ኢቲቪ ሁለተኛውን አናዳጅ ፊልም ሊሰራ ነው

(አንድ አድርገን ሐምሌ 4 ፤ 2004 ዓ.ም) ፡- የዛሬ ሳምንት ግድም “ብዙ ሃይማኖት አንዲት ሃገር” በሚል ርእስ ዶክመንተሪ ፊልም በኢቲቪ ባለሙያዎች ተሰርቶ ለህዝብ መቅረቡ ይታወቃል ፤ ሆኖም እስከ አሁን ድረስ ተለያዩ ኤሌክትሮኒክስ ሚዲያዎች እና በሃገሪቱ ውስጥ የሚታተሙ ጋዜጦችን እንደተመለከትነው አንድም ኢቲቪን ደግፎ “ጎሽ” ያለው አለመኖሩ የስራውን ዝቅጠት እንድንመለከት አድርጎናል ፤ ይህ ፊልም ለማን እንደተዘጋጀ ግራ የገባቸው በርካታ ሙስሊሞች እና ክርስትያኖች አጋጥመውናል ፤ ባለፈው ሳምንት የወጣው የሙስሊም ጋዜጣ ላይ እንደተመለከትነው ሙስሊም ማህበረሰብ በዚህ ፊልም ክፉኛ ማዘኑን አስነብቦናል ፤ ባሳለፍነው አርብም ተቃውሟቸውን ሲያሰሙ መመልከት ችለናል ፤ በኦርቶዶክስ አማኙ ዘንድም ሁኔታው በጣም ግራ እንዳጋባቸው ብዙዎች ሲናገሩ አስተውለናል ፤ ከ33 ሚሊየን በላይ የኦርቶዶክስ አማኞች ከ25 ሚሊየን በላይ ሙስሊም ማህበረሰቦች በሚኖሩባት ኢትዮጵያ በኢቲቪ የቀረበው ፊልም ላይ ሁለቱም ወገኖች ቅሬታ ካላቸው እውን ይህ ፊልም ምንን ታሳቢ አድርጎ እና ለማን እንደተዘጋጀ እስከ አሁን ግልጽ አይደለም ፡፡

በጣም ትልቅ የታሪክ ስህተት የተሰራበት ይህ ፊልም በኢቲቪ ጓዳ ከቀናት በፊት መገምገም ችሎ ነበር ፤ በግምገማ ላይ ከውስጥ የወጡ መረጃዎች እንደሚያመላክቱት የታሰበው እና የተሰራው ስራ አራምባ እና ቆቦ እንደሆኑ ከህዝቡ የደረሳቸው የቁጣ መልእክቶች አመላክቷቸዋል ፤ ለዚህም ስህተት ይህን ፕሮግራም ያዘጋጁት ሰዎች እንደተቀየሩ እና በሌሎች ባለሙያዎች የተሻለ ይዘት ያለው የባለፈውን ስህተት ሊያርም የሚችል ዶክመንተሪ እንዲያዘጋጂ ቀጣይ የቤት ስራ ተሰቷቸዋል ፤ የፕሮግራሙን ይዘትን ሲደርስ የምትመለከቱት ይሆናል ፤ በስብሰባው ላይ ከተነሱት ሃሳቦች ውስጥ የተሰራው ስራ ምን ያህል የታሰበለትን አላማ አሳክቷል ? ምን ያህልስ መልዕክት ማስተላለፍ ችሏል?  የማንም እምነት መጤ ቢሆን ለኛ ትርፉ ምንድነው  ? ኢትዮጵያ የክርስቲያን ደሴት ብትባል ወይንም ባትባል ምን የሚያመጣው ችግር አለ ?  ይህ ፊልም የሃሳብ ልዩነቱን ለምን ሊያሰፋው ቻለ ? የተሰራው ስራ ያለውን ችግር ከማረጋጋት እና ከማባባስ ረገድ ያለውን ከህዝብ ግብረ መልስ ተነስቶ መገምገም የሚሉት ይገኙበታል ፤

እውነቱን ለመናገር ይህን ዘጋቢ ፊልም ተመልክቶ ውስጡ የረካ ሰው አለ ብሎ ለመናገር አያስደፍርም ፤ ሁሉም ያዘነበት ስራ መሆኑን ለማወቅ የኢቲቪ 982 ስልክ ተቀባይ ሆኖ በቦታ ላይ መቀመጥ ብቻ በቂ ነበር ፤ መንግስት የራሱን ጥቅም ለማስጠቅ እና የእጅ አዙር አላማውን ከጥቂት ጊዜያት በኋላ ለማሳካት የሄደው መንገድ ለራሱ ትምህርት ሆኖት አልፏል ፤ ለዘመናት በአንጻራዊ ሰላም ሲኖር የነበረውን ማህበረሰብ አንዱ በአንዱ ላይ ሌላ እይታ እንዲኖረው ማድረግ ለማንም የሚበጅ አካሄድ አይደለም ፤ እኛ ለዘመናት እንተዋወቃለን ፤ የሰውን ታሪክ በቃለ-መጠይቅ ለመናድ የታሰበውን የአላዋቂ አካሄድን እንቃወማለን ፤ “ያላዋቂ ሳሚ ንፍጥ ይለቀልቃል” እንዳይሆን ለስራችሁ ተጠንቀቁ ፤ ታሪካችን ታሪካቸው ነው ፤ ታሪካቸው ታሪካችን ነው ፤ ሁለቱ አንድ ሲሆን ታሪካችን  የኢትዮጵያ ታሪክ ይሆናል ፤ በበርካታ ቦታዎች ላይ መልካም ተሞክሮዎችን አስመልክታችሁናል ፤ ይህን የመሰለ ተግባር በማጎልበት የተሻለ አገልግሎት ለማህበረሰቡ የሚፈጠርበትን መንገድ ማመቻቸቱ ጥሩ ሆኖ ሳለ እነዚህን አካላት ለእናንተ የፊልም ግብአት ስትሉ ብቻ መጠቀማችሁ ተገቢ ነው አንልም፡፡

አሁንም ያለውን ሁኔታ እንዲያረጋጋ ሌላ ተጨማሪ ፊልም እንዲያዘጋጅ የተሰጠው ቡድን የክርስትያኑን እና የሙስሊሙን ስረ መሰረት ጠንቅቆ ማወቅ ይኖርበታል ፤ የኦርቶዶክሳውያን መምህራን መጤ ናችሁን? የሚል ታሪክን እና የቤተክርስትያኒቱን መሰረት ያላገናዘበ ጋዜጠኛ እንዲኖር አንፈልግም ፤ በባለፈው ፊልም ላይ በጣም አሳፋሪ ታሪክ አዋቂ መሳይ ወጣት(ተመስገን ዮሀንስ) ያደረጋችሁትን ቃለ-መጠይቅ ለምን እንደቆረጣችሁት ፤ ለምንስ ለህዝቡ እንዳላደረሳችሁ መጠየቅ እንፈልጋለን ፤ ማህበራትን የአክራሪነት መነሻ መሆናቸውን የተናገረውን ንግግር ለምን ቆረጣችሁት? የዚህን ሰው ጀርባውን መጀመሪያ እወቁት ፤ አክራሪነትን በምን አንግል በመመልከት እንደመለሰ ያደረገው ቃለ-መጠይቅ ኢቲቪ ያላቀረበውን እኛ መመልከት ችለናል ፤ የተመስገን ዮሀንስን መልስ ከራሱ ማንነት ጋር በማያያዝ ወደፊት ቃለመጠይቁን ከእውነታው ጋር በማመሳጠር ለአንባቢያን እናደርሳለን ፤ በተጨማሪ ፓስተር ዳዊት ከዓመታት በፊት በኦርቶዶክሳውያን ላይ የሰራውን ስራ በቪሲዲ ተመልክታችሁ ስታበቁ ተጋባዥ አድርጋችሁ በማቅረባችሁ የሱን ዝቅጠት ብቻ ሳይሆን የናንተንም የወረደ አመለካከት ለመመልከት ችለናል ፤ ፊልሙን ስትሰሩ “አዲስ ራዕይ” መጽሄትን እንደ ትልቅ ግብአት ተጠቅማችሁ ስታበቁ ነገሩ ፖለቲካዊ ይዘት እንዳይኖረው በመስጋት ምንጫችሁን ሳትናገሩ በማለፋችሁ አስገርማችሁናል ፤ ዶክመንተሪ ፊልም ሲሰራ ሰሪው አካል ፊልሙ ላይ የተጠቀመበትን ጽሁፎች ከየት እንዳገኛቸው የማን አመለካከት መሆናቸውን እንዲያስቀምጥ የሙያው ስነ ምግባር ያስገድዳል ፤ ዘጋቢ ፊልሙ ላይ  “አዲስ ራእይን” መጽሄትን ለምን አንቀጽ በአንቀጽ አነበባችሁልን? “አዲስ ራእይ”ን ቀድሞ ላነበባት የኢቲቪ ፊልም ትረካ እንጂ ፊልም አለመሆኑን ይረዳ ነበር ፡፡

በአሁኑ በ21ኛው ክፍለ ዘመን የቀረበው ዘጋቢ ፊልም ተመልካቹ እርሱን  የሚመጥነው ሆኖ አላገኝውም ፤በመካከለኛው የኢትዮጵያ ታሪክ የተደረጉ ጦርነቶች ፤ በጊዜው የወደሙ ንብረቶችና ሃብቶች ፤ሃይማታዊ እንደሆነ ብቻ አድርጎ ማቅረቡ ስህተት ነው፤ አንድ ዘጋቢ ፊልም ከመሰራቱ በፊት ሰሪዎች ከተመልካቹ የተሻለ በቂ እውቀት ይኑራቸው ፤ እድሜ ዘመናችሁን በታሪክ ትምህርት ላይ ያሳለፋችሁ ሰዎች ነገ ታሪክ የሚሆነው መንግስት ስለ ታሪክ ቢጠይቃችሁ ስላበቀላችሁት ነጭ ጸጉር ብላችሁ ብቻ እውነቱን ተናገሩ ፤ ያልተጠየቃችሁትን አትመልሱ ፤ እናንተ ነገም ታሪክ ሆናችሁ ታሪክ ጠያቂ እንደሚነሳባችሁ እወቁት ፤ መልከ ጼዲቅ የነበረበትን ጊዜ የማያውቅ ጋዜጠኛ ስለ ኦርቶዶክስ ቤተክርስትያን መጤ መሆን አለመሆን ጥያቄ ማንሳት አይገባውም ፤ እባካችሁ ፖለቲካዊ ዶግማ ደግማችሁ ያልተጻፈ አታንቡልን ፤ ያልተከሰተን ድርጊት አትንገሩን ፤ ያልሆነው እንደሆነ አድርጎ ማቅረብ ይበልጥ አጀንዳውን  ከማራገብ ውጪ ፋይዳው ሀገራዊ ጥፋት መሆኑን እወቁ ፤  ሊፈቱ የማይችሁ የሚመስሉ ችግሮች በመነጋገር ሰፊ ውይይት በማድረግ እልህ አስጨራሽ ትእግስት ታክሎበት በርካቶች በተለያዩ የአለማችን ክፍሎች ላይ ለችግሮቻቸው መፍትሄ ሲያመጡ ተመልክተናል ፤ አሁን ግን መንግስት እየሄደ ያለው መንገድ እንደ ሃገር ጫፍ ያድርሰው አያድርሰው መጀመሪያ መመልከት ያለበት ይመስለናል ፤ የማያዘልቅ መንገድ መጀመር አንድም ድካም ነው አንድም መንገዱን ሲጀምሩ አለማስተዋል ነው ፤ በሌላ በኩል 100 ዓመት ወደ ኋላ በመሄድ “እናንተ እኮ ተበድላችኋል” ማለት ሰውን ላልተፈለገ አመጽ ስለሚያነሳሳው ሀሳቡን የሚያነሱ ሰዎች ከሀሳቡ ጀርባ ሊመጣ የሚችለው ነገር ቢያስተውሉት መልካም ነው ፤ አሁን እኛ እንደ ሃሳብ የምናቀርበው ነገር ቢኖር ከእምነት ተቋማት ላይ መንግስት ረዥሙን ክንዱን ያንሳ ፤ ይህን ችግር ለመቅረፍ አቅም ያለው መንግስት ሳይሆን ህዝቡ ራሱ መሆኑን መጀመሪያ  ይወቅ ፤ የመንግስት ሚና መሆን መቻል ያለበት የእምነት ተቋማት በራሳቸው መፍታት የማይችሉትን ጉዳይ የመንግስትን እርዳታ ሲጠይቁ ብቻ ለሀገር ሰላም ፤ ለምዕመናን ደህንነት ሲባል ብቻ መንግስት ጣልቃ የመግባቱን ስራ ቢሰራ መልካም ነው፡፡

በሌላ በኩል ከእምነቶች መካከል አንዱ የአንዱን እምነትና ስርኣት ጥላሸት የመቀባት ስራ የሚሰሩ ሰዎችን የሚሰሩት ስራ አግባብ አለመሆኑን የራሳቸውን እምነት በራሳቸው ዛቢያ ዙሪያ በመዞር የእምነት ነጻነቶቻቸውን ተጠቅመው በዛቢያቸው እንዲሽከረከሩ ትምህርት ቢሰጣቸው ፤ የሌላውን ስም ካልጠሩ ያላስተማሩ የሚመስላቸው የእምነት መምህራኖች የያዙትን የተሳሳተ አቋም እንዲያስተካክሉ ቢደረጉ ፤ አንዱን በአንዱ ላይ የሚያነሳሱ የጋዜጣና የመጽሄት ጽሁፎች ፤ የመጽሀፍ ህትመቶች ፤ የቪሲዲ እና የካሴት የተቀረጹ ድምጽና ምስሎችን መቆጣጠር የሚያስችል መንገድ ቢቀየስ መልካም ነው የሚል እምነት አለን ፤

ቸር ሰንብቱ