ዛሬ በአታ ለማርያም ሄጄ ይህን ሰምቼ መጣሁ

(አንድ አድርገን ታህሳስ 3 2005 ዓ.ም)፡- የዛሬዋን ቀን ለማክበር እና ከእመቤታችን በረከት ለመቀበል በታእካ ነገሥት በአታ ለማርያም ቤተክርስቲያን  አቃቢ መንበር ብጹእ አቡነ ናትናኤል ፤ ብጹእ አቡነ አረጋዊ የመንበረ ጸባኦት ቅድስት ሥላሴ ካቴድራል የበላይ ጠባቂ ፤ ብጹእ አቡነ ስምኦን የምስራቅ ወለጋ ሀገረ ስብከት ሊቀ ጳጳስ ፤ ብጹእ አቡነ ዮሴፍ የባሌ ሀገረ ስብከት ሊቀ ጳጳስ እና ከአዲስ አበባ ገዳማትና አድባራ የመጡ  በርካታ ዲያቆናት ቀሳውስት መነኮሳት እና ምዕመናን በአሉን ለማክበር በቦታው ተገኝተዋል፡፡

በግቢው እንደደረስኩኝ አንድ አባት ስለ በአሉ ምንነት ለምን እንደምናከብር በሰፊው ትምህርት ሲሰጡ ደረስኩኝ ፤ በመቀጠልም እመቤታችንን  ተማጽነው እና ለምነው ስለታቸው የደረሰላቸው እምባቸው የደረቀላቸው ፤ ጸሎታቸው የተሰማላቸው የሶስት ምዕመናንን ስለት ለምዕመኑ ተነገረ ፡፡ አንዲት እህታችን እንዲህ በማለት ምስክርነቷ ሰጥታለች “የኤች አይቪ ቫይረስ ተይዤ ነበር ፤፡ ከዶክተሮችም መድሃኒቱን እንድትጀምር ተነግሮኝም ነበር ፡፡ ነገር ግን “መድሀኒቴም ይሁን ሕይወቴ እግዚአብሔር ስለሆነ መድሃኒቱን አልጀምርም በጸሎት በጾምና በስግደት እድናለሁ እፈወስማለሁ” በማለት በርካታ ገዳማት እየሄድኩኝ ከበሽታው እግዚአብሔር እንዲፈውሰኝ ጸሎት አደረኩኝ ፤ ለልጆቼ እንድኖርላቸው ከዚህ በሽታ አድነኝ ብዬ ተማጸንኩኝ ፤ ሞልቶ ከሚተርፍ ተርፎ ከሚቀር እድሜ አትንፈገኝ በማለት ለመንኩኝ  ፤  አንገት የማታስጎነብስ ልመናን የምትሰማ ወደ እመቤታችን ጸበል በማምራት ጸበሏን ጠጥቼ እና ተጠምቄ ከበሽታዬ ነጻ ልወጣ ችያለሁ” በማለት በአውደ ምህረት ላይ  ምስክርነቷን ሰጥታለች ፡፡ 

ሁለተኛዋ ምስክር “ከጓደኞቼ ጋር ከስራ በአንድ ላይ ተባረርን ፤ ግራ ገባኝ ጨነቀኝ  ፤ የማደርገው ነገር ጠፋኝ፡፡  ከጓኞቼ ጋር ከስራ ስንባረር እነርሱ ጠበቃ ቀጥረው ፍርድ ቤት ክስ መሰረቱ ፤ እኔ ግን ጠበቃዬን እግዚአብሔርን እና እመቤታችንን አድርጌ ወደ ቤተ መቅደሱ መጥቼ እመቤቴን ተማጸንኩኝ ፤ ለእኔ ግን ጠበቃዬ ሰው ሳይሆን እመቤታችን ናት  በማለት በጸሎት በቤተመቅደስ በመገኝት ለመንኳት ፤ እባክሽን ጠበቃ ሁኝልኝ ፤ እባክሽን ችግሬን ፍቺልኝ ብዬ ተማጸንኳት ፤ ጓደኞቼ ጠበቃ ቀጥረው እስከ አሁን ድረስ ይከራከራሉ እኔ ግን በእናቴ ጠበቃነት ችግሬ ተፈትቶልኛል ፤ በዚህ ጉዳይ ያልተከፈለኝን የ5 ወር ደመወዝ ከእነ ጥቅማ ጥቅሙ በእሷ አማላጅነት ተከፍሎኛል  ፡፡ እኔን የተለመነች እናት እናንተንም ትለመናችሁ፡፡” በማለት የተደረገላትን ነገር በአውደ ምህረት መስክራለች፡፡

 በመቀጠልም   አንድ ወልደ ማርያም የሚባል ወንድማችን ” በስራዬ ላይ ከባድ ጥፋት ደርሶብኝ ነበረ ፤ በእመቤቴ በእለተ ቀኗ በቤተክርስትያን በመገኝት አልቅሼ ነገርኳት ፤ የለመንኩት ነገር አንዳች ሳይጓደል ስራዬ እንደ ቀድሞ ተመልሶልኛል ፤ ለክብሯ መግለጫ 5ሺህ ብር ይዤ መጥቻለሁ በማለት ምስክርነቱን ሰጥቷል፡፡  ጸሎታቸው የተሰማላቸውን ሰዎች ምስክርነት ቢጻፍ ብዙ ሰዎች ይማሩበታል የደከመም ይበረታበታል ብሎ በማሰብ በማሰብ እናንተ ዘንድ እንዲህ አድርሰናል፡፡

መልካም በዓል ይሁንላችሁ

እነርሱን የተለመነች እመቤታችን እኛንም ትለመነን .. አሜን