ከአቡነ ጳውሎስ እረፍት በኋላ

• ዛሬ በመንበረ ፓትርያርክ ቅድስተ ቅዱሳን ማርያም ገዳም ስርዓተ ቅዳሴ ላይ በአቡነ ኤጲፋንዮስ የምዕራብ ሸዋ (አምቦ) ሊቀ ጳጳስ የብጹእ ቅዱስ አቡነ ጳውሎስን ነፍስ  ይማር ብለዋል፡፡

የመግቢያው በር በፖሊሶች እየተጠበቀ ነው(ታርጋ ፓሊስ -1881)

(አንድ አድርገን ነሐሴ 10 2004 ዓ.ም)፡- የተለያዩ ኢትዮጵያ ውስጥ የሚገኙ የመገናኛ ብዙሃን የአቡነ ጳውሎስን እረፍት እየዘገቡ ይገኛሉ ፤ ነገሩ ከተሰማ በኋላ የአዲስ አበባ ፖሊስ 20 የሚጠጉ ጸጥታ አስከባሪ ፖሊስ በመላክ ቤተክህነት አካባቢ ልኳል ፤ ከ15 የማያንሱ ፌደራል ፖሊሶች በቦታው ላይ ችግር እንዳይፈጠር አለፍ አለፍ ብለው ቆመዋል ፤ የቤተክህነቱ ግቢ በሰዎች ግርግር ታፍኗል ፤ የአቡነ ጳውሎስ አስከሬን ባልቻ ሆስፒታል ስለሚገኝ ብዙዎች ወደ ቦታው አምርተዋል ፤ በመንበረ ፓትርያርክ ቅድስት ማርያም ቤተክርስትያን የቅዳሴ መርሃ ግብሩ እንደ ከዚህ በፊቱ በጣም በርካታ ምዕመናን በተገኙበት እየተካሄደ ይገኛል ፤ በአካባቢው ከአዲስ አበባ እና ከፌደራል ፖሊሶች እና ትንሽ ግርግር በቀር ይህ ነው የሚባል ነገር አይታይም ፤ የአቡነ ጳውሎስ የህይወት ታሪክ በተለያዩ ኤፍ ኤም ሬዲዮኖች ላይ እየተነገረ ይገኛል ፤ በጣም ትልቅ አባት ሀገሪቱ እንዳጣች በተጨማሪ እየተዘገበ ይገኛል ፤ የቀብራቸው ሁኔታ ከቤተክህነቱ ዛሬ ወይም ነገ የሚገለጽ ይሆናል ተብሏል፡፡

የቅዱስነታቸውን ዕረፍት አስመልክቶ ብፁዕ አቡነ ፊልጶስ የጠቅላይ ቤተ ክህነት ሥራ አስኪያጅ ዛሬ ረፋዱ ላይ በጠቅላይ ቤተ ክህነቱ አዳራሽ ለተገኙት ለአድባራትና ገዳማት አስተዳዳሪዎች እንዲሁም ለምእመናንና ምእመናት ባስተላለፉት መልእክት የቅዱስ ፖትርያርኩ ዕረፍት የመላው ዓለምና የቤተ ክርስቲያኒቱ ኀዘን መሆኑን ገልጸው የሥርዐተ ቀብራቸውን አፈጻጸም አስመልክቶ በቅዱስ ሲኖዶስ አስቸኳይ ስብሰባ በሚወሰነው መሠረት ተግባራዊ እንደሚደረግ ይፋ አድርገዋል፡

ይህን ክፍተት ለመጠቀም የሚሯሯጡ ሰዎች አይጠፉምና መጠንቀቅ ያስፈልጋል ፤ ከዚህ በፊት ሲያውኩ የነበሩ ሰዎች አሁን ስለማይተኙ ነቅተን ልንጠብቅ ይገባናል ፤ የአንዱ ግርግር ለሌላው በር መክፈት መቻል የለበትም ፤ ቤተክህነቱም ሆነ ሊቃነ ጳጳሳቱ ከአሁን በኋላ የሚደረገውን ነገር በጥንቃቄ ማድረግ ይገባቸዋል ፤ ቤተክርስትያኒቱ የምትጠቀምባቸው የሂሳብ አካውንቶች ፤ ቼኮች እና መሰል ሰነዶች በአግባቡ በጥንቃቄ መያዝ መቻል አለባቸው ፤ የሚቀጥለው ፓትርያርክ በህገ እግዚአብሔር እና በቤተክርስትያን ህግ መሰረት ብቻ መመረጥ  መቻል አለበት ፤ የ1984 ዓ.ም በታምራት ላይኔ እና በቤተክህነቱ አማካኝነት የተደረጉትን  ነገሮች ደግመው እንዳይደረጉ ሁሉም አባቶች ስለ ቤተክርስትያን እና ስለ ህዝበ ክርስትያን ብለው ቀጣዩን ፓትርያርክ በጣም በጥንቃቄ መምረጥ መቻል አለባቸው ፤ ወይዘሮ እጅጋየሁንና መሰል ሰዎች የቀጣይ ፓትርያርክ ምርጫ ላይ ተጽህኗቸውን እንዳያሳድሩ ብርቱ ጥንቃቄ ያሻል፡፡ ምዕመኑም በእነዚህ አይነት ጊዜ በሰከነ መንፈስ ነገሮችን መከታተል መቻል አለበት ፤ያሳለፍናቸው እነዚያ ጊዜያት ዳግም እንዳይመጡ አሁን ላይ ቀጣዩ ፓትርያርክ ምርጫ ላይ ልንጠነቀቅ ይገባል ፤ ምዕመኑ በቀጥታ የመምረጥ መብት ባይኖረው እንኳን አባቶች ስለ ህዝበ ክርስትያኑ እና ስለ አንዲት ቤተክርስትያን ብለው የመምረጥ ሃላፊነታቸውን በጥንቃቄ ሊያከናውኑት ይገባቸዋል ፤ ሲኖዶሱ ቤተክርስትያኑቱ የሰጠችውን ኃላፊነት በአግባቡ ከመንግስትም ሆነ በሰርጎ ገቦች ተጽህኖ ራሱን ነጻ አድርጎ ማከናወን መቻል አለበት ፤

መጠንቀቅአሁን ነው  ምክንያቱም ጅብ በቀደደው ውሻ ይገባልና ፤ ለሚቀጥለው ምርጫ እንደ ግብጾች ቢቻል ሁሉንም የቤተክርስቲያን ልጆችን የሚያሳትይፍ ቢሆን ፤ ያም ባይሆን እንኳን የተመረጡ ምእመናንንና ማህበራትን የሚያሳትፍ ቢሆን መልካም ይመስለናል ፤ አሁን መታሰብ ያለበት ጉዳይ ሌላ 20 አመታትትን የመከራ ቀንበር ቤተክርስትያናችን የምታስተናግድበት አቅሙ ያላት አይመስለንም ፤ 

እግዚአብሔር ነፍሳቸውን በገነት ያሳርፍልን ከቅዱሳኑ ጋር ይጨምርልን። 

እግዚአብሔር ቤተ-ክርስቲያናችንን ይጠብቅልን! ሰላም እና ፍቅር ከሁላችን ጋር ይሁን።