በጠራራ ፀሀይ ዝርፊያ

‹‹ ሕፃናቶቻቸውን እንደ መንጋ ያወጣሉ፥ ልጆቻቸውም ይዘፍናሉ።

ከበሮና መሰንቆ ወስደው ይዘምራሉ፥ በእምቢልታ ድምፅ ደስ ይላቸዋል።

ዕድሜያቸውንም በተድላ ይፈጽማሉ ድንገትም ወደ ሲኦል ይወርዳሉ።››

መጽሐፈ ኢዮብ 21 ፤ 11-13

(አንድ አድርገን ፤ ታህሳስ 09 ፤2004):- ከቀናት በፊት  የአሁኑ ጊዜ መዝሙሮች ፤ የፕሮቴስታንት ቅጅዎች በማለት ከቪዲዮ ማስረጃ ጋር አንዲት አጠር ያለች ፅሁፍ ማነበባችን ይታወቃል ፤ የዛኔ  የኛ ብለን የተቀበልናቸው ሰባኪያን ከመናፍቃን ካሴት ግጥም ሲገለብጡ ለማሳየት ሞክረናል፤ የዛሬው ደግሞ መናፍቃን የቤተክርስትያነችንን ፅናፅል ፤ መቋሚያ ፤ ከበሮው እና ወረቦቻችንን በፊት እኛው ውስጥ መሽገው ባስቀመጧቸው ሰዎቻቸው አማካኝነት ትምህርቱን ከቤታችን በመማር በአሁኑ ሰዓት ያለ ፍቃዳች እየተጠቀሙበት ይገኛሉ፡፡ ይህን አይነት ወረራስ እኛ እንዴት  እንመለከተዋለን ?

የኔ አጋጣሚ

ቀኑ እለተ ሰንበት ሲሆን ቅዳሴ ለማቀደስ ማልጄ ነበር ከቤት የወጣሁት ፤ ወደ ቤተክርስትያን እየሄድኩኝ ሳለ ጦር ኃይሎች አካባቢ 6 የሚደርሱ ወጣቶች አንድ ትልቅ ከበሮ ፤ ከ10 የሚበልጡ መቋሚያዎች ብዙ ፀናፅሎች ይዘው ታክሲ ሲጠብቁ ስመለከት ገዳም የሚሄዱ ወጣንያን አድጌ ነበር ያሰብኳቸው ፤ እስቲ ከየት እና ወዴት እንደሚሄዱ ጠጋ ብዬ ለመጠየቅ ወደ እነርሱ ቀረብኩኝ ፤ ቀረብ ብዬ ነገራቸውን ስሰማ መናፍቃን መሆናቸውንና አየር ጤና አገልግሎት እንዳለባቸው በጣም እንደሚቸኩሉ እርስ በእርስ ሲነጋገሩ ሰማሁኝ ፤ አንዳች ነገር ውስጤን አራደኝ ፤ ምን እየተደረገ ነው ያለው ?  የእነዚህ ሁሉ መሳሪያዎች ባለቤት የኢትዮጵያ ኦርቶዶክስ ቤተክርስትያን መገልገያ መሳሪያዎች ሲሆኑ እንዴት ማንም አንስቶ ይጠቀምበታል? ይህ ጉዳይ የሚመለከተው የትኛው የቤተክህነት  ክፍል ነው?  እነዚህ መሳሪያዎች እኮ በአንድ ለሊት ተሰርተው ያለቁ መሳሪያዎች አይደሉም ፤ ማንም ደስ ሲለው አንስቶ የሚጠቀምበትም መሆንም የለበትም ፤ ያውም መናፍቃን ፡፡ ለምንስ በህግ አግባብ ተመዝግበው የቤተክርስትያኗ የመዝሙር መሳሪያዎች መሆናቸው ታውቆ አይቀመጡም ? ጥያቄዬን ለራሴ ስጠይቅ ፤ ሳወጣ ሳወርድ ፤ መንገዱን ሳላውቀው ቤተክርስትያን ደረስኩኝ ፤ የዚያን ቀን ቅዳሴ ባየሁት ነገር በጣም ስለተናደድኩኝ  ሀሳቤ ወዲያ ፤ አካሌ ደግሞ ወዲህ ሆኖ ነበር ቅዳሴው ያለቀው፡፡ 

እነዚህ ሁሉ ነገሮች ማንነታችንን የሚገልፁ ፤ እግዚአብሔርን ለማመስገን የምንጠቀምባቸው መሳሪያዎቻችን መሆናቸውን አንርሳ ፤   ዛሬ በዚህ ድርጊታቸው ዝም ካልን ነገ የሚከሰተውን ነገር ለማወቅ ነጋሪ አያሻንም ፤ የኛ የሆነውን ነገር አውቀን አስመዝግበን ማስቀመጥ መቻል አለብን፤ ማንም እንዳይነካም በህግ አግባብ ተጠቅመን ለመቋሚያችን ፤ ለፀናፅላችን ፤ ለከበሯችን ፤ ለዜማዎቻችን ፤ ለቅዳሴያችን ፤ ለወረባችን ፤ በጠቅላላ አምልኮተ እግዚአብሔርን የምንፈፅምበትን ነገር የህግ ከለላ ካልሰጠን ነገ ፤ ከነገ በስትያ ባሉት ቀናት ቅዳሴያችንን እነሱ ጋር የማንሰማበት ምንም አጋጣሚ እንደሌለ ማወቅ መቻል አለብን ፡፡

አባ ናትናኤል ታዬ በፕሮቴስታንት እምነት ምን እየሰራ ነው? ይህ ሰው ከወራት በፊት ከእነ በጋሻው  ደሳለኝ ፤ከያሬድ አደመ ፤ ከአሰግድ ሳህሉ ፤ ከአቶ ፅጌ ስጦታው  ግሩፕ ጋር በመሆን በሀረር የተሀድሶነትን ስልጠና ሲሰጥ የነበረ ሰው ነው?   ፤ በቤተ ክርስቲያን በቅርስ የዝርፊያ አልበቃ ብሎ ወደ መዝሙር ዞሯል ፤ ፅናፅሉ ፤ መቋሚያው ፤ ከበሮው  ወረቦቻችን እንዲህ መቀለጂያ ይሁኑ? በጣም የሚያበሳጭ ነገር ነው፡፡

የአባቶቻችንን የአደራ ቃል እንጠብቅ፡፡

ብፁዕ አባታችን አቡነ ጎርጎርዮስ ካልዕ (ነፍሳቸውን ይማርልንና) በወርቃማው የአገልግሎት ዘመናቸው ለዚህ ዘመን ትውልድ ይህን የአደራ ቃል አስተላልፈው ነበር፡፡ 

“ይህ ትውልድ እምነቱንና ታሪኩን ከቀበረና ካጠፋ በኋላ ሃይማኖቱን ፍለጋ ወደ ቤተ መዘክር እንዳይሄድ ነው አደራ የምለው፡፡ ስለዚህ እምነታችሁንና መንፈሳዊ ሕይወታችሁን እንድትጠብቁ አደራዬ የጠበቀ ነው፡፡” 

 

እውነት ግን ይህ ትውልድ የአባቶቹን የሃይማኖት አደራ በትክክል እየተወጣ ይሆን? እስኪ እያንዳንዳችን እራሳችንን እንጠይቅ፡፡ ይህ መልዕክት የቤተክርስትያን መፃህፍቷን ፤ አምልኮተ እግዚአብሔር የምትፈፅምባቸውን መሳሪያዎቿን ፤ አውቀን እና ጠብቀን ለሚቀጥለው ትውልድ ሳንቀንስ እንድናተላልፍ ያሳሰቡበት አደራም ጭምር  ነው ፡፡ ይህች ርትዕት ሃይማኖት ዶግማዋና ቀኖናዋ ተጠብቆ ለቀጣዩ ትውልድ ይተላለፍ ዘንድ ምን አስተዋጽኦ እያበረከትን ነው? ቤተ ክርስቲያን ላይ ያለንን ድርሻስ ለይተን አውቀናል? ነው እንዲሁ በልማድ እየተመላለስን ነው? እስከመቼ ከንፈር መጣጭ እንሁን? ለምን የመፍትሄ አካል መሆን አቃተን ? እግዚአብሔር ልቦናችንን ይመልስልን፡፡

እሲቲ ያቀረብነውን ቪዲዮ ይመልከቱ እና የራስዎን ሀሳብ ይስጡ ፤ ለመፍትሄም ይንቀሳቀሱ