በፓትርያርክ ምርጫ ላይ መንግስት ተጽህኖ ለማሳደር የራሱን ቡድን መሰረተ

(አንድ አድርገን ጥቅምት 30 2005 ዓ.ም )፡- የቀድሞ ፓትርያርክ ከአቡነ ጳውሎስ ሞት በኋላ ብዙዎችን እያነጋገሩ ካሉት ነገሮች ውስጥ ስለ ቀጣይ ፓትርያርክ ምርጫ  እና እርቀ ሰላም ይገኙበታል ፤ ከሁለት ሳምንት በፊት በፌደራል ጉዳዮች አማካኝነት የራሱን ተጽህኖ ማሳረፍ የሚልች 7 ሰዎችን የያዘ ቡድን በሚስጥር መመስረቱ ጉዳዩን በቅርበት ከሚያውቁ ሰዎች  ተሰምቷል ፤ ይህ ቡድን የሚመራው በዶ/ር ሽፈራውና በምክትላቸው በአቶ ሙሉጌታ አማካኝነት ነው ፤ ባሳለፍነው የቅዱስ ሲኖዶስ ጉባኤ ላይ ይህ ነው የሚባል ጫና ያላደረበት ጉባኤ ቢካሄድም ወደፊት የምርጫ ሕጉ ተዘጋጅቶ ካበቃ በኋላ ሁሉም ነገሮች በሕግና በሕግ ብቻ እንዳይከናወኑ መንግስት እጁን በዚህ ቡድን አማካኝነት እንደሚያስገባ እና እንደማያስገባ ቀኑ ሲደርስ የሚታይ ነገር ይሆናል፡፡በሕገ-መንግሥቱ ላይ “ሃይማኖት በመንግሥት ጣልቃ አይገባም ፤ መንግሥትም በሃይማኖት ላይ ጣልቃ አይገባል” የሚል አንቀጽ ቢኖርም በተዘዋዋሪ መንገድ የመንግሥት እጅ ከሃይማኖቶች ላይ ጣልቃ እየገባ ይገኛል፡፡ 

በአሁኑ ሰዓት ይህን ስውር እጅ ማክሸፍ ይቻል ዘንድ መፍትሄው ያለው ብጹአን አባቶቻችን ጋር ነው ፤ በጊዜው በውስጥም ይሁን በውጪ የሚካሄዱ ሕገ ወጥ የሆኑ ድርጊቶችን በመቃወም የተሰጣቸውን እና የተሸከሙትን ከባድ ኃላፊነት ከግምት ውስጥ በማስገባት ኃላፊነታቸውን መወጣት መቻል አለባቸው፡፡ ይህ ምርጫ አልጋ በአልጋ ይሆናል ተብሎ ባይጠበቅም የሚመጡትን ጫናዎች በመቋቋም ስለ ህዝበ ክርስትያን እና ስለ ቤተክርስትያን ብለው ሁሉንም ነገር በአግባቡ ያከናውኑ ዘንድ ምዕመኑ ከፍተኛ ተስፋ ጥሎባቸዋል፡፡ 

ስለ ቀጣዩ እርቀ ሰላም እየተሄደበት ያለው መንገድ መልካም ቢሆንም ለዓመታት የአዲስ አበባው እና የአሜሪካው ሲኖዶስ በመባል ሲጠሩ የነበሩትን አንድ ለማድረግ ከዚህ የተሻለ ጊዜ ይመጣል ብሎ ማሰብ ይከብዳል ፤ አንድ የምንሆንበት ጊዜ አሁን ሊሆንም ላይሆንም ይችላል ፤ ነገር ግን ከውስጥም ከውጭም ያሉ አባቶች ያለፈውን ሳይሆን የወደፊቱን በማሰብ ሆደ ሰፊ በመሆን ቤተክርስቲያኒቱ አንድ የምትሆንበትን መንገድ ቢጠርጉ መልካም ነው ፤ ከታሪክ ተወቃሽነትም ለመዳን ይችሉ ዘንድ ምርጫው በእጃቸው ይገኛል ፤ አሸናፊም ተሸናፊም ሳይኖር ይቅር ለእግዚአብሔር ቢባባሉ ቤተክርስትያኒቱን ወደ ቀደምት ስሟ እንደሚመልሷት ተስፋ አለን፡፡

በሌላ ዜና ወ/ሮ እጅጋየሁ የምታንቀሳቅሰው ቡድን በሊቀ ሊቃውንት እዝራ የሚመራው ቡድን የራሱን ተጽህኖ ለማሳደርና ከመንግስት ጋር አብሮ ለመስራት እየተንቀሳቀሰ ይገኛል ፤  ሊቀ ሊቃውንት እዝራ በቅዱስ ኡራኤል ቤተክርስትያን ላይ ዘረፋ በማካሄድ ታስረው እንደወጡ ይታወቃል ፤ በሌላ በኩልም በአዲሱ ሚካኤል ቤተክርስትያን ላይ ባደረጉት የገንዘብ ምዝበራ ጉዳዩ ምዕመኑ አቤት ለማለት 10 ትላልቅ  መኪናዎችን በመመሙላት ቤተክህነት ድረስ መምጣታቸው ይታወቃል፡፡ 

ጊዜው ሲደርስ ሁሉን ነገር በግልጽ እናየዋለን

እግዚአብሔር ለአባቶቻችን ብርታትና ጥንካሬን ይስጥልን