‹‹የማህበረ ቅዱሳን ተቃራኒ›› ማለት ምን ማለት ነው?

ይህ የግሌ አስተያየት ነው ፤ የማንም አቋም አይደለም

(አንድ አድርገን ሚያዚያ 10 2004ዓ.ም)፡- በትላንትናው ቀን ክቡር ጠቅላይ ሚኒስቴር መለስ ዜናዊ ለህዝብ ተወካዮች ምክር ቤት በምክር ቤቱ አባላት በተነሱላቸው ጥያቄዎች መልስ ሰጥተው ነበር ፤ ስለ ሀይማኖት አክራሪነት ላይ በተነሳው ጥያቄ ላይ በተነሳ ጥያቄ ላይ ውሀቢዝምን ካስረዱ በኋላ አንዳንድ የዚህ አይዲዎሎጂ ተከታይ የሆኑ ሰዎችን ‹‹የማህበረ ቅዱሳን ተቃራኒ›› በማለት መስለዋቸዋል ፤ ይህ ምን ማለት ነው? ክቡር ጠቅላይ ሚኒስትር የተረዱት ማህበረ ቅዱሳን የሀይማኖት አክራሪነት የሚያራምድ ማህበር አድርገው ነው የሚያስቡት ፤ ሰው ሀይማኖቱን ሲጠብቅ እንዴት አክራሪ ይባላል? ፤ ከአባቶች የተረከቡትን እምነታቸውን ለቀጣይ ትውልድ ለማስተላለፍ ስራ ቢሰሩ እንዴት የሀይማኖት አክራሪዎች ሊባሉ ይችላሉ ? ፤ ጠቅላይ ሚኒስትራችን የእውቀት ማነስ ከሌለብዎ በስተቀር ይህን ማለት ባልቻሉ ነበር ፤ እኔ በበኩሌ ወሀቢዝም የሚለውን አይዲዎሎጂ በመሰረቱ የገባዎት ራሱ አይመስለኝም ፤ አለማወቅ ሀጥያት አይደለም ነገር ግን አለማወቅን እንደ እውቀት ቆጥሮ ለኢትዮጵያ ህዝብ በምክር ቤቱ ተገቢ ያልሆነ አስተያየት መስጠት ተገቢ አይደለም ፤

ማህበሩን ለማያውቀው ሰው እንዲህ ነው ብሎ ለንግግር ማጣፈጫዎ መጠቀምዎ ተገቢ አይደለም ፤ ከበታችዎ ያሉት ሰዎች እውነቱን ሳይሆን መስማት የሚፈልጉትን ነገር ነው የሚግርዎት ፤ ከወራት በፊት ሳያስቡ የሚናገሩት አቦይ ስብሀት ‹‹ማህበረ ቅዱሳን የቤተክህነት እዳ ነው ›› በማለት ከአንድ የሀገር ሽማግሌ ሊጠበቅ የማይችል ንግግር በአደባባይ ተናገሩ ፤ እኔ በበኩሌ እርጅና ሊሆን ይችላል በማለት አልፌዋለሁ ፤ ሰው ሲያረጅ ወደ ህጻንነት ይመለሳል ይባላል ፤ ይህ ነገር እውነት መሆኑን የዛኔ ነው ያየሁት ? በዚህ አጋጣሚ ጭንቅላት ያለው ሁሉ አያስብም የሚል ጥቅስ በልጅነቴ አንብቤ ነበር  ፤ ለካንስ እውነት መሆኑ የገባኝ ዘንድሮ ነው ፤ ያኛው የትግል አጋርዎ በቅርቡ በውጭ ሚዲያ ሀገራችንን የማይመጥን አሳፋሪ ቃለ መጠይቅ ያደረገው አቶ ታምራት ላይኔ ፓትርያርክ ሸኝቶ ፓትርያርክ ሲያመጣልን ፤ አቦይ ስብሀት ደግሞ መደራጀቱ ያላማራቸው ማህበረ ቅዱሳን ላይ የቃላት ጦርነት ይከፍቱ ጀመር ፤ ቤተክርስትኒቷ ጌታ በወንጌል ‹‹ አይችሉሽም›› ተብላለች ፡፡  

የኢህአዴግ ትልቁ ችግሩ ከ1997 በኋላ ሰዎች ማህበር ሲፈጥሩ አይኑ ደም ይለብሳል ፤ ጥሩ እቅልፍ ላይ ካለም ይባንናል ፤ ፍርሀት ጥሩ ነው ፍርሀቱ ደግሞ ጠርዙን ያለፈ ይመስለናል ፤ ሰው በሀይማኖት ስም ስለ ቤተክርስትያ ብሎ ማህበር ሲመሰርት በሌላ አይን መመልከት ጤነኝነት አይመስለንም ፤ እናንተ ፖለቲካችሁ ላይ ብትበረቱ እኛ ደግሞ እምነታችን ላይ እንበረታለን ፤ ከአባቶቻችን የተቀበልነውን እምነት እና ስርዓት ለልጆቻችንና ለልጆቻችሁ ለማውረስ እንሰራለን ፤ ወሀቢዝም ምን ማለት እንደሆነ ካላወቃችሁት እኛ ልናስረዳችሁ ፍቃደኞች ነን ፤ እናንተ ጋር ካለው አመለካከት እኛ ጋር ያለው መረጃ የሚሻል ሊሆንም ይችላል ፤ ይህን አመለካት ከጥቂት ሰዎች በስተቀር እስከ ጠቅላይ ሚኒስትራችን ድረስ ገብቷቸዋል ብዬ አላስብም ፤ እነዚህ ሀይሎች ሀገሪቱ በእስላማዊ መንግስት እንድትተዳደር የሚፈልጉ ፤ ሙስሊም ማህበረሰቡ ግብር መክፈል ያለበት ለእስላማዊ መንግስ እንጅ ለሌላ አለመሆኑን አጥብቀው የሚሰብኩ በ2020 ዓ.ም በመላው አፍሪካ ላይ አይዲዎሎጂውን በማሰራፋት የእምነቱን ተከታዮችን እንደ ነብያቸው መሀመድ ከተቻለ በስብከት ካተቻለ በሀይል ለማበርከክ ቆርጠው የተነሱ ፤ በቢሊየን የሚቆጠር ዶላር ከአረብ መንግስታት የተመደበላቸው ለአላማቸው መሳካትም ውስጥ ውስጡን ቀን ከሌት የሚሰሩ ሰዎች ናቸው ፡፡ የቀድሞ የአሜሪካን ኢምባሲ አምባሳደር በአገሪቱ ላይ ምን እንደሚሰሩ መረጃ ደርሷቸው ለስቴት ዲፓርትመትን የጻፉት ምልእክት በዊኪሊክስ አማካኝነት ይፋ መውጣቱን አታውቁትም ብለን አንገምትም ፤ ታዲያ እነዚህን በምን ምግባራቸው እና ስራቸው ነው ከማህበረ ቅዱሳን ጋር ያመሳሰሏቸው? ማህበረ ቅዱሳን ክርስትያናዊ መንግስት ለማቋቋም የሚሰራ ተቋም አይደለም ፤ ባይሆን የእምነቱ ተከታዮች በክርስትና እንዲኖሩ የሚጥር ተቋም እንጂ፡፡

ጠቅላይ ሚኒስትራችን የተናገሩት ለእኔ እንደገባኝ  ‹‹እነዚህ ሰዎች የእስልምና አክራሪዎች ናቸው ፤ ማህበረ ቅዱሳንም የኦርቶዶክስ አክራሪ ማህበር ነው›› ለማለት ፈልገው መሰለኝ ፤ ቤተክርስትያንን ስርአቷ መጠበቅ እና ማስጠበቅ ፤ ለቀጣይ ለልጆቻችን እና ለልጆቻችሁ ማስተላለፍ መቻል እንዴት አክራሪ ያስብላል ፤ ስጋችሁ ከነፍሳችሁ ስትለይ ቀብራችሁ እንኳን እንዲደምቅላችሁ ቅድስት ስላሴ ቤተክርስትያን የምትመጡ ሰዎች እኮ ናችሁ ፤ መቼስ ቀብሩ ስለደመቀ መንግስተ ሰማያት የሚገባ ፤ ቀብሩ ስላልደመቀ ሲኦል የሚገባ ነፍስ የለም ፤  

ጠቅላይ ሚኒስትራችን ወደ ኤፌሶን ሰዎች 4፤5 ‹‹አንድ ጌታ አንድ ሃይማኖት አንዲት ጥምቀት፤›› ብለው ጥምቀት በዓል ላይ የሚለብሱ ወጣቶች የሚለብሱት ቲሸርት ላይ የተጻፈው ጥቅስ ሊዋጥላቸው ባለመቻሉ ቅሬታ ያለባቸው መሆኑን በንግግራቸው ማወቅ ይቻላል ፤ ይህን ጥቅስ ማህበረ ቅዱሳን የጻፈው ጥቅስ አይደለም ፤ ማህበሩ ገና 20 ዓመት አልሞላውም ፤ ጥቅሱ  ግን 2000ዓመት አለፈው ፤ ይህ እስከ ህይወታችን መጨረሻ የምንታመንበትና የምናምንበት የወንጌሉ ቃል ነው ፤ በሀገሪቷ ህገ መንግስት አንቀጽ 27 ‹‹የሀይማኖት የእምነትና የአመለካከት ነጻነት›› በማለት ንኡስ አንቀጽ 1 ላይ ‹‹ ማንኛውም ሰው የማሰብ የህሊናና የሀይማኖት ነጻነት አለው ፤ ይህ መብት ማኛውም ሰው የመረጠውን ሀይማኖት ወይም እምነት የመያዝ ወይም የመቀበል መብት›› እንዳለው ይደነግጋል ፤ ይህ ወደ ኤፌሶን ሰዎች የተጻፈው መልእክት ደግሞ ህገ መንግስቱን ይጋፋል ፤ ስለዚህ ይህን ነገር አቶ መለስ ቢቃወሙ እኔ በበኩሌ አልፈርድም ፤ ወንጌሉ ሲጻፍ ሙስሊሞች ፤ ፕሮቴስታንቶች ፤ ካቶሊኮች ፤ አድቬንቲስቶች የሉም የነበርነው እኛ ብቻ ነን ፤ ለዚህ ደግሞ እኛ ዝም ብንል የእነዚህ እምነት መሰረቶቻቸው ምስክሮች ናቸው ፡፡ እኔ ያልገባኝ ነገር  ‹‹አንድ ጌታ አንድ ሃይማኖት አንዲት ጥምቀት፤›› ብሎ ማመን እንዴት አክራሪ ክርስትያን ያስብላል ? ‹‹አልፋና ዖሜጋ፥ ፊተኛውና ኋለኛው፥ መጀመሪያውና መጨረሻው እኔ ነኝ።››ዮሐንስ ራእይ 22፤13  ይላል አንድ ጌታ ብለን እናምናለን ፤ አንዲት እውነተኛ እምነት ኦርቶዶክስ ተዋህዶ ብለን እናምናለን ፤ አንዲት ጥምቀት ብለንም እናምናለን ታዲያ የኦርቶዶክስ አክራሪዎች እንባላለን ? እኛ እኮ እናንተ በአፋችሁ የምትክዱትን በውስጣችሁ የምታምኑትን እምነት ነው የምንከተለው ፤ በርካታ አባላቶቻችሁ የዚች እምነት ተከታይ ናቸው እናውቃለን ፤ወንጌሉ የሚያዘን ‹‹ ንቁ፥ በሃይማኖት ቁሙ፥ ጎልምሱ ጠንክሩ።›› 1ኛ ወደ ቆሮንቶስ ሰዎች 16 ፤13 ታዲያ ሰው በሃይማኖቱ ስለቆመ ፤ በእምነቱ ስለጎለመሰ እንዴት አክራሪ ሊባል ይችላል ?

ባለፈው ጥምቀት ምን ሆነ መሰላችሁ ፤ ጊዮርጊስ አካባቢ የሚገኙ ወጣቶች የጥምቀትን በዓል ለማክበር ሲንቀሳቀሱ  ለመንገዶች ማስዋቢያ የገዙት ባንዲራ መሀሉ ላይ ኮከብ የሌለበት ነበር ፤ ይህ ባንዲራ በተሰቀለ በሰዓታት እድሜ ውስጥ የፌደራል ፖሊስ አባላት መጥተው አማርኛ መናገር የማይችሉ አባላት ፤ ‹‹ባንዲራው ላይ አንባሻ አድርጉበት ወይም አውርዱት አሏቸው››(ይህ አነጋገር ከአንደበታቸው የተሰማው እንጂ የኔ አይደለም) ፤ ወጣቶቹም ‹‹መሀሉ ላይ አንባሻ እድርገን ባንዲራውን አንሰቅልም ›› ፤ ብለው በማውረድ አረንጓዴውን ለብቻ ፤ ቢጫውን ለብቻ ፤ ቀዩን ለብቻ ፤ መሀል ላይ ነጭ ቀላቅለውበት በየስልክንጨቱ በመስቀል በዓሉን ሊያከብሩ ችለዋል ፤ ከ10 ዓመት በፊት የማከብራቸው ጠቅላይ ሚኒስትራችን ባንዲራ ጨርቅ ነው ብለው ሲናገሩ አጨብጭበው ሲያበቁ ፤ አሁን ደግሞ ስለ ባንዲራ ክብር ለኛ ሊነግሩን መጡ ፤ እናት ለልጇ አይነት ነገር …….  እነዚህ ወጣቶች ውስጣቸው የሌለውን ማድረግ አልፈለጉም ፤ እኛም በሀገራችን ላይ 1000 ዓይነት ሀይማኖት መንግስት ህገ መንግስቱን መከታ አድርጎ ቢፈቅድ ‹‹ሃይማኖት ብዙ ነው ፤ ጥምቀት አንዲት ናት›› አንልም ፤ ብለንም አናምንም አናስተምርም ፤ ህገ መንግስቱ በሰዎች አማካኝነት የተጻፈ ነው ፤ እኛ ምናምንበት ወንጌል ግን በመንፈስ ቅዱስ መሪነት የተጻፈ ነው ፤ ስለዚህ ህገመንግስቱን የሚቃረኑ ነገሮች ቢኖሩ እንኳን እርሱን ከመስበክም ሆነ ከማመን ወደ ኋላ አንልም ፤ ደግሜ  ለማስረገጥ ‹‹አንድ ጌታ አንድ ሃይማኖት አንዲት ጥምቀት፤›› የማይዋጥ እውነት ፡፡

ከ20 ዓመት በፊት በራሳችሁ አባል ይችን ቤተክርስትያን ላይ የዶለታችሁላት ነገርን እናውቃለን ፤ ይህች ስለ ሀገር አንድነት ስለቤተክርስያንና እለ ህዝብ ሰላም ዘወትር የምትጸልይ ቤተክርስትያን ላይ ያሰባችሁላት ሴራ ከኛ ጠፍቶ ሳናውቀው ቀርተንም አይደለም ፤ በዓመት 365 ቀን የሚጸለየው ጸሎት እናንተንም እንደሚያካት ብታውቁ ኖሮ እንዲህ ባላላችኋት ነበር ፡፡ እኛ ክርስትያኖች ምናችን ነው ከአክራሪ ሙስሊሞች ጋር ተዛምዶ የነሱ ተቃራኒ ምሳሌ የምንሆነው ? ክቡር ጠቅላይ ሚኒስትራችን አንደበት የሚናገረው ጭንቅላት ውስጥ ያለውን ነው ፤ እኛን በየትኛው ጎራ እንደመደባችሁን ስለነገሩን ሳናመሰግን አናልፍም ፤ ማንም ተናገረው ማን ነገሩን የሰማው ጆሮዬ ነገሩ ከአመለካከቴ ጋር ከተጋጨ እቃወማለሁ ፤ ባልቃወም ነገ ጭንቅላቴ እኔን ይቃወመኛል፡፡

ይህ የአንድ ሰው አስተያየት እንጂ የማንን አለመሆኑን ተረዱልኝ

መቃወም ያለብኝን ያለ መስፈርት እቃወማለሁ

መደገፍ ያለብኝንም እደግፋለሁ ፤

ዛሬ ከማህበሩ ጎን በመሆን እቆማለሁ ፤

ነገ ጥሩ ያልሆነ ነገር ካየሁም ከማህበሩ በተቃራኒ እቆማለሁ ፤

ለእኔ መሰረቴ እውነት ብቻ ናት


Click the following link to see the image of Wahabism in Ethiopia found by Wiki Leaks 
Wahabism in Ethiopia as "CULTURAL IMPERIALISM"