በቤተል ጊዮርጊስ ከይዞታ ጋር ተያይዞ በተነሳ ተቃውሞ ሁለት ሰዎች ሞቱ

(አንድ አድርገን ግንቦት29 ፤ 2004 ዓ.ም)፡- ቦታው ኮልፌ ቀራንዮ ክፍለ ከተማ ቤተል ጊዮርጊስ ቤተክርስትያን ሲሆን ይህ ቦታ አዲስ አበባ ውስጥ ከሚገኙት ሰፊ ቦታ ካላቸው አብያተክርስያናት አንዱ ነው ፤ ቦታው ህጋዊ ካርታ ያለው ቢሆንም አጥር ግን የለውም ፤ በዚህ መሀል ባዶ ቦታ ነው በሚል ከቤተክርስትያኒቱ ቦታ ላይ መንግስት በመቁረስ ለሙስሊሞችና  ለተለያዩ መሰረተልማቶች በሊዝ የሸጠ ሲሆን ይህን ያወቁት የአካባቢው ነዋሪዎች በመሰባሰብ በተወካዮቻቸው አማካኝነት ክፍለ ከተማ ድረስ ሂደው ጉዳዩን መንግስት ላስቀመጣቸው ሃላፊዎች ቢያስረዱም ሰሚ አላገኙም ነበር፤ በዚህ ሰዓት “እናንተም መታችሁ ቦታውን ታጥራላችሁ እኛም ዝም ብለን አንመለከታችሁም” በማለት በቁጣ ሊመለሱ ችለዋል ፤ ይህ ከሆነ በኋላ የቤተክርስያኒቱ ቦታውን ሲታጠር በቦታው በመገኝት የተመለከቱ ክርስትያኖች ባነሱት ተቃውሞ አንድ ወጣትና አንድ ፖሊስ በግጭቱ ህይወታቸው ሊያልፍ ችሏል ፤የተፈጠረው ሁኔታ ያልተጠበቀ እና ተቃውሞውም ይበረታል ብሎ ያልጠበቀው መንግስት የክርስትያኖቹን ቁጣ በቀላሉ ለማብረድ ባለመቻል በአከባቢው የነበረው የፖሊስ ኋይል ህዝቡን ለመበተን በቂ ባለመሆኑ ከፌደራል ፖሊስ በርካታ የታጠቁ ፌደራል ፖሊሶች ወደ ቦታው በመምጣት ለተቃውሞ የወጣውን ህዝብ በአስለቃሽ ጭስ በትነዋል ፤ አስለቃሽ ጭሱ ወደ ጊዮርጊስ ቤተክርስያን ግቢ ውስጥ ሲተኩሱ ተስተውሏል ፤ በርካቶችም ለእስር ተዳርገዋል ፤ ይህ ተቃውሞ እስከ ምሽቱ 2 ሰዓት ድረስ የህዝቡ ተቃውሞ በመቀጠሉ አካባቢው ውጥረት ነግሶበት አምሽቷል ፤ በዚህ ሁኔታ ህዝቡ ክፉኛ የተቆጣ በመሆኑ መንግስት ያለአግባብ የሸጠውን የቤተክርስትያኒቱን ቦታ ካልመለሰ ከዚህ የባሰ ነገር እንዳይፈጠር ያሰጋል ፤ በአሁኑ ሰዓትም የጦር ካምፕ ይመስል ቦታው በከፍተኛ የፖሊስ ሀይል እየተጠበቀ መሆኑን ለማወቅ ችለናል፡፡



ከዚህ ጋር በተያያዘ ከጊዮርጊስ ወረድ ብሎ የሚገኝው ከ10 ሺህ ካሬ በላይ የሚሆነው "ወይራ ታቦት ማደሪያ" የሚባለው ስፍራ ለጥምቀት ከ5 በላይ ታቦቶች የሚያርፉበትነና ከጥር 20-22 ድረስ በየጊዜው ትልቅ ጉባኤ የሚካሄድበት ቦታ ነው ፤ የዚህ ቦታ ህጋዊ ባለቤት ቤተክርስትያኒቱ ብትሆንም እስከ አሁን ድረስ ሳይታጠር እንዲህው ተቀምጦ ይገኛል ፤ ወደፊት እነዚህን የመሰሉ ቦታዎች የግጭት መነሻ እንዳይሆኑ የሚመለከተው አካል ትኩረት ቢሰጣቸው መልካም ነው፡፡

ከመስከረም 9 1998 ዓ.ም በፊት የተሰሩት በአዲስ አበባ የሚገኙ 120 ገዳማትና አድባራት የጸበል ቦታዎች ፤ የመካነ መቃብር ፤ የበዓለ ጥምቀት ማክበሪያ እና መሰል ስፍራዎች ሙሉ ይዞታቸውን ሳይቀነስ የይዞታ ማረጋገጫ እንደተዘጋጀላቸው ከወራት በፊት ገልጸን ነበር ፤ በዚህ ወቅትም አቡነ ጳውሎስ ከአዲስ አበባ መስተዳደር ተወካይ የይዞታ ማረጋገጫ ካርታ መቀበላቸው ይታወሳል ፤ እነዚህ ቦታዎች ህጋዊ ካርታ እስካገኙ ድረስ ቤተክህነቱ እና አብያተክርስትያናቶቹ ቦታቸውን የመከለል ሀላፊነትን መወጣት አለባቸው፤ በከተማዋ ከ152 በላይ የቤተክርስትያኒቱ ገዳማት አድባራት እና የጸበል ቦታዎች ሲኖሩ ከነዚህ ውስጥ 31 ገዳማትና አድባራ ቀደም ብሎ የይዞታ ማረጋገጫ ካርታ መውሰዳቸው ይታወቃል፡፡

አሁንም መንግስት እጁን ከቤተክርስያናችን ላይ ያንሳ ፤ ዋልድባ ድረስ ሄደን የሚሰራውን የስኳር ልማት  መቃወም ቢያቅተን እንኳን እዚህው አጠገባችን ያለውን የቅዱስ ጊዮርጊስን ቤተክርስትያን ቦታ ቆርሶ ሲሸጥ አይተን ዝም የምንልበት አይን ፤ ሰምተን የምናልፍበት ጆሮ የለንም ፡፡