የወ/ሮ ዘርፌ ቃለ መጠይቅ

(አንድ አድርገን ህዳር 1 2006 ዓ.ም) ወ/ሮ ዘር ከበደ ከአዲስ አድማስ ጋዜጣ ጋር ቃለ መጠይቅ አድርጋ ነበር ፡፡ ቃለ መጠይቁን አለፍ አለፍ ብለን እንዲህ ለማየት ወደድን…

ወ/ሮ ዘርፌ፡- ብዙ ዘማሪዎች ግጥምና ዜማ ራሳቸው ናቸው የሚሰሩት... እንደ ዓለማዊ ዘፈን ከሰው ብዙ አይቀበሉም… የስጦታ ጉዳይ ነው ብዬ ነው የማስበው፡፡ አንድ ሰው ካልተሰጠው ምንም ነገር መስራት አይችልም። ጌታ ቢፈቅድ ብዙ ልሰራቸው ያቀድኳቸው ነገሮች አሉ፡፡ በእኛ አገር በተለያዩ ቋንቋዎች መዝሙሮች መሰራት አለባቸው፡፡ እዚህ አሜሪካ ብዙ የአበሻ ልጆች አማርኛ መስማት አይችሉም፡፡ ቤተክርስቲያን ይመጣሉ፤ ግን ለማምለክ ብዙ ይቸገራሉ፡፡

ቃለ መጠይቁ ቃናው ከመናፍቃኑ አልለይ አለ ፤ አባቶቻችን ሲናገሩ እጅጉን ሲጠነቀቁ ነው የምናውቀው ፤ ጌታችን መድኃኒታችን ኢየሱስ ክርስቶስን ‹‹ውዴ›› ፤ ‹‹ፍቅሬ›› እያሉ ሲናገሩ አንሰማም ሰምተንም አናውቅም፡፡ የአምላክን ስም አንጠልጥለው ሲጠሩን አንሰማም ፡፡ እነዚህ ፕሮቴስታንታዊ ዘይቤ ያላቸው አነጋገሮች ‹‹ማምለክ›› ፤‹‹ስጦታ›› ፤ ‹‹ሙላት›› …… ከየት የመጡ ናቸው…? ለነገሩ ‹‹ስለ እመቤታችን መዝሙር መዘመር አልችልም፤ አንድ መዝሙርም ሲበዛባት ነው፡፡ እኔ የኢየሱስን ክብር መግለጥ ነው የምፈልገው›› ብላ ከአንደበቷ የተናገረች ቃሏ እንዴት እኛን ይመስል?

ወ/ሮ ዘርፌ ፡- ‹‹እዚህ አሜሪካ ብዙ የአበሻ ልጆች አማርኛ መስማት አይችሉም፡፡ ቤተክርስቲያን ይመጣሉ፤ ግን ለማምለክ ብዙ ይቸገራሉ፡፡ በእንግሊዝኛ የተዘመረ መዝሙር የለም፡፡ በኢትዮጵያ ያለውን ነው እየዘመሩ ያሉት፡፡ለእነሱ በእንግሊዝኛ መዝሙር የመስራት ሀሳብ አለኝ፡፡››

አሁን ያሉት ከተሀድሶያውያን ጋር የሚንቀሳቀሱት ‹‹ዘማሪ›› ነን ባዮች ግዕዝ Nuclear Physics የሆነባቸው ይመስላል፡፡ የቡድኑ ‹‹ሰባኪ›› ተብዬውም ቢሆን ጆሮው ግዕዝን መስማት አንደበቱ ግዕዝን መናገር አይችልም ፤ ታዲያ የቤተክርስቲያን መሰረቷ ግዕዙን ትቶ እንግሊዝኛ ቋንቋ ላይ መንጠልጠል ምን ይባላል ?    

ወ/ሮ ዘርፌ  ፡- ከዚህ በተረፈ የሙዚቃ ትምህርት ቤት ገብቼ፣ በዩኒቨርስቲ ደረጃ ያለኝን ተሰጥኦና ችሎታ ለማሳደግ እየተዘጋጀሁ ነው፡ በቤቴ ውስጥ የሙዚቃ መሳሪያዎች አሉኝ..ባህላዊም ዘመናዊም፡፡ እነሱንም እያጠናሁ ነው፡፡

ኢትዮጵያውያኖች ነጮችን ቤተክርስቲያን ይዘዋቸው ይመጣሉ--. አማርኛ አይሰሙም፤ ነገር ግን ዜማውንና የድምፄን ቅላፄ ሲሰሙ ይደነቃሉ፡ለራሴም መጥተው ይነግሩኛል--.‹‹የሚያምር ድምፅ ነው ያለሽ›› ይሉኛል፡፡ አይሰሙትም ግን እንዴት ነው የሚያደንቁት--.እላለሁ፡፡ ሙዚቃ አለማቀፍ ቋንቋ ስለሆነ ይመስለኛል፡፡ አንዳንዴ በማይገባን ቋንቋ ሙዚቃውን ብቻ ሰምተን ‹‹ቅላፄው ደስ ሲል…ሙዚቃው ደስ ሲል›› የምንልበት ሁኔታ አለ አይደል፡፡ ወደነው የምንቃትትበት ጊዜ አለ--.ምን ማለት እንደፈለጉ ይገባናል እኮ››

ከጊዜ በኋላ በፒያኖ እና በጊታር ተመልሳ ለመምጣት ያሰበች ትመስላለች ፤ ‹‹ሙዚቃ አለማቀፍ ቋንቋ ነው›› የሚሉ የዘርፉ ባለሙያዎች ናቸው ፤ መጀመሪያም እኮ መቼ መዝሙር አወጣች ሙዚቃ እንጂ ፤  ከመናፍቃን ካሴት ላይ አቶ በጋሻው ደሳለኝ የለቃቀመውን ግጥም እንጂ ፤ አቶ በጋሻው በመጀመሪያ ካሴት ላይ ካሉት ግጥሞች ከመናፍቃን ካሴት ላይ ሳያስፈቅድ በመውሰዱ እና ለወ/ሮ ዘርፌ በመስጠቱ ከፍተኛ ፍርድ ቤት ክስ ተመስርቶበት ነበር ፤(የቀጠሮ ቀን ክሱን ከሳሽ በማንሳቱ ክሱ ተዘግቷል)፡፡  

“ለኢትዮጵያ ሰዎችም ምግባቸውን ሰጠሃቸው።” መዝ .74:14 ለኢትዮጵያ ከተሰጡት ታላላቅ ሀብቶች መካከል አንዱ የቅዱስ ያሬድ የዜማ ስልት ነው፡፡የቅዱስ ያሬድ የዜማ ስልት ግዕዝ ዕዝልና አራራይ በሚባሉ ሦስት የዜማ መደቦች ይመደባሉ፡፡በቤተ ክርስቲያን የሚቀርበው ምስጋና በሙሉ በሦስቱ የዜማ  ዓይነቶች አማካኝነት ነው፡፡ማንኛውም አገልጋይ  በቤተክርስቲያናችን  መዝሙር የሚያቀርበው  የቅዱስ ያሬድን የዜማ ምልክቶችና ዓይነቶች /ስልቶች/ ተከትሎና መሰረት አድርጎ ነው፡፡ ታዲያ ሙዚቃ ትምህርት ቤት ገብቶ የነ ቢትሆቨንን ሙዚቃ ከመማር ከሁሉ የቀደመውን የቅዱስ ያሬድን ዜማ ከአባቶች እግር ስር ሆኖ መማር አይሻልምን ?  

አዲስ አድማስ ፡- በቅርቡ ወደ ኢትዮጵያ መጥተሸ ገጠር ገጠሩን ብቻ አገልግለሽ ነው የተመለስሺው፡፡ ለምንድነው?

ወ/ሮ ዘርፌ፡-  የገጠሩ ሰው ቶሎ ቶሎ ይጠራኝ ነበር፡፡ ወንጌልን የተጠማ ህዝብ ነው፡፡ እኛ ጥሪ በቀረበልን ቦታ ነው የምንሄደው። ‹‹እዚህ ቦታ ካልሰበክን፣ እዚህ ቦታ ካልዘመርን›› የሚል ሃሳብ የለንም፡፡ ሊሰበክለት፣ ሊዘመርለት ፈቃደኛ ሲሆን ብቻ ነው ልንሄድ የምንችለው። ፈቃደኛ ሆነው የጠሩን ቦታ ሁሉ እየሄድን እናገለግላለን፡፡ ከተማም ቢሆን…በአዲስ አበባ ዮሴፍ ቤተክርስቲያን አገልግዬአለሁ፡፡

አንባቢ እዚህ ጋር መገንዘብ ያለበት ነገር በአዲስ አበባ እና በአካባቢዋ ውስጥ ከሚገኙ ከ150 ከሚበልጡ አብያተክርስቲያናት ውስጥ አሁንም ከእነ አቶ በጋሻው ቡድን ያልጠራው ቅዱስ ዮሴፍ ቤተክርስቲያን ብቻ ነው ፡፡ ስለዚህ አሁንም ቤተክህነቱ ጉዳያቸው እስኪጣራ እንዳያገለግሉ ያገዳቸው ሰዎች ቅዱስ ዮሴፍ ቤተክርስቲያን ሲመላለሱ ይታያሉ ፡፡ ወ/ሮ ዘርፌን አገልግይን ብሎ የሚጠራ አዲስ አበባ ውስጥ አንድም ደብር የለም ፡፡ ለዛ ነው አገለግላለሁ በሚል መንፈስ ቅዱስ ዮሴፍ ቤተክርስቲያንን የጠራችው ….