ቤተክርስቲያኑ አሁንም የእኔ ነው ወደፊትም የራሴው ነው ( አቡነ ፋኑኤል)

የደብረ ምሕረት የትላንትናው ትዕይንት ይሄን ይመስል ነበር

• እኔን ቀበሌ አላከኝም፣ የላከኝ ቅዱስ ሲኖዶስ ነው:: 
• 14 ዓመት ደክሜ ከሰራሁት ቤቴ የትም አልወጣም ::
• ወደዳችሁም ጠላችሁም ከዚህ የትም አልሄድም:: 
• አዎ አዲስ አበባ ላይ ቪላዎች ቤቶች አሉኝ፣ ያንን ትቼ ይህንን ህዝብ ላገለግል መጣሁ::
• ከዋሺንግተን ዲሲ እስከ ካሊፎርኒያ የኔ ግዛት ነው::
• ከዚህ በኃላ ስደተኛ፣ ገለልተኛ፣ መፃተኛ የሚባል ቤተ ክርስቲያን የለም
  

  
  

  በትላንትናው እለት በደብረ ምሕረት ቅዱስ ሚካኤል ክብረ በዓል ላይ የተገኙት አቡነ ፋኑኤል በአዋሳ ላይ  እንዳደረጉት ‹‹ምንም የምታመጡት ነገር የለም ፤ እኔን የላከኝ ቀበሌ አይደለም ቅዱስ ሲኖዶስ ነው›› በማለት ለበዓል የታደመውን ምዕመን አስገርመውት ውለዋል። 

  
  

  ትላንት በጠዋት የተጀመረው የቅዱስ ሚካኤል ክብረ በዓል ከወትሮው በተለየ ሁኔታ የቤተ ክርስቲያኑ መግቢያ በፓሊስ ሲታጠር ፤ ውጪው ደግሞ በተቃዋሚ ታውኮ ውሏል። ከሥርዓተ ቅዳሴው በኃላ በመምህር ዘላለም ወንድሙ አማካኝነት የማስፈራሪያ መልዕክት እንዲያስተላልፍ በተሰጠው ጥብቅ መመሪያ መሰረት እግሩ ረግጦት በማያውቅበት የደብረ ምሕረት ቅዱስ ሚካኤል ቤተ ክርስቲያን አውደ ምህረት ላይ በመቆም ባለሟልነቱን በሚገባ አረጋግጧል፡፡  እንደሚታወሰው መምህር ዘላለም ወንድሙ ከዚህ በፊት በቅዱስ ፓትሪያሪኩ ፈቃድ በአቡነ ፋኑኤል አደራጅነትና አዋቃሪነት በተከፈተው ‹‹የቤተ ክርስቲያን የውጪ ግንኙነት ጽ/ቤት›› በሚባለው የሰሜን አሜሪካ የሰባኪያን እና ዘማሪያን ባለሙሉ ሥልጣን የበላይ ኃላፊ በሚል እንደተሾመ ይታወሳል። በትላንትናው ድራማ ላይ አቡነ ፋኑኤል ‹‹ለእኔ የሚናገርልኝ ሰው ከሌለ እኔው ራሴ ስለ  ማንነት እነግራችኃለው›› ብለው ለተሰበሰበው ምዕመን ስለራሳቸው ገድል እና ድርሳን ሲናገሩ የምዕመኑን ጆሮ ሲያደነቁሩ ፤ ከግማሽ ሰዓት በላይ አሳልፈዋል፡፡

በዚህም መሠረት ‹‹እኔ ልሰራ እንጂ ልከፋፍል አልመጣሁም ፤ ስለዚህ ከዚህ በኃላ ስደተኛ ወይም ገለልተኛ ሳንል በተጠራንበት በመሄድ እናገለግላለን›› በማለት አስጨብጭበዋል፣ እንደ እውነቱ ከሆነ ቅዱስ ሲኖዶስ ከለየው ጋር ሄዶ መባረክም ሆነ ፤ እናቀራርባለን ብሎ ማለት ሥርዓት አልበኝነታቸውን የበለጠ ያጎላዋል እንጂ የሥራ ሰው መሆናቸውን አያስመሰክርም፡ ከዚህ በተጨማሪ ‹‹እኔ የሁሉም አባት ነኝ›› ማለታቸውም ነገ የአባ ሰላማ ብሎግ ባለቤቶች (ፕሮቴስታንቶቹም) ቢጠሯቸው የሁሉም አባት ስለሆኑ ሄደው ሊባርኩ ነው ማለት ነው ? አንባቢ ያስተውል።

በእለቱ ከታዩት በርካታ ካሜራዎች እና ተቃዋሚዎች ጥቂቱ

አቡነ ፋኑኤልና ካሕን መስሎ ከቆመው BODY GUARD ጋር

‹‹የዛሬ 5 ዓመት ቅዱስ ሲኖዶስ መድቦኝ እዚህ መጥቼ ነበር፣ ነገር ግን ሕዝቤን በሀገሩ ማገልገል አለብኝ ከሚለው ጽኑ ፍላጎቴ የተነሳ ለቅዱስ ሲኖዶስ ደብዳቤ ጽፌ አዛውሩኝ በማለት ተዛውሬያለሁ›› ያሉት አቡነ ፋኑኤል ፡፡  አሁን ደግሞ ‹‹ለ17 ዓመት ደግሜ በገዛ ገንዘቤ ያቋቋምኩትን ቤቴንና ሕዝቡን ላገልግል ብዬ አዲስ አበባ ላይ ካሉኝ ቪላዎቼ እናንተን መርጬ ላገለግላችሁ መጥቻለው›› ብለዋል።

ትላንት ከታዩት አስገራሚው ትዕይንት የህዝቡን ቀልብ የሳበው አባ ፋኑኤል ልክ እንደ ቅዱስ ፓትሪያሪኩ የግል ጠባቂ (Body Guard) የካህን ልብስ አልብሰው ፤ ጥቁር መነጽሩን ደንቅሮ ፤ በተጠንቀቅ ሲጠብቅና የሙያውን ሥራውን በሚገባ ሲወጣ ቆይቷል፡፡ የፓሊሱ ግርግር፣ የቦዲ ጋርዱ ጥበቃ፣ የተቃዋሚዎች ስድብ በቤተ ክርስቲያናችን እስከ መቼ እንደሚቀጥልና ታቦታችን ፊት እንዲህ አይነት ስድብና ውርደት መቀጠል እንደሌለበት የሁላችንም እምነት ቢሆንም አቡኑ ግን ‹‹ወደዳችሁም ጠላችሁም ከሰራሁት ቤቴ ማንም አያስወጣኝም›› በማለት ‹‹ደርግ እንኳን ሁለት ያለውን አንዱን ነው የነጠቀው፣ እኔ ግን አንድ ስለሆነ ያለኝ እሱንም ስጥ የሚል ህግ የለም›› ነበር ያሉት።

 

ሌላው አስገራሚው ትዕይንት ደግሞ አቡነ ፋኑኤል እስከ ዛሬ ድረስ እርሳቸውንም ጨምሮ በተለያየ ጊዜ የተለያዩ ሊቃነ ጳጳሳት በዋሽንግተን ዲሲና አካባቢው ተቀማጭ ሆነው ብዙ ሥራዎችንም የሰሩም ነበሩ፡፡  ነገር ግን አቡነ ፋኑኤል እርሳቸው የመጀመሪያው ለሥራ የመጡ የቅዱስ ሲኖዶስ ተወካይ እንደሆኑ ሲናገሩ ምዕመናኑን ሁሉ አስገርመዋል፡፡ በተለያየ ጊዜ እየመጡ ያደራጇቸው የገለልተኛ አስተዳደር በሙሉ ምንም ነገር እንዳልተፈጠረ ነበር የተናገሩት በመቀጠልም ሁሉንም ይዘው ሥራ ለመስራት እንደተዘጋጁና ምዕመናኑንም ገንዘብ ያለህ በገንዘብህ ፤ ሙያ ያለህ በሙያህ ፤ ተባበረኝ ብለው ነበር የተናገሩት።

እንደሚታወቀው የራሳቸውን ዝናና ክብር ሲወራ የሚወዱት አቡነ ፋኑኤል ትላንት የርሳቸውን ገድለ ፋኑኤል የሚያወራ ስለጠፋ ‹‹ስለ እኔ የሚናገር ከሌለ እኔው ስለራሴ ልናገር›› ብለው ነበር፡፡  ስለ እኔ ገድል ተናገሩ ያሏቸው በሙሉ ለመናገር ባይደፍሩም ሕዝበ ክርስቲያኑን ከንቀታቸው የተነሳ ‹‹ይሄንን ቤተ ክርስቲያን ተቃዋሚዎች ጥይት ግዛ ብለው ሲሰጡኝ፣ እኔ ቤተ ክርስቲያን ገዛሁበት ፤ በመሆኑም አሁንም የእኔ ነው ወደፊትም የራሴው ነው›› ነበር ያሉት፡፡

 ታዲያ እንዲህ አይነት "እኔነት" የተጠናወታቸው አባት እንዴት ነው ይህንን የተለያየ አላማና አካሄድ ያለውን ሕብረተሰብ እመራለሁ ብለው የተነሱት ? ሲሆን እንደ ጥንት አባቶቻችን በትህትና እና በፍቅር መጀመር ሲገባቸው ገና ሲጀምሩ በትዕቢትና በማናለብኝነት የጀመሩት አቡነ ፋኑኤል በአዋሳ ሕዝብ ላይ ያደረሱትን በደል በዋሽንግተን ሕዝብ ላይ እንደሚያደርጉት ይጠበቃል።

በዋሽንግተን አካባቢ በተለያዩ አስተዳደር ስር ያሉ አብያተ ክርስቲያናት ውስጥ ጥቂቶቹ

፩/ በእናት ቤተ ክርስቲያን አስተዳደር ስር ያሉ

፪/ በስተደኛው ሲኖዶስ አስተዳደር ስር ያሉ

፫/ በገለልተኛ አስተዳደር ስር ያሉ

፬/ ስደተኛውም ሲኖዶስ ወይም የሀገር ውስጥ ሲኖዶስ የማይመሩ ነገር ግን በራሳቸው የቦርድ አስተዳደር ያሉ

፭/ በእናት ቤተ ክርስቲያን ያሉ ነገር ግን የፓትሪያሪኩን ስም በጸሎት የማይጠሩ

፮/ በገለልተኛ አስተዳደር ያሉ ነገር ግን የባለቤቶቻቸውን የቅዱስ ሲኖዶስ ጥቂት አባላት ስር የሚተዳደሩ

እውነት ታዲያ አቡነ ፋኑኤልን መሪ አድርጎ ተቀብሎ የሚሰራ የትኛው ክፍል ነው? እንደ እርሳቸው አባባል የመጡት ለሁሉም ነው ብለዋል ፤ ታዲያ ይሳካላቸው ይሆን? ለጊዜው አሸንፈው የገቡት የራሴ ነው ፤ የግል ንብረቴ ነው ፤ ታክስ እከፍልበታለሁ ፤ ወይም መጦሪያ ቤቴ ነው፤  በሚሉት ቤተ ክርስቲያን ብቻ ነው፣ ቀጥሎስ የትኛውን አሸንፈው ወይም ብልጣ ብልጣ ብልጥነታቸውን  ተጠቅመው ማስተዳደር ይችሉ ይሆን? ጥያቄውን ለአንባቢ በመተው የወደፊቱን አብረን ለመመልከት የዛሬውን በዚህ እያጠቃለልን በመቀጠል የአቡነ ፋኑኤልን አካሄድ  እየተከታተልን ለማቅረብ ቃል እንገባለን።

መልዕክት አለን

የሰውዬው ማንነት በሚዛን ተመዝኖ ክፉ ስራቸው ያደላባቸው አባት ናቸው ፡፡ ሰው ስህተት ይሰራል ፤ ነገር ግን ከስህተታቸው አልታረምም ያሉ አባት ናቸው፡፡ የሀዋሳውን ህዝብ እንዴት እንደተጫወቱበት አሁን ላይ መናገር ለቀባሪው ማርዳት ነው የሚሆነው ፤ ልባቸው ደንድኗል ፤ በማን አለብኝነት መምራት እና ማተዳደር ነው የሳቸው ፍላጎት፡፡  ይህ አይነት አካሄድ ደግሞ በዚህ ዘመን የሚቻል አይመስለኝም፡፡ መረጃ በደቂቃዎች ውስጥ ከአንዱ ጫፍ ወደ አንዱ ጫፍ በሚወነጨፍበት ፤ ሰዎች ምን እንዳሰቡ ፤ ምን እንዳደረጉ በቀላሉ መረጃ የሚለዋወጥበት ጊዜ ስለሆነ ….

በሀዋሳ ያሉትን አባቶቻችን የእንጨት ላይ  ሽበት እያሉ ያሰደቧቸው እሳቸው በፈቀዱት መድረክ አማካኝነት ነው ፤ ሰዎች እንባቸው የፈሰሰው በእሳቸው ፍትሀዊ ባልሆነ ስርዓት የተነሳ ነው ፤ቤተክርስትያኗን የተገዳደሯት ሰዎች ብቅ ብቅ ያሉት እሳቸው ባጠቧቸው ጡጦ አማካኝነት ነው ፤ክርስትያኖችን በዘር መከፋፈል አፍን ሞልቶ መናገር የተጀመረው በአቡኑ ያልተገባ አካሄድ አማካኝነት ነው ፤እኛ የምናውቀው ቤቱ በእጣን ሲታጠን ነበር እሳቸው ግን በከብት ኩበት ያሳጠኑት እኝህ ሰው ናቸው ፤ ከሰባኪዎች ጋር ያልተገባ ዝምድና በመፍጠር ወንጌሉ በአግባቡ እንዳይሰበክ ያደረጉ ሰው ናቸው ፤ ለሰባኪያን ከቤተክርስትያን ስርዓት ውጪ መጋቢ ሀዲስ ፤ መጋቢ ብሉይ ፤ እያሉ መአረጓን ለማይገባቸውና ለማይመጥናቸው የስሙንም ትርጓሜ በአግባቡ ለማያውቁ ሰዎች በስጦታ አማካኝነት የሰጡ እኝህ ናቸው ፤ ከስርዓተ ቤተክርስትያን ውጪ ያለ ሀገረ ስብከታቸው በመሄድ ቅስና እና ድቁና የሰጡ እኝህ ሰው ናቸው ፤ታዲያ በምን መስፈርት ነው አሜሪካ የተመደቡት? ብለው እንዳይጠይቁ ፡፡ እሳቸው የአቡነ ጳውሎስ ታማኝ ስለሆኑ ብዙ Business በእነሱ አጠራር የሚታፈስበት ቦታ ስለሆነ ፤ ‹‹ታማኝ የሆነ ሰው›› ነው መላክ ያለበት ከሚል እሳቤ የተነሳ ነው ፡፡ እኛም መሰሪነታቸውን እናውቃለን ፤ ህዝበ ክርስትያ እንዲየውቅ እናደርጋለን ፡፡ የእስከዛሬ ስራዎት ይብቃዎት ልንላቸው ይገባል ፡፡ ህዝቡንም ልናነቃው ግድ ይለናል፡፡ 

ኢትዮጵያ ሀገራችንን፣ ተዋሕዶ ሃይማኖታችንን ከአጽራረ ቤተክርስቲያን ይጠብቅልን አሜን

የመላው ዓለም የተዋሕዶ ቤተሰብ

Posted by ቁርጠኛ የተዋሕዶ ልጆች