"የነፍስ ወይንስ ከስጋ ፈውስ?"

(ያሬድ ሹመቴ)

 

(አንድ አድርገን ጥቅምት 20 2008 ዓ.ም)፡- ሰሞኑን በመምህር ግርማ መታሰር ዙሪያ የሚነሱ ክርክሮችን ስመለከት 20 ዓመታት ወደ ኃላ ተጉዤ አንድን ክስተስ እንዳስታውስ ምክንያት ሆነኝ። መምህር ግርማ በተከሰሱበት ወንጀን ነፃ መሆን አለመሆን ጉዳይ ላይ ምንም አይነት አስተያየት የሌለኝ ሲሆን እግዚአብሔር ሲፈቅድ እውነታውን ማወቅ እንደሚቻል በማመን ለሱ ትቼዋለሁ።

ወደ 20 ዓመት ትውስታዬ ልመለስ፡-
ባህታዊ ገ/ መስቀልን የማያውቅ የኔ ወይንም የቀደመኝ ትውልድ ይኖራል ብዬ አላስብም። የዛሬ 20 ዓመት ገደማ በመናገሻ ቅ/ጊዮርጊስ ቤተ ክርስቲያን የዲቁና ተማሪ ሆኜ አገለግል ነበር። በወቅቱ ታዲያ ባህታዊ ገ/መስቀል በርካታ ተከታይ የነበራቸው ብዙ "ተዓምራት እና ፈውስ" ያደርጋሉ የሚባሉ አባት ነበሩ። እንዲያውም የሞተ ሰው አስነስተዋል ተብሎ ይነገርላቸው ነበር።

 ቅ/ ጊዮርጊስ ቤተ ክርስቲያን ከጠቅላይ ቤ/ክህነት በደረሰው መመሪያ መሰረት እኚህ አባት በቅጥር ጊቢው ተገኝተው እንዳይሰብኩ በመከልከሉ ሶስቱም የቤተ ክርስቲያኒቱ በሮች በሰንሰለት ተቆለፉ። በእሳት አደጋው በኩል በሚገኘው ማርገጃ ክፍት ቦታ ላይ ባህታዊ ገ/መስቀል ስፍር ቁጥር ከሌለው ምዕመን ጋር ሱባኤ ተያያዙ። ወቅቱ የአብይ ፆም ወቅት እንደነበር አስታውሳለሁ። በተቆለፈው ቤተ ክርስርስቲያን ውስጥ ግን ቅዳሴ አልተቋረጠም።

ከጥቂት ቀናት በኋላ በአቤቶ እያሱ ልጅ አዛውንቱ ልጅ መስፍን እያሱ (ጫማቸውን እግራቸው ውስጥ ለማስገባት እንዴት እስከሚያልበኝ እታገል እንደነበር አስታውሳለሁ) የተቆለፈውን በር ሰንሰለት በመጋዝ ቆርጠው "የአያቴን ቤት ማንም አይዘጋውም ግቡ" ብለው አዘዙ። ውጭ ያለው ምዕመን እየጎረፈ ወደ ውስጥ በእልልታ እና በሆታ ገባ። በመሀል ሾልከው የገቡ ማንነታቸው የማይታወቅ አጥፊዎች የቤተ ክርስቲያኑን መስኮት በድንጋይ ሲሰብሩ አንድ አንዶቹ ደግሞ ቁሳቁሶችን ሰርቀው ተሰውረዋል። ፖሊስ ቦታውን ከግርግሩ ነፃ ለማውጣት ብዙ ጊዜ ፈጅቶበታል።

ግርግሩ እና ወከባው እስከ ምሽት ድረስ ቆይቶ በፖሊስ ቁጥጥር ስር ዋለ። ባህታዊ ገ/መስቀልም ታሰሩ። በኢትዮጵያ ቴሌቪዥን ዝርፊያውና የተሰባበሩ መስኮቶች ብቻ በምሽቱ ዜና እወጃ ላይ በመታየታቸው ባህታዊ ገ/መስቀልን "የሚከተሉ" ምዕመናንን በእጅጉ አበሳጭቶ ነበር። እንዲያውም ይህንን ያደረገው እራሱ መንግስት ነው እስከማለት ደርሰው እንደ ነበር አስታውሳለሁ።

ባህታዊ ገ/መስቀል ከእስር ከወጡ በኋላ ቀጨኔ መድሀኒያለም በሚገኘው መኖሪያ ቤታቸው (ከሰው በስጦታ ያገኙት ይመስለኛል) በመወሰን ስብከት እና "የፈውስ" አገልግሎት መስጠታቸውን ቀጠሉ።

ከረዥም ርቀት ተጉዘው የሚመጡ ምዕመናን ቀጨኔ መድሐኔአለም ቤተ ክርስቲያንን ሳይሳለሙ ባህታዊ ገ/መስቀል ቤት አምሽተው ይመለሳሉ። የቃል ኪዳን ታቦቱ ያለበት ቤተ ክርስቲያን ተረስቶ የባህታዊ ገ/መስቀል ግቢ እና መንደር በምዕመናን ተጥለቀለቀ።

አንዲት መኪና ደግሞ እንደነበረቻቸው አስታውሳለሁ። ድምጽ ማጉያ ሁል ጊዜ የተተከለባት በየሄዱበት ቦታ ከመኪናቸው ሳይወርዱ የሚሰብኩባት። ምዕመኑ መንገዱን ዘግቶ ስብከታቸውን ይሰማል። አብዛኛው ሰው ደግሞ መኪናዋን በእጁ ለመዳበስ እና "ለመፈወስ" እየጓጓ ሲጋፋ አስታውሳለሁ። ተመልከቱ እንግዲህ መኪናዋ "ቅዱስ" ናቸው የተባሉትን ሰው ስለያዘች ነው።

ያ ሁሉ ጊዜ አልፎ ዛሬ ባህታዊ ገ/መስቀል ሚስት አግብተው ወልደው ሲኖሩ ሁሉም አይንህን ለአፈር ብሏቸዋል።

ስጋ የተሸከመን ማመን እና መከተል መጨረሻው ይህ ነው። የእምነት መሸርሸር የሚያመጣ መሆኑንም ልብ ማለት ያስፈልጋል። ለስጋ ህመም ፈውስ የሚሰጥን ሰው በመከተል ብቻ ነፍስን ነፃ ማውጣት አይቻልም። በዙ ተአምራት ዛሬ በበርካታ የእምነት ድርጅቶች ውስጥ አለ። ወደ እግዚአብሔር ቤት የምንሄደው ነፍሳችንን ለማዳን ቢሆን ስጋችንም አብሮ ይፈወሳል።

 

በስጋ ፈውስ ምክንያት ሰውን ተከትሎ ከቤተ ክርስቲያን መውጣት እግዚአብሔርን መከተል ሳይሆን ሰውን መከተል ነው። ስጋ ተሸካሚ ሰውን ማመን ደግሞ ውጤቱ ምን እንደሆነ ግልጽ ነው። የእግዚአብሔርን አሰራር በምድር ስሌት አንጠብቅ። ምንም ቢሆን ምንም እስካሁን ፀንታ ያለችው ቤተ ክርስቲያናችን ነች። ብዙዎች አልፈዋል። አሁንም ያልፋሉ። ቤተ ክርስቲያናችን ግን እስካሁን ድረስ አለች። ወደ ፊትም ትኖራለች!!

የስጋ ፈውስ ፍለጋ የመንፈስን መዳን አያረጋግጥምና ምክንያታችን የስጋ ፈውስ ብቻ አይሁን።

 

"እንደ ስጋ ፍቃድ የሚኖሩ የስጋን ፍቃድ ያስባለና፥ እንደ መንፈስ ፍቃድ የሚኖሩ ግን የመንፈስን ነገር ያስባሉ።
ስለ ስጋ ማሰብ ሞት ነውና፥ ስለ መንፈስ ማሰብ ግን ህይወትና ሰላም ነው" እንዲል ሮሜ 8፥5-6 

ልዑል እግዚአብሔር የነፍሳችንን ድህነት የምንሻ ያድርገን!!