በእንተ ሐውልት

From :- Abel Wabella

ለአንዳንድ ኦርቶዶክሳውያን
(አንድ አድርገን ህዳር 19 ፤ 2005 ዓ.ም)፡- የሰማዕቱ አቡነ ጴጥሮስን ሐውልት መነሳት አስመልክቶ ጥቂት ያሳዘኑኝ ጉዳዮች አሉ፡፡ የመጀመሪያው “ሐውልቱ መነሳቱ ካልቀረ ቢነሳ ችግር የለውም” የሚለው ነው፡፡ ለኔ እንደሚገባኝ እንዲህ ማለት አቡኑ የከፈሉትን መስዋዕትነት ማቃለል እና ዋጋ ማሳጣት ነው ፡፡ ይህን የምልበት ምክንያት መጀመሪያ ስርዓቱ (ሕወሓት መር) ቤተ ክርስቲያኒቷን ሆን ብሎ ከስሯ ለመንቀል እንደሚንቀሳቀስ የታወቀ ነው፡፡ ከትጥቅ ትግል እስካሁን ድረስ ይህ አቋሙ አልተለወጠም ፤ ትላንት ደብረ ዳሞ ገብተው ቤተ ክርስቲያኒቷን እንዲሰልሉና እንዲሰነጥቁ የሐሰት መነኮሳት እያሰለጠነ ሲያሰርግ የነበረው ስብሐት ነጋ ዛሬ ደግሞ ትልቁ ስኬታቸው የኦርቶዶክስ እና የአማራ(አማራ የሚባል ነገር?) “የበላይነት”(quote unquote ) ማስቀረት እንደሆነ በድፍረት ተናግሯል፡፡ ይህ የሚያሳየው ስርዓቱ በተገኘው አጋጣሚ ሁሉ የጠነከረውን በትር ቤተ ክርስቲያኒቷ ላይ እንደሚያሳርፍ ነው፡፡ ስኳር ፋብሪካ ሲባል ተነስቶ ዋልድባ ላይ ፣ መንገድ ሲባል ደግሞ ተነስቶ የሰማዕቱ ሐውልት የሚታይ ከሆነ ለምን ? ብሎ መጠየቅ ያስፈልጋል፡፡ በሰለጠነው አለም የአንድ ግለሰብ መኖሪያ አከባቢ አዲስ ነገር ሲሰራ  የሚሰራው ነገር በሰውዬው የወትሮ እንቅስቃሴ፣ አስተሰሳሰብ ፣ ልማድ ላይ ያለው ተጽእኖ ታይቶ በንድፍና በሞዴል ቀርቦለት የግል አስተያየቱን እንዲሰጥ ይጠየቃል፡፡ የአንድ ግለሰብ፣ የአንድ ነፍስ፣ የአንድ ንፋስ መብት! እኛ ግን ብዙ ሚሊዮኖች ሳለን እንደማንኛውም ተራ ዜና፣ እንደ ማንኛውም የሐማስ ሮኬት ከሬዲዮ መስማታችን እጅግ ያሳዝናል፡፡ እውነታው ይህ ሆኖ ሐውልቱ እንደማንኛውም ድንጋይ እናነሳዋልን ሲሉን ተሸቀዳድመን “የሚመለስ ከሆነ” ብለን እሺ ማለታችን  እጅግ የሚያሳፍር ነው፡፡

ሌላው ይህን ንድፍ የሰሩት ሰዎች እኛም የተማርነውን ምህንድስና የተማሩ ከሆነ አንድን ነገር ለመስራት አንድ ሺ አንድ መንገዶች ይኖሩታል፡፡ ከነዚህ ውስጥ ያለውን ፋይናንስ እና ሌሎች አስገዳጅ ሁኔታዎች ግምት ውስጥ ስናስገባ እጅግ ብዙ አማራጮች ይቀሩናል፡፡ መቼም ቦታውን የምታውቁ እና ለሙያው ቅርብ የሆናችኹ ሰዎች ታውቁታላችኹ ፤ የአቡኑን ሐውልት ሳይነካ የሚያልፍ የባቡር መስመር መዘርጋት ይቻላል፡፡ ለባለታሪኩ ተገቢውን ዋጋ ከሰጡ “ከልብ ካለቀሱ እንባ አይገድም” አንዲሉ አበው ያለ ጥርጥር ይቻላል፡፡ ከቤተ ክርስቲያኒቷ እና ስርዓቱ ተራክቦና የኋላ ታሪክ በመነሳት ምን እየተሰራ ነው? ከዚህ ፕሮጀክት ጀርባ እነማን አሉ? ብሎ አጥበቆ እንደመጠየቅ ዝም ማለት ወይም “ተመልሶ በቦታው ከቆመ ችግር የለውም” ማለት ተገቢ አይደለም፡፡ አባቶቻችን እነ አቡነ ጴጥሮስም ይህን አላስተማሩንም፡፡እሳቸውም  እሺ ብለው አጎንብሰው ለጣልያን አድረው መኖር ይችሉ ነበር፡፡ ነገር ግን በመንፈስ ከፍ ያሉ በመሆናቸው የበለጠውን መረጡ፡፡ ጉባኤ ዘርግተው፤ አበ ነፍስ ሆነው ካስተማሩት በገነተ ልዑል በፈሰሰው ደማቸው ያስተማሩት በለጠ፡፡ ይህንን አስቤ የአባቶቻችን ልጆች ባለመሆናችን እጅግ ሀዘን ገባኝ፡፡ ከዚህ ሐዘኔ ምን ይነጥለኝ ይሆን? እንጃ! አላውቅም ምንአልባት የሎሬት ፀጋዬን ጴጥሮስ ያችን ሰዓት ደጋግሞ ማዳመጡ ትንሽ ሳይረዳኝ አልቀረም፡፡ ምነዋ! እመብርሃን No comment!!!

ለአንዳንድ ኢትዮጵያውያን
በብዙ ሀገራዊ ጉዳዮች ከጥላቻ የጸዳ ዐሳቦችን ስናቀርብ ስንወያይ መቆየታችን ይታወሳል፡፡ የነገዋ ኢትዮጵያ እጣ ፈንታም ያገባናል ብለን ትንንሽ መስዋዕትነትን ልናዋጣ ተዘጋጅተናል፡፡ ይሁንና ከወትሮ በተለየ የብዙዎቹ ወዳጆቼን የሰላ ምልከታ (critical) ሐውልቱንም በተመለከተ አላየሁኝም፡፡ ይህ በእያንዳንዳችን ውስጥ ያለችው ኢትዮጵያ እጅግ የተለያየች እንደሆነች ነግሮኛል፡፡ በጽዕኑ የማምንበትን የኔን ትውልድን ጤነኛነትም እንደገና እንዳስተውለው አድርጎኛል፡፡ ሐውልት ትክል ነው የማይነሳ:: እንኳን በጎ አርአያ የሆነ ሰው ይቅርና የነሳዳም ሲፈርስ ‘አይ! ይህ እንኳን አግባብ አይደለም ትውልድ እየተመለከተ ያለፈውን ይማርበት ዘንድ ይጠበቅ’ ብለናል፡፡ የበቀል ጥማት ሁለንተናቸውን ከተቆጣጠረው በቀር፡፡ ምናዋ እንዲህ ያለ አይን ያወጣ የመብት ጥሰት significant ቁጥር ባለው ወገናችን እሴት ላይ ሲደርስ ዝምታን መምረጣችን? ወይስ ባለቤት ካልጮኸ ጎረቤት አይረዳም በሚል ቀመር ነው? የሰማዕቱ ደም ቅኝ ያልተገዛች ሀገር ዜጎች እንድንሆን ያበረከተው አስተዋጽኦ የለምን? የአቡነ ጵጥሮስ ገድል የበጎው ታሪካችን አካል አይደለምን? ባለጊዜውን ጀብራሬ የሚያቆመው የለም እንደፎከረው ሐውልቱን ያነሳዋል፡፡ እኔም ፖለቲካ የብቻ ስራ አይደለም የምትለውን የጋሽ መስፍን(ፕሮፍ) ምክር ልቤን እያመመኝ ስለዋጥኩኝ ምንም የምለውጠው ነገር የለኝም እንደው በሆዴ እንዳይቀር ብቻ ይህን አልኩኝ፡፡ No comment!!!