የዋልድባ ገዳም መብት ለማስከበረ በዋሽንግተን ዲሲ ሰላማዊ ሰልፍ ተካሄደ

ተቋውሞ ሰልፉን በቪዲዮ ለማየት ይህን ይጫኑ

የአሜሪካ ድምጽ ስለ ሁኔታው የዘገበው  ለማድመጥ ይህን ይጫኑ

(አንድ አድርገን መጋቢት 19 2004ዓ.ም)፡-26/03/2012 ዓ.ም  በአሜሪካን ሀገር የሚገኙ የኢትዮጵያ ኦርቶዶክስ ቤተክርስትያን አማኞች  ዋልድባ ገዳም ላይ መንግስት ሊሰራው  ያሰበውን የስኳር ልማት በመቃወም ታላቅ ሰላማዊ ሰልፍ አድርገዋል ፡ ሰላማዊ ሰልፉን እንዲሳተፉ ለብዙ ሰንበት ተማሪዎች ፣ የሰበካ ጉባኤ አባላት እና ለአባቶች ጥሪ ተደርጎላቸዋል ፣ ሰላማዊ ሰልፉ ከመጀመሩ በፊት በአባቶች ጸሎት ተጀምሯል ፣ በሰላማዊ ሰልፉ ላይ 450 ሰዎች የፈረሙበትን የህዝብ ድምጽ አያይዘው አቤቱታቸውን አቅርበዋል ፡ የኢምባሲው ሰራተኛ ነኝ የሚሉ አንድ ሰው ነገ ተመልሰው እንዲመጡ አሳስበዋቸዋል ፣ በፊት በተለያዩ ሲኖዶሶች ሲተዳደሩ የነበሩት ክርስትያኖች ይህ ጉዳይ አንድ ያደርገናል እንጂ ሊለየንም አይችልም በሚል ሀሳብ ተስማምተው በአንድነት ሰላማዊ ሰልፉን በኢትዮጵያ ኢምባሲ ፊት ለፊት አድርገዋል ።  በጊዜውም

ሀይል የእግዚአብሔር ነው

ማዳን የእግዚአብሔር

ጥበብ የእግዚአብሔር

አንመካም በጉልበታችን

እግዚአብሔር ነው የኛ ሀይላችን

እያሉ ሲዘምሩ ተደምጠዋል። እውነት ነው «ሀይል የእግዚአብሔር ነው» እኛ ጉልበት ኖሮን ለውጥ ላናመጣ እንችላለን ፣ ጉልበት ግን የእግዚአብሔር ነው ፡ ኃይል ግን የእግዚአብሔር ነው  ። የእግዚአብሔርን እጅ እንጠብቃለን ፣ ከ420 ዓመት በኋላ እስራኤልን ከባርነት ያወጣ አምላክ እኛንም አይተወንም ፡ አይረሳንም ። እኛን የሚጎነኝበት ለጥያቄያችን መልስ የሚሰጥበት ጊዜ እስኪመጣ ድረስ በተስፋ እንጠብቃል ።

(ከአሐቲ ተዋሕዶ):-“የአባቶቻችን ርስት እና ቅርስ ተጠብቆ ለትውልድ ይተላለፍ” የሚል መሪ ቃል ያለው የአቤቶታ ሰላማዊ ሰልፍ የአሜሪካን መንግስት መቀመጫ በሆነችው በዋሽንግተን ዲሲ በኢትዮጵያ ኤምባሲ ዛሬ መጋቢት 17፣2004 ዓ/ም በአካባቢው የሰዓት አቆጣጠር 9am ላይ ተካሄዶዋል:: በአቤቶታ ሰላማዊ ሰልፉ ላይ በቦታው የተገኙ አባቶች በጸሎት አስጀምረዋል:: በሰልፉም ከአንድ ሺህ በላይ ክርስቲያኖች እንደተገኙ በአካባቢው የነበሩ ዘጋቢዎቻችን ገልጸውልናል:: በአቤቶታ ሰላማዊ ሰልፉም በአስተዳደር ምክንያት የተለያዩ ወገኖች በአንድነት የቤተ ክርስቲያን ህልውና የሚፈታተኑን ከድርጊታቸው እንዲቆጠቡ ጠይቀዋል:: ለአራት ሰዓታት ያህል የቆየው የአቤቶታው ሰልፍ በተለያዩ መዝሙራት የታጀበ ነበረ:: ተሳታፊዎቹም ጥያቄዎቻቸውን በእንባ እና በጩኸት ለኤምባሲው አሰምተዋል:: 

የጠቅላይ ሚንስተሩ ጽ/ቤት ከዋልድባ ገዳም በተወከለቱ የገዳሙ አባቶቻችን ላይ ያሳየውን ንቀት የዋሽንግተን ዲሲው የኢትዮጵያ ኤምባሲ ለአቤቶታ በወጡ ክርስቲያኖች ላይ ንቀቱን ደግሞታል:: አቤቶታ አቅራቢዎች ለሦስት ሰዓታት ተኩል ያህል በኤምባሲው በር ላይ መብታችውን ሲጠይቁ ከኤምባሲው ማንንም ምንም የመንግስት ተወካይ ወጥቶ ሊያናግራቸው አልቻለም ነበር:: በመጨረሻም አንድ ተላላኪ ወጥቶ “ዛሬ ሳይሆን ነገ እናግራችኋለን” በማለት አሳፋሪ ምላሽ እንደሰጣቸው ዘጋቢዎቻችን ገልጸውልናል:: መንግስት በኢትዮጵያ የኦርቶዶክስ ተዋሕዶ አማኞች ላይ እያደረገ ያለውን ንቀት በዋሽንግተን ዲሲ ባስቀመጣቸው ተወካዮቹ ጭምር ደግሞታል:: ታድያ ንቀቱ እስከ መቼ ድረስ ይሆን? 

ክርስቲያኖች በአላውያን ነገስታት ወይም በእምነት የለሽ ገዢዎቻቸው ጭቆና ሲበዛባቸው በጸሎት አምላካቸውን ከመማጸን በተጨማሪ ድምጻቸውን ለመንግስታት ማሰማት በአሐት አብያተ ክርስቲያናት ዘንድ የተለመደ ነው:: የግብጽ፣ የአርመን እና የሶርያ ክርስቲያን ወንድሞቻችን በተለያዩ ጊዜያት በገዢዎቻቸው ጭቆና ሲደርስባቸው ለዓለም መንግስታት እና ለራሳቸውም መንግስታት በአቤቱታ ሰላማዊ ሰልፍ ጩኸታቸውን እንደሚያሰሙ በተለያዩ የዓለም አቀፍ የመገናኛ ብዙኃን ሲዘግቡ እንሰማለን:: በሕገ ክርስትና በኢ-አማኞች ጭቆና ሲደርባችሁ የአቤቱታ ሰላማዊ ሰልፍ አትውጡ የሚል ነገር የለም:: ስለዚህ ክርስቲያኖች የአቤቱታ ሰላማዊ ሰላማዊ ሰልፍ መውጣታችው ተገቢ ነው:: 

አቤቱታን ለዓለም መንግስታት ማቅረብ በአሐት አብያተ ክርስቲያናት ዘንድ እንደተለመደው ሁሉ በኢትዮጵያ ኦርቶዶክሳውያን ዘንደም መለመድ አለበት በማለት የሰላማዊ ሰልፍ አዘጋጆቹ በቦታው ለተገኙ ዘጋቢዎቻን ገልጸውላቸዋል:: 

በኢትዮጵያ ቤተ ክርስቲያ ከአርባ ዓመት ወዲህ በተለያዩ ጊዜያት ክርስቲያኖች ሲታረዱ፣አብያተ ክርስቲያናት ሲቃጠሉ፣ ቅዱስ ፓትርያርኩ ለወህኒ ወርደው በግፍ ሲገደሉ እንደሌሎች እህት አብያተ ክርስቲያናት የኢትዮጵያ ክርስቲያኖች ድምጻቸውን ለዓለም መንግስታት አላሰሙም ነበረ:: ይህ ዛሬ የተካሄደው የአቤቱታ ሰላማዊ ሰልፍ ከእንግዲህ ወዲህ ለኢትዮጵያ ኦርቶዶክሳውያን ክርስቲያኖች “ዝምታው በቃን ድምጻችን እናሰማለን” በማለት የተጀመረ ይመስላል:: ስለዚህ ሀገራችን ኢትዮጵያ ውስጥ ጨምሮ በተለያዩ ዓለማት የሚኖሩ የተዋሕዶ ልጆች በጥታውያን ገዳማቶቻችን እየደረሰ ያለውን ጥፋት ለማስቆም የአቤቱታ ሰላማዊ ሰልፍ እንቅስቃሴ ለማካሄድ የዛሬው አቤቱታ መልካም ጅምር ነው:: በሰላማዊ ሰልፉ የተነሱ ጥያቄዎች እንደሚከተለው ቀርቧል:: 

• · ክርስቲያኖች ዋልድባን ነጻ ያወጣሉ፣ 
• · በዋልድባ ጉዳይ ክርስቲያኖች ሁሉ በአንድነት እንቆማለን፣ 
• · ጳጳሳት ውሳኔያችሁ ይሰማ፣ 
• · የአባቶቻችን ርስት ተጠብቆ ለትውልድ ይተላለፍ፣ 
• · የገዳማት አባቶቻችን መብት ይጠበቅ፣ 
• · ዋልድባ ነጻ ትውጣ፣ መንግስት የመነኮሳቱ ድምጽ ይስማ፣ 
• · ዋልድባ የቅዱሳን እንጂ የኢንቨስተር አይደለችም፣ 
• · አባቶቻችን ያስቀመጡልን ገዳማት ሲፈርሱ ዝም አንልም፣ 
• · የቤተ ክርስቲያን መሪ አባቶች ዝምታችሁ ይብቃ፣ 
• · ገዳማትን የሚያፈርስ መንግስት አንፈልግም፣ 
• · የስልጣኔ ምንጭ የሆነች ቅድስ ቤተ ክርስቲያን መብቷ ይከበር፣ 
• · ገዳማት የጸሎት ቦታ እንጂ የመዝናኛ ቦታ አይደሉም፣ 
• · ክርስቲያኖች የገደሉ ለፍርድ ይቅረቡ፣ 
• · አድባራትንና ገዳማትን ማጥፋት ኢትዮጵያዊነትን ማጥፋት ነው፣ 
• · የአባቶቻችን ተረፈ አጽማቸው ይከበር፣ አጽማቸው ቆፍሮ ማውጣት ይቁም 
• · ልማት ገዳማትን በማፍረስ አይመጣም፣ 
• · ሃይማኖታችን የማንነታችን መገለጫ ናት ስለዚህ መንግስት ይህንን ያክብር፣ 
• · ሃይማኖት ከሌለ ሀገር አይኖርም፣ 
• · ገዳማት የሚያፈርስ መንግስት ተቀባይነት የለውም፣ 
• · አብያተ ክርስቲያናት ያቃጠሉ ለፍርድ ይቅረቡ፣ 
• · ቅዱስ ሲኖድ የገዳማትን ይዞታ የማስከበረ ግዴታ አለበት፣ 
• · ገዳማትን ማጥፋት በታሪክ ያስጠይቃል፣ 
• · ገዳማቱ እንዲከበሩ እንፈልጋለን፣ 
• · ገዳማትን የሚያፈርሱ አይከበሩም፣ 
• · ዋልድባን ለማጥፋት የሚሞክሩ ይጠፋሉ፣ 
• · ገዳማቶቻችን ታሪካችን ናቸው፣ 
• · የአብነት ተማሪው ናታንን የገደሉ ለፍርድ ይቅረቡ፣ 
• · የኢትዮጵያ ክርስቲያኖች ለሃይማኖታቸው ዝም አይሉም፣ 
• · መንግስት ሃይማኖታችን ከማጥፋት ይቆጠብ፣ 
• · አጥፊዎች ለፍርድ ይቅረቡ፣ 

የሚሉ ናቸው:: የጥንታውያን ገዳማት ህልውና ማስጠበቅ የቤተ ክርስቲያናችን ህልውና ማስጠበቅ ነውና በተለያዩ ቦታዎች የሚኖሩ የተዋሕዶ ልጆች በአጠቃላይ የፖለቲካ እና የዘር ልዩነታቸውን ትተው የአንድነት ድምጻቸውን ለሚመለከተው ሁሉ እንዲያሰሙ የሰላማዊ ሰልፍ አስተባባሪዎች አደራ ብለዋል:: አሐቲ ተዋሕዶ ይህንን የአደራ ቃል ለምእመኑ ሁሉ እንዲዳረስ የበኩሏን ጥረት ታደርጋለች::

እግዚአብሔር አሐቲ ተዋሕዶ ሃይማኖታችንን ይጠብቅልን!!! 
ከአሐቲ ተዋሕዶ የተወሰደ