አመድ ሆኗል ብለን የተውነው ነገር ውስጡ ፍም አለመያዙን እርግጠኛ እንሁን

(አንድ አድርገን መጋቢት 20 2004 ዓ.ም)፡- ይህ የተሀድሶዎች ጉዳይ አንዳንዴ ትልቅ የመወያያ አርዕስ ይሆናል አንዳንዴ ደግሞ የሌለ እስኪመስል ድረስ ዝም ይላል፡፡ አሁን እያየን ያለነው ነገር ይህ ነው ፤ ቤተክርስትያንን ከእነዚህ ሰዎች አስተምህሮ ለመጠበቅ ብዙ ስራዎች ተሰርተዋል በመፅሄት ፤ በጋዜጣ በድምጽ እና በምስል ያስደገፉ በርካታ መረጃዎች ተለቀው ሰዎች ዘንድ ደርሰዋል ፤ አሁን ግን አልፎ አልፎ ይህን ችግር የተለያዩ ቦታዎች እንዳለ ፈፅሞም እንዳልጠፋ የሚያሳዩ ነገሮች እየተከሰቱ ነው ፤ ዋናዎቹ እና ፊት አውራሪዎቹ ከሳምንታት በፊት በቤተክሀነት አዳራሽ ጉባኤ ለማድረግ አስበው መከልከላቸውን ለመግለጽ ሞክረን ነበር ፤ ይህን ሲከለከሉ ሌላ አዳራሽ ከቤተክርስትያኒቷ ፍቃድ ውጪ ቤተክህነቱ ጉባኤውን ሳይፈቅድ ምዕመኑን አዳራሽ ሰብስበው ማካሄድ ችለው ነበር ፤

በጉባኤው ላይ አቶ በጋሻው ደሳለኝ ‹‹ለሱባኤ ገዳም ሄዷል›› ተብሎ ጉባኤውን እንዳልተካፈለ መረጃ ደርሶናል ፤ እኛ ግን ጥያቄ አለን ገዳም ያሉትን መነኮሳት ከገዳም ለማውጣት ካልሆነ በቀር ሌላ አላማ ይዞ ሱባኤ  ይገባል የሚል ግምት የለንም ፤ ነገሩ እውነት ከሆነ እሱም ገዳም ከሄደ  የገቡትን ለማውጣት እንጂ ለሌላ ነገር እንደማይገባ እናውቃለን ፤ ከወራት በፊት የደረሰን መረጃ እኛም አይተን ያረጋገጥነው ነገር አባቶችን ከገዳም የማውጣት ስራ ሲሰሩ ነበር ፤ አንድ ሙስሊም ከወሎ አካባቢ የተነሳ ሰው ትምህርታችንን ተምሮ ገዳም ልግባ ካለ በኋላ ራቅ ያለ ገዳም ገባ ፤ በኋላ ብዙ ዓመት በጾም በጸሎት ሲተጉ የነበሩትን አባት የተሻለ ነገር እንዳለ በመምከር ከገዳም አውጥቶ ወደ ምስራቅ የሀገራችን ክፍል አዋሽን ተሸግሮ ይዟቸው ሊሄድ ችሏል ፤ ቦታው ላይ ሲደርሱም ቤተክርስትያን እንዲቀጥሯቸው ፤ የቤተክርስተያኒቷን ትምህርት እንደተማሩ አገልግሎቱን ጠንቅቆ እንደሚያውቅ ካስረዳ በኋላ እሱን አሰበ ተፈሪ ተሻግሮ ሂርና አካባቢ የሚገኝ አንድ ደብር ውስጥ ሊቀጥሩት ችለዋል፡፡  እሳቸውን ደግሞ ቦርደዴ ከሚገኝበት 20-30 ኪሎ ሜትር ላይ የምትገኝው አዲስ የኪዳነምህረት ቤተክርስትያን አስተዳዳሪ አድርገው መድበዋቸው ነበር ፤ ሲጀመርም ሂርና የተመደበው ሰው ሙስሊም የሆነ ለጥፋት የተሰማራ ሰው በመሆኑ ጊዜው ሲደርስ ስራው ተደርሶበት ፤ በሰበካ ጉባኤው ተባሮ ካበቃ በኋላ ጀለቢያውን ለብሶ አሰበ ተፈሪ አንዱ ሆቴል በፖሊስ መያዙን እናስታውሳለን ፤ እኛን ከገዳም ወጡት አባት ግን እስከ ቅርብ ጊዜ ድረስ በቦታው እንደሚያገለግሉ እንደነበር የሆነውን ሁላ ሰውየው ከተያዘ በኋላ ማስረዳት ችለው ነበር ፡፡ ታዲያ አሁን እየተደረገ ያለው ነገር እየገባን ይመስለኛል ፤ ከተማ ሰው ቢያጡ የላመ የጣፈጠውን ይቅርብኝ ብሎ ገዳም የገባውን ሰው የማውጣት ስትራቴጂ ይዘው በመንቀሳቀስ ላይ ይገኛሉ ፡፡ ይህም ሰው ከዚህ የተለየ ነገር ይሰራል ብለን አናምንም፡፡

ሌላው ይህን ችግር ፈተናው ፈተና ሆኖ እንዲቀጥል የሚያደርገው ቤተክርስትያኒቷ በአዳራሽ መስበክ የከለከለች ቢሆንም ይህን የሚቆጣጠር ክፍል አለመኖሩ ጭምር ነው ፡፡ አመድ ሆኗል ብለን የተውነው ነገር ውስጡ እሳት አለመኖሩን እርግጠኛ መሆን መቻል አለብን ፤ ይህ በእንዲህ እያለ በቅርቡ ከወደ ደብረዘይት የተሰማው እየተደረገ ያለው ነገር ደግሞ አሁንም ፈተና መሆናቸውን ያሳየናል፡፡  

ደብረዘይት ከተማ ውስጥ ያሉ ስብከተ ወንጌል ሃላፊዎች ተሃድሶያውያኑን ሲጋብዙ ለምን ትጋብዛላችሁ? ቅዱስ ሲኖዶስ ያወጣውን መመሪያ ለምን አታከብሩም ? ሲባሉ  እከሌ እከሌ ተብሎ የደረሰን ደብዳቤ የለም፡፡ በደፈናው ተቆጣጠሩ ተባልን እንጂ እየሉ ይገኛሉ ፡፡  ለነገሩ ልባቸው እያወቀ ቢጋብዙም ለምዕመኑ ካላቸው አክብሮት ብቻ መልስ ሊሰጡ ይሞክራሉ፡፡ እናም  ቅዱስ ሲኖዶሱ አጉራ ዘለል ሰባኪያንና ዘማሪያን ብሎ ያገዳቸውን አካላት በስም ዝርዝር ለየሃገረ ስብከቱ ካተበተነ ተለይቶም ካልታወቀ ችግሩ የሚያቆም አይደለም ፡፡ እኛ የታየንን ችግር በየጊዜው ከመጻፍ ወደ ኋላ አንልም ፡፡ ለሁሉም የእግዚአብሔር ቸርነት የድንግል ማርያም አማላጅነት የጻድቃን ሰማዕታት ተራዳዒነት አይለየን አሜን!!!