የቦረና ጉጂና ሊበን ዞን ሀገረ ስብከት ጉዳይ

• የታሰሩ ክርስትያኖች ፍርድ ቤት ቀርበው 11 ቀን የምርመራ ጊዜ ተጠይቆባቸዋል
• የዋስ መብታቸው ተነፍጓቸዋል ፤ የማህበረ ቅዱሳን ታፔላ ተለጥፎባቸው የታሰሩት ይበዛሉ (አባል መሆን ያሳስራል እንዴ?)
• እስረኛ መጠየቅም ያሳስራል ፤  ህጉ ከሚፈቅደው ውጪ ነገሮች  እየሄዱ ይገኛሉ

(አንድ አድርገን የካቲት 19 ፤ 2004ዓ.ም)፡- የቦረና ጉጂና ሊበን ዞኖች ሃገረ ስብከት የክብረመንግስት ከተማ  በ16/06/2004 ዓ.ም ችግር መፈጠሩን ዘግበን ነበር ፤ ይህ በእንዲህ እያለ ፖሊስ የታሰሩትን ክርስትያኖች ቅዳሜ አመሻሹ ላይ ፍርድ ቤት ያቀረባቸው ሲሆን ፖሊስ ጉዳዩን ለማጣራት የአስራ አንድ ቀን ጊዜ ከፍርድ ቤቱ ጠይቆባቸው በእስር ላይ ይገኛሉ፤  ፍርድ ቤቱ የዋስ መብታቸውን ነፍጓቸዋል ፤ ማንም ሰው የታሰሩትን ሰዎች መጠየቅ አይፈቀድለትም ፤ አንዲት እህት በቦታ ላይ ያልነበረች ሁኔታው መከሰቱን ሰምታ፤ ከቤተሰቦቿ ውስጥ የታሰሩ መኖራቸውን አውቃ  ከሩቅ ሀገር በመምጣት የታሰረች እህቷን ለመጠየቅ ስትሞክር ፖሊስ ህግ ከሚፈቅደው ውጪ እሷንም ለ24 ሰዓት አስሯት መቆየቱን ከቦታው የደረሰን መረጃ ያመላክታል ፤ አንድ ሰው ሰውን ለመጠየቅ ሄዶ ሲታሰር ስንሰማ ይህ የመጀመሪያችን ነው ፤ ይህ የሚያሳየው የአካባቢው ፖሊሶች ህጉን ያለ አግባብ እየተረጎሙት መሆኑን ብቻ ነው ፤ ሁሉም ሰው በህግ ፊት እኩል ነው ለነገር ግን በዚህ ቦታ ላይ ይህን ለመመልከት አልቻልንም ፤

በጊዜው በፖሊስነት የተመደቡት የፖሊስ አባላት ፕሮቴስታንቶች እና ሙስሊሞች ሲሆኑ ቤተመቅደስ ውስጥ ከነጫማቸው በመግባት ቀሳውስቱን እና ዲያቆናቱን በዱላ እየወገሩ ሲያስወጧቸው እንደነበር ለማወቅ ችለናል ፤ አብዛኛው ክርስትያን እስር ቤት የገባው የማህበረ ቅዱሳን አባል ናችሁ ተብለው የማህበሩ ታፔላ ተለጥፎባቸው ነው ፡፡ የማህበረ ቅዱሳን አባል መሆን የሚያስጠይቅበት ቦታ ሆኗል ፤ ከዚህም ጋር በተያያዘ ይህ ሁኔታ እንደሚፈጠር ያወቁት ተሀድሶያውያን ከማረሚያ ቤት ፖሊሶች ጋር ቅዳሜ እና እሁድ ሻይ ቡና ሲሉ ከርመዋል ፤ መቼስ ሻይ ቡና እያሉ ስለ ጤንነታቸው እንደማያወሩ እርግጠኞች ነን ፤ እኛ የምንፈልገው ጉዳዩ በአግባቡ ገለልተኛ በሆኑ ፤ ጉዳዩ ላይ እጃቸውን ባላገቡ አካላት እንዲጣራልን ብቻ ነው፡፡ ቤተክህነቱም ጉዳዩን ጉዳዬ ብሎ ይያዘው የሚል መልዕክት አለን ፤ የአካባቢው ክርስትያን በሁኔታው ክፉኛ ልቡ ደምቷል ፤ ህግ አለመኖሩን በአካባቢው ፖሊስ መመልከት ችለዋል ፤ የሚጠቡ የልጆች እናት እህቶቻችንም በእስር ላይ ይገኛሉ ፤ እውነት እኛ ጋር ነው ምንም አንሆንም ፤

ጉዳዩ እዚህ ደረጃ ደረሰበት መንገድ………..

አቡነ ሳዊሮሰ የቦረና ጉጂና ሊበን ዞኖች ሃገረ ስብከት ጳጳስ ሆነው እንደተሾሙ በጊዜው ነገሮች ሁሉ በጎ ይመስሉ ነበር ነገር ግን ቆየት ብሎ እነ አቶ በጋሻውንና መሰል የተሀድሶ አቀንቃኝ ባልደረቦቻቸውን በማስመጣት በእግዚአብሔር ስም የሚጠራበት ፤ ታቦቱ ወጥቶ ምዕመኑን የሚባርክበት ቦታ ላይ አባቶችን፤ ህዝቡንና ቤተክርሰቲያኒቱን ማሰደብና ማስዘለፍ ጀመሩ፡፡ ህዝቡም በአብዛኛው ቅር ሲሰኝ ጥቂቶቹም የሳቸው ተባባሪ መሆን ቀጠሉ፡፡ በተለይ አዲስ በመገንባት ላይ ያለው የመልአኩ የቅዱስ ገብርኤል ቤተክርስቲን ህንጻ አሰሪና ሰበካ ጉባኤ ኮሚቴ (ሁለቱንም ስራ ከህግ ውጭ ለሰባት አመት እየሰሩ የቆዩ)፣ የርሳቸው ጭፍን ደጋፊ ሆነው ተገኙ፡፡ ህዝቡም ሁኔታውን አይቶ እንዳላየ ባለማለፍ ማጉረምረሙን ቀጠለ፡፡ ይህ ሆኖ እያል ሳዊሮስ በግንቦቱ ሲኖዶስ ዝውውር ጠይቀው ወደ ወሊሶ ተመደቡ ፤  (አሁንም እዚያም እያመሱት ነው ፡፡)

እርሳቸው ከመነሳታቸው አንዳንድ መረጃዎች መውጣት ጀመሩ፡፡ ከሀገረማርያም ወረዳ ቤተክህነት ጽ/ቤት ለካህናት ማሰልጠኛ ብለው በርካታ ብር ወስደው በባንክ ቁጥራቸው ማስገባታቸው ተነገረ፡፡የገቢ ወጪ የባንክ ደረሰኝም ተገኘ፡፡ በተመሳሳይ ከሻኪሶ ወረዳም በሰማቸውና በሾፌራቸው ስም ገንዝብ መውሰዳቸው ታወቀ፡፡ አስቡት ራሳቸው የበሉት አልበቃ ብሏቸው በሹፌራቸው ስም የባንክ ቡክ በመክፈት ወደፊት የሚመጣውን ጥያቄ ለመሸሽ የቤተክርስትያን ብር የደረሰበትን ደብዛውን ለማጥፋት ይህን የመሰለ ሴራ ሰሩ ፤ ያን ጊዜ ይህ መረጃ የደረሰው ህዝብ ሆ ብሎ ተነሳና የቤተክርስትያንን ገንዘብ እንዲመለስ ጠየቀ ፤ ገንዘባችንን ይመልሱ ብሎ ደወለ አስደወለ ፤ ውጤቱ ግን ምንም ነበር፡፡  በወቅቱ ስራ አስኪያጅ የነበረው  መጋቤ ጥበባት ሲያምር ተክለማርያም (ዲ/ን) የስላሴ ኮሌጅ ተመራቂ ህዝቡን ወክሎ ጥያቄውን ለጠቅላይ ቤተክህነት አቀረበ፡፡ የማይነካ ነገርም ነካ፡፡ ወዲያው ከሃላፊነቱ ተነሳና ወደ አዲስ አበባ ተዛውሮ በሆነ ማተሚያ ቤት ውስጥ እንዲሰራ ደብዳቤ ደረሰው፡፡ ሌላ ስራ አስኪያጅም መመደቡ ተነጋረ፡፡ ፤ ለዝርፊያ የሚመች ሌላ ሰው ከወደ ወላይታ አካባቢ ብቅ አለ (አቶ ተሾመ ሓይለማርያም) የሚባል፡፡ ይህ ሰው ለኪዳነምህረት ዓመታዊ ክብረ በዓል ቀን ንግስ እንዳይኖር ፤ ቅዳሴ እንዳይቀደስ ከ40 በላይ ሰዎች እንዲታሰሩ ፤ ብጥብጥ እንዲነሳ ምክንያት የሆነ ሰው ነው፡፡

ሕዝቡም የጉዳዩ አመጣጥ ስለገባው (የአቡነ ሳዊሮስ ሴራ እንደሆነ ተረዳ ፤ ሳዊሮስና አባ ጳውሎስ በጣም ወዳጅ ናቸው)፡፡ በዚህ ወቅት አባ ሳዊሮስ ሲዛወሩ የቦረና ሃገረ ስብከት በአዋሳ ላይ እንዲደረብ ተደርጎ ነበር እናም ይህ ጉዳይ ሲነሳ፤ ወዲያው ሐገረ ስብከታችሁ ከባሌ ጋር ተዳምረዋል ተባለ፡፡ በዚህ ጊዜ ባሌ ራሱ ጳጳስ አልነበረውም አቡነ ዮሴፍ ከአውሮፓ አልመጡም ነበር፡፡ ስለዚህ ሆን ተብሎ የሚናገር አባት እንዳይኖረ የተደረገ ስልት ነበር፡፡

ሕዝቡም ነገሩ በገባው ቁጥር ይበልጥ አመረረ፡፡ አንድ ስራ አስኪያጅ የሃገረ ስብከቱ ጰጰስ ለሲኖዶስ ሳያቀርብ አይሻርም አይሾምም፡፡ ስለዚሀ ውሳኔው የቤተክርስቲኒያቱን ስርዓት የጠበቀ ስላልሆን አንቀበልም አለ ፤ ህገ ቤተክርስትያን ሲጣስ እያየን እጅ እና እግራችን አጣጥፈን የምንቀመጥበት ቦታ የለንም ፤ ይህች ቤተክርስትያን የሁላችን ናት ፤ እኛም እንደ ምዕመን ያገባናል ይመለከተናል አለ፡፡ ነገሮች እየከረሩ ሲሄዱ ነገሩን ረጋ ለማድረግ ሽማግሌዎች በህዝቡ መራጭ አማካኝነት ተመረጡ ፤ አዲስ አበባ ከአቡነ ጳውሎስ ዘንዳ ፤ ከጠቅላይ ቤተክህነት ነገሩን አስረድተው መልስ ይዞ ለህዝቡ ለማምጣት ቃል ገብተው ወደ አዲስ አበባ አቀኑ ፤ ከአዲስ አበባ ሲመለሱ ግን ምንም መፍትሄ አላመጡም ነበር ፡፡ የቀድሞው ስራ አስኪያጅም እንዳያስረክብ ህዝቡ አዘዘ፤ ከዚህ በኋላ አቡነ ፊሊጶስ ጠበቃ ቀጥረው ስራ አስኪያጁ በህግ ተከሶ ንብረት እንዲያስረክብ ፍርድ ቤት አቆሙት ፤ ፍርድ ቤትም ሚዛናዊ ያልሆነ ፤ ሁኔታዎችን ያላገናዘበ ውሳኔ ወሰነ ፤ የአካባቢውም ህዝብ ሰላማዊ ሰልፍ በምጣት ውሳኔውን በይፋ ተቃወመ  ፤ ከአቅም በላይ በሆን ምክንያት (ሽማግሌዎቹ ከመንግስት ከፍተኛ ግፊት ነበረባቸው) ንብረት ርክክብ ተደረገ፡፡ በኋላ ግን አንድ ጥሩ ነጥብ ተገኘ፡፡ ፍርድ ቤት ንብረት እንጂ ስልጣን አረካክብ አልተባልኩም አለ ፤ ንብረቱም ተመልሶ ለሃገረ ስብከቱ ንብረት ክፍል እንዲገባ ውሳኔ ተሰጠ ፤ አዲሱ ስራ አስኪያጅ ግን ቢሮ እንዳይገባ ህዝቡ አገደ፡፡ የሃገረ ስብከቱ ሰራተኞች ደመወዝ  ግን ታገደ፡፡

በዚህ መካከል አቡነ ዮሴፍ ከአውሮፓ መጥተው ባሌንና ቦረናን ደርበው ማስተዳደር ጀመሩ ፤ ህዝቡም ዘንድ ቀርበው ቀድሞ የነበረውን ችግሩን ተረዱ፡፡ ለጠቅላይ ቤተክህነት ደብዳቤ ጻፉ ፤ የቀድሞው ስራ አስኪያጅን መርጫለሁ አሉ ፤ የነበረውን ደመወዝም ውዝፍ ከፈሉ፡፡ ህዝቡ እልል አለ፡፡  እልልታው ግን ብዙም አልቆየ ነገሮች ተለወጡ፡፡ ውሃ ቅዳ ውሃ መልስ ሆነና ቦረና ሐገረ ስብከት ሌላ ጳጳስ ተመደበለት ከአሜሪካ (አቡነ እዎስጣቴዎስ) እርሳቸውም ሳይመጡ ቀሩ፤ ሃገረ ስብከቱም እስከ ዛሬ ድረስ ያለ አባት ቀረ፡፡ እኛ ግራ የሚገባን ነገር አባቶች ከሀገረ ስብከት ወደ ሌላ ሀገረ ስብከት ሲመደቡ ቶሎ ስራ የማይጀምሩበት ሁኔታ ነው ፤ ለምን ይሆን? በጊዜው የተመደቡበት ቦታ ላይ ደርሰው ስራ ካልጀመሩ መጀመሪያውኑ መመደቡ ለምን አስፈለገ ?

በዚያን ጊዜ ህዝቡም ከኪሱ ገንዘብ እየከፈለ ለሃገረ ስብከቱ ሰራተኞች ደመወዝ እየሰጠ መስራትን መረጠ፡፡ ለ7 ዓመት ህንጻ አሰሪና ሰበካ ጉባዔ ሆነው ሲበሉና ሲያበሉ የነበሩትን በተመረጡት ሽማግሎዎች አሳሳቢነት አውርዶ ሌላ መረጠ (በቃለ አዋዲው መሰረት ህንጻ አሰሪና ሰበካን በመለያየት)... ትግሉ ግን እየቀጠለ ነው፡፡( የቀድሞው የቅዱስ ገብርኤል ሰበካ ገባኤ ባንክ ሂሳብ በአቡነ ዮሴፍ ተዘግትዋል፡፡ አዲሱ ስራ አስኪያጅ በአቡነ ፊሊጶስ በኩል ከብሄራዊ ባንክ ደብዳቤ አጽፎ ቢመጣም ህዝቡ ፊርማ በማሰባሰብ ለነጌሌ ቦረና ንግድ ባንክ ስራ አስኪያጅ በማስገባት የብሄራዊ ባንክ ደብዳቤን ማሳገድ ችሎ ነበር)፡፡ አሁን አዲሱ “ስራ አስኪያጅ” ከመንበረ ጵጵስና ውጭ በመሄድ ሌላ ወረዳ ላይ ጽህፈት ቤት ከፍቻለሁ ብሎ ስራ ጀምርዋል፡፡ የራሱን ማህተምም በኪሱ ይዞ እየዞረ ደብዳቤ ይጽፋል፡፡ ህዝቡ አሁን በዚህ ጉዳይ ባለው መረጃ መሰረት ይህን ህገወጥ ግለሰብ ለመክሰስ እየተዘጋጀ ነው፡፡ 

እግዚአብሔር ቢፈቅድ ከመጀመርያ አንስቶ እስከ አሁን ድረስ ያሉትን ዋና ዋና የደብዳቤ ልውውጦች ስካን አድርገን ለተሟላ መረጃ ለእርስዎ እናቀርብሎታለን፡፡ 

በሌላ በኩል የእኛን ስም ካላነሱ መጻፍ ያቃታቸው ይመስል አንዳንድ ድህረ ገፆች ከማህበረ ቅዱሳን ጋር የሚደባልቁን ወንድሞቻችን አሉ፤ የእነሱን ስራ መስራት መቻል በየትኛው እድላችን ነው ፤ ለበጎ ስራው አይደለም ማህበሩን እናንተም ጥሩ ስራ ብትሰሩ ረዳቶቻችሁ ነን ፤ ወንድማችሁ እንጂ ጠላቶቻችሁ አይደለንም ፤ ለአንዴ እና ለመጨረሻ ጊዜ እኛ የማህበሩ አባል አይደለንም ፤ ማህበሩ ትልቅ ማህበር ነው ፤ እኛ ስለ ቤተክርስትያን ግድ የሚለን ጥቂት የቤተክርስትያን ልጆች ነን ፤ ማህበርም አይደለንም ፤ ማህበሩ ስለ ራሱ የሚናገርበት የራሱ ድህረ ገፅ አለው  ፤በዮሐንስ ወንጌል 3፤11 ላይ ‹‹የምናውቀውን እንናገራለን ያየነውንም እንመሰክራለን›› ይላል ፤   ሐዋርያት ሥራ 4፤ 20 ላይ ደግሞ ‹‹እኛስ ያየነውንና የሰማነውን ከመናገር ዝም ማለት አንችልም›› ይላል ፤ ስለዚህ እኛ ስለ ቤተክርሰትያን ዝም ማለት አንችልም ፤ እናንተ የምትሄዱበት መንገድ መጨረሻውን ስትደርሱ ታውቁታላችሁ፡፡ እኛን ማመስገንም ሆነ መስደብ ከፈለጋችሁ ‹‹አንድ አድረገን›› ብቻ ብላችሁ መጻፍ ትችላላችሁ ፤ ይህ እውነት ሆኖ ሳለ ባልሰሩት ስራ ፤ ግራ ክንፍ  ፤ ቀኝ ክንፍ ፤ የማህበሩ ድህረ ገፅ ፤ ብሎግ እያላችሁ ስም አትስጡን ፡፡ምዕመኑ የተሻለ መረጃ እንዲኖረው ፍላጎታችነን ነው ፤ በሰሚ ሰሚ ሳይሆን የተጨበጠ ፤ ‹‹አንድ አድርገን›› ፈጣን ፤ ተዓማኒና ለማንም ሳይሆን ለቤተክርስትያን ወግና ትሰራለች ፤ ያልሆነ ስያሜ እየለጠፋችሁብን ሰዎች ዘንድ ድንግዝግዝ ያለ ነገር አትፍጠሩ ፤ እኛን ራሳችንን ውቀሱን ፤ እኛኑ ስደቡን ከሌሎች ጋር አንድ ላይ በማድረግ  መደፍጠጡን ተዉ