የመጨረሻው ..‹‹የአዋጅ ምህላ በቅድስት ሥላሴ ቤተክርስያን››

(አንድ አድርገን መጋቢት 19 2004ዓ.ም)፡- ሀገራችን ኢትዮጵያ ያላትን መንፈሳዊ እሴትና የማይናወጽ ሐይማኖት ይዛ ከትውልድ ወደ ትውልድ ስትሸጋገር የቆየችው (1ኛ) በእግዚአብሔር ቸርነት (2ኛ) በቅዱሳን ምልጃ እና (3ኛ) በአባቶቻችን ቆራጥ ሐይማተኝነትና ራሳቸውን ለቤተክርስቲያን አሳልፈው ለመስጠት በወሰዱት አርምጃ ነው:: ታዲያ በብዙ መከራና ፈተና ቤተክርስቲያናችን እዚህ ዘመን ደርሳ በአሁኑ ወቅት በውስጥም ሆነ በውጭ በመደራጀትም ሆነ በተናጥል ፤ በግልጽም ሆነ በድብቅ እየደረሰባት ያለው ፈተና የአደባባይ ምስጢር ከሆነ ሰንብቷል:: ምንም እንኳን ቤተክርስቲያን በአለት ላይ የተመሰረተችና የሲኦል ደጆች እንደማያናውጧት ብናምንም አሁን በላይዋ ላይ እንደመዥገር ተጣብቀው ደሟን እየመጠጡ ያሉት አካላት የሚያደርሱት ጥፋት ቀላል አይሆንም፡፡ በርግጥ አጠፋናት አደስናት እያሉ የሚደሰቱ ሁሉ ዘመናቸው ሲደርስ እንደሚያልፉና መታሰቢያቸው እንደሚረሳ እናምናለን:: በእኛ ዘመን በእኛ አቅም የሚጠበቅብንን ማድረግ ግን መዘንጋት የለብንም:: በቀደምት አባቶቻችን ዘመን እንኳን በቤተክርስቲያኗ ይቅርና በሃገሪቷ ለየት ያለ ክስተት ፤ ረሃብ፤ ቸነፈር፤ ጦርነት ሲነሳ ቤተክርስቲያናችን አዋጅ አውጃ ጸሎት ምህላ ታደርግና በረከትን ከእግዚአብሔር ከአምላካችን ታሰጠን እንደ ነበር በእኛ ዘመን እንኳ የምናውቀው ታሪክ ነው::

አሁን ባለንበት ዘመን እንኳን ለሃገር ችግር ቤተክርስቲያን መከራ ላይ ስትወድቅ ምህላ ሊታወጅ ቀርቶ ገዳማት በእሳት እየተቃጠሉ ምዕመናን ያላቸውን የሌላቸውን ሰብስበው ለማጥፋት ሲረባረቡ የቤተክህነቱ ሰዎች የተነሳውን እሳት ‹‹ምን ማጋነን ያስፈልገዋል›› በማለት ያፌዛሉ:: ገዳሟ ሲታረስ ፤በእሳት ሲቃጠል ፤ልጆቿ በጥይት ሲደበደቡ፤ የቤተክርስቲያኗ ጠባቂዎች አውቀው ከመተኛት አልፈው የነቃውን ለማስተኛት እየሞከሩ ነው ፤ ከዚህ በላይ ሌላ ሊመጣ አይችልም:: ለነገሩማ የእምነት ደካሞች ሆንን እንጂ አናብስትን ያስገዛላቸው አምላክ ገዳማቸውን ከእሳት መጠበቅ አይሳነውም:: ዓለም በቃን፤ የላመ የጣመ ይቅርብን፤ ብለው ሁሉን ነገር ታግሰው ከከተማ ርቀው የተቀመጡትን መነኮሳት መታደግም እንደማያቅተው እናውቃለን:: በእኛ አመለካከት እንደዚሁ ዝም ብለን ከቀጠልን ማህተባችሁን በጥሱ መባላችን አይቀርም:: መፍትሄው ደግሞ ወደ እግዚአብሔር መጮህ ነው:: አብዝቶ መጮህ ፤ሳያቋርጡ መጮህ፤ መልስ እስኪገኝ መጮህ ፤ሳይፈሩ መጮህ ፤ሳይታክቱ መጮህ:: ከላይ ያለውን አርዕስ ስታዩ ምህላ በአዋጅ ተይዟል ብላችሁ እንዳታስቡ ፤ ይህን ማድረግ መንግስት ህዝብን ማነሳሳት ብሎ ስለሚመለከተው ይህ ይሆናል ብላችሁ አታስቡ ፤ ቤተክርስትያኗ ምህላ ብታውጅ ችግሩን እንደ ችግር አደጋውን እንደ አደጋ ተቀብላዋለች ማለት ይሆናል ፤ አሁን ግን ቤተክህነቱም ሆነ አባ ጳውሎስ ችግሩን ቢውቁትም እንደ አደጋ ለመቀበል የፈሩት ነገር እንዳለ በግልጽ ይታያል ፡፡በዋልድባ አካባቢ የሚገኙት አስራ ስምንቱ አብያተ ክርስትያናት ላይ የማፍረስ ስራ ሲጀመር የዛኔም ምህላ የሚይዙ አይመስለንም ፤ ከመንግስት ተስማምተው አብያተክርስያናቱን በዶዘር እንደሚያርሷቸው በእኛ በኩል አንዳች ጥርጥር የለንም ፤ 20ሺ የአካባቢው ነዋሪ ከተነሳ 18ቱ አብያተ ክርስትያናት ብቻቸውን ይቀራሉ ፤ ስለዚ ያፈርሷቸው እና ቦታ ይቀይሩላቸዋል ፤ ቤተክርስትያኖቹ ካልፈረሱ ግድብ መስራት አዳጋች ይሆንባቸዋል ፤ ሸንኮራም ማብቀል አይችሉም ፤ የመንግስት ባለስልጣናትም በአንደበታቸው እንዳመኑት ከሲኖዶስ ጋር መስማማት ላይ ተደርሶ ነው ይህ የሚሆነው ብለውናል ፤ አቡነ ሺኖዳ መንግስትን ተቃውመው 3 ዓመት በግዞት አሁን የተቀበሩበት ገዳም እንደወረዱ ታሪካቸው ይነግረናል ፡፡( እኛ ግን አልታደልንም) ፤ ባይሆን ከ20 ዓመት በፊት የነበረውን የመጨረሻ የምህላ ጊዜ ዞር ብዬ ላስታውሳችሁ ብዬ በማሰብ የመጨረሻው ‹‹የአዋጅ ምህላ በቅድስት ሥላሴ ቤተክርስያን›› ብዬ ለፅሁፌ አርእስቱን ተጠቅሜዋለሁ፡፡ 

በወታደራዊው መንግስት መጨረሻ የስልጣን ቀናት ህዝቡ ከፍተኛ ጭንቀት ውስጥ ወድቆ ነበር እያንዳንዱ ቀን ሊያስከትል የሚችለው ነገር ማንም እርግጠኛ ካለመሆኑ ጋር አንዱ ካንዱ ይሻላል ብሎ ሊመርጣቸው ከማይችል ከሁለት ኀይሎች ጋርም የተፋጠጠበት ወቅት ነበር ፡፡ በአንድ በኩል አለሁ አልሞትኩም እያለ የሚፎክረው ወታደራዊ መንግስት ፤ በሌላ በኩል ደግሞ ወደ ፊት እየገፋ የነበረው ተቃዋሚ ኃይል አካሄድ ብዙ ግልጽ ስላልነበረ የህዝቡን ጭንቅ ይበልጥ አብሶት ነበር፡፡ 

በዚህ ሰዓት ሕዝቡ በሀይማኖቱ እየተሰበሰበ ምህላ ጸሎት ጀመረ ፡፡ በየአብያተ ክርስትያናት ህዝብ እየተሰበሰበ አለቀሰ ፤ ተከዘ እግዚአብሔርን ይቅርታ ጠየቀ ፡፡ ያንዣበበው የእልቂት ደመና ዞር እንዲል ተማጸነ ፡፡ በመንበረ ጸባኦት ቅድስት ሥላሴ ቤተክርስትያን ታላቅ የምህላ ጸሎት በይፋ ተነገረና ብዙ ህዝብና የቤተክህነት ባለ ስልጣኖች ተገኙ፡፡ በዚህ እለት አለቃ አያሌው ታምሩ በቦታ ተገኝተው እንዲያስተምሩ ተጋበዙ ፤ ያስተማሩትም ትምህር በአጭሩ ይህን ይመስላል፡፡ 

‹‹ በህዝብና በአገር ላይ ያንዣበበው የጥፋት ደመና ይገፈፍ ዘንድ ህዝቡ ወደ እግዚአብሔር እያቀረበ ያለው እግዚኦታ አስፈላጊ እና ተገቢም ነው፡፡ ግን በተለይ የዛሬን የጸሎት መርሀ ግብር ያስያዙት ባለስልጣናት የት አሉ? ዛሬ እንደ ነነዌ ሰዎች በእግዚአብሔር ፊት መውደቅ ነው የሚገባን ምክንያቱም የመጣው ፍርድ አበሳ እና ውድቀት ማንንም ከማንም ሳይለይ የሚያንገላታ በመሆኑ ነው፡፡ በአገራችን በጎ ነገር ይኖር ዘንድ ከዋና መሪ እስከ ዝቅተኛ ኑሮ ድረስ ያለው ሕዝብ ከልባዊ ጾምና ጸሎት ጋር በእግዚአብሔር ፊት ሊወድቅ ይገባል ›› በማለት ዛሬ ላይ ሆነው ሲያስቡት በብዙዎች እንደ ትንቢት የሚቆጥሩት ትምህርት ሰጥተዋል ፡፡ 

አሁንስ ቤተክርስትያን እና ገዳማት ላይ የተጋረጠው አደጋ ምህላ የሚያስቆም አይደለምን ? መስመራቸውን አይተናል ፤ ጉዟቸውን ተመልክተናል ፤ ከሰው መልስ ብናጣ እንዴት ወደ አምላካችን መጮህ ያቅተናል? ፓትርያርኩ ዝም ብለዋል ፤ ቤተክህነቱም ነገ ላይ የሚስጠይቀውን መግለጫ ሰጥቷል ፤ የሲኖዶስ አባቶች ድምጻቸው ምን ይሁን አላወቅንም ፤ መንግስት በሚዲያዎች ማስተባበሉን ተያይዞት ስራውን በመከላለከያ ሰራዊት ደጀንነት እያከናወነ ይገኛል፤ የገዳሙ አባቶችን አቤቱታ ከማቅረብ ወደ ኋላ አላሉም ፤ በአሜሪካ የኢትዮጵያ ኢምባሲም ሙስሊሞችን ባስተናገደበት ረገድ እኛን ሊያስተናግደን አልቻለም ፤ የጉዳዩ ግለት ከቀን ወደ ቀን እየጨመረ እየሄደ ነው ፤ ምዕመኑም አብዝቶ በስራቸው እያዘነ ነው ፤በአሜሪካ በተደረገው ሰላማዊ ሰልፍ አብዛኛው ምዕመኑ ስለ ገዳሙ እያለቀሰ ነበር ፤ ሰዎቹ እዚች ቤተክርስትያን ላያ ያላቸው አላማ ምንድነው ? ግብና መዳረሻቸውስ ? በዚህ በችግር ጊዜ ምዕመኑ ምህላ ካልያዘ ከዚህ የሚብስ ነገር ከየት ይመጣል ? 

የሰሜን ጎንደር ሀ/ስብከት ሊቀ ጳጳስ ብፁዕ አቡነ ኤልሳዕ የገዳመ ዋልድባ ችግር ከተሰማበት ዕለት አንሥቶ ጸሎተ እንዲያዝ ዐውጀው እንደነበር ተሰምቷል፡፡ ይኹንና ‹‹እንዴት ጸሎት ያውጃሉ፤ ዐመፅ ለመቀስቀስ ነው ወይ?›› በሚል በአንድ የዞኑ ባለሥልጣን በተጠየቁበት ወቅት ‹‹ጸሎት እንዳላውጅ ማን ይከለክለኛል?›› ብለው መልሰዋል፡፡ ለምን ምህላ አወጃችሁም ተባልን እኮ ? ፤ ይገርማል ፤ ምህላ እኮ ህዝብ  ፤ ሀገር ፤ ቤተክርስትያናት አደጋ ላይ ሲወድቁ ከአምላክ መልስ ለማምጣት ህዝበ ክርስትያኑ አንድ ላይ ሆኖ እንባውን እያፈሰሰ የችግሩን ጊዜ አምላክ እንዲያሳልፈው የሚያደርገው የህብረት ጸሎት ነው ፡፡ አሁን ግን ይህንም አታደርጉም ተባልን ፤ አሁን በቤተክርስትያናችን የውስጥ ቀኖና እና ዶግማ ላይ እጃቸውን ማሳረፍ ተያይዘውታል ፡፡ በመሰረቱ ምህላውን ቢፈሩ አይገርምም ፤ መፍራትም ይገባቸዋል ፤ የህብረት ጸሎት ሀገር ያቀናል ፤ መንግስት ይነቅላል ፤ ከአምላክ መልስ ያመጣል ፤ ምህረትን ያወርዳል ፤ መጥፎ ጊዜን ያሳልፋል ፤ ክፉዎችን ያሳልፋል እረ ብዙ ማለት ይቻላል፡፡ የምህላን ጥቅም የምናውቀው እኛ በ40 በ80 የስላሴ ልጅነትን ያገኝን ክርስትያኖች እንጂ በአብዮታዊ ዲሞክራሲ የተጠመቁት አይደሉም ፡፡ ቤተክህነቱ ትክክለኛ የቤተክርስትያኒቷ ችግር ያለችበት ሁኔታ ፍንትው ብሎ ሳይታየው ቀርቶ አይደለም ፤ ነገር ግን የፍራቻ አጥርን ከቦ ይዞት እንጂ ፤ አባታችን አለቃ አያሌው ታምሩ ደርግ ሊወድቅ ሲል በሀገሪቱ ላይ የተደቀነውን አደጋ ምዕመኑ ምህላ ይዞ በነበረበት ጊዜ ላይ ፤ ‹‹ በህዝብና በአገር ላይ ያንዣበበው የጥፋት ደመና ይገፈፍ ዘንድ ህዝቡ ወደ እግዚአብሔር እያቀረበ ያለው እግዚኦታ አስፈላጊ እና ተገቢም ነው፡፡›› ብለዋል ፡፡ አሁን ግን ቤተክርስተያን ላይ ያጋረጠው የመፈራረስ አደጋ ከፓትርያርኩ ጀምሮ ፤ ቤተክህነቱ እና መንግስት በአንድ መስመር ቆመው እያየናቸው ነው ፤ ምዕመኑ ምህላ እንኳን እንዳያደርግ እየከለከሉት ይገኛሉ ፤ ታዲያ የእምነት ነጻነት አለ ተብሎ በሚነገርባት ኢትዮጵያ ምህላ አባቶች ሲያሲዙ በሹማምንቱ መታገዱ ይህን ምን ይሉታል ? ቤተክርስትያን ሄደን በህብረት ጸሎት ማድረግ ከተከለከልን የትስ ሄደን አቤት እንበል ? በዋሽንግተን ዲሲ የኢትዮጵያ ኢምባሲ ፊት ለፊት ስለ ዋልድባ ገዳም ብለው ፤ ጉዳዩ አሳስቧቸው ጥያቄያቸውን በህጋዊ መንገድ ሊያቀርቡ የወጡትን ምዕመናን ኢምባሲው ጆሮ ሊሰጣቸው እና ችግራቸውን ሊሰማቸው እንኳን አለመቻሉ በርካታ የእምነቱ ተከታይ የሆኑትንና ያልሆኑትን ሰዎች አስገርሟል፡፡ በኦሪት መጽሀፍ ‹‹ፈርዖንም በዚህ ጊዜ ደግሞ ልቡን አደነደነ፥ ።›› ኦሪት ዘጸአት 8 ፤32 ተብሎ ተፅፏል ፡፡ አሁንም መንግስት ልቡን እንደ ፈርኦን በጥያቄዎቻችን ላይ እያደነደነው ይገኛል ፤ የአባቶችንም ጥያቄ ጆሮ ዳባ ልበስ ብሎታል ፤ ይህ ግን ይበጀዋል ብለን አናስብም ፤ 

ከ1983  በኋላ በርካታ ፈተናዎችን ቤተክርስትያኒቷ አሳልፋለች በማሳለፍም ላይ ትገኛለች ፤ በአዋጅ ግን ምህላ ሲያዝ አይቼ አላውቅም ፤ ምህላውንም በፖለቲካ አይን ማየት ጀመሩ መሰል ፤ ምህላው ቢደረግ መንግስት ብቻ ሳይሆን ቤተክህነቱም ጭምር ለራሱ የፈራ ይመስላል ፤ ለዚህ ነው ሰው ምህላ እንያዝ ፤ ለምንስ ስለ ፈተናችን ምህላ አናደርግም ? ፤ ብሎ ሲጠይቅ አይሆንም አርፈህ ተቀመጥ የሚባለው ፤ ያውቁታል እግዚአብሔር የማንንም እንባ መና እንደማያስቀር ፤ አንድ ቀን ግን እንባችን ጎርፍ ሆኖ ይዟቻ ይሄዳል አልጠራጠርም ፡፡ ምህላ እኮ ማለት በህብረት ጸሎት እናድርግ ማለት ነው ፤ ስለ ሐጥያታችን እናልቅስ እናንባ ማለት ነው ፤ ችግራችንን በተሰበረ ልብ አምላካችን ጋር እናቅርብ ማለት ነው ፤ ሌላ ምንም ትርጉም የለውም ፡፡ የእኛ መሳሪያችን ጎራዴ እና ሰይፍ ወይም ዘመናዊ መሳሪያ አይደለም ፤የኛ መሳሪያችን የህብረት ፀሎት(ምህላ)፤ ፆም  ፤ ስግደት ፤ እና የመሳሰሉት መልካም ነገሮች ብቻ ናቸው ፡፡ ታዲያ ምኑ ያስፈራቸው ይመስላችኋል?፡፡ 

ኦሪት ዘዳግም 10፤ 16 ‹‹እንግዲህ አምላካችሁ እግዚአብሔር የአማልክት አምላክ የጌቶችም ጌታ፥ ታላቅ አምላክ ኃያልም የሚያስፈራም፥ በፍርድ የማያደላ፥ መማለጃም የማይቀበል ነውና እናንተ የልባችሁን ሸለፈት ግረዙ፥ ከእንግዲህ ወዲህም አንገተ ደንዳና አትሁኑ።›› ይህን መልዕክት ለቤተክህነት ሰዎች እና ለመንግስት ባለስልጣናት እናስተላልፋለን ፤ እግዚአብሔር ታላቅ አምላክ ኃያልም የሚያስፈራም መሆኑን እወቁ ፡፡ ነገር ግን ይህን ሳትሰሙ ብትቀሩ መጽሐፈ ምሳሌ 29፤1 እንዲህ ይላል ‹‹ብዙ ጊዜ ተዘልፎ አንገቱን ያደነደነ ድንገት ይሰበራል፥ ፈውስም የለውም።›› የምታደርጉት ነገር የመጨረሻ መጀመሪያ እንዳይሆንም መጠንቀቅ መቻል አለባችሁ፡፡ 

ደርግ ስልጣኑ አፈር ሊበላ ሲቃረብ  ቤተክርስትያን ምህላ እንድታደርግ በደብዳቤ ቤተክህነቱን ጠይቆ ነበር ፤ ቤተክርስትያኒቷም ተቀብላ ምህላ አውጃ በየአብያተክርስትያናት እና በገዳሞች የሰው ደም እንዳይፈስ ፤ ሀገር ሰላም እንድትሆን ፤ ሀገሪቱ ላይ የሚመጣውን አደጋ አምላክ እንደ ንፋስ አንዲያሳልፈው በምህላ ከምዕመን ጋር በአንድነት ጸለ㝕ች፤ አዲስ አበባም ብዙ እልቂት ሳይከሰት በለሆሳሳ ሁሉን ነገር አለፈ መንግስት ወረደ መንግስት ተተካ ፡፡ ዛሬ ገዳሞቻችን ላይ የተጋረጠውን አደጋ ከመንግስት መልስ ብናጣ በምህላ ወደ አምላካችን እንዳንጮህ ጸሎታችን እንዳይሰማ እቅፋት ሆናችሁብን ፤ ነገ ግን ለራሳችሁ ህልውና ቤተክርስትያኒቷ ምህላ እንድታደርግላችሁ የምትጠይቁበት ጊዜ ሊመጣ ይችላል ፤ ማን ያውቃል ? ስልጣን መጀመሪያ እንዳለው መጨረሻም እንዳለው እወቁ፡፡ በተጨማሪ ወደ ሮሜ ሰዎች 13 ፤ ‹‹ከእግዚአብሔር ካልተገኘ በቀር ሥልጣን የለምና፤›› ተብሎ ተጽፏል፡፡