የቀድሞ መሪዎቻችን እምነት ምን ነበር ? የመጪዎቹስ ?

(አንድ አድርገን ጳግሜ 1 ፤ 2004 ዓ.ም)፡- አቶ ኃ/ማርያም ደሳለኝ በደቡብ ኢትዮጵያ በሎሎ ወረዳ በ1980 ከአዲስ አበባ ዩኒቨርሲቲ በሲቪል ምህድስና የመጀመሪያ ድግሪ ፤ ፊንላንድ ከሚገኝ ዪኒቨርሲቲ ባገኙት ነጻ የትምህርት እድል በሳኒቴሽን ኢንጂነሪንግ ሁለተኛ ድግሪያቸውን አግኝተዋል ፤በአርባ ምንጭ የውሃ ቴክኖሎጂ ዩኒቨርሲቲ ለ13 ዓመት በዲንነት አገልግለዋል ፤ ከ14 ዓመት በፊት የኢህአዲግ አባልነት ከተመዘገቡ በኋላ በ1993 ዓ.ም የደቡብ ክልላዊ መንግስት ፕሬዝዳንት ሆነው አገልግለዋል ፤ ኢህአዴግ በብቃት ማነስ ከተሸሙበት ቦታ ዝቅተኛ ቦታ ሰጥቶ እንዲሰሩ አድርጓቸዋል ፤ ከዓመታት በፊት በብቃት ማነስ ወደ ታች የተወረወሩት ዛሬ ሐገሪቱን ለመምራት ትልቁን ስልጣን ለመቆናጠጥ ፤ በጠቅላይ ሚኒስትርነት ቦታ ላይ ለመቀመጥ ከፊት ለፊት ቆመዋል ፤  ግላዊ ስብዕናው በተመለከተ ሀይለማርያም ቅንነትና ትህትና የሚታይበት ፤ ሰውን ሁሉ የሚያከብር ፤ የማይመጻደቅ ተግባቢ ምሁር ፤ በራሱ የሚተማመን ፤ ስብሰባ ሲመራ  የማያስፈራራና የማይደነፋ ፤ ተቃራኒ ሀሳብ የሚቀበልና በአግባቡ ምልሽ የሚሰጥ ፤ በአግብኦ(አሽሙር) ወይም በማሽሟጠጥ ጥያቄዎችን የማይመልስ ፤ የበታችነት ወይም የበላይነት ስሜት የማይሰማው ፤ ፈገግታ የማይለየውና ለማነጋገርም የማይከብድ ሰው መሆኑን በቅርብ የሚያውቁት ሰዎች ይመሰክሩለታል፤ በተጨማሪ አቶ ኃ/ማርያር ትልቁ ስብእና የኢህአዲግ ባለስልጣን ይቅርና ጠቅላይ ሚኒስትር ቢሆንም ባይሆንም ራሱን ችሎ በሰላምና በነጻነት ለመኖር እንደሚችል አስቀድሞ የተረዳ ሰው በመሆኑ  አምባገነን ልሁን ቢል እንኳን ለመሆን የማይችል ሰው ነው፡፡  

 በአጠቃላይ አቶ ኃ/ማርያም ከመሪነት ይልቅ ወደ አስተዳዳሪነት የማድላት ተፈጥሮ ስላላቸው የዘር ፖለቲካ እየሸረቡ ፤ እሁድን ሰኞ ነው ፤ ድንጋዩን ዳቦ ነው ፤ ጨለማውን ብርሀን ነው በማለት በአፈ ጮሌነት በማስመሰል የሚኖሩ ሰው አለመሆናቸውን የቅርብ ሰዎች ይመሰክሩላቸዋል፡፡ ከሳምንት በፊት አቶ መለስ የሞቱ ሰሞን የወጡ መረጃዎች እንደሚያመለክቱት አቶ ኃ/ማሪያም ፕሮቴስታንት መሆናቸውን የሚናገሩ ዘገባዎች በአለማቀፋዊ ድረ ገጾች(Los Angeles Times) ላይ ወጥቶ ነበር ፤ በመሰረቱ በደፈና ሁሉንም ፕሮቴስታንት ካላልናቸው በቀር አቶ ኃ/ማርያም “በኢትዮጵያ ሃዋሪያዊት ቤተክርስትያን ” ወይም ONLY JESUS የሚባለው የእምነት ተከታይ ናቸው ፤ በኢትዮጵያ ፍቃድ ከጠየቁ ከሺህ የሚበልጡ ተቋማት በአሁኑ ሰዓት ፍቃዳቸውን አሳድሰው የሚንቀሳቀሱት 178 መሆናቸው ይታወቃል፡፡

እንደ እነርሱ እምነት  አምላክ አንድም ሶስትም ነው የሚለውን የሥላሴን ትምህርት የማይቀበሉ ሲሆን አብም ወልድም መንፈስ ቅዱስም ኢየሱስ ነው የሚል እምነት አላቸው ፤ አንድ አምላክ አንድ አካል እንደሆነና በወልድና በመንፈስ ቅዱስ አመለካከት የራሳቸው አስተሳሰቦችን ያራምዳሉ ፤ እኝህ ሰው የአቶ መለስ ሞት ለህዝብ ይፋ እስከተደረገበት ጊዜ ድረስ በነጻነት እንደ አንድ ተራ ግለሰብ ያለ ጠባቂ ጎፋ ካምፕ አካባቢ የሚገኝው የእምነት ተቋማቸው ጋር በሳምንት 2 ቀን እንደሚሄዱና ፕሮግራም እንደሚከታተሉ ቦታው ላይ ያሉ ሰዎች ይናገራሉ፡፡ 

አቶ ኃ/ማርያም ጠቅላይ ሚኒስትር ቢሆኑ ከበፊት ስብእናቸው ጋር የማይሄድ ስራ ይሰራሉ ተብሎ አይገመትም ፤ እርሳቸው ሀይማኖትን መሰረት አድርገው ከሚፈጥሩት ተጽህኖ ይልቅ የእሳቸውን እምነት የሚከተሉ ሰዎች እንደ አንድ አይከን እሳቸውን በመውሰድ ብዙ ነፍሶችን ወደ አዳራሾቻቸው ለማስገባት የአባላትን ቁጥር ለመጨመር ስማቸውንና ስልጣናቸውን በሀገሪቷ ላይ ተጨማሪ የእምነት ተቋም ለመገንባት ሊጠቀሙበት ይችሉ ይሆናል ፤ “ጌታን ተቀብዬ ስራ ያዝኩኝ ፤ ጌታን ተቀብዬ ኮንዶሚኒየም ቤት ወጣልኝ” እያሉ የሚያስተምሩ ግብዞች የሰውየውን Public image በመጠቀም በዚህ መሰሉ አካሄድ በመጠመድ ብዙ ነፍሳትን ወደ አዳራሾቻቸው ሊያኮበልሉ ይችላሉ ፤ አቶ ኃ/ማርያም በፖለቲካ ብዙ ተሰሚነትም ሆነ ተጽህኖ ፈጣሪ ሰዎች ውስጥ ስለማይገኙ ቦታውን ቢያገኙት እንኳን እንደ ጋሪ ፈረስ ከኋላ ሆኖ የሚጋልባቸው ፓርቲው በመሆኑ ሌሎች እምነቶች ላይ ተጽህኖ ለማሳደር እንደሚከብዳቸው በቅርብ የሚያውቋው ሰዎች ተናግረዋል፡፡

አቶ ኃ/ማርያም ጠቅላይ ሚኒስቴር ቢሆኑ እንኳን የዋልድባን አይነቱን ችግርና  ሙስሊሞች ያነሱት ጥያቄዎችን መፍታት እና አግባብ የሆነ መልስ የመስጠት ብቃቱ የላቸውም ፤ ይህን መልስ መስጠት የሚችሉት እንደነ አባይ ጸሀዬ ፤ አቦይ ስብሀት ፤ በረከት ስምኦንና  የፓርቲው የፖሊት ቢሮ ከፍተኛ አባላት እንጂ ሌሎች ሊሆኑ አይችሉም ፤ ስለዚህ ኃ/ማርያምን ጥርስ የሌለው አንበሳ ሊያደርጓቸው ይችላሉ  ተብሎ ይገመታል ፤ ብዙ ሰዎች እሳቸው ጠቅላይ ሚኒስትር ቢሆኑ ኢትዮጵያ በታሪኳ የመጀመሪያውን ከኦርቶዶክስ ተዋህዶ እምነት ውጪ የሆነ ሰው ሀገሪቱን እንደሚያስተዳድራት ይናገራሉ ፤ ነገር ግን ካለፉት ጥቂት ነገስታት በስተቀር ማነው በህይወተ ስጋ ሳለ ስልጣኑ ሳያስኮፍሰው ኦርቶዶክስ ነኝ ብሎ ያለ ባለስልጣን ? 17 ዓመት ይችን ሀገር የመራው መንግስቱ ኃ/ማርያም እምነቱ ምንድነው? ሰው ከዚህ ዓለም በሞት ሲለይ በቤተክርስትያን ስለተቀበረ ብቻ ኦርቶዶክስ ነበር ማለት አይቻልም ፤ ለክርስትና በእናቶቻችን መዳፍ በ40 እና በ80 የምንመጣ ፤ ስንሞት ደግሞ ግብአተ መሬት ለማስፈጸም በሳጥን በሰዎች ተሸካሚነት ወደዚች ቤተክርስትያን የምንመጣ ሰዎች የኦርቶዶክስ ተዋህዶ እምነት ተከታይ ነን ብለን መናገር አንችልም ፤ ለቀብር ለቀብር ቅዱስ ዮሴፍ ቤተክርስትያን ሙስሊሙም ፤ ፕሮቴስታንቱም ፤ እምነት የለሹም ሁሉም ሲሞት ይቀበራል ፤ ታዲያ እኝህ ሰዎች ኦርቶዶክስ ናቸውን ? ታምራት ላይኔ እግዚአብሔር የለም ብሎ የሚያምን ሰው ነበር ፤ ይህን አመለካከቱን በራሱ አንደበት ሲናገር ተሰምቷል ፤ ይህ ሰውና መሰሎቹ በጊዜው ሲያራምዱት በነበረው አመለካከት ምክንያት ብዙዎችን መንገድ አስተዋል ፤ ቅዱስ ሲኖዶስ ሁለት ቦታ የተከፈለው በእነዚህ ሰዎች አማካኝነት ነው ፤ የቀድሞ ምክትል ጠቅላይ ሚኒስትር ታምራት ላይኔና ጓደኞቹ ይህን ሁሉ ስራ ሰርተው “እግዚአብሔር የለም” ብለው ቢሞቱ የሚቀበሩት እዚችው ቤተክርስትያን ነው ፤ ፍትሃትም የሚደረግላቸውም በኦርቶዶክሳውያን ስርዓት ነበር(በአሁኑ ሰዓት ታምራት ላይኔ ፕሮቴስታንት መሆኑ ይታወቃል) ፤ ጥቂቶችም ትግል አንድ ያድርጋቸው እንጂ የዚህ አመለካከት የሰረጸባቸው ሰዎች ነበሩ ፤   

በጣም የሚገርመው ነገር በአሁኑ ሰዓት በዋልድባ ገዳም መነኮሳትን መከራ እያደረሱባቸው የሚገኙት ከፍተኛ የመንግስት ባለስልጣናት ሲሞቱም የሚቀበሩት እዚችው ቤተክርስትያን ነው ፤ እነሱ ሲሞቱም የኦርቶዶክስ እምነት ተከታይ ነበሩ እንላለን ? ስንቱን ደመከልብ ያደረጉ የደርግ ባለስልጣናትም በዘመናቸው ህይወታቸው ሲያልፍ የተቀበሩት ኦርቶዶክስ ቤተክርስያን ነው ፤ “ኢትዮጵያ ትቅደም” እያሉ ያንን ሁሉ ደም ያፈሰሱ ሰዎች ፤ ቤተክርስትያንን ሙዝየም ለማድረግ ሲንቀሳቀሱ የነበሩት ባለስልጣናት እነሱም ኦርቶዶክስ ናቸውን ? የሀገራችን ሰሜናዊ ክፍል የአክሱም ሀውልት የተቀረጸበት የላሊበላ ውቅር አብያተክርስትያነት የታነጹበት ፤ አብርሀ ወአጽብሀ የነገሱበት ፤ የቃልኪዳኑ ታቦት የሚገኝበት ፤ ክርስትና የበቀለበት ቦታ ሰው ቢወለድ የኦርቶዶክስ ተዋህዶ እምነት ተከታይ ነው ልንለው አንችልም ፤  ቦታው ላይ መወለድ ፤ እምነቱን ማወቅና ፤ በእምነቱ አምኖ መገኝት ሁሉም ለየቅል ናቸው ፤ ስለዚህ አቶ ኃ/ማርያም የሚከተሉትን እምነት ፤ የሰውየውን ስብእና እና የሚቀመጡበት ወንበር ሁሉን ለያይተን ብንመለከት መልካም ነው ፤ አንድን ሰው የኦርቶዶክስ እምነት ተከታይ ነው ለማለት መስፈርታችን ምንድነው ? ለዛውም የአቶ ኃ/ማርያም ደሳለኝም እምነታቸውን አውቀናል ፈሪሀ እግዚአብሔርም ያለባቸው ይመስላሉ የበፊት መሪዎቻችንን  እምነት ግን አናውቅም . .(ያለፉትን በጠቅላላ በደፈናው ኦርቶዶክስ ነበሩ አትበሉን)   

ኃ/ማሪያም ደሳለኝ በአንድ ወቅት በሰጠው ኢንተርቪው “ንጉሥ ዳዊት የተከበረ በእግዚአብሔር ዘንድም የተወደደ በብዙ ነገር በጣም የተመሰገነ ንጉሥ ነበር፡፡ እስራኤልን የሚመስል ትልቅ ሕዝብ መግዛት የቻለ ዳዊት ግን ራሱን መግዛት አልቻለም ነበር፡፡ ለዚህ ነው መጽሐፍ ቅዱስ ከተማን ከመግዛት ይልቅ ራስን መግዛት ይበልጣል ያለው፡፡ ነገር ግን መጽሐፉ የሚመክረው ራስን ቤተሰብን መግዛት እንድንችል ነው፡፡ ከተማን በመግዛትህ ሁሉን እገዛለሁ አትበል፡፡ አንዳንድ ጊዜ ውስጣዊ ሰብዓዊ ውድቀት ሊኖርብህ እንደሚችል አስበህ ጥንቃቄ አድርግ፡፡” ምዕራፍ  መጽሔት፣ ጥር  2003 ዓ.ም.

መልካም የሱባኤ ወቅት ይሁንልን