኩል የአቡነ ጳውሎስ የመመረቂያ መጽሀፍ ላይ የ‹‹ጥንተ አብሶ›› ጉዳይ ለምን አጀንዳ መሆን እንዳልቻለም በምዕመኑ ዘንድ ጥያቄ አለ ፤ ይህስ ለአጀንዳነት አይመጥንም ? ወይስ ልዩ ልዩ ጉዳዮች የሚለው ውስጥ ለመነጋገር አስበው ነው ? ይህ ጉዳይ እኮ የቤተክርስትያኒቱን አስተምህሮ የሚጻረር ነው ፓትርያርኩ በህይወት እያሉ ስህተታቸውን ነገሮ ለሰሩት ስራ ይቅርታ እንዲጠይቁ እና ንስሀ እንዲገቡ ማድረግ ይሻላል ? ወይስ ፓትርያርኩ በህይወት ካለፉ በኋላ በጉዳዩ ላይ ትክክል አይደሉም ማለት ? የፓትርያርኩ ሀውልት መፍረስ ያለበት የመመረቂያ ጽሁፋው ላይ ያጻፉት ኑፋቄ መገለጥና መገሰጽ ያለባቸው  በህይወት ሳሉ ነው ፤ አሁን እየተደረገ ያለው ነገር ጥቂት አባቶች ፓትርያርኩን ጨምሮ ጉባኤውን ውዝግብ ውስጥ የሚከትን ጉዳይ በሲኖዶስ ስብሰባ ላይ ላለማንሳት የታሰበ አካሄድ እንደሆነ ያሳየናል ፡፡  ለምን ይህ ጉዳይ እሳቸውን ብቻ ሳይሆን በርካቶችን አብረዋቸው የቆሙትን ሰዎችን አቋቸውን ስለሚያጋልጥ ነው፡፡

‹‹ የእግዚአብሔርን ቤተ ክርስቲያን ትጠብቁአት ዘንድ መንፈስ ቅዱስ እናንተን ጳጳሳት አድርጎ ለሾመባት ለመንጋው ሁሉና ለራሳችሁ ተጠንቀቁ። . . ." የሐዋሪያት ሥራ  ፳ ፥ ፳፰   ይህን መልእክት በመጽሀፍ ቅዱስ ሰፍሮ እናገኝዋለን ፤ አሁንም ብጹአን አባቶቻችን ለመንጋውና ለቤተክርስተያን ግድ ሊላቸው ይገባል ፡፡ ለምን ይህ ፈተና መጣ አንልም ‹‹ከሚቻላችሁ መጠን ይልቅ ትፈተኑ ዘንድ የማይፈቅድ እግዚአብሔር የታመነ ነው፥ ትታገሡም ዘንድ እንድትችሉ ከፈተናው ጋር መውጫውን ደግሞ ያደርግላችኋል።›› 1ኛ ወደ ቆሮንቶስ ሰዎች 10 ፤13 ላይ ሰፍሯል ፤ ነገር ግን ፈተና ሲመጣ ብቻውን እንደመጣ ብቻውን አያልፍም ፤ ፈተናው አብሮ ይዞ የሚያልፋቸው ነገሮች ይኖራሉ ፤ እኛም ስለ ፈተናችን ልንታገስ በጾም በጸሎት ልንበረታ ያስፈልጋል  ፤ ይህ ፈተና የሚያልፈው አባቶች የአባትነታቸው ተግባር ሲፈጽሙ ምዕመናኑም ሀላፊነታቸውን አውቀው ስራቸውን በአግባቡ ሲፈጽሙ ብቻ ነው ፡፡ ይህ ፈተና ሰዎችን ከስልጣናቸው ሊያፈናቅል ይችላል ፤ እስር ቤት ሊያስገባቸውም ይችላል ፤ አካላዊ ጉዳትም ሊያደርስባቸው ይችላል ፤ አባቶችን ከበአታቸው በረው እንዲጠፉ መንገድ ሊከፍት ይችላል ፤ በስተመጨረሻ የህይወት መስዋእትነትንም ሊጠይቅ ይችላል ፤ ይህን አውቀን ነው ፈተናን በእግዚአብሔር ኃይል ለመጋፈጥ መዘጋጀት ያለብን ፤ ስለዚህ ይህ ፈተና የመጣው ለዋልድባ መነኮሳት ብቻ አይደለም ፤ ይህ ፈተና የሁላችንም ነው ፤ ቅዱስ ፓትርያርኩና የሲኖዶስ አባላት በጉዳዩ ላይ እስካሁን ያሉት ነገር የለም በአሁኑ ሰዓት የተጀመረውጉባኤ ላይ ራሱን ችሎ በአጀንዳነትም አልታየም ፤  ነገሩን መቃወምም አለመቃወምም ሁለቱም አቋም ነው ፤ ነገር ግን ሁኔታው እያዩ ዝም ማለት ግን እንደ አባት መልካም አይደለም ፤  እነርሱ በዚህ ጉዳይ ላይ አንድ እርምጃ ተራምደው ለእኛ ቢያሳዩን መልካም ነው ፡፡