አሁንም ተሀድሶያውያኑ አልተኙልንም

• “አባ” ናትናኤል ለአየር ጤና አንቀጸ ብርሃን ኪዳነ ምህረት ቤተክርስቲያን አስተዳዳሪ ተደርገው ከቤተክህነት ተሾሙ፡፡

(አንድ አድርገን ፤ ታህሳስ 2 ፤2004)፡- ከጥቅምት ሲኖዶስ መጠናቀቅ በኋላ በተሀድሶነት ሲንቀሳቀሱ የነበሩት አቀንቃኞች በደረሰባቸው የምዕመናኑ ተቃውሞ ድምፃቸው ጠፍቶ ነበር፡፡ አሁን በደረሰን ወሬ ግን በአዋሳ ምዕመናን እንደተዘጋጀና በመንበረ ፓትርያርክ ቅድስተ ቅዱሳን ማርያም ገዳም ቅዱስነታቸውን ጨምሮ ለብፁዐን አበው በነጻና በስፍራው ለተገኘው ምዕመን በአነስተኛ ዋጋ ያተሰራጨው ቁጥር አንድ ቪሲዲ ካሴት ላይ ሦስቱ ወፎቹ ተበለው ከተጠቀሱት “መነኮሳት” አንዱ የሆነውና በወቅቱ የአዋሳ ቅድስት ሥላሴ ቤተ ክርስቲያን “አስተዳዳሪ”የነበረው “አባ” ናትናኤል በዕለተ ሰንበት እሁድ 01/04/2004 ዓ.ም ቀን በአየር ጤና አንቀጸ ብርሃን ኪዳነምህረት ቤተክርስቲያን አለቃ ሆኖ ከቤተክህነት ተሹሞ ፤ ፓትርያርኩ ሹመቱን አፅድቀውለት ቢሄድም የሰንበት ት/ቤቱ ወጣቶች ፤ የሰበካው ጉባኤው እና የአካባቢው ምዕመን በነበራቸው መረጃ መሠረት
ግለሰቡ የሃይማኖት ሕፀፅ ያለበት ፤ ሐዋሳ ላይ ከእነ በጋሻው ጋር ግሩፕ በመፍጠር ‹‹ያለ ነውጥ ለውጥ አይገኝም› ብሎ በመስበክ ፤ ሰውን ለአመፅ ያነሳሳ ፤ እና በከፍተኛ ሁኔታ የገንዘብ ምዝበራ ወንጀል ክስ የቀረበባቸው በመሆኑ እንደዚህ ዓይነት ሰው መመደቡ ለቤተክርስቲያኒቱ ከፍተኛ ጉዳት የሚያስከትል በመሆኑ አሁኑኑ እንዲመለሱ እንዲደረግ በማለት ለሕዝቡ አስፈላጊው መግለጫ ከተደረገ በኋላ ሕዝቡም የ‹‹አንፈልጋቸውም›› ድጋፉን በእልልታ በመግለጹ ፤ ቅዳሴው እንደተፈፀመ በመጡበት እግራቸው በሰላም ሌላ ብጥብጥ በእግዚአብሔር ቤት ውስጥ ከመከሰቱ በፊት ግለሰቡን ሸኝተዋችዋል ፤

ህዝቡ ለቤተክርስትያን መቆርቆሩ ጥሩ ሆኖ ሳለ ፤  “አባ” ናትናኤል ላይ በጊዜያዊ ስሜታዊነት ሌላ ችግር እንዳይፈጥሩበት ፤ በቤተክርስትያኒቱም ውስጥ ሌላ አላስፈላጊ ነገር እንዳይከሰት ተብሎ በማሰብ ጥቂት ሰዎች ምዕመኑን እንዲበተን ካደረጉ በኋላ ፤ ከአካባቢው በሰላም ለመሸኝት ኮንትራት ታክሲ ተኮናትረውላቸው አብረዋቸው ከመጡ ሁለት መነኮሳት ጋር ከቤተክርስትያን አስወጥተው ሊሸኟቸው ችለዋል ፤ ሶስት ሆነው ቤተክርስቲያኒቱን ለማስተዳደር ፤ ምንፍቅናቸውን ለመዝራት ፤ ሀዋሳ ላይ የሰሩትን ለመድገም ፤ ህዝበ ክርስትያን ለማወክ በእግራቸው ቢመጡም ምዕመኑ ግን በኮንትራ ታክሲ ሸኝተዋቸዋል፡፡

አባ ናትናኤል(የሀዋሳ ደብረ ገነት ቅድስት ስላሴ ቤተክርስትያን አስተዳዳሪ የነበሩ ) እና አባ ጊዮርጊስ (የሞኖፖል ተክለ ኃይማኖት እና የቅዱስ ገብርኤል አስተዳዳሪ የነበሩ) በፊት በተሐድሶ እና ከፕሮቴስታንት አራማጆች(ተስፋ ኪዳነምህረት ማህበር እና ከመሰሎቻቸው )ጋር በመሆን የእግዚአብሔርን አውደ ምህረት እንዲፈነጩበት ካደረጉ ሰዎች መካከል ሁለቱ ናቸው፡፡በጊዜው ገንዘብ አይናቸውን አሳውሯቸው ፤ ለአውደምህረት የማይመጥኑ ፤ ትምህርቱ የሌላቸው ሰዎችን በመጋበዝ ህዝቡን እዚህ ደረጃ እንዲደርስ ካደረኩ ሰዎች ዋናዎቹ ሲሆኑ አሁንም በሰሩት ስራ ንስሀ እንደመግባት ከእኩይ ስራቸው ሊማሩ ባለመቻላቸው አሁንም ከአቡነ ጳውሎስ ተልከው ለአስተዳዳሪነት በአየር ጤና አንቀጸ ብርሃን ኪዳነምህረት ቤተክርስቲያን መጥተዋል፡፡

አባ ናትናኤል ሲኖዶሱ ባቋቋመው አጣሪ ኮሚቴ በጊዜው እንደ ስራቸው ተመዝነው በፊት ከተሸሙበት ቦታ ተነስተዋል:: አባ ናትናኤል ‹‹ያለ ነውጥ ለውጥ አይገኝም›› ብለው በአውደ ምህረት ላይ የሰበኩ ሲሆን በአሁኑ ሰዓት ለሌላ ብጥብጥ እየተንቀሳቀሱ ይገኛሉ፡፡ እኛም መዝገባቸውን ከፍተን ለምዕመን ከማድረስ ወደ ኋላ አንልም ፤ እነርሱ ቤተክርስትያኒቷን ለማፍረስ እንዳልተኙ ሁላ ፤ እኛም ሁላችንም ነቅተን መጠበቅ ይገባናል፡፡

ከአንድ ጋዜጣ ጋር ያደረጉት ቃለ መጠይቅ ላይ ስካን ተደርጎ የተወሰደ

የአየር ጤና አንቀጸ ብርሃን ኪዳነምህረት ቤተክርስቲያን  አስተዳዳሪ መልአከ ጽዮን አባ ኅሩይ መሸሻ በቅርቡ የሰንበት ት/ቤቶች ማ/መምሪያ ሓላፊ ተደርገው ከተዘዋወሩ ጊዜ ጀምሮ ደብሩ ያለ አስተዳዳሪ ለ2 ወር መቆየቱ የሚታወስ ሲሆን ይህችን ቀዳዳ በመጠቀም አይናቸውን በጨው አጥበው አባ ናትናኤል ከአቡነ ጳውሎስ ተሹመው መምጣታቸው ለእኛም ገርሞናል፡፡እንደ አየር ጤና ምዕመናን ሁላችንም በየአካባቢያችን ያለውን ደብር የመጠበቅ ሀላፊነት እንዳለብን ልንዘነጋ አይገባም ፤ እኛ ሀላፊነታችንን ከተወጣን ቤታችን እንደ እግዚአብሔር መልካም ፍቃድ ሰላም ይሆናል፡፡

‹‹ከኛ የሚያመልጥ እርስዎ ጋር የማይደርስ መረጃ የለም››

‹‹እግዚአብሔር ቤተክርስትያንን ይጠብቅልን››