አንድ የምንሆንበት ጊዜው የደረሰ ይመስላል

(አንድ አድርገን ፤ የካቲት 6 ፤ 2004 ዓ.ም)፡-የኢትዮጵያ ኦርቶዶክስ ተዋህዶ ቤተክርስትያን በውጭ የሚገኝው በብፁእ አቡነ መርቆርዮስ የሚመራው  ሲኖዶስ እና  በኢትዮጵያ የሚገኝው ቅዱስ ሲኖዶስ መካከል ድርድር ሊካሄድ መሆኑ ተገለጸ፡፡

ድርድሩም የሚካሄደው በሰሜን አሜሪካ አሪዞና ውስጥ ሲሆን ከአዲስ አበባ በብጹ አቡነ ገሪማ(የውጭ ግንኙነት ሃላፊ)፣  የሚመራውና ብጹእ አቡነ ቆስጦስ ፤ ብጹእ አቡነ አትናትዮስ (የደቡብ ወሎ ሃገረ ስብከት ሊቀ ጳጳስ)እና ንቡረእድ ኤልያስ አብርሀ (የአዲስ አበባ ሃገረ ስብከት ሥራ አስኪያጅ) ያሉበት የልኡካን ቡድን ወደ አሜሪካ በማቅናት ውጭ ከሚገኙ በብጹ አቡነ መልከ ጸዴቅ (ዋና ጸሀፊ) የሚመራና ፤ ብጹእ አቡነ ኤልያስ (የአውሮፓ ሊቀ ጳጳስ) ሊቀ ካህናት ምሳሌ(በካናዳ የኢ/ኦ/ት/ቤ/ክ ዋና አስተዳዳሪ)፤  እንግዳ  መላከ ገነት ገዛህኝን (ረዳት ጸሐፊ) ያካተተ ልዑክ ድርድር ለማካሄድ መዘጋጀታቸው ተጠቁሟል፡፡

ብፁእ አቡነ መርቆርዮስ ኢህአዴግ ስልጣን ከያዘ በኋላ ከኢትዮጵያ ወደ ኬንያ በመሰደደድ ወደ አሜሪካ የገቡት በመንግስት ጣልቃ ገብነት እንደሆነ የገለጹ ቢሆንም መንግስት ሲያስተባብል መቆየቱ ይታወቃል፡፡ ይሁን እንጂ የቀድሞ ጠቅላይ ሚንስቴር አቶ ታምራት ላይኔ የአቡነ መርቆርዮስ ከፓትርያርክነት መነሳት ከሀገር መሰደድ ላይ የመንግስት እጅ እንዳለበት ይህንንም እሳቸው ፈርመው በማጽደቅ ድርጊቱን መፈጸማቸውን እና ከእስር ከተፈቱም በኋላም በመንግስት ምክንያት ለሁለት የተከፈለው ቅዱስ ሲኖዶስ ማስታረቅ እንደሚፈልጉ ከ2 ዓመት በፊት የኢትዮጵያ የአሜሪካ አምባሳደር የሆኑት ለዶናልድ ያማማቶ መግለጻቸውን ዊኪ ሊክስ ይፋ ማድረጉ አይዘነጋም፡፡ እውነቱ ከዚህ የራቀ አይደለም ፤ ቤተክርስትያኗ ባለፉት 20 ዓመታት በሁለት ሲኖዶስ ስትተዳደር መቆየቷ ጸሀይ የሞቀው ሀገር ያወቀው ጉዳይ ነው፡፡

አቡነ ጳውሎስም ከውጭ ሀገር ተጠርተው ሐምሌ 5 1984 ፓትርያርክ ሆነው ሲሾሙ የቤተክርስትያኗን ቀኖና በመንግስት ጣልቃ ገብነት እንደፈረሰ በስደት ያሉ አባቶች ቢገልጹም ኢትዮጵያ ውስጥ ያለው ሲኖዶስ ደግሞ አቡነ መርቆርዮስ ነሀሴ 8 ቀን 1983 ዓ.ም በጤና መታወክ ምክንያት ቅዱስ ሲኖዶስ እሳቸውን ስራ እንዲሰራ ጠይቀዋል በሚል አዲስ ፓትርያርክ መሾሙን ገልጸዋል፡፡ ነገር ግን አቡነ መርቆርዮስ እስከ አሁን በጽሁፍ እሳቸው ስለማለታቸው የፈረሙበት ሰነድም ሆነ የድምጽ ማስረጃ የቀረበ የለም፡፡ ቀርቧል የተባለው ነሀሴ 28 ቀን 1983 ዓ.ም ‹‹ዜና ቤተክርስትያን›› ላይ የወጣው ዘገባ ዋቢ በማድረግ ነበር፡፡

 ይህ በእንዲህ እያለ ከረጅም አመታት በኋ ሁለቱን አካላት ወደ አንድ ለማምጣት እና የቤተክርስትያኗን ሰላም ለመጠበቅ በሚል በተደጋጋሚ ድርድር ለማድረግ ጥረት ቢደረግም ሳይሳካ መቅረቱ አይዘነጋም፡፡ይሁን እንጂ ይህን ድርድር ለመጀመር ከሁለቱ በኩል አጀንዳ ተዘጋጅቶ የአዲስ አበባው ልኡክ ቅዳሜ የካቲት 2 2004 ወደ አሪዞና አቅንቷል፡፡

በውጭ የሚገኝው በብጹእ አቡነ መርቆርዮስ የሚመራው ቅዱስ ሲኖዶስ ዋና ጸሀፊ ብጹእ አቡነ መልከ ጸዲቅ እንደገለጹጽ በእነሱ በኩል ለድርድር 5 አጀንዳ ማቅረባቸውን  ይፋ አድርገዋል፡፡

1.      የቤተክርስትያኗን ቀኖና ማን እንዳፈረሰ መተማመን ላይ መድረስ
2.     ጠቅላላ የይቅታ አዋጅ እንዲታወጅ ስምምነት ላይ መድረስ
3.     ከዚህ በፊት በሁለቱም በኩል የተፈጸመው ግዝት እንዲነሳ እና ሁለቱ ፓትርያርኮች ፊት ለፊት ተገናኝተው የቤተክርስትያኗ ቀኖና በሚፈቅደው መሰረት የሚቀጥለው ፓትርያርክ ማን እንደሆነ በውይይት እንዲፈታ
4.     ከላይ የተጠቀሱት ድርርሮች ከተሳኩ የድርድሩ ውጤት በይፋ እንዲታወቅ መንግስት በውጤቱ ለይ ጣልቃ ገብቶ ጫና እንዳያደርግ  ፤ ምዕመኑ እና አባቶች በነጻነት እንዲንቀሳቀሱ
5.     ውግዘት ከእንግዲህ በኋላ እንዲቀር የሚሉ አጀንዳዎች ይፋ አድርገዋል

በብጹእ አቡነ ገሪማ የሚመራው ልኡክ የያዛቸው አጀንዳዎች ይፋ ባይደረጉም ከአጀንዳዎቹ አንዱ ብጹእ አቡነ ጳውሎስ በፓትርያርክነት እንዲቀጥሉ ብጹእ አቡነ መርቆርዮስ ደግሞ የቤተክርስትያኗ የበላይ ጠባቂ እንዲሆኑ የሚል እንደሚገኝበት ከድርድሩ በፊት የሁለቱም ተወካዮች ልኡካን በጋራ ጸሎት እንደሚያደርጉ የውስጥ አዋቂዎች ጠቁመዋል፡፡ እንደኛ እምነት ይህ ድርድር በተሳካ መልኩ የሚጠናቀቀው መንግስት እጁን ካነሳ ብቻ ነው፡፡

የእኛ የምን ጊዜም ህልማችንና ምኞታችንም በሀገር ቤት እና ከሀገር ውጪ የሚገኙትን አብያተክርስትያናት በአንድ ሲኖዶስ እና በአንድ ጳጳስ ስትተዳደር ማየት ነው ፤ በእኛ ጊዜ ያበላሸነውን ስርዓተ ቤተክርስትያን ከአባቶቻችን እደተቀበልነው አስተካክለን ለልጆቻችን የማስረከብ ሀላፊነት የሁላችንም ነው ፤ በዚህ ክፍፍላችን ጠላት ደስ መሰኝት የለበትም ፤ አሁንም ይህን መልካም አላማ ሰንቀው ከአዲስ አበባ ተነስተው አሜሪካን ሀገር አሪዞና ውስጥ የተገኙት አባቶቻችንን አላማቸውን አሳክተው  መልካም ዜና ያሰሙን ዘንድ  የእግዚአብሄር መልካም ፍቃድ ይሁን እንላለን ፡፡

‹‹አንድ አድርገን››