መንግስት ለምን ‹‹ማህበረ ቅዱሳንን›› ጥምድ አድርጎ ያዘው?

ይህ የአንድ ሰው ሀሳብ ነው ፤ የማንም አቋም አይደለም

(አንድ አድርገን ሚያዚያ 17 ፤ 2004 ዓ.ም )፡- መቼስ በባለፈው የክቡር ጠቅላይ ሚኒስትራችን ንግግር ያልተናደደ ቢኖር ማህበረ ቅዱሳንን የማያውቅ ያለበለዚያ በተቃራኒ የቆመ ሰው ብቻ ነው ፤ ማህበሩ ወጥ የሆነ ተጠያቂነትና ግልጽነት ያለው ማህበር ነው ፤ እንደ ጠላት ተደብቆ ስራውን የሚሰራ መንፈሳዊ ተቋም አይደለም ፤ በርካታ በመቶ ሺዎች የሚቆጠር አባላት ያለው ፤ በተቻለው እና አቅሙ በፈቀደ መጠን ቤተክርስትያንን ለመርዳት ፤ የተዘጉትን ለማስከፈት ፤ የሰባኪ ወንጌል ችግር ያለባቸውን መምህር በመመደብ ፤ ለገዳማትና የተቸገሩ አብያተክርስትያናት ፕሮጀክት በመቅረጽ በቋሚነት የሚረዳ ፤ ምዕመኑ በመንፈሳዊ ህይወቱ ጠንካራ እንዲሆን የቤተክርስትያኒቱን መንፈሳዊ ትምህርት ከማስተማሩም በላይ በርካታ አሁን ዘርዝሬ የማልጨርሳቸውን ዘርፈ ብዙ ስራዎችን እያከናወነ የሚገኝ መንፈሳዊ ተቋም ነው ፤ ከወራት በፊት ዲ/ን ዳንኤል ክብረት በማህበሩ ላይ ያለው ተቃውሞ ባነሳበት ጊዜ የብዙዎች መነጋገሪያ ርዕስ መሆኑ የቅርብ ጊዜ ትውስታችን ነው ፤ ይህን የመሰለ አስቸጋሪ ሁኔታም ቢፈጠር ችግሮችን በመነጋገር መፍትሄ በመስጠት በችግር ጊዜ ጥንካሬውን አሳይቷል ፤ መንፈሳዊ ህይወትና ወንጌሉ እንደሚያዘውም በወንድሞች መካከል የተፈጠረውን ቅራኔ ይቅር በማስባባል ያጠፋው ይቅርታ እንዲል ፤ የተበደለውም ይቅርታውን እንዲቀበል አድርጓል ፤ እኛም በሁኔታዎቹ ብናዝንም በስተመጨረሻ ደስ ብሎናል ፤ ፈተና ተቋሙን በሚያናጋ መልኩ ከግለሰብ ሊነሳ ይችላል ፤ ከማህበሩን ከተቃራኒ መንገድ የቆሙ ሰዎች ሊነሳ ይችላል ፤ ከቤተክህነቱም ሊነሳ ይችላል ፤ ከመንግስትም ሊነሳ ይችላል  ፤ እንደ ባለፈው ሳምንት ደግሞ ከጠቅላይ ሚኒስትሩም ሊነሳ ይችላል ፤ ነገር ግን ፈተና በየጊዜው መፈጠሩ ሊያስገርመን አይገባም ፤በዮሐንስ ወንጌል 16፤33 ‹‹በእኔ ሳላችሁ ሰላም እንዲሆንላችሁ ይህን ተናግሬአችኋለሁ። በዓለም ሳላችሁ መከራ አለባችሁ፤ ነገር ግን አይዞአችሁ፤ እኔ ዓለምን አሸንፌዋለሁ።›› ተብሎ ተጽፏል ፡፡ ስለዚህ መከራም ይሁን ፈተና በጌታችን በመድሀኒታችን በኢየሱስ ክርስቶስ እናልፈዋለን እንጂ የሚመጣውን ፈተና ፈርተን ወደ ኋላ አንልም ፤ በፊትም ፈተና ነበር ፤ ዛሬም አለ ፤ ነገም የህይወትን መስዋእትነት የሚጠይቅ ፈተና ሊመጣ ይችላል ፤ ግን ሁሉም እንደ አመጣጡ ያልፋል፡፡

መንግስት ለምን ማህበሩን ጠምዶ ያዘው?

ከ97 ዓ.ም በፊት ነገሮች ሁሉ መልካም ይመስሉ ነበር ፤ መንግስት ሌሎች ሲያደርጉ ተመልክቶ ፤ እኔም ለምን ይቅርብኝ በማለት ዲሞክራሲያው ምርጫ አደርጋለሁ ብሎ ተነሳ ፤ ጥሩ የሆነ ሂደት ያለው የፖለቲካ ቅስቀሳ በመላው ሀገሪቱ ተካሄደ ፤ መጨረሻ ግን ሁላችን እንደምናውቀው ውጤቱ መንግስት እንዳልጠበቀው ስለሆነ የምርጫውን አቅጣጫ የሚያስቀይር ስራ ተሰርቶ ፤ ኮሮጆ ተገልብጦ ፤ ብዙ ሰዎች ሞተው ሁሉም ነገር እንዳልሆነ ሆነ ፤ ከዚህ በኋላ መንግስት የሰራው ስራ ቢኖር ለመሸነፌ ምክንያት ምንድነው? ብሎ በመነሳት ከበታችኛው አመራር ጀምሮ እስከ ላይኛው ባለስልጣናት ድረስ ሂስና ግለ ሂስ ፤ ውስጣዊ እና ውጫዊ ምክንያቶችን ማውጣት ማውረድ ተያያዙት ፤ በርካቶች ላይ ግልጽ እርምጃ በመውሰድ ከመስመር አስወጧቸው ፤ በርካታ መንግስታዊ እና መንግስታዊ ያልሆኑ ተቋማት ለ97 ምርጫ መሸነፍ የራሳቸውን ሚና መጫወታቸው በስመጨረሻ ደረስንበት አሉ ፤ ለመያዶች ህጉ በሀገሪቱ ውስጥ የማያሰራቸው በማድረግ ከጨዋታ ውጪ እንዲሆኑ አደረጓቸው ፤ በዚህ ማህበራትን የማክሰም ስራ በርካቶች የተመሰረቱበትን ፍቃድ በግልጽ ፍቃዳቸውን መለሱ ፤ በዚህ ጥናት ወቅት ‹‹ማህበረ ቅዱሳን›› ለመሸነፋችን አንዱ ምክንያት ነው የሚል የውስጥ አቋም ያዙ ፤ ይህን የምነግራችሁ ሂደቱን ስለማውቅ ነው ፤ በምን መስፈርት ሚዛን ላይ ‹‹ማህበረ ቅዱሳንን›› አስቀምጠውት ይህን ሊሉ እንደቻሉ አላውቅም ፤ የህልውና ጉዳይ ስለሆነም የፈለጉትን ቢሉ ተሳስታችኋል ማለት የማይቻልበት ደረጃ ላይ ነበርን ፤ ማህበሩ የተቋቋመበት መንገድ ለማፍረስ ቢፈልጉ ቀላል እንደማይሆን ሌላ ጥያቄ እንደሚያስነሳ ስለተገነዘቡ በውስጥ እና በውጭ አካሄዱን መከታተል ተያያዙት ፤ አንድ ነገር ርግጠኛ ሆኜ መናገር የምችለው ማህበሩ የሚያወጣቸው መጽሄቶች ፤ ጋዜጦች ፤ ሲዲዎች እና የድረ-ገጽ ጽሁፎች ከመንግስት ሰዎች አምልጦ አያውቅም(ተጠንቅቆ መስራ ግድ ነው) ፤ የፈለጉበት ቢሮ ቢገቡ ህትመቶቹን አያጧቸውም ፤ የሚጽፉቸው መንፈሳዊ ጽሁፎች ሁላ የሚታዩበት መነጽር ለየት ያለ ነው ፡፡

ባለፈው ዓመት በአቡነ ሳሙኤል የተጻፈው ‹‹እውን የሀይማኖት መቻቻል አለን? ›› የሚል ባሳተሙት መጽሀፍ እውታውን ስላወጡ መንግስት በፊት ለፊትም ሆነ በቤተክህነቱና በአቡነ ጳውሎስ  በኩል ያሳደረባቸው እና እያሳደረባቸው ያለው ተጽህኖ ማየት ብቻ በቂ ነው ፤ አቡነ ጳውሎስንም እተቀየሟቸው ወደው አይደለም ባይሆን ጸልዩላቸው ፡፡ በተጨማሪ በርካታ ኦርቶዶክሳውያን በጅማ ሲጨፈጨፉ ሁኔታው በሲዲ እንዳይወጣ ክርስትያኑ በአግባቡ እንዳያውቀው ፤ ተደባብሶ እንዲያልፍ መንግስት በሰዎች እና ማህበሩን በመሰሉ ማህበራት ላይ ያሳደረውን ተጽህኖ ማየት ብቻ በቂ ነው ፤ እኛ እኮ ሰው እንግደል አላልንም ፤ ባይሆን የተደረገውን ነገር ለህዝበ ክርስትያኑ ይወቀው ነው የተባለው ፤ በጊዜው የ6ወር ህጻን የእናትበጡት ያልጨረሰ ልጅን ትታ የተሰዋች እናት ነበረች ፤ ከዓመት በኋላ ልጁን አንድ መነኩሴ ጋር አግኝቼው ታሪኩን ነግረውኝ እጁን ስጨብጠው ሰውነቱ ውስጥ አጥንት ያለ አይመስልም ነበር ፤ ስጨብጠው የተሰማኝን ስሜት ለእናንተ በቃላት መግለጽ አልችልም ፤ የእናት ጡት በአግባቡ ስላላገኝ ፤ እናቱም ስለሞተችበት እጅጉን ምግብ እንዳስቸገራቸው በጊዜው ካገኝኋው አባት ማወቅ ቻልኩኝ ፤ በጣም አዘንኩኝ ፤ ግን የመፍትሄ ሰው ባለመሆኔም በራሴም ክፉኛ አዘንኩኝ ፤ በጊዜው ይህን ችግር ህዝቡ እንዳያውቀው መንግስት እንቅፋት ሆኖ ተነሳ ፤ ፖለቲካው ላይ ችግር እንደሚያመጣ ይታወቃል ፤ ነገር ግን እውነት ስለሆነ ‹‹ሰው ማውቅ አለበት የመፍትሄም አካል መሆን አለበት›› የሚል የከረረ የግል አቋም ነበረኝ፡፡ የሞቱትን መመለስ ባይቻል እንኳን ነገ ይህን መሰል አደጋ እንዳይከሰት ማድረግ በተቻለ ነበር ፡፡ 

የ97 ምርጫ ላይ ልክ እንደ አንድ ነጥብ የተያዘበት በጊዜው ማህበሩ 13 ዓመት ሙሉ በርካታ ሰዎች  በእምነት እንዲኖሩ ከሰንበት ትምህርት ቤት አንስቶ እስከ ዩኒቨርሲቲ ተቋማት  ያለው ኔትወርክ ከላይ አንስቶ እስከ ወረዳ ደረጃ ድረስ ሰፊ ግንኙነት መኖሩ መረጃዎችንም በቀላሉ ይወርዳሉ ብለው በማሰባቸው በተለየ አይን እንዲታይ አድርጎታል ፤ መንግስት በ14 ዓመት ውስጥ በሀገሪቱ ላይ ሊሰራ ያልቻለውን ስራ ማህበሩ በጥቂት ጊዜያት መስራት ችሎ መታየቱ ለእነርሱ ጥሩ አጋጣሚ አልነበረም ፤መንግስት ተቃዋሚ ፓርቲዎች(ቅንጅት ነፍስ ይማር) ‹‹ማህበረ ቅዱሳን›› የዘረጋውን ኔትወርክ ለአላማቸው ማስፈጸሚያ ተጠቅመውበታል የሚል አቋም ነበረው ፤ ይህ ግን የፖለቲከኞቹ  የተሳሳተ ግምት እንጂ እውነታው የመንግስት አቅም ማነስና ህዝብን ያለማድመጥ መሰረታዊ ችግር ነበር  ፤ በጊዜው በየመድረኩ ያጨበጨበ ሁላ ደጋፊ መስሏው ነበር ፤

ምርጫው አልፎ ነገሮች ወደ መስመራቸው ከተመለሱ ከዓመታት በኋላ የመንግስት ባለስልጣን አቶ አቦይ ስብሀት በማን አለብኝነት በነጋድረስ ጋዜጣ እና በተለያዩ መጽሄቶች ላይ ‹‹የኦርቶዶክስ ጳጳሳቱ አይረቡም ›› ‹‹ማህበረ ቅዱሳን የቤተክህበት እዳ ነው›› በማለት በፊት የቋጠሯትን ቂም ግልጽ አድርገው በሚዲያ ተናግረዋል ፤ እኔ እንደ አንድ አማኝ በጊዜው በጣም ተናድጄ ነበር ፤ በመሰረቱ አይደለም አቦይ ስብሀት ጠቅላይ ሚኒስትሩም ቢሆኑ ያለ አግባብ አይደለም አንድን ትልቅ ማህበር ያለመረጃ ይቅርና ግለሰብን የመናገር መብት የላቸውም (ይህ በእኛ ሀገር ደረጃ አይደለም) ፤ ነገር ግን ሙልጭ አድርገው የሺዎችን ማህበር የማይገባውን ስም በመስጠት ሲናገሩ ማንም እረፉ ያላቸው ሰው አልነበረም ፤ እኛም ባለስልጣን ለመቃወም የሚበቃ ወኔ አልነበረንም አሁን የለንም ፤ ይባስ ተብሎ ሰው ዘንድ እንዲደርስ ምዕመኑ ለማህበሩ መልካም አመለካከቱ እንዲቀየር የስትራቴጂ ስራ በመስራት ሰው አንቅሮ እንዲተፋው ያልተሳካ ስራ አከናውነዋል ፤ ግን አልተሳካላቸውም ፤ በዚች አጋጣሚ ‹‹ደጀ-ሰላም›› በጊዜው የጻፈውን ጽሁፍ ሳላደንቅ አላልፍም ፤ አቦይ ስብሀት ማለት የወረደ ብቻ ሳይሆን የዘቀጠ አመለካከት ያላቸው ሰው መሆናቸውን ‹‹የጋዜጠኛው ማስታወሻ›› ጸሀፊ ተስፋዬ ገ/አብ ነግሮናል ፡፡

ሰውየው ጤነኛ ናቸው ብሎ መናገር ይከብዳል ፤ እኔ በበኩሌ አህያ ቢፈሳ አፍንጫ አይያዝም ብዬ አልፌዋለሁኝ ፤ ከአመታት በፊት ኤርትራ ከተገነጠለች በኋላ ኢህአዴግ ግንቦት 20ን ሲያከብር ሰውየው ሁለት ልጆቻቸውን ‹‹ነጻ ኤርትራ›› ‹‹FREE ERITREA›› የሚል ጽሁፍ ጽፈው መስቀል አደባባይ ከፍተኛ የመንግስት ባለስልጣናት ባሉበት ቲሸርት አስለብሰው መድረክ ላይ ያወጡ ሰው ናቸው ፡፡ ይህ ጤነኝነት ነው ይላሉ ? ይህ ነገር ሀገር መናቅ ነው? ህዝብ መናቅ ነው ? ወይስ ምንድነው ? ስለዚህ ይህን ነገር ያደረገ ሰው ስለ ‹‹ማህበረ ቅዱሳን›› አፉን ቢከፍት ለኔ ምኔም አይደለም ፤ እንዴትስ አድርገን ልናምን እንችላለን ፤ በማህበረሰቡ ዘንድ ተሰሚነት ያለው ሰው ፤ ስብእናው ኢትዮጵያዊነት የተላበሰ ፤ አንቱ ሊባል የሚችል ሰው ቢሆን ኖሮ በርካቶች በተሰናከሉ ነበር ፤ ግን አይደለም ፡፡ ይችን ክፍተት በመጠቀም ተሀድሶያውያኑ የአቦይ ስብሀትን ቃል ለመጽሀፍ አርዕስት አድርገው የዲ/ን ዳንኤል ክብረትን 20 ገጽ ማህበሩ ላይ የጻፈውን ወቀሳ አንድ ላይ በማድረግ መጽሀፍ መጻፋቸውን እናስታውሳለን ፤ የመጽሀፉ ስም ‹‹ማህበረ ቅዱሳን የቤተክህነት እዳ›› የሚል ነበር ፤ ጠላትም አንዳንዴ ጥሩ ነው ምን ያህል እንደተኛን ያመላክተናል ፤ ምን ያህል መስራ እንዳለብንም ትምህርት ይሰጠናል ፤ በጣም የሚገርመው ነገር መጽሀፉን እኔ ለራሴ ‹‹ደሞ ምን አሉ›› በማለት ምን እንደተጻፈ ለማወቅ ገዝቼው ነበር ፤ ከዚያ በኋላ ግን ይህን መጽሀፍ እንደ አቶ በጋሻው ደሳለኝ ሲዲ ቅዳሜ ቅዳሜ ሙሉ ወንጌሎች በር ላይ ሲሸጥ ነበር ፤ በርካታ መናፍቃንና ተሀድሶያውያን መጽሀፉን በእጃቸው ላይ መመልከት ችዬ ነበር ፤ አስቲ አስቡት ሰዎች ምን ያህል ጊዜያቸውን ወስደው ማህበሩን ለማጥፋት ምን ያህል ርቀት እንደሚጓዙ ? ለምንስ መጽሀፉ ሙሉ ወንጌላውያን እና መሰል ተመሳሳይ መናፍቃን ሊገዙትና ሊያነቡት ቻሉ ? የኛ ጉዳይ ለነሱ ምናቸው ነው ? ለኔም የገረመኝ ነገር ነው፡፡ እነርሱ ይህን ካደረጉ እኔም ለምን እንደሚያነቡ ማወቅ አለብኝ የማለት ሀሳብ ውስጤ አደረብኝ ፡፡

ይህን ነገር ለምን እንዳደረጉ ለማወቅ ሰዎች ጋር ቀርቤ እነሱን መስዬ ለማነጋገር ሞክሬ ነበር ፤ እነርሱ እኛን መስለው እንደተጠጉን እኔስ እነርሱን መስዬ አልጠጋቸውም ? ይህን ስራ ስሰራ ያወኩት ሰው እኔም የነርሱ ዘመድ መናፍቅ መስዬው የሚያውቀውን ነገር እንዲህ አለኝ  ፤ ‹‹እነርሱ አያውቁትም እንጂ በመቶዎች የሚቆጠሩ  የማያውቋቸው ሰዎች መሀላቸው አሉ ሲለኝ›› ልቤ ደው ድው እያለ ይመታ ነበር ፤ እነርሱ የተባልነው እኛ ‹‹ኦርቶዶክሳውያን›› ነን ፤ እኛ ዛሬ ላይ ተነስተን ‹‹አሰግድ ሳህሉ›› መናፍቅ ነው ስንል መረጃዎቻችሁን አቅርቡ ይባላል ፤ መረጃችንን ስናቀርብ ሌላ ነገር ይላሉ ፤ እነዚህ ሰዎች ተሀድሶ ናቸው ስንል ሌላ ነገር ይሉናል ፤ እኛ የማናውቃቸው በጣም ብዙ መቶዎች የሚቆጠሩ መናፍቃን ቤተክርስትያኒቱን ለማፍረስ ከሚገነቧት ጋር አብረው ቆመዋል ፤ እኛ ስለምናውቃቸው ሰዎች ብቻ እንከራከራለን እኛ የማናውቃቸውን እርሱ አንድ አምላክ ስለ ‹‹አንዲት እምነታችን›› እና ስለ ‹‹አንዲት ቤተክርስትያን›› ብሎ ክፉ ስራቸውን ይያዝልን ፡፡ እውነቱን ነው እኛ አናውቃቸውም እንጂ እነርሱ ግን ያውቁናል ፤ እስኪ ስንት ድረ-ገጽ ከፍተው እንደሚሰሩ ተመልከቷቸው ? የኛ ከምንለው እና ከምናነበው ድረ-ገጽ የነርሱ ብሎግ እና ድረ-ገጽ ይበልጣል እኮ ፤ ብዙዎቹ ያልጠነከሩት በነርሱ ስራ ማንን እንመን በማለት ላይ ይገኛል ፤ ፍሬውን ከእንክርዳዱ ምዕመኑ እንዳይለይ የራሳቸውንም ሆነ ቤተክርስትያኒቱን የሚወክሉትን ድረ-ገጾች እውነተኛ ለመባል ሊንክ ፈጥረው አስቀምጠውናል ፤ የእኛን አድራሻ ‹‹አባ ሰላማ›› የሚባለው ገጽ ላይ በማየታችን በጣም ተገርመናል ፤ እኛ ከእነርሱ ጋር አንድ የሚያደርገን ምንም አላማ አንድነት የለንም ፤ እነርሱ ግን በመመሳሰል ስለሚያስወጧቸው ነፍሳት በማሰብ ይህን ሊያደርጉ ችለዋል ፤ ቤተክርስትያኒቱን ትተው ለምን ‹‹ማህበረ ቅዱሳን›› ላይ ብቻ እጃቸውን ይጠቁማሉ ? ‹‹ማህበሩ ከተበተነ ሌላው ገለባ ነው›› በማለት የሚሰሩ ይመስለኛል ፤ ደግሞም እውነት ነው ፤ አሁን ምዕመኑ በማህበሩ ስር በአንድ ላይ ሆኖ ባይቆም ኖሮ ምን ሊከሰት እንደሚችል አስበውት ያውቃሉ ? የህ ነገር ብዙ ያስብላል ስለዚህ ወደ ቀደመ ነገሬ ልመለስ..

የአቦይ ስብሀት አነጋገር ሲገርመን ፤ ባለፈው ሳምንት ደግሞ አቶ መለስ ኦርቶዶክሳዊ  አክራሪ የሚል ትርጉም ያለው ነገር መናገራቸው በጣም አስገርሞናልም ፤ እና ንግግራቸውን ተቃውመን ሰዎች ሰምተው እንዲቃወሙ በር ከፍተናል ፤ ስለዚህ መንግስት ለማህሩ ጥሩ ነገር የለውም ፤ ቢኖረውም ባይኖረውም እና ምንም መስሎ አይታንም ፤ ቤተክርስትያን ላይ የሚደረገውን ጥሩ ያልሆነ የማይጠቅምና የፖለቲካ ትርፍን መሰረት ያደረገን ነገር  ከመቃወም ግን ወደ ኋላ አንልም፡፡

እኛ ‹‹አንድ ሀይማኖት አንዲት ሀገር›› ብለን እናውቃለን?           

እኛ የኦርቶዶክስ እምነት ተከታዮች   ‹‹አንድ ሀይማኖት አንዲት ሀገር ብለን እናውቃለን?›› አይመስለኝም ፤ ቤተክርስትያንም ‹‹ይህችን ሀገር ክርስትያን ብቻ ይኑርባት›› ብላ አታስተምርም ፤ በዚች  ነገር ሌላ ጥቅም ለማግኝት የማጠጋጋት ስራ የተሰራ ይመስለናል ፤ ወደ ኤፌሶን ሰዎች 4፤5 ‹‹አንድ ጌታ አንድ ሃይማኖት አንዲት ጥምቀት፤›› ነው የሚለው የወንጌሉን ቃል  የጥምቀት ወጣቶችም ይህን ነው የለበሱት ፤ መንግስት ህገ መንግስቱን ተጋፋ የሚለው ‹‹አንዲት እምነት›› የሚለው ነገር ነው ፤ ‹‹እንዴት ከ80 በላይ ብሔር ያለባት ኢትዮጵያ እና በርካታ የእምነት ተቋማት ያላት ሀገር ላይ የኦርቶዶክስ  እምነት ተከታዮች ይህን ነገር ያራምዳሉ ››የሚል ሀሳብ ነው ያለው፤ መንግስታችን ስለ ለብሔር ብሄረሰብ ነጻነት የቆመ ስለሆነ ይህ ነገር አይዋጥለትም(አታስቁኝ ልጻፍበት..ቂቂ) ፤ ህገ-መንግስቱ መግቢያ ላይ ‹‹ የግለሰብና የብሔር ብሔረሰብ መሰረታዊ መብቶች መከበራቸው ፤  ኃይማኖቶች ካለአንዳች ልዩነት እንዲራመዱ የማድረግ አስፈላጊነት ጽኑ እምነታችን ነው…›› በማለት ይዘረዝራል    ይህንም የቲሸርት ጽሁፍ ማህበሩ የሚሰራው መስሎ ይታየዋል ፤ ግን እንደ እኛ እምነት አንዲት ንጽህት እምነት‹‹ኦርቶዶክስ ተዋህዶ›› መሆኗን ከመናገር ወደ ኋላ አንልም ፤ እንደ እኔ እንደ እኔ ይህ አቋማችን ይሆናል ሌሎችን ብስጭት ውስጥ ከቷቸው ጥያቄ እንዲያቀርቡ የሚያደርጓቸው ፤ እና እኛ ምን እናድርግ ፤ ሰዎች ደስ እንዲላቸው ብለን የወንጌሉን ቃል አንቀይር ፤ የአምላክን ቃል አናጥፍ ፤ የማይዋጥ እውነት ቢመስላቸውም ይዋጡት ፤ ይህ የጥምቀት በዓል በርካታ ነገሮችን አሳይቶናል ፤ ታቦታቱ በየአካባቢያቸው የጥምቀትን በዓል ያክብሩ በማለት ጃልሜዳ የሚሰበሰበውን ምዕመን የመከፋፈል ስራ ለመስራት ታስቦ ነበር(ካላወቁት) ፤ ይህም ‹‹ለጸጥታ ሲባል›› በሚል ምክንያት ተቀምጦለት ነበር ፤ እንደ ሰው ሀሳብ ሳይሆን እንደ አምላካችን ፍቃድ እስከ አሁን ጃልሜዳ እያከበርን እንገኛለን ፤ ከሁለት ዓመት በፊት በጎንደር ካርኒቫል የሚባል ነገር ከጥምቀት በዓል ጋር አስታከው ገቢ ማሰባሰቢያ በማድረግ የበዓሉን ይዘት ላይ ቀጥተኛ ተጽህኖ ከመፍጠራቸው በላይም ታቦታቱ ከጥር 4 አንስተው ቀስ እያሉ ቢወጡ የሚልም ሀሳብ ላይ ተወያይተው ነበር ፤ በጊዜው ተቃውሞ የበዛበት የጎንደር ባህልና ቱሪዝም ሁኔታው እንዳልተፈጠረ ስብሰባ በማድረግ ኦፊሺያል የሆነ ደብዳቤ ለ‹‹አንድ አድርገን›› ብሎግ ልኳል ፡፡ እኛ ይህን ደብዳቤ  የተመለከትነው የጻፍነው ጽሁፍ በርካቶች ጋር ደርሶ በአካል ሄደው ጥያቄ ማቅረባቸውንና ውጤትም ማምጣቱን ጭምር ነው ፤ የእኛም መነሻ ግባችን ምዕመኑ ለችግሮች መፍትሄ እንዲሆን መረጃዎችን በጊዜ ማቅረብ ነው ፤ ሌላ አንዳች ነገር ከበስተጀርባችን አለመኖሩን በአምላካችን ስም እንምላለን ፤ የጥምቀት ነገር ከተነሳ ስለማያልቅ ስለሆነ ልተወው…

‹‹አንድ ጌታ አንድ ሃይማኖት አንዲት ጥምቀት፤›› የሚለውን የወንጌል ቃል ህገ መንግስቱን ስለሚጋፋ ብቻ እናንተን ደስ እንዲላችሁ መቀየር አንችልም ፤ የጌታችን ቃል የሚታጠፍ አይደለም ፡፡ ይህን ነገር ሲያስረግጥልን ‹‹ሰማይና ምድር ያልፋሉ ቃሌ ግን አያልፍም።›› የማርቆስ ወንጌል 13፤31 ታዲያ እኛን ምን አድርጉ ትሉናላችሁ ? በመጽሀፍ ቅዱስ አትመኑ ማለት አንድ ነገር ነው ፡፡ በተጨማሪ ጠቅላይ ሚኒስትሩ ‹‹ይህን ነገር የሚያራምዱ ወጣቶች ህገ መንግስቱ ያልገባቸው በትምህርት የሚመለሱ ናቸው›› ብለዋል ፤ እኛ ግን ያልገባዎት እርስዎ ኖት ባዮች ነን ፤ ወጣቶቹ ህገመንግስቱ ባይገባቸው ወንጌሌ ግን ገብቷቸው ታቦታቱን ለማጀብ በረከትም ለማግኝት ‹‹አንድ ጌታ አንድ ሃይማኖት አንዲት ጥምቀት፤›› የሚል ቲሸርት ለብሰው ሊታዩ ችለዋል ፤ ይባስ ብለው ‹‹ይህ አክራሪነት በእንጭጩ ሊቀጭ ይገባዋል ፤ ይህ አመለካከት አፈር መብላት አለበት›› በማለትም አክለዋል ፤ ምኑ ነው አክራሪነት ? እስከ አሁን እኛ ነን ከአፈር ተፈጥረን ወደ አፈር የምንመለስ ሰዎች ነን፤  የአምላካችን ቃል ግን እርስዎ እንደሚያስቡት አይደለም ፤ አመለካከቱም በፍጹም አፈር አይለብስም ፤ ቀድሞ ማን አፈር እንደሚለብስ እናያለን ፤ ቃሉ ከ2000 ዓመት በላይ አሳለፈ ፡፡ አሁንም እርስዎ ያልተዋጠልዎን የወንጌል ቃል ‹‹አንድ ጌታ አንድ ሃይማኖት አንዲት ጥምቀት፤›› ፤ ጌታ ያልነው ‹‹ጌታችን መድሀኒታችን ኢየሱስ ክርስቶስ ነው ፤ አንዲት እምነት ያልናት እኛ የምንገኝባትበ ‹‹ኦርቶዶክስ ተዋህዶ›› ፤ አንዲት ጥምቀት ያልናት ደግሞ ‹‹እኛም እናንተም በ40 በ80 የተጠመቅናት ፤ የስላሴ ልጅነትን ያገኝንባት ጥምቀት›› ናት ….. ሌላ ምንም የምለው የለኝም.. ከተሳሳትኩኝ ለመታረም ዝግጁ ነኝ፡፡

ባለፈው ወር አንድ ሙስሊም ‹‹መጅሊስ አይወክለኝም›› የሚል መልእክት ያለው ጽሁፍ አድርጎ ፖሊስ ይዞ አዲስ ከተማ ፖሊስ ጣቢያ ነበር ያስገባው ፤ ወዲያው ከ20 የሚበልጡ ወጣቶች አንድ አይነት ተሸርት ለብሰው እኛንም እሰሩን ‹‹መጅሊስ አይወክለኝም›› ሲሏቸው ፖሊሶች የታሰረውን ወጣት ሊፈቱ ችለዋል ፤ ይህ ወጣትም አክራሪ ተብሏል ፤ ይህ ግን ለነገሮች ካለን የተዛባ አመለካከት እንጂ በሌላ አይደለም ፤ ሙስሊም ወንድሞቻችን ሁሉ አክራሪ አይደሉም ፤ የነሱን ጥያቄ ህገ - መንግስቱን መሰረት ተደርጎ ቢመለስላቸው ህዝቡም ባልተነሳሳ ነበር ፤ ለጥያቄዎች በአግባቡ መሰረታዊ የሆነ መልስ መስጠት ሲያቅተው አማኙ ላይ ደስ ያለውን ስም መለጠፍ አግባብ አይደለም ፤

የጥምቀት ወጣቶች በለበሱት ቲሸርት በፓርላማ ላይ እንዴት ‹‹ይህ አክራሪነት በእንጭጩ ካልተቀጨ ብለው ›› አስተያየት ይሰጣሉ ፤ የሚገርመው ነገር ግን ይባስ የእምነቱ ተከታይ ለእምነቱ ያለው አመለካከት እንዲጨምር ያደርገዋል ፤ ይህ ደግሞ ለኛ መልካም ነው ፤ ካለ ልፋት ሀይማኖቴን እንዲል እየገፋችሁት ነው ፤ የሚፈለገውም ይሄ ነው ፤ ይህ ሲገርመን አቡነ ጳውሎስ እና ሌሎች የሀይማኖት አባቶቻችን ቁጭ ብለው ጠቅላይ ሚኒስትሩ ሲናገሩ ሰምተው ሲያበቁ መውጣት መቻላቸው ነው ፡፡

እኔ ጃንሜዳ  ለበርካታ ጊዜያት በዓል አክብሬአለሁ ፤ አንድም ጊዜ ወጣቶች ከመጽሀፍ ቅዱስ ጥቅስ ውጪ ስጋዊ ፍላጎታቸውን መሰረት አድርገው ሌላውን የእምነት ተከታይ ለማናደድ ሲባል ጥቅስ ሲጽፉ አላየሁም ፤ እኔ በበኩሌ ያልሆነ ነገር ከስርአተ ቤተክርስትያን ውጪ ብመለከት ማንም ይሁን ማን የመጀመሪያ ተቃዋሚ ነኝ ፤  ጠቅላይ ሚኒስትሩ ሲናገሩ ሁሉንም የሚመለከት ጉዳይ ለማድረግ በመሞከር ከአንዳንድ ሙስሊሞች ጋር የሚያያዘውን ‹‹አክራሪነት›› ወደ እኛ በመግፋት ሚዛናዊ ዘገባ ላቅረብ በማሰብ ይመስለኛል፡፡

ብሎጋችን አሁንም እንደተቆለፈ ነው ፤ ብዙ የመናፍቃን ብሎግ በሚሰራበት ሰዓት የኛ በመዘጋቱ ምንም አይመስለንም ፤ ለዚያውም የምንጽፈው ጽሁፍ የምንልከው መረጃ ለማዘጋት የሚያደርስ ከሆነም መልካም ነው ብለናል ፤ ጠላት ያበረታል ፤ ጠላት የበለጠ እንድንሰራ እንድንጠነክር ያደርጋል ፤በ8ወር እድሜያችን ከ800 ሺህ በላይ ጊዜ ሰዎች ጎብኝተውናል  ፤ ይህ ለኛ ሽልማታችን ነው ፤  እኛ ግን በቀጥታ አንባቢዎቻችን ብሎጉን የሚያነቡበትን የተለያዩ ድረ-ገጾችንና ፌስ ቡክን በመጠቀም መረጃዎችን በሁሉም አቅጣጫ እንደ ውሀ እንዲፈሱ እናደርጋለን ፤ አስፈላጊ ከሆነም ባለን እውቀት የራሳችንን unblock web sites በመስራት መረጃዎችን በተቻለን መጠን ተደራሽ እናደርጋለን ፡፡  

ይህ የአንድ ሰው ጽኁፍ ነው ፤ የማንም  አቋም አይደለም

(ሌላውን የጠቅላይ ሚኒስትሩን ሀሳብ ሌላ ጊዜ ልመለስበት ፤ እስኪ ደግመው የአቶ መለስን ቃል ያድምጡት)

ቸር ሰንብቱ