ለብፁዕ ወቅዱስ አቡነ ጳውሎስ አስከሬን የሚገባውን ክብር እንስጥ

Read by PDF

መከራ ሲመጣ አይነግርም ዐዋጅ

ሲገሠግሥ አድሮ ቀን ይጥላል እንጂ

(አንድ አድርገን ነሐሴ 13 ፤ 2004 ዓ.ም)፡- ይህ ዓመት አቡነ ሺኖዳ ሳልሳዊን ከ40 ዓመታት የፕትርክና ዘመን በኋላ  አቡነ ጳውሎስን ደግሞ ከ20 ዓመት የፕትርክና ዘመን በኋላ በሞት የተለዩበት ዓመት ሆኗል ፤  የአቡነ ሺኖዳ ሞት ሲሰማ ዓለም አዝኗል ፤ በተለይ በግብጽ ውስጥ የሚገኙት የመንፈስ ልጆቻቸው እና በርካታ የእስልምና ተከታዮች በእርሳቸው ሞት ክፉኛ አዝነዋል ፤ ግብጽ በጣም ቁልፍ የሆኑ አባትን በወሳኝ ሰዓት ማጣቷን የሀገሪቱ መንግስት መስክሯል ፤ የአቡነ ሺኖዳ ሞት ከተሰማበት ሰዓት ጀምሮ ግብዓተ መሬት እስኪፈጸምበት ጊዜ ድረስ በሚሊየን የሚቆጠሩ ምዕመናን በረከታቸውን ለመካፈል ወደ ካቴድራሉ ሲጎርፉ ተመልክተናል ፤ ሚሊዮኖች የእምነት ልዩነት ሳይገድባቸው እምባቸውን አውጥተው ስለ አቡነ ሺኖዳ አልቅሰዋል ፤ ቀብራቸው በሚፈጸምበት ጊዜ በሰዎች ብዛት የተነሳ በመገፋፋት ምክንያት 4 ሰዎች ሞተዋል በርካቶች ተዝለፍልፈው ወድቀዋል ፤ ግብጽ በታሪኳ እንደ አቡነ ሺኖዳ አይነት አባት ብዙዎች በተገኙበት የቀብር ስነ-ስርዓት አከናውና አታውቅም ፤ ምንኛ መታደል ነው? የሃይማኖት አባት ሆኖ ሚሊየኖች ልብ ውስጥ መግባት መቻል ፡፡ 

የአቡነ ጳውሎስን ሞት የሰማን ጊዜ መረጃውን ትክክለኛነት ለማረጋገጥ ወደ ቤተክህነት አዳራሽ አመራን ጥቂት ሰዎች ሲያለቅሱ ተመለከትን ፤ አኛም አዘንን ፤ ሰዓቶች ካለፉ በኋላ ዜናው ብዙ ምዕመናን ጋር ሲደርስ በርካታ ሰዎች በቤተክህነት ይሰበሰባሉ ሀዘናቸውንም ይገልጻሉ የሚል ሃሳብ ነበረን ፤ ዜናው በኤፍ ኤም ሬዲዮኖች እና በኢትዮጵያ ቴሌቪዥን ከተነገረ በኋላ ቤተክህነት ገብቶ የሚወጣው ጋዜጠኛ እና የጋዜጠኛ መኪና ብቻ መሆናቸው እጅጉን አስገረመን ፤ አቡነ ሺኖዳ ሞታቸው ሲሰማ ወደ መንበረ ማርቆስ የመጣው ምዕመን እጅግ ብዙ ነበር ፤ አሁን ግን አቡነ ጳውሎስ ህልፈተ ህይወታቸው ከተሰማ ጀምሮ ወደ መንበረ ፓትርያርክ የሚመጣ ብዙ ሰው መመልከት አልቻልንም ፤ ግማሽ አዳራሽ የሚሞላ ሰው ለመመልከት ችለናል ፤ በኢቲቪ ላይ ከተለያዩ መንግስታዊ እና መንግስታዊ ያልሆኑ ተቋማት በጣም በእረፍታቸው እንዳዘኑ የሚገልጽ ደብዳቤ እያስነበቡ ይገኛሉ ፤ ምዕመኑስ ምነ ያህል ሀዘን ተሰምቷቸዋል? እኛ አናውቅም ፤ ግብጽ መንገዶች ሁላ በሰዎች ብዛት ለቀናት ተዘግተው ነበር ፤ እኛ ጋር ግን የቤተክህነት አዳራሽ በአግባቡ ሲሞላ እንኳን አልተመለከትንም ፤ ይህ ምዕመኑ በውስጡ አቡነ ጳውሎስ ላይ ያለውን ቅሬታን ያመለክታል ፤ ጥቂት የስጋ ዘመዶችና ለጥቅም የቀረቧቸው ሰዎች “አባታችን” እያሉ ሲያለቅሱ በርካቶች ደግሞ ተመልካች ሆነው ቆመዋል ፤ ስራቸውን መቃወም እንችላለን እንጂ አባትነታቸውን ግን መካድ አንችልም ፤ ፓትርያርክነት እኛ እስኪገባን ድረስ ትልቁና የመጀመሪያው የቤተክርስትያኒቱ ሹመት ነው ፤ ታዲያ ለምን ለአቡነ ጳውሎስ እንደ አቡነ ሺኖዳ እውነተኛ ሃዘን ማዘን ምዕመኑ አቃተው ? አቡነ ሺኖዳ የግብጽ ኮፕቲክ ቤተክርስትያን ፓትርያርክ ሆነው ከቀብራቸው በፊት አስከሬናቸውን ለመመልከትና በረከት ለመቀበል ለሶስት ቀን በግልጽ ለምእመናን አስከሬናቸውን በወንበራቸው ላይ አስቀምጠዋቸው ህዝብ ሲጎርፍ ተመልክተናል ፤ አሁን ግን በቤተክህነቱ ተገላቢጦሽ ሆኖብናል ፤ 5 ኪሎ አካባቢ ቢንቀሳቀሱ ከወትሮ የተለየ ነገር አይመለከቱም ፤ የስብከተ ወንጌል አዳራሹ ለአቡነ ጳውሎስ ሀዘኑን የሚገልጽ ምዕመን በቂ ነው የሚባል የሰው ብዛት አይታይበትም ፤ ነገር ግን ከ4 ኪሎ እስከ 5 ኪሎ ያሉት ካፍቴሪያዎች በሰዎች ሙሉ ሆነው ይመለከታሉ ፤ አቡነ ጳውሎስ በፓትርያርክነት ዘመናቸው በርካታ ችግሮች እንዲፈጠሩ በር ከፍተው ሊሆን ይችላል ፤ ከስርአተ ቤተክርስትያን ውጪ በርካታ ነገር አድርገውም ሊሆን ይችላል ፤ ስርአተ ቤተክርስትያንን ሳያከብሩ በርካቶችን ሹመው በርካቶችን ደግሞ አውርደው ሊሆን ይችላል ፤ ከሲኖዶስ በላይ ሆነው ለቅዱስ ሲኖዶስ አልገዛም ብለውም ይናል ፤ በዘመናቸው የቤተክርስቲያኒቱን ገንዘብ ያለአግባብ በትነው ሊሆን ይችላል ፤ ይህን እና መሰል በርካታ ነገሮችን አከናውነው ሊሆን ይችላል ፤ እኛ ግን እንደ አንድ ክርስትያን እግዚአብሔር ነፍሳቸውን ከአብርሐም ከይስሀቅ ከያቆብ ጎን እንዲያሳርፍ ልንጸልይላቸው ይገባል ፤ የእርሳቸውን በደል ስንመለከት የእኛ ቢታወሰን ኖሮ እጅ መጠቋቆሚያ ባላደረግናቸው ነበር ፤ “እንዳይፈረድባችሁ አትፍረዱ፤ በምትፈርዱበት ፍርድ ይፈረድባችኋልና፥ በምትሰፍሩበትም መስፈሪያ ይሰፈርባችኋል። በወንድምህም ዓይን ያለውን ጉድፍ ስለምን ታያለህ፥ በዓይንህ ግን ያለውን ምሰሶ ስለ ምን አትመለከትም?” ማቴዎስ ወንጌል 7፤1  

አንድ አባት በአንድ ወቅት አውደ ምህረት ላይ “እንደ እኛ ሃጥያትና ክፉ አባት ቢሰጠን ለምን እናማርራለን ? መጀመሪያ ጥሩ መሪ እንዲሰጠን ጥሩ አባት እንዲሾምልን የምንፈልግ ከሆነ እኛ ጥሩ ሆነን መገኝት ይኖርብናል” በማለት ሲያስተምሩ ነበር ፤ ያለፉትን 20 ዓመታት ቤተክርስትያን ያሳለፈችውን መከራ ሳንረሳ በዚህ በሱባኤ ወቅት ልናስባቸውና አስከሬናቸው ግብአተ መሬት የሚፈጸምበት ቀን የሚገባውን ክብር ለመስጠት በቅድስት ሥላሴ ቤተክርስትያን በመገኝት ከአባቶች ጋርም ጸሎት ልናደርግላቸው ይገባናል ፤  

መወድስ ተቀኙ ካህናቶች በያምባው

ፓትርያርክ ነው ብለው ሥላሴ የገባው

የሚያሳዱንን ካሳደድናቸው ፤ የሚሰድቡንን ከሰደብናቸው ፤ በደል ላደረሱብን ሰዎች ቂም ከያዝን የእኛ ክርስትና የቱ ጋር ነው ? “ቂም አትያዝ” ኦሪት ዘሌዋውያን 19፤18 አሁን የያዝንባቸውን ነገሮች በመርሳት የምድር የመጨረሻ ስንብታቸው ላይ እንደ ኦርቶዶክሳዊ ክርስትያን በቀብር ቦታው ላይ መገኝት አስከሬኑንም ማጀብ ይገባናል ፤ የሳቸው ዘመን እንባ አስለቅሶን ሊሆን ይችላል ፤ ወደፊት ደም እንዳናለቅስ በርትተን እንጸልይ ፤ “ስለ ምን ትተኛላችሁ? ወደ ፈተና እንዳትገቡ ተነሥታችሁ ጸልዩ አላቸው።” የሉቃስ ወንጌል 22፤46 ስለዚህ እግዚአብሔር በአባቶች ጉባኤ ተገኝቶ መልካሙን ያመላክታቸው ዘንድ ልንጸልይ ይገባል ፤ የእሳቸው እረፍት ለቤተክርስቲያን የተሻለ ዘመን እንደሚመጣላት የሚናገሩ ሰዎች አሉ ፤ የባሰው እንዳይሆን መጸለይ ይገባል ፤  ሚዛኑን ለአምላክ ትተን ብጹእ ወቅዱስ አቡነ ጳውሎስ ምንም ይሁን ምን ለ20 ዓመታት ቤተክርስቲያንን በፓትርያርክነት መርተዋል ፤ ይህ የኢትዮጵያ ኦርቶዶክስ ተዋህዶ ቤተክርስትያን የ5ተኛው ፓትርያርክ ሞት ነው፡፡

ከዚህ በተጨማሪ

“አምላክ በጨለማ እንዳይሄድ ዐውቃለሁ

ቀን ያልፋል ብለውኝ እጠባበቃለሁ .” እንዳለ ያገሬ ሰው እኛም ይህ ጊዜ ሃላፊ መሆኑን ተረድተን በትእግስት መጪውን መልካሙን ጊዜ ብንጠባበቅ መልካም ነው፡፡

ቸር ሰንብቱ