ሃያ አንደኛው ሰማዕት

አንድ አድርገን የካቲት 16 2007 ዓ.ም

ዲ/ን ሄኖክ ኃይሌ

 henoktsehafi@gmail.com

•   '' ክርስቲያንና ዕጣን አንድ ናቸው:: ሁለቱም መዓዛቸው የሚታወቀው እሳት ውስጥ ሲገቡ ነው'' ፓትርያርክ ታዋድሮስ

ሰሞኑን በሊቢያ ባሕር ዳርቻ ላይ የግብፅ ኦርቶዶክስ ምእመናን የሆኑ ወጣቶች አምላካችንን አንክድም ብለው እንደ በግ ተነድተው ሲታረዱ ተመልክተናል፡፡ የቤተ ክርስቲያን ራስ ክርስቶስ ነው፡፡ አንዱ አካል ሲሰቃይ ሌላው አካል መታመሙ አይቀርምና የእነርሱ ስቃይ የክርስቶስ አካል ክፍሎች ለሆንን ሁላችም ተሰምቶናል፡፡ የአምላካቸውን ስም እየጠሩ የታረዱት ምእመናን በወጣትነት ዕድሜ ላይ የሚገኙ ፣ ሥራ ፍለጋ ወደ ሊቢያ የሔዱና አንዳንዶቹም ጋብቻ ለመመሥረት እየተዘጋጁ የነበሩ ናቸው፡፡ ሆኖም የአምላካቸውን ስም ጠርተው ሰማያዊ ሙሽሮች ሆኑ፡፡ ምንም እንኳን በምድራዊ ዓይን ስናየው እጅግ አሰቃቂ ቢሆንም እነዚህ ኦርቶዶክሳዊያን ወጣቶች ያለ አንዳች ተቃውሞ በፈቃደነት የተቀበሉት ሰማዕትነት እጅግ የሚያስቀና እና ሰማያዊ አክሊል የሚያጎናጽፋቸው ነው፡፡ በሰማይም ከመሰዊያው አጠገብ ቆመው ከሚያማልዱ ቅዱሳን ሰማዕታት ማኅበር ተደምረው ‹‹በታላቅ ድምፅም እየጮኹ። ቅዱስና እውነተኛ ጌታ ሆይ፥ እስከ መቼ ድረስ አትፈርድም ደማችንንስ በምድር በሚኖሩት ላይ እስከ መቼ አትበቀልም›› እንደሚሉ ነጭ ልብስም ተሰጥቷቸው እንደ እነርሱም ደግሞ ይገደሉ ዘንድ ያላቸው የባሪያዎች ባልንጀራዎቻቸውና የወንድሞቻቸው ቍጥር እስኪፈጸም ድረስ፥ ገና ጥቂት ዘመን እንደሚያርፉ›› እናምናለን:: /ራእ 6:11/

እነዚህ ሰማዕታት ሃያ አንድ ሲሆኑ የግብጽ ኦርቶዶክስ ምእመናን የሆኑት ሃያዎቹ ናቸው:: ሃያ አንደኛው ከግብጻውያኑ ጋር አብሮ ይሠራ የነበረ የቻድ ዜጋ የሆነ በቀለሙም ከእነሱ የተለየ ወጣት ነበር:: የግብጻውያኑን የሃይማኖት ጥንካሬ ባየ ጊዜ አምላካቸው አምላኬ ነው አለ:: ከጌታ ቀኝ እንደተሰቀለው ወንበዴ ከሞት አፋፍ ላይ በመንግሥትህ አስበኝ ብሎ አመነ:: የደም ጥምቀት ተጠምቆ ለክብር በቃ::

ከዓመት በፊት ፓትርያርክ ታዋድሮስ እንዲህ ብለው ነበር:: '' ክርስቲያንና ዕጣን አንድ ናቸው:: ሁለቱም መዓዛቸው የሚታወቀው እሳት ውስጥ ሲገቡ ነው'' በእርግጥም የሃያዎቹ ክርስቲያኖች መዓዛ የዚህን የቻድ ወጣት ልብ ማረከው:: ''በሚድኑት ዘንድ የክርስቶስ መዓዛ ነን'' 2 ቆሮ 2:15

ከሰማዕታቱ በረከት ያሳትፈን!

/Sources for the News : Indian Orthodox Diaspora /Fb page/ , Radio Vatican news/

በታላቁ ጾም መጀመሪያ ሰማዕትነትን የተቀበሉትን የኮፕት ኦርቶዶክስ ቤተ ክርስቲያን ወንድሞቻችንን እስከ እለተ ትንሳኤ እናስባቸው፡፡