የእነ በጋሻው ጉዳይ ወደ እርቅ እያመራ መሆኑ ተገለጸ

(አንድ አድርገን ህዳር 12 2006 ዓ.ም )፡- ከዚህ በፊት በተለያየ ጊዜ በሃዋሳ ፤ ዲላ እና ሌሎች አካባቢዎች ሁከት በማስነሳትና በሃይማኖት ህጸጽ በህዝቡ በተነሳባቸው ጥያቄ እስከ ቅዱስ ሲኖዶስ ድረስ ደርሶ የነበረው የእነ በጋሻው ደሳለኝ ጉዳይ በጥቅምቱ የሲኖዶስ ጉባኤ ላይ የመጨረሻ እልባት እንዲሰጠው በተወሰነው መሰረት ሶስት ብጹአን ሊቃነ ጳጳሳትን የያዘ ኮሚቴ ተቋቁሞ ጉዳዩን ሲያጠና ከቆየ በኋላ በእርቅ ለመቋጨት የሚያስችል ውሳኔ ላይ መድረሱን ለጉዳዩ ቅርበት ያላቸው ምንጮች ገልጸዋል፡፡

 

ከቅዱስ ሲኖዶስ ጉዳዩን አጣርተው የመጨረሻ እልባት እንዲያበጁለት የተመረጡት  ብፁዕ አቡነ  እስጢፋኖስ ፤ ብፁዕ አቡነ ማቲያስ ዘካናዳ እና  ብፁዕ አቡነ ሉቃስ ለዚህ እርቅ መነሻ የሆነው በ21/2/06 በቅዱስ ሲኖዶስ ጽ/ቤት አዳራሽ በተካሄደው ስብሰባ ላይ በጋሻው ደሳለኝና ያሬድ አደም በብፁዕ አቡነ ገብርኤል እግር ላይ ወድቀው ይቅርታ በመጠየቃቸውና አቡነ ገብርኤልም ‹‹ይቅር ማለት የአባት ስርአት ነው›› ብለው ቅርታውን መቀበላቸው መሆኑ ይታወሳል፡፡ ከዚሁ ጋር ተያይዞ በእለቱ እርቁን መጠየቅ እንደሚፈልጉና ይቅርታውንም ለመጠየቅ ሶስት በማህበረሰቡ ዘንድ ተሰሚነት ያላቸው ሰዎች ከአዋሳ እንዲጠሩላቸው ስም ጠቅስው በጠየቁት መሰረት የተባሉት ሶስቱ የሀገር ሽማግሌዎች ተጠርተው በ27/02/06 ዓ.ም  ይቅርታ የጠየቋቸው ሲሆን ሽማግሌዎችም እንደ ግለሰብ ይቅርታውን ለመቀበል እንደማይቸገሩ ጠቅሰው፤ ነገር ግን አሁን በሕዝብ ተወክለን ስላልመጣን በሕዝብ ስም ይቅርታውን መቀበል እንደማይችሉ በጊዜው ገልጠውላቸው ነበር፡፡

 

ይህም ከሆነ በኋላ ሽማግሌዎቹ ወደ ሀዋሳ ተመልሰው ሕዝቡን ያወዩ ሲሆን ሕዝቡም በውይይቱ ወቅት ያለውን ሀሳብ ከነስጋቱ ጭምር ገልጿል፡፡ ተወያዮቹ እርቁን ከተቀበሉ በኋላ ተወካዮቻቸውን የመረጡ ሲሆን በዚሁ መሰረት እንደገና ከሕዝብ ወገን 7 ሽማግሌዎች ከነ በጋሻው ወገን ደግሞ 5 ሰዎች ተወክለው እንዲቀርቡ በተደረሰው ስምምነት መሰረት በ05/03/06 ዓ.ም በሃዋሳ ምእመን የተወከሉ ሰባት ሸማግሌዎች እና ከነበጋሻው ወገን የተወከሉ አምስት ተወካዮች በተገኙበት የእርቅ ውይይት ተካሂዷል፡፡ 

በዚህም መሰረት ተገንጥለው ለብቻ ወጥተው የነበሩት የነበጋሻው ቡድን ወደ እናት ቤተክርስቲያናቸው እንዲመለሱ እና ከሰበካ ውጪ ባሉ የቤተክርስቲያኒቱ መዋቅሮች በሰንበት ትምህርት ቤት አመራርና በልማት ኮሚቴ ውስጥ ሁለት ሁለት ተወካይ እንዲኖራቸውና ከዚህ በኋላ በአንዲት ቤተክርስቲያን ስር በአንድነት ለማገልገልና ለመገልገል በመስማማት የተጠናቀቀ ሲሆን በቋሚ ሲኖዶስ ታይቶ ከጸደቀ በኋላ

በዚህ ወር መጨረሻው ሳምንት በሃዋሳ ቅዱስ ገብርኤል በይፋ ለሕዝቡ ይነገራል ተብሎ እንደሚጠበቅ ጉዳዩን በቅርበት ሲከታተሉ የነበሩ የውስጥ ምንጮቻችን አስታውቀውናል፡፡

አንዳንድ ምዕመናን   ለእርቀ ሰላሙ መነሻ መጀመሪያ ምክንያት የሰዎቹ የእርቅ ጥያቄ ሲሆን ከዚህ በተጨማሪ የፌደራል ጉዳዮች ሚኒስትር ጫና በቅዱስ ሲኖዶስ ላይ ሁለተኛ ምክንያት ነው ብለውም ያምናሉ ፡፡

አነ በጋሻው አውደ ምህረት ላይ ወጥተው ይቅርታ ይጠቃሉ ወይ? ከሆነስ ምን ብለው ነው ይቅርታ የሚጠይቁት? ምንስ አጥፍተን ነበር ይላሉ ? መድረክ አግኝተው የማስተማራቸው ነገርስ በምን መልኩ ይከናወናል ? የሚሉት ጥያቄዎች መልስ የሚፈልጋቸው ናቸው በማለት ምዕመኑ አሁንም በጥያቄነት እያነሳ ይገኛል፡፡

እስኪ ስለዚህ ጉዳይ የእርስዎን ሀሳብ በብሎጋችን ላይ ያኑሩልን…..

እናመሰግናለን…..