የቅድስት ሥላሴ መንፈሳዊ ኮሌጅ ተማሪዎች ኮሌጁን በመቃወም ለፓትርያርኩ ደብዳቤ ጻፉ

-    አሥር ችግር ናቸው ያሏቸውን ጥያቄዎች አቅርበዋል
   (Reporter March 20 ):- አራት ኪሎ የሚገኘው የቅድስት ሥላሴ መንፈሳዊ ኮሌጅ ተማሪዎች ኮሌጁ እያደረሰባቸው ያለውን ችግር በመዘርዘርና በመቃወም፣ ከ15 ቀናት በፊት በዓለ ሲመታቸውን ለፈጸሙት ስድስተኛው ፓትርያርክ ለብፁዕ ወቅዱስ አቡነ ማትያስ ቀዳማዊ ደብዳቤ ጻፉ፡፡

ደብዳቤያቸውን ለቋሚ ሲኖዶስ ጽሕፈት ቤት፣ ለጠቅላይ ቤተ ክህነት፣ ለኮሌጁ፣ ለሰብዓዊ መብት ኮሚሽን፣ ለፌዴራል ፖሊስ፣ ለአዲስ አበባ ወጣቶች ቢሮና ለአራዳ ክፍለ ከተማ ፖሊስ መምሪያ ግልባጭ ያደረጉት ተማሪዎቹ፣ በኮሌጁ ውስጥ ከዕለት ወደ ዕለት እየተባባሰ መጥቷል ያሉትን አስተዳደራዊና የመማር ማስተማር ሒደት ችግሮች አስታውቀዋል፡፡

ቁጥራቸው ከ200 በላይ የሚሆኑትና ፔቲሺን ተፈራርመው ቅሬታቸውን ያቀረቡት ተማሪዎቹ፣ ኮሌጁ ለሚጠይቁት ማንኛውም ጥያቄ አፋጣኝ ምላሽ እንደማይሰጣቸው፣ ኮሌጁ ከትምህርት ማዕከልነት ይልቅ የንግድ ማዕከል መምሰሉን፣ የትምህርት ጥራትና የመምህራን ብቃት መፍትሔ ማጣቱን፣ የውኃ መቋረጥ ችግር፣ ተማሪዎች ሲታመሙ ተከታትሎ አለመርዳት፣ ከሌሎች ኮሌጆች ጋር ሲነፃፀር ጥራቱን ያልጠበቀ የጤፍ አቅርቦት፣ የቤተ መጻሕፍት ችግርና ሌሎችንም በደብዳቤያቸው አስፍረዋል፡፡

የጠቀሷቸው ችግሮች ለማሳያ ያህል መሆኑን የገለጹት ተማሪዎቹ፣ ችግሮቹን ተሸክመውና ተቋቁመው የሚሄዱበት ትዕግስታቸው ማለቁን ጠቅሰው፣ ፓትርያርኩ አፋጣኝ መፍትሔ እንዲሰጧቸው ጠይቀዋል፡፡

ተማሪዎቹ ለፓትርያርኩ በደብዳቤ የገለጿቸውን ችግሮች በሚመለከት ማብራሪያ እንዲሰጡን በኮሌጁ ቅጥር ግቢ ተገኝተን የኮሌጁን የበላይ ጠባቂ አቡነ ጢሞቲዎስን ለማነጋገር ብንሞክርም ከተማሪዎቹ፣ ከቤተ ክህነትና ከመንግሥት አካላት ጋር ስብሰባ ላይ ስለሆኑ ሊያነጋግሩ አይችሉም በመባሉ አልተሳካልንም፡፡