የአባቶች እርቀ ሰላምና እንቅፋቶች

የ ESAT ጊዜውን ያላገናዘበ እና ሚዛናዊ ያልሆነ ዘገባ

(አንድ አድርገን ፤ የካቲት 12 2004ዓ.ም)፡- ይህ ዘገባ አሁን እየተካሄደ ያለውን እርቀ ሰላም መፍትሄ አልባ እንዲሆን ሆን ተብሎ የተሰራ ስራ ይመስለናል፡፡ እኛ አቡነ ጳውሎስ ቤተክርስትያናችን ላይ ምንም ያላደረጉ ፃድቅ አባት ናቸው እያልን አይደለም ፡፡ ነገር ግን ካለሁ ሁኔታ አኳያ ቅድሚያ መሰጠት ያለበት የአንድነታችን ጉዳይ ነው ፡፡ አንድነታችን መስመር ካስያዝን በኋላ ሌላው ውስጣዊ ጉዳይ ይሆናል ፡፡ የዛሬ 20 ዓመት የተሰራ ስህተት አለ ፤ የዛሬ 10 ዓመት ገደማም የተሰራ ስህተት አለ ፤ በ1998 ዓ.ም ጭምር እምነቱን ከፖለቲካ ጋር በማያያዝ ህዝቡ ያሰማው ተቃውሞ አለ ፤ በቅርብም አባቶቻችን ላይ የተቃጣ ጥቃት ሁላ የቅርብ ጊዜ ትዝታችን ነው ፡፡ ይህ ሁሉ ነገር ቢከናወንም መሰረታዊው ነገር ሁለቱ ሲኖዶሶች ወደ አንድ መምጣታቸው ይመስለናል ፤አክንባሎ ላይ የተቀመጠችውን አይጥ ለመግደል ብለን ትልቁን አክንባሎ ላይ አደጋ በሚያደርስ መልኩ መሰንዘር የለብንም ፡፡ይህን ያለፈውን ነገር ወደ ኋላ እየሄዱ ነገሩን እየቆሰቆሱ ከ20 ዓመት በኋላ ማቅረብ ግን ምዕመኑንም ሆነ ለሰላም መስፈን ፤ ለእርቀ ሰላም ከአዲስ አበባ ወደ አሜሪካ የተንቀሳቀሱት አባቶች ላይ ተፅህኖ ያሳድራል፡፡ ያወራችሁትን ወሬ(ዜና እንበለው?ESAT : ዜና ትንታኔ - News Analysis 17 February 2012 )  በኢንተርኔት 5ሺህ ሰው አየውና መረጃውን በአለም ላይ የሰዎች ቀልብ የሳበ በመሆኑ ሰዎች እየተከታተሉት መሆኑን አስረግጣችሁ መናገርም አትችሉም ፤ የፖለቲካ ዜና አድማጩም ፤ የገባውም ፤ ያልገባውም ፤ ግራ የገባውም ሰው ዩቱብ ላይ ከፍቶ ስላየ በአለም ዙሪያ ያለ ሰው እየተከታተለ ነው ለማለት አያስደፍርም፡፡ ለምሳሌ የእኛን ብሎግ በቀን ከ4ሺህ እስከ 6ሺህ ሰው በአማካይ ይመለከተዋል የሚል ማስረጃ የመረጃ ቋታችን ይነግረናል ፤ ይህ ማለት ብዙ ሰው ይመለከተዋል ብለን መደምደም የሚያስችል ቁጥር ግን አይደለም ፤ በአለም ላይ 5ሚሊየን ሰዎች በቀን የሚጎበኙት ብሎግ እንዳለም ማወቅ አለባችሁ ፡፡ እነሱ እንኳን አፋቸውን ሞልተው መናገር አልቻሉም፡፡ ነገሮችን ሁላ አንፃራዊነታቸውን ሳታዛቡ  ብትዘግቡ ጥሩ ነው እንላለን፡፡

የእኛ ችግራችን የእኛው ስለሆነ ለቀቅ አድርጋችሁን እናንተም የፖለቲካ ስራችሁን ብታጣድፉ የሚሻል ይመስለናል ፤ አሁን ላለንበት ችግር ተጠያቂዎች ላይ እጃችን መጠቆም የመፍትሄ አካል ነው የሚል እምነት የለንም ፤ እንደ እናንተ ያለው ሚዛናዊ ያልሆነ ዘገባ ፤ ህዝብ አባቶቻችን ላይ የተለየ አቋም እንዲኖረው ፤ ክብራቸውን በአደባባይ ዝቅ ሲያደርግ የሚያሳይ ዘገባ ለእኛ እና ለያዝነው የአንድነት እርቅ ላይ ጥቁር ነጥብ የሚያሳርፍ ቢሆንም እግዚአብሔር ከእኛ ጋር ስለሆነ የሚያመጣው ከፍተኛ የሆነ ተፅህኖ ፤ ሰላሙን የሚያስተጓጉል ነገር አይታየንም፡፡ ጊዜ ሊወስድ ይችላል አንድ መሆናችን ግን የማይቀር ነገር ነው፡፡

መንግስትን መቃወም ሌላ አጀንዳ ነው ፤ ነገር ግን መንግስትን ለመቃወም ሲባል ቤተክርስትያናችን ላይ ያለውን ብልሹ አሰራር ፤ ሙስና ፤ አድልዎ ፤ በደል አንስቶ ሀሳብን ለራስ በሚያመች መልኩ እየጠመዘዙ ነገሩን ወደ ሌላ አቅጣጫ መውሰድ ሌላ ነገር ነው፡፡ አቡነ ጳውሎስ ምንም ያህል አንዲት ቤተክርስትያን ላይ በደል ቢሰሩም እንኳን ለሰሩት ስራ ተጸጽተው ንስሀ ቢገቡ እግዚአብሔር መሀሪ አምላክ ነው እና ንስሀቸውን እንደሚቀበላቸው አንጠራጠርም ፤ እግዚአብሔር ልቦናቸውን ወደ መልካም ነገር እንዲመልስ ለሀገርም ሆነ ለቤተክርስትያናችን መልካም ስራ ሰርተው እንዲያላፉ ፤ ለሰሩት ስራ የንስሀ እድሜ እዲጨምርላቸው በጸሎት አምላካችንን መጠየቅ እያለ ሰዎች ልባቸውን እዲያደነድኑ ፤ የይቅርታ ልብ እንዳይኖራቸው ለማድረግ የሚሰራውን መጪውን ያላገናዘበ ስራ እንደ  የኦርቶዶክስ ተዋህዶ  እምነቱ ተከታይ አጥብቀን እንቃወማለን፡፡

ከቅዱስ ሲኖዶስ የተወከሉ አባቶች ከአዲስ አበባ ይህን በጎ ሀሳብ አንስተው እርቀ ሰላም ለማምጣት ማሰባቸው ብቻ የሚያስመሰግናቸው ስራ ሆኖ ሳለ ከስብሰባው በፊት ፤ የሚወያዩበት አጀንዳ ሳይታወቅ አይሆንም አይደረግም ፤ በፍፁም አይሳካም ብሎ ማሰብ ከቅን ሰው የሚጠበቅ አካሄድ አይደለም፡፡ ስብሰባው በአንድ ለሊት ታስቦ እና ታቅዶ የተከናወነ አለመሆኑን እኛ ከማስረጃ ጋር ልናቀርብልዎት እንችላለን ፤ ይህ ስብሰባ ከመታሰቡ በፊት ለረዥም ወራት ያህል ቅድሚያ የተሰሩ ስራዎች በሁለቱም ሲኖዶሶች በኩል ነበሩ ፤ ለምሳሌ ያህል በጥቅምት 2004 ዓ.ም ቅዱስ ሲኖዶስ ስብሰባ ላይ አባቶች በጉባኤ አንስተው የተነጋገሩበት አጀንዳ አንዱ ይህ እርቀ ሰላም ነበር ፤ ከአዲስ አበባ ወደ አሪዞና ያቀኑት አባቶች የተመረጡትም በቀደምት የቅዱስ ሲኖዶስ  ጉባኤ ላይ ነበር፡፡ ይህ የሚሄዱበት ቀንም የተቆረጠው ቀድሞ ከወራት በፊት ነበር ፡፡ አሁን ላይ ደርሶ የመጣ ዱብዳ ነገር አይደለም፡፡ እናንተ ይህን ጉዳይ ቀድሞ አለማወቃችሁ ጉዳዬን አዲስ ያደርገዋል የሚል እምነት የለንም፡፡

ይህችን ቤተክርስትያን ከአባቶቻችን የተቀበልናት አንድ ሆና ነበር ፤ አሁን በእኛ ዘመን ሶስት ቦታ ተከፋፍላ ትገኛለች ፤ ታዲያ ከአባቶች የተቀበልነውን ቀኖና ፤ ዶግማ ወደ መጀመሪያው እንመልሰው ፤ ቀኖና ተሸሯል ፤ ማን እደሻረ እንነጋገር እና መተማመን ላይ እንድረስ ፤ ለወደፊትም የመፍትሄ አቅጣጫ እናስቀምጥ ፤ የአቡነ ጳውሎስም ሆነ ከእሳቸው በፊት ያለ አግባብ ስለተነሱት ፓትርያርክ ጉባኤ ሰርተን እንወያይ ማለት የቱ ጋር ነው ክፋቱ ? ሰው ስለመታረቅ ሲያስብ እኛ ልናግዘው ሀሳቡን ልንደግፈው ይገባናል እንጂ ፤ ልዬነታቸውን ልናጠብ መስራት ሲገባን መረጃ ስላለ ብቻ መረጃው ይሄ ነው መታረቅ የለብህም ማለት ተገቢ መስሎ አይታየንም፡፡ ይህች ቤተክርስትያን ዛሬ እኛ በእድሜአችን ካየነው የባሰ ችግር ውስጥ የነበረችባቸው ጊዜያት ያላለፉ መስሎ የሚታየን ሰዎች አለን ፤ እውነታው ግን በጣም በርካታ ጊዜያት ፈተናዎች አጋጥመዋት በአሸናፊነት ተወጥታችዋለች ፤ የግራኝ አህመድ ወረራ ፤ የዮዲት ጉዲት ዘመን ፤ 8000 ኦርቶዶክሳውያን በአንድ ቀን ሀይማኖታችንን አንቀይርም ብለው በሰማእትነት ያለፉበት ጊዜያት ከዋና ዋናዎቹ የፈተና ዘመናት በዋነኝነት የሚጠቀሱት ናቸው፡፡ ይህም ለእኛ ፈተናችን ነው እግዚአብሄር የፈተና መውጫ ቀዳዳ እንደሚያዘጋጅልንም እናውቃለን፡፡ አሁን ላይ ያለውን መለያየት ወደ አንድነት ማምጣት ብንችል ፤ ለአንድነታቸው የሚያስፈልጉ ነገሮችን ማከናወን ብንችል ከታሪክ ተጠያቂነት እና ከህሊና ተወቃሽነት የምንድነው እኛው ነን ፤ ይህን ሀላፊነት ሳንወጣ ብንቀር የታሪክ ተወቃሽ ፤ የህሊናም ሰላም የምናጣው እኛው እራሳችን ነን፡፡ ቤተክርስትያን ግን ቃል እስከተገባላት ፤ እንክርዳዱ ከስንዴው የሚለይበት ዘመን እስኪመጣ ድረስ ሳትናወፅ ፀንታ ትቆያለች፡፡

ኢትዮጵያ ኢትዮጵያ ያለ ሁለ ሀገሩን ይወዳል ማለት አይደለም ፤ አቡነ ጳውሎስን ሌባ ሌባ ያለ ሁላ እሱ ንፁህ ሰው አይደለም ፤ እንደ ኢሳት ያለ ተቃዋሚ የቴሌቪዥን ጣቢያ ሁላ ደግሞ እውነተኛ ነው ማለትም አይደለም ፤ የመንግስት ተቃዋሚ ሁላ  ይችን ሀገር ወደ ተሻለ የእድገት አቅጣጫ ይወስዳታል ማለትም አይደለም ፤ ስለዚህ በቤተክርስትያን ውስጥ ተገኝተው አቡነ ጳውሎስ ሲሰድቡ ብታሳዩን እኛ እሳቸውን እናንተ እንዳላችኋቸው አንላቸውም ፤ መፅሀፍ ቅዱስ እንዲህ ይላል

‹‹ እንዳይፈረድባችሁ አትፍረዱ፤ በምትፈርዱበት ፍርድ ይፈረድባችኋልና፥ በምትሰፍሩበትም መስፈሪያ ይሰፈርባችኋል። በወንድምህም ዓይን ያለውን ጉድፍ ስለምን ታያለህ፥ በዓይንህ ግን ያለውን ምሰሶ ስለ ምን አትመለከትም? ወይም ወንድምህን። ከዓይንህ ጉድፍ ላውጣ ፍቀድልኝ እንዴትስ ትለዋለህ? እነሆም፥ በዓይንህ ምሰሶ አለ። አንተ ግብዝ፥ አስቀድመህ ከዓይንህ ምሰሶውን አውጣ፥ ከዚያም በኋላ ከወንድምህ ዓይን ጉድፉን ታወጣ ዘንድ አጥርተህ ታያለህ።›› የማቴዎስ ወንጌል 7፤ 1-5

ስለዚህ የእናንተን አዛኝ ቂቤ አንጓች ዘገባችሁን አንሰማም ፤ ስለ አንዲት ቤተክርስትያናችን ብለን ችግሮችን በብልሀት እንፈታቸዋለን ፤ አይጧን ለመግደል አክንባሎውን አንሰብርም ፤ የስድስት ኪሎ ሀውልት በጣሊያን ወረራ ጊዜ በግፍ ለተገደሉ 30 ሺህ ኢትዮጵያውያን እናት አባቶቻችን የቆመ መታሰቢያ ሀውልት ነው ፤ እናንተ ደግሞ ከሀውልቱ ባልተናነሰ መልኩ ይህች ቤተክርስትያን አንድ እንዳትሆን እንደ ሀውልቱ ቆማችሁባታል ፤ ስለዚህ ዘወር በሉላት ፤ ወሬ መፍትሄ ሲሆን አይተን አናውቅም፡፡

ከወራት በፊት በተሀድሶያውያን ማር ላይ የተቀመጠ መርዝ ቤታችን ውስጥ ይዘው በመግባት ምዕመኑን ግራ አጋብተውት ነበር ፤ ብዙ ደጋፊ እንጂ ያመነ ክርስትያን ባላፈሩበት ሁኔታ እሾህ ሆነውብን ነበር ፤ ይህም ፈተናዋ ነበር ፤ ነገር ግን ጊዜ እውነትን ለያዘ ሰው ፈራጅ ነውና በአሁኑ ሰዓት ከበፊቱ ጋር ስናወዳድረው አንፃራዊ ሰላም በቤተክርስያናች ላይ ሰፍኖ ይገኛል ፤ እነዚህ ሰዎች ተገለሉ ማለት አበቃላቸው ተመልሰው አይነሱም ማለት አይደለም ፤ እንደ ክርስትያን እግዚአብሔር ወደ ልቦናቸው እንዲመልሳቸው የምዕመኑ ፀሎት ሊሆን ይገባል ፤ ነገር ግን ከፀሎት ጋርም ቢሆን ነቅተን ቤተክርስትያናችንን ከመጠበቅ ለአፍታ ያህል መዘናጋት የለብንም ፤ ‹‹ ‹‹እንደ ርግብ የዋህ እንደ እባብ ብልህ ››ነው የሚለን መፅሀፉ፡፡ የአባቶቻችንንም ጉባኤ መሳካት እንደ ክርስትያን እንጂ እንደ ፖለቲከኛ ማሰብ የለብንም ፤ ኢሳት አለን ከምትሉት መረጃ በላይ እኛ ደግሞ አስር እጥፍ በላይ አለን ፤ የጽሁፍ ፤ የድምፅ ፤ የቪዲዮ ሌላም ፤ መረጃው ፍርድ ቤት ይዞ መሄድም አቅቶን አይደለም ፤ ነገር ግን እሳቱን ለማጥፋት እንደ ውሀ የተጠቀምንበት መንገድ ውሀው ቤንዚል ስለሚሆን ለማውጣት አልወደድንም ፤ ይህን መንገድ ብንከተል ሌላ ችግር እንፈጥራለን እንጂ ለቤተክርስትያንም ሆነ ለሀገር ሰላም እንፈጥራለን ብለን አናስብም ፤ መረጃ ቢኖርም አጠቃቀሙን ካላወቁበት ጉዳቱ ስለሚያመዝን አጠቃቀም ላይ ጥንቃቄ መደረግ ያለበት ይመስለናል፡፡ የ1998 ዓ.ም የመስቀል አደባባይ ችግር ሰፊ እና ብዙ መነሻ ሀሳቦች ስላሉት እዚህ ላይ ምንም ማለት አንፈልግም፡፡

እኔ አንድ የምለው ነገር አለኝ እንደ ኢቲቪ ሚዛናዊ ያልሆነ የዜና ማሰራጫ የለም ፤ በአይናችን ያየነውን ፤ በቦታው ተገኝተን የተሳተፍነውን ስብሰባ ኢቲቪ ላይ መልኩን ቀይሮ ሲመጣ በጣም ይገርመኛል ፤ እነሱም የሚዋሹበት አላማ አላቸው ፤ 21 ኢንች ቴሌቪዥን በእነሱ ውሸት ተሸማቆ 14 ኢንች መሆኑን በቀልድ መልክ ሰምተን ልንስቅበት እንችላልን ፤ ይህ የሚያሳየው ማህበረሰቡ  በኤሌክትሮኒክ ሚዴያዎች ላይ ምን ያህል እምነት እንዳጣ እና ለማመንም እንደሚቸገር ጭምር ነው፡፡ አሁን እናንተም ከጀርባችሁ እንደ ኢቲቪ አላማ አስቀምጣችሁ ማህበረሰቡን ሚዛናዊ ባልሆነ ዘገባ ፤ መፍትሄ የማይሆንን አሳብ ዘወትር እያመጣችሁ አታደንቁሩት ፤ ቤተክርስትያናችን ለምታካሂደው አንድነት ጉባኤ እንቅፋት አትሁኑብን ፤ ካቀረባችሁ ሚዛናዊ የሆነ ሁለቱንም ወገን ያማከለ ፤ መፍትሄ ሊሆን የሚችል ፤ ተዓማኒነት ያለው ዘገባ ብታቀርቡ መልካም ነው ፤ ያለበለዚያ ለአላማችሁ ማሳሄጃ የቤተክርስትያንን ጉዳይ እንደ ጥይት አትጠቀሙበት፡፡

ለማህበረሰብ ግን ሚዛናዊ ያልሆነ ዘገባ ማቅረብ በህግም የሚያስጠይቅ ተግባር ነው ፤ ኢሳት በመሰረቱ የመንግስት ተቃዋሚ ጣቢያ ነው ይህን እናውቃለን ፤ ብዙም ሰው በውጩ አለም እንደሚከታተለው እናውቃለን ፤ ግን ኢትዮጵያ ውስጥ ገዥ ፓርቲውን ለመቃወም ሲባል የቤተክርስትያናችንን ስም በሆነውም ባልሆነውም ቦታ ከቶ የወሬ ማጣፈጫ ማድረግ ተገቢ ነው አንልም፡፡ ይህች ቤተክርሰትያን አንድ ብትሆን የመጀመሪያ ተጠቃሚ ሀገረ እግዚአብሔር ኢትዮጵያ ናት ፤ የቤተክርስትያን አንድነት ለሀገር አንድነት ጥቅም እንዳለው ማወቅ የምትፈልጉ ከሆነ የአድዋ ጦርነት ታሪክን ወደ ኋላ መለስ ብላችሁ ብትመለከቱ ጥሩ መረጃ ይሰጣችኋል ብለን እናምናለን ፤ በጊዜው ሰው ለሀገሩ እና ለቤተክርስትያኑ ብሉ ሲዘምት በሊቃነ ጳጳሳት እና አባቶቻንን ከጦርነት ካልተመለሰ ተብሎ የቁም ፍትሀት ተደርጎ ነበር ሀገርን ለማስከበር ፤ ህዝብ ላይ የሚመጣውን አደጋ ቀድሞ በመመልከት ፤ ለሰማዕትነት ወደ ጦር ሜዳ ሲጎርፍ የነበረው ፤ እግዚአብሔርም ሀገሪቱን ሳያሳፍራት ጠላትን ከእግራቸው በታች እንዲንበረከክ አድርጎላቸዋል፤ የአድዋ ጦርነት ጊዜ የቤተክርስትያናችን አስተዋፅኦ እንዲህው በቀላሉ ፅፈን የምንጨርሰው ጉዳይ አይደለም ፤ ለድሉ መበርከት የአንበሳውን ድርሻ የምትወስደው የኢትዮጵያ ኦርቶዶክስ ቤተክርስትያን ናት ፤ ይህ ድል የመጣው በጊዜው የነበረው አንድነታችን ነው ፡፡ አሁንም ለቤተክርስትያን ትንሳኤ አንድነታችንን ለእኛም ለሀገርም እንናፍቀዋለን ፤ ታዲያ አሁን ላይ አንድ እንዳንሆን የምትፈልጉ እናንተ ማን ናችሁ ? ለሚመጣው ትውልድስ ምን ልታስረክቡት ነው አንድነታችን ላይ ጣት የምጠቁሙት ? እኛ ለልጆቻችን በሰው ሀገር ተቀምጠው የመንግስት ተቃዋሚ ሆነው እንዲያድጉ ፍላጎታችን አይደለም ፤ ሀገር አለን ፤ ህዝብ አለን፤ እምነት አለን ፤ አንድ የሆነችን እምነት የቤተክርስትያንን ትምህርት ተምረው ለራሳቸው ፤ ለቤተሰባቸው ፤ ለአካባቢያቸው ፤ ለሀገራቸው ጥሩ ዜጋ ሆነው እንዲያድጉ ነው የምንፈልገው ፡፡ የእኛን ጥፋታችንን ከነ በጎ ስራችን መማሪያ ይሆናቸው ዘንድ መንገር ነው የምንፈልገው ፤ ከእኛ ስህተት ተምረው እነርሱም አደራ ተቀብለው የቤታችን ቀኖና እና ዶግማ ለመጪው ትውልድ እንዲያስተላልፉ እንፈልጋለን ፡፡ይህን ለማድረግ ደግሞ አንድ መሆናችን ግድ ነው፡፡

በሌላ በኩል አዲስ አበባ ውስጥ በየ15 ቀኑ የሚታተሙ መፅሄቶች አንዱ የሆነው ‹‹ላይፍ›› መፅሄት መረጃዎችን በትክክል ሳይቀበል ግራቀኙን ሳይመለከት ‹‹ የሁለቱ ሲኖዶሶች ጉባኤ ያለ ስምምነት ተበተነ›› የሚል ዘገባ አውጥቷል::

‹‹ጊዜ ሊወስድ ይችላል እግዚአብሔር አንድ እደሚያደርገን አንጠራጠርም››  

አንድ አድርገን 

አንድ አድርገን

አንዲት ፡ ቅድስት ፡ ቤተ ፡ ክርስቲያንን ፡ በሚመለከት ፡ ዕለት ፡ በዕለት ፡ የሚታየዉ፦ - የውስጥና ፡ የውጭ ፡ ችግር ፡ - አደጋና ፡ የወደ ፡ ፊት ፡ ስጋት ፡ ምን ፡ እንደኾነ ፡ ኹሉም ፡ የእናት ፡ ቤተ ፡ ክርስቲያን ፡ ልጆች ፡ እንዲያውቁት ፡ የበኩላቸውንም ፡ መፍትሔ ፡ እንዲፈልጉ ፡ ሐሳብ፡ እንዲሰጡ ፡ በክርስትናቸው ፡ የሚጠበቅባቸውን ፡ ሓላፊነት ፡ እንዲወጡ ፡ የክርስቶስን ፡ መስቀል ፡ ለመሸከም ፡ የማይሰቀቅ ፡ ክሣደ ፡ ኅሊና ፡ ኖሯቸው ፡ ለስብከተ ፡ ወንጌልና ፡ ሐዋርያዊ ፡ ተልእኮዋ ፡ መሳካት ፡ ለህልውናዋ ፡ መጠበቅና ፡ ለፍጹም ፡ አንድነቷ ፡ እንዲነሡ ፡ የምታተጋ ፡ ዐውደ ፡ ምጽሓፍ ፡ ወመስተሳትፍ ፡ ናት ።