ለቤተክርስቲያን አስተዳራዊና መንፈሳዊ ትንሣኤ ነቀፌታ የሌለባቸውን አቡነ ዩሴፍ መምረጥ እንደ አማራጭ

• “ለመሆኑ ከፈቃደ እግዚአብሔር ለምን ትሸሻላችሁ? እናንተንስ እንዴት እንመናችሁ?” አቡነ ዩሴፍ የተናገሩት በቅዱስ ሲኖዶስ ጉባኤ ምርጫው በእጣ እንዲሆን ከተወሰነ በኋላ በማግስቱ ላስቀለበሱት አባቶች
• አቡነ ዩሴፍ በቤተክህነቱ ካለው ዘረኝነት፣ ክፋት፣ ተንኮል፣ ፍቅረ ንዋይ፣ ስሜታዊነት(ግብታዊነት) ተለይተው ፥አርአያ ክህነትን ጠብቀው ፥ ሥጋ እንዳየ አሞራ በቤተክርስቲየኒቱ ላንዣበቡ ተሐድሶ መናፍቃን መዶሻ የሆኑ ጥሩ አባት ለናፈቀን የቀረቡልን ሲሳይ ናቸው፡ 

 

(አንድ አድርገን የካቲት 20 2005 ዓ.ም)፡- የቤተ ክርስቲያኒቱ አንድነት ይጠበቅ ዘንድ በሀገር ውስጥና ከሀገር ውጭ ያሉ አባቶች ልዩነት ጠፍቶ በፍቅር በአንድነት መንበረ ፓትርያርኩን ተረክቦ በአባትነት የሚመራን መልካም እረኛ ከሐሜትና ተንኮል በጸዳ ልቡና ምእመናንም ሆኑ ካህናት እንደልጅነት፤  ፓትርያርኩ እንደ አባት በመሆን በፍቅር እንኖር ዘንድ ያልተመኘና ያልጣረ ቢኖር የቤተክርስቲያንን ሁለንተናዊ ዕድገት እንዲሁም ሰላምና ፍቅርን የማይወድ የክፋት አበጋዝ ብቻ ነው፡፡ሆኖም ግን የዚህች ርትዕት ቤተ ክርስቲያን ፈተናዋ ሊቋጭለት አልቻለምና  ይህ ምኞታችን በእውነተኞቹ አባቶችና ምእመናን ጥረት ፈርጀ ብዙ በሆኑ መንገዶች ቢሞከርም ለጊዜው አልሆነም፡፡የፓርትያርክ ምርጫ ጉዳይ ከተወሰነ በኋላ ግን ከድጡ ወደማጡ እንዳንሔድና ለመናፍቃንና እለከርሶሙ አምላኮሙ /ሆዳቸው አምላካቸው/ ለተባሉት እየበሉ ለሚርባቸው ጭራቆች አሳልፎ ከመስጠት፣ መንጋውን ከመበተንና የለቅሶውን ዘመን ከማራዘም ያለፈ ረብ ያለው ለውጥ ማምጣት አይቻል ይሆናል የሚል ስጋት ብዙዎቹ የሚጋሩት ሆኖ ቆይቷል፡፡

ቤተ ክርስቲያናችን ሰማያዊ ዓላማ ያላት ቅድስት፣ ርትዕት ይህ ቀረሽ የማትባል ስንዱ እመቤት መሆንዋ ከእያንዳንዱ ሰው ልቦና የሚጠፋ አይደለም፡፡ በዶግማዋ፣ሥርዓቷና ትውፊቷ ምድራውያን መላእክትን ያስገኘች የነቃች የበቃች መሆንዋን ዓለም የመሰከረው ነው፡፡ ይሁን እንጂ ሌት ተቀን የሚበላውን ፈልጎ እንደሚያገሣ አንበሳ የሚያደባው ጥንተ ጠላታችን ዲያብሎስ እስከ ምጽአት ድረስ የሚፈታተናት መሆኑ ይታወቃል፡፡ በዚህ መሠረት አስተዳደራዊ ችግሯ እግር ከወርች ሰቅዞ በያዘ እሥራት ዝርክርክ አስተዳደር፣ በአካባቢ ጠብ የሚፈላለጉ፣ ሥራቸውን ሰድደው በመደላደል ቤተ ክርስቲያኒቱን የወንበዴዎች ዋሻ ለማድረግ በጨለማ ቡድንነት የሚንቀሳቀሱ እንኳንስ በኛ ቤት ልናየው በዓለሙ እንኳ ጸያፍ የሆነውን በተቀደሰው አደባባይ የሚፈጽሙ አሁንም ወስነው ቆርጠው ተነሥተው እርካቡን ረግጠው ወደ ኮርቻ ለመውጣት በፈለጉም ጊዜ ገንዘብ መድበው የሚመቻቸውን መዋቅር ሁሉ ያለአግባብ በመጠቀም የሚፈልጉትን ፓትርያርክ በማስመረጥ ገዳማቱን ለመፍታት፣ ቤተ ክርስቲያኒቱንና ምእመናኑን ባለጌ እንደፈረፈረው ዳቦ ለመበታተንና ለመቀሰጥ ተዘርፎ አላልቅ ያለውን ከድኃው የሚሰበሰበውን ለመዝረፍ ቤተ ክርስቲያኒቱን ዛሬም መካነ ብካይ ሊያደርጓት ደፋ ቀና እያሉ ነው፡፡

ዋናው ጉዳይ በጊዜያችን በዘመናችን ያለን ክርስቲያኖች የአቅማችንን በመሥራት የሚጠበቅብንን ሓላፊነት እንወጣ ዘንድ በ6ኛ ፓትርያርክነት የሚመረጡት አባት ማን ቢሆኑ ይበጀናል? የሚለው ነው፡፡

በመጀመሪያ እጩ ሆነው የቀረቡ አምስቱ ጳጳሳት ቡራኬያቸው ይደርብንና የቤተ ክርስቲያኒቱን ችግር አስተዳደራዊና መንፈሳዊ በማለት በሁለት ፈርጅ እናስቀምጠው.. ከምንም በላይ መንፈሳዊ አባት ከሆኑ አስተዳደሩን በጠንካራ ሥራ አስኪያጅና ቋሚ ሲኖዶስ መደገፍ ይቻላል፡፡ ምእመናን የሚቀበሉት መንፈሳዊ አባትነትን ግን በድጋፍ ልናመጣ አንችልም የአቡነ ጳውሎስ ችግር የዕውቀት እጥረት ሳይሆን የቅንነትና መንፈሳዊነት እጥረት ነው፡፡ በመሆኑም በእጩነት ከቀረቡት አባቶች መካከል ከሚከተሉት ነጥቦች አኳያ ብፁዕ አቡነ ዮሴፍ     ቢሆኑስ፤

መንፈሳዊ ሕይወት 1. በጾምና በጸሎት፡ ብፁዕ ወቅዱስ አቡነ ተክለሃይማኖትን ሊያስታውሱን

                   የሚችሉ አባት በመሆናቸው፤

መንፈሳዊ ሕይወት 1. በጾምና በጸሎት፡ ብፁዕ ወቅዱስ አቡነ ተክለሃይማኖትን ሊያስታውሱን

                   የሚችሉ አባት በመሆናቸው፤

                                    2.ማኅበራዊ ትሩፋቶች፡ በሚሰጣቸው ደመወዝ አሳዳጊ የሌላቸውን ሕጻናት     በመኖርያቸው የሚያሳድጉ የድሀ አባት መሆናቸው

                3. ንጽሕና፡ በሐሜት ደረጃ እንኳን ምንም የማንሰማባቸውና ሀብተ

                       ንጽኅ(ንጽሕና) የያዙ ስለሆኑ

ሰብእና፡ በትእግስትና በታረመ ንግግራቸው ብዙ ችግሮችን የመፍታት ጸጋ ስላላቸው

አቋም፡ በቅዱስ ሲኖዶስ ጉባኤ ምርጫው በእጣ እንዲሆን   ከተወሰነ በኋላ በማግስቱ ላስቀለበሱት አባቶች ለመሆኑ ከፈቃደ እግዚአብሔር ለምን ትሸሻላችሁ? እናንተንስ እንዴት እንመናችሁ? በማለት እስከመጨረሻው በአቋም ከመጽናታቸውም ባሻገር አቋም የሌላቸውን አባቶችን መገሰጻቸውና ለዕርቀ ሰላሙ የነበራቸው ጽኑ አቋም

በውጭ ዓለም ተሞክሮ፡ በአውሮፓም በጵጵስና በምእመናኑ ዘንድ እጅግ ተወደው ያገለሉ ደግ

        አባት መሆናቸው

ገዳማዊ ሕይወት፡ የገዳም አበምኔት በመሆን ያገለገሉ ጣዕመ ገዳምን የሚያውቁ ለገዳሞቻችንም ትኩረት ሊሰጡ የሚችሉና በተግባር ታይተው የተመሠከረላቸው መሆኑ

የቋንቋ ችሎታ፡ በኦሮምኛ ቋንቋ በማስተማርና በኦሮሚያ አካባቢ ቤተ ክርስቲያኒቱ የእነገሌ ብቻ ናት በማለት ለተወሰነ አካባቢ በሚሰጡ አጽራረ ቤተክርስቲያን ከእውነት መንገድ ለወጡ በብዙ ሚሊዮን ለሚቆጠሩ ወገኖቻችን ፈውስ ስለሚሆኑ ተመራጭ ያደርጋቸዋል፡፡

በአጠቃላይ በቤተክህነቱ ካለው ዘረኝነት፣ ክፋት፣ ተንኮል፣ ፍቅረ ንዋይ፣ ስሜታዊነት(ግብታዊነት) ተለይተው ፥አርአያ ክህነትን ጠብቀው ፥ ሥጋ እንዳየ አሞራ በቤተክርስቲየኒቱ ላንዣበቡ ተሐድሶ መናፍቃን መዶሻ የሆኑ ጥሩ አባት ለናፈቀን የቀረቡልን ሲሳይ ናቸው፡፡

በመሆኑም በቤተክርስቲያን ፍቅር ለሚቃጠልና የቤተክርስቲያንን ትንሣኤ ለሚናፍቅ ሁሉ ብፁዕ አቡነ ዮሴፍን መምረጥ ብቸኛና ለድርድር የማይቀርብ የወቅቱ ክርስቲያናዊ ጥሪ መሆኑን የአንድ አድርገን ኢዲቶሪያል ኮሚቴ ያምናል።