‹‹ትዕግስታችንን ከፍርሀት አትቁጠሩብን›› ድንገተኛው የመንግስት መግለጫ

(አንድ አድርገን ሚያዚያ 26 2004ዓ.ም)፡- ትላንትና ማታ ኢቲቪ ላይ መንግስት የሰጠው መግለጫ በጣም አስገርሞኛል ፤ ይህ የሀይማኖት ጉዳይ ይህን ያህል መግለጫ የሚስወጣ ነገር ላይ ይደርሳል ብዬ አለመገመቴ ይሆናል ፤ ይህን የመሰለ መግለጫ የሰማሁን በ97 ነበር ፤ መግለጫው በጣም በርካታ ነገሮችን ያካተተ በመሆኑ የ20 ደቂቃ ቆይታን ወስዷል ፤ መግለጫው ተሰጠው ዶ/ር ሽፈራው ከሚመሩት ፌደራል ጉዳዮች ነበር ፤ ሙስሊሙ ማህበረሰብ የሚሄድበት መስመር ያደረገውን ነገር በዝርዝር ያስቀመጠም መግለጫ ነበር ‹‹ትእግስታችንን ከፍርሀት አትቁጠሩብን›› በማለት አበክሮ መንግስት ተንፍሷል ፤ በተለያዩ መስኪዶች የሚደረገውን ነገር ቀን በመጥቀስም ለማቅረብ ሞክሯል ፤ ከ2 ቀን በፊት ‹‹በሃይማኖት ጉዳይ ላይ የለዘበ አቋም እንዳታሳዩ›› የሚል መመሪያ ከመንግስት መውረዱን ጽፈን ነበር ፤ በልደታ ፍርድ ቤትም ከ19 አቃቢ ህጎችና ዳኞች መሀከል 13ቱ በቅዳሜ ቀን ህገወጥ ስብሰባ ሲያደርጉ መደረሱንም ገልጸን ነበር ፤ ትላንትና ግን በጣም የጠነከረ መግለጫ ተሰጥቷል ፤ በፌስቡክ እና በፓልቶክ የሚዶለቱትን ነገር እንደ ምሳሌ አንስቷል ፤ ሙስሊሙ ማህበረሰብ ለተየቀው ጥያቄ  መንግስት መልስ መሰጠቱን አሳስቧል ፤  ነገር ግን ሌላ አላማ ይዘው የሚንቀሳቀሱትን ሰዎች ተጠንቀቁ በማለት መልእክት አስተላልፏል ፤ የህዝብ ተወካዮች ምክር ቤት አክራሪ ብሎ ከፈረጃቸው ድርጅቶች ጋርም ሚደረግን ግንኙነት እንዲያቋርጡ ጠቁሞ አልፏል ፤ ማህበረሰቡ መስኪድ ሄዶ ጸሎት አስርጎ መመለስ የማይችልበት ደረጃም መድረሱን ጠቁሟ ፤ ሰዎች በየመስኪዱ ከኢማሞች ማይክራፎን እስከመቀማት ደርሰዋል ብሏል ፤ የፖሊስ ኋይል ላይም አካላዊ ጉዳት አድርሰዋል በማለት ያትታል ፤ መንግስትና ሀይማኖት የተለያዩ ነገሮች መሆናቸውን አትቷል ፤ መንግስት ለማንኛውን የእምነት ተቋም እንደማያደላም ያስቀምጣል ፤ መንግስት ከህገ መንግስቱ ጎን መቆሙንም ጠቁሟል ፤  ከቀናት በፊት በአርሲ በአርብ ቀን 4 ሰዎች መገደላቸውን ለማወቅ ችለናል ፤ በአወሊያ አካባቢም 2 ሰዎች መሞታቸውን የመገናኛ ብዙሃን ጠቅሰዋል ፤

ሀገር ሰላም ስትሆን ነው ሰው ወጥቶ መግባት የሚችለው ፤ የእነርሱ ሰላም ማጣት በተዘዋዋሪ እኛንም ሰላም እንዳያሳጣን እሰጋለው ፤ ለእነርሱ የተሰነዘረው ሆን ብሎም ይሁን በአጋጣሚ እኛ ላይም እንዳያርፍ ስጋት አለኝ ፤ እኔ መግለጫው ያስገረመኝ ውስጡ የያዘውን ነጥብ ሳስበው ብቻ ነው ፤ ነገሩ ምን ያህል የመንገስት ራስ ምታትም እንደሆነ ለማወቅ ችያለሁ ፤  ጥያቄዎች ሁሉ በጊዜው መፍትሄ ቢሰጣቸው ለዚህም ባልተደረሰ ነበር ፤ አሁንም የእኛን የዋልድባ ጉዳይ መሰረታዊ የሆነ መፍትሄ መንግስት ካልሰጠ ህዝቡ ማንጎራጎሩን አያቆምም ፤ በአሁኑ ሰዓት ወደ ዋልድባ የተመመው ህዝብ እግሩን ወደ ኋላ አይልም ፤ ይህ ጉዳይ ከባድ ነው ፤ መልሱን ከመመለስ በፊት ስህተትን ማመን ግድ ይላል ፤  መንግስት ቱግ ብሎ በመቆጣት እና ያልሆነ መግለጫ ማውጣትና እርምጃም መውሰድ የለበት ፤ እንደ መንግስት ‹‹ሆደ ሰፊ›› መሆን አለበት ብለን እናምናለን ፤ አይደለም ሀገር ቤተሰብ ማስተዳደር ራሱ ከባድ መሆኑን እናውቃለን ፤ መንግስት ሆደ ሰፊ ካልሆነ መንግስትንና ህዝብ ያላቸው ግንኙነት  ሆድና ጀርባ ስለሚሆን  ስለሚያደርጋቸው ነገሮች ጠንቅቆ ሊያስብባቸው ይገባል እንላለን ፤ ህዝብ ሁል ጊዜ ጥያቄ ማቅረቡንም ወደ ኋላ አይልም ፤ ለምን ጠየክም አይባልም ፤ ጥያቄዎች ሁላ ተገቢ ምላሽ ያስፈልጋቸዋል ፤ የምዕመኑን ጥያቄ መደፍጠጥ ግን ህዝቡን ሌላ ነገር እንዲያስብ ቂም እንዲይዝ እና አላስፈላጊ ነገር ውስጥ እንዲገባ መንገዱን ይከፍትለታል ፤ በዚያን ጊዜ የሚደረግ ነገር ለማንም የሚጠቅም አይሆንም ፤ እኛ ሀገራችን ያላትን አንጻራዊ ሰላም ይዛ እንድትቀጥል ጽኑ ምኞታችን ነው ፡፡ 
ትንሽ ጊዜ ወስደው ቢመለከቱን ከመግለጫው ይልቅ የተሸለ ሀሳብ ይቀርባልም ብለን እናስባለን ፤ ይባስ ነገሮች እንዳይከሩ መንገዳቸውም እንዳይሰፋ ስጋት አለን ፤ አሁን ያለንበት ዘመን ነገሮችን ተነጋግሮ መፍታት የሚቻልበት ወቅት ነው ብለን ስለምናምንም ሊሆን ይችላል ፤ መንግስት ሲናገር ሚሊዮኖች ይሰማሉ ፤ጊዜውና ሁኔታውም ያስፈራቸዋል፤ ሚሊዮኖችም ራሳቸውን ፍርሀት ላይ ይጥላሉ ::

ከጠቅላይ ሚኒስትራችን የፓርላማ ንግግር በፊት ይች መግለጫ ታስቦባታል ፤ ነገር ግን ማህበረሱ ድንገተኛ እንዳይሆንበት ስለ ወቅቱ በሀይማኖት ዙሪያ ያለው ሁኔታ በሰፊው ጠቅላይ ሚኒስትሩ ዳሰሳ ሰጥተውበታል ፤ በመሀሉም የማህበረ ቅዱሳንን ስም አንስተው አልፈዋል ፤ ይህ ነገር በሆነ ከ15 ቀናት በኋላ ይህን መግለጫ ሰምተናል ፤ ቀጣዩን ለጊዜው መገመት አንችልም ፡፡