አቶ ጌታቸው ዶኒ በሰላም አልሳካ ሲለው ጉልበት እየተጠቀመ ይገኛል

(አንድ አድርገን መጋቢት 28 2004 ዓ.ም) ፡- በባቦጋያ መድሀኒአለም የቦታ ጉዳይ ላይ ውዝግቡ እንደቀጠለ ነው ፤ ይህን ጉዳይ ዳር ለማድረስ ከቤተክህነት የተላከው አቶ ጌታቸው ዶኒም የመሰሪ ስራውን እያከናወነ ይገኛል ፤ ካህናቱ እና ህዝቡም ከአቋማቸው ሊንቀሳቀሱላቸው አልቻሉም ፤ የአቶ ጌታቸው ዶኒ ሀሳብ ዛሬ መልኩን ቀይሯል ባለፈው እሁድ በአውደምህረት ላይ ያነበበውን ደብዳቤ የተቃወሙትን ካህናት ዛሬ ጠዋት   2 ሰዓት በደብረዘይት መድሀኒአለም ቤተክርስትያን  ሁሉንም በግቢ ውስጥ በፌደራል ፖሊስ አማካኝነት አሳግዷቸው ከቤተክህነት የወረደውን መመሪያ በግድ እንዲቀበሉት እያስገደዷቸው ይገኛሉ ቤተክርስትያኒቱን በታጠቀ ፖሊስ አስከብበው ማንም እንዳይገባ ከልክለው ካህናቶቹን እያስጨነቋቸው ይገኛሉ ፤ እናንተ ናችሁ ህዝቡን የምታነሳሱት ፤  ህዝቡ በቦታው ላይ ምንም አላለም ፤ ህዝቡ ምንም ተቃውሞ የለውም በማለት የቦታው ሽያጭን ተቀበሉ እያሏቸው ይገኛሉ ፤ ዛሬ እስከ 6፡00 ሰዓት ድረስ ቤተክርስያን መግባትም በፖሊሶች አይፈቀድም፡፡

ከቦታው ከታማኝ ምንጭ እንደሰማነው ዲያቆናቱንና ካህናቱን በአሁኑ ሰዓት ሰብስበዋቸው ከሲኖዶስ መጣ የተባለውን ደብዳቤ መሰረት በማድረግ ተስማምተናል ብላችሁ ፈርሙ ብለው  የመንግስት ባለስልጣናት ፤ ከፖሊስ የተወከሉ ሰዎች አቶ ጌታቸው ዶኒን ጨምሮ እየወተወቷቸው ይገኛሉ ፤ ቤተክርስትያኒቱን የሚያገለግሉትን ካህናትን የንስሀ ልጆቻቸውን ቤት ለቤት እየሄዱ እንዲያሳምኑ እና በቦታው ላይ ጥያቄ እንዳይጠይቁ የማድረግ ስራ እንዲሰሩ እያስገደዷቸው ይገኛሉ ፤ ከተሰበሰቡት ካህናት ውስጥ ይህን ለማድረግ ፍቃደኛ አይደለንም ያሉት ፤ ሀሳባቸውንም ያልተቀበሉት ሁለት ካህናት ስብሰባውን ትተው ወጥተዋል ፡፡  

እረ ጎበዝ እንዴት ነው ነገሩ ?  ፍርድ ቤቱ መብታችሁ ነው ፍርድቤት ጉዳዩን በተወካዮቻሁ አማካኝነት ይዛችሁ መምጣት ትችላላችሁ ሲል ከቤተክህነቱ በኩል እየተሰራ ያለው ነገር በጣም አሳፋሪ እየሆነ እየመጣ ነው ፤ ይህ ሰው ለቀናት በደብረዘይት ከተማ ሲሸርብ የነበረውን ነገር ጫፍ ለማድረስ በመንገድ ላይ ይገኛል ፤ በተለያየ ቦታ ላይ የሚገኙ ሰዎች ስለ ቦታው በቂ መረጃ የሌላቸው መሆኑ ደግሞ ሌላ ፈተና ነው ፤ ሁሉም ይህን ጉዳይ በአግባቡ ማወቅ ቢችል መፍትሄ ለመሻት ህገወጦችን ለመቃወም ትንሽ መንገድ ይከፍት ነበር ፤ አሁን ግን እየሆነ ያለው ነገር በእነ አቶ ጌታቸው ዶኒ አማካኝነት ከቤተክህነቱ በተወከሉ ሰዎች ፤ ከሪዞርት ባለቤቱ ጋር በመነጋገር የቤተክርስያኒቱን ሳይሆን የግለሰቦችን መብት ማስከበር ላይ እየሰሩ መገኝታቸው ነው ፤ ቤተክርስትያኒቱ ህጋዊ የሆነ ካርታ እያላት በእጅ አዙር በተደረገ ሴራ 10 ሺህ ካሬ የጥምቀት ቦታውን ልታጣው ጫፍ ደርሳለች ፤ እኛስ ምን ማድረግ አለብን ? አባቶችስ ይህን ጉዳይ ሳያውቁት ቀርተው ነው ወይስ ሰምተው እንዳልሰሙ አልፈው ? ለእኛ ግልጽ አይደለም ፤ ጳጳሳት ተብለው እስከተሾሙ ድረስ ጉዳዩን በአግባቡ ተመልክተው የመፍትሄ አቅጣጫ ማስቀመጥ ይኖርባቸዋል ፤ የእነሱ በነገሮች ላይ የሚያሳዩት ዝምታ ምዕመኑን ግራ እያጋባው ይገኛል ፤ ይህው የዋልድባ ጉዳይ ላይ ቃል እንኳን መናገር አልቻሉም ፤ አባ ሰረቀን ባለፈው ጥቅምት ወር ላይ ለመሾም አስቸኳይ ስብሰባ የጠሩት ፓትርያርኩ በዋልድባ ጉዳይ ላይ ግን ዝም ማለታቸው ሰልፋቸው ከወዴት እንደሆነ እንድናውቅ አድርጎናል ፤ ይህ የደብረዘይቱ ባቦጋያ አካባቢ የሚገኝው  የመድሀኒአለም መሬት ውዝግብ ሲኖዶሱ ሊያውቀው ይገባል ፤ የሚደረገውን ስራም ሊከታተል ይገባዋል ፤ ታዲያ ይህን የመሰለ አንገብጋቢ ጉዳይ ላይ በጊዜው አውቀው መፍትሄ ካልሰጡ ጠባቂነታቸው ጥያቄ ውስጥ የሚገባ ይመስለናል ፤ እኛ የማይመለከተንን ጥያቄ እያነሳን አይደለም ፤ ነገር ግን ጉዳዩን አስጠንተው ተገቢውን መልስ መስጠት ባይችሉ እንኳን ምዕመኑ የሚያደርገውን የቤተክርስትያን ጠበቃነት እንቅፋት ሊሆኑበት አይገባም የሚል እምነት አለን ፡፡ ከሰው መልስ ባናገኝ መድሀኒዓለም መፍትሄ እንዳለሁ አንጠራጠርም፡፡

ባሳለፍነው እሁድ አቶ ጌታቸው ዶኒ ይዞት የመጣውን ስትራቴጂ የሚገርም ነበር ፤ ቀድሞ ከፖሊሶች ጋር በመነጋገር ፖሊሶች በቦታው ላይ እንዲገኙ አስደርጎ ድንገት ከሲኖዶስ መጣ የተባለውን ጽሁፍ በሚያነብበት ጊዜ ችግር ቢፈጠር ፖሊሶቹ ችግር ፈጣሪዎችን አፋፍሰው እስር ቤት ለማስገባት የተዘጋጁ ነበሩ ፤ ከዚህ ቀደም ዱላ ነበር የሚይዙት የባለፈው እሁድ ግን መሳሪያ የታጠቁት ነበሩ ፤ ይህ አካሄድ ጥቅምት 11 2004 ዓ.ም ተሀድሶያውያንን ለመቃወም በወጡት ሰንበት ትምህርት ቤት ወጣቶች እና ተሀድሶያውያን መካከል በተደረገ ጸብ 11 ሰዎች በጊዜው መታሰራቸውን እናስታውሳለን ፤ ምዕመኑ ስለቤተክርስትያን ብሎ የሚሰማውን ስሜት በውስጥ መቆጣጠር ሲያቅተው ለቤተክርስትያን ካለው ቅንአት የተነሳ ምን እንደሚያደርግ ቀድሞ ገብቷቸዋል ፤ ይህንም ነገር ልክ እንደ Advantage ተጠቅመው ህጋዊያን እኛ ነን ጉዳት የደረሰብን እኛ ነን ፤ ለማለት እና ሰዎችን ለማሳሰር ፍርድ ቤትም ለማቅረብ የያዙት የስትራቴጂ መንገዳቸው ነው ፤ አቶ ጌታቸውም ይህችን  ቴክኒክ ተጠቅሟል ፤ በቅርቡ በቦረና እና ጉጂ ዞን ኪዳነ ምህረት ቤተክርስትያን የተፈጠረውን ነገር ጥሩ ማሳያ ይሆናል ፤ 40 ክርስትያኖች ስለ ህገ ወጥ ሰዎች ፤ ቤተክርስትያን የማይወክሉ ሰዎች ላይ ባደረጉት ተቃውሞ መታሰራቸውን ጉዳዩ ፍርድ ቤት ድረስ ሄዶ ግማሹ በነፃ ሲለቀቁ ቀሪዎቹ ደግሞ በፍርድ ሂደት ላይ ናቸው ፡፡ ይህን መሰረት አድርገን እውነት ስለተናገርን የምንታሰርበት ሁኔታ እንዳይፈጠር ነገሮችን ሁሉ በብልጠት እና በብልሀት ማድረግ ተገቢ ነው እንላለን ፤ የጠላትን አሰላለፍ ቀድሞ መረዳት እኩይ ተግባራቸውን ለመዋጋት መልካም ነው፡፡የማቴዎስ ወንጌል 10 ፤16 ላይ እንዲህ ይላ ‹‹እነሆ፥ እኔ እንደ በጎች በተኵላዎች መካከል እልካችኋለሁ፤ ስለዚህ እንደ እባብ ልባሞች እንደ ርግብም የዋሆች ሁኑ።›› 

የስብሰባውን ጫፍ ሲጠናቀቅ እንነግሮታለን ፤፤

እግዚአብሔር አሁንም ቤተክርስትያናችንን ይጠብቅልን