በቡሌ ሆራ ቅድስት አርሴማ ቤተ ክርስቲያን እንድትፈርስ መታዘዙ ቁጣን ቀሰቀሰ

(ኢትዮ-ምህዳር ጋዜጣ ሚያዚያ 29 2005 ዓ.ም)፡-  በኦሮሚያ ክልላዊ መንግሥት ቦረና ዞን ቡሌ ሆራ(ሀገረ ማርያም) ከተማ የምትገኝው ቅድስት አርሴማ ቤተ ክርስቲያን እንድትፈርስ መታዘዙ በአካባቢዋ ቁጣ መቀስቀሱ ታወቀ፡፡ የአካባቢ የኦርቶዶክስ ተዋሕዶ ቤተ ክርስቲያ አማኞች  ለዝግጅት ክፍላችን እንደገለጹት “የከተማዋ ከንቲባ ኃላፊነት በጎደለው እና በማን አለብኝነት ቤተክርስቲያኑን አፍርሰው ቦታውን ለባለሀብት ለመሸጥ መወሰናቸው ለሃይማኖቱም ሆነ ለሕዝቡ ያላቸውን ንቀት ያሳዩበት ነው” ሲሉ አውግዘዋል፡፡የአካባቢው ነዋሪዎች አሁን የወሰዱት አቋም ሲገልጹ ‹‹የከተማው ከንቲባ  በድፍረት ቤተክርስያኑን አፍርሰው እንጨትና ቆርቆሮውን እንድናነሳ አዘዋል ፤ እኛም የእግዚአብሔርን ቤት አናፈርስም ፤ እሳቸው ከፈለጉ በሚፈልጉት ኃይል ሊያፈርሱ ይችላሉ  ፤ ለወረዳው አስተዳደር አመልክተን የወረዳው አስዳዳሪ በቦታው በመገኝት ተመልክተውልናል፡፡ ቤተክርስቲያ እንዳይፈርስ የሚያስችለውን ውሳኔ ይሰጣሉ ብለን ተስፋ እናደርጋለን›› ሲሉ ተናግረዋል፡፡

አስተያየት ሰጪዎቹ በመጨረሻ እንደተናገሩት በዚሁ ከተማ የቅዱስ ሚካኤል ቤተ ክርስቲያን ያለ ሲሆን ይህን ቤተክርስቲያን  ካለፈው መንግሥት ጀምሮ  በከተማው ማስተር ፕላን መሰረት ፍቃድና ካርታ አለው ፤ ይሁን እንጂ እኚህ የከተማው ከንቲባ ቦታውንና ከቦታው ላይ ያለውን ባሕር ዛፍ አላስረከብንም ብለው ችግር ፈጥረውብን እስከ አሁን ድረስ ችግሩ ባልተፈታበት ሁኔታ እንደገና አሁን ደግሞ ፊታቸውን ወደ ቅድስት አርሴማ ቤተ ክርስቲያን መዞራቸው አግራሞትን ፈጥሮብናል ብለዋል፡፡ የከተማው ከንቲባ አቶ ቡሉ ገመዳ በጉዳዩ ላይ አስተያየት እንዲሰጡ በተንቀሳቃሽ ስልካቸው እና በጽ/ቤታቸው ስልክ ለማግኝት ያደረግነው ሙከራ አልተሳካም፡፡

ኢትዮ-ምኅዳር ጋዜጣ ሚያዚያ 29 ቀን 2005 ዓ.ም