ተሀድሶያውያን በክብረ መንግሥት ቅዱስ ሚካኤል ቤተክርስቲያን ‹‹መተዳደር የምንፈልገው በቦርድ ነው›› በማለት ለመንግሥት ማመልከቻ አስገቡ

(አንድ አድርገን ሐምሌ 3 2005 ዓ.ም)፡- በአሁኑ ሰዓት በሰፊው የተሐድሶ መናፍቃን እንቅስቃሴ መልሶ በማገርሸት ከሚገኝባቸው አጥቢያ አብያተ ቤተክርስቲያናት መካከል ሐረር ቅዱስ ሚካኤል ፤ ሆሳዕና ቅዱስ ሚካኤል እና ክብረ መንግስት ቅዱስ ሚካኤል ተጠቃሾች ናቸው፡፡ ከእነዚህ አጥቢያ ቤተክርስቲያናት መካከል ግን የክብረ መንግስት ቅዱስ ሚካኤል በከፍተኛ ሁኔታ በማገርሸቱ ምክንያት በቅዱስ ሲኖዶስ አንተዳደርም የሚሉ ጥቅት ግለሰቦች ( በአሜሪካው የተሐድሶ ክንፍ መሪ “ቀሲስ’’ ተስፋዬ መቆያና እና የዱባዩ የተሐዲሶ ክንፍ መሪ “ቀሲስ” ተስፉ የሚመሩ የተሐዲሶ መናፍቃን) በአሁኑ ጊዜ ለክብረ መንግሥት የመንግሥት አካል የምንተዳደረው በቦርድ ነው በማለት ማማልከቻ አስገብተዋል፡፡ 

 ከክብረ መንግሥት የሚወጡ ሰባኪያን ወንጌላውያን ነን ባዮች በአሁኑ ጊዜ በደቡብ ኦሮሚያ በሚገኙ አኅጉረ ስብከቶች በቦረና ጉጂ እና ሊቤን ዞኖች ውስጥ በመሰግሰግ በሰፊው የተሐድሶን እንቅስቃሴ በማስፋፋት ላይ ይገኛሉ፡፡ ከእነዚህም መካከል አቶ ታምራት የሚባሉ የሀገረማርያም ዙርያ ( የቡሌ ሆራ ) ወረዳ ቤተክህነት ኃላፊ ሆነው ከተመደቡበት ጊዜ ጀምሮ በአካባቢው ሰፊ ሁከትና ረብሻ እንዲፈጠር ከማድረግ ባሻገር በቅዱስ ሲኖዶስ ጉዳያቸው በመታየት ላይ የሚገኙትን የተሀድሶ መናፍቃን የፊት መስመር ተሰላፊዎች እነ በጋሻው ደሳለኝን በመጋበዝ በቅርቡ በሁለት የገጠር ወረዳዎች ( በፍንጨዋና በመልካ ሶዳ ) በድምሩ 60,000 ( ስልሳ ሺህ ) ብር በማሰባሰብ ሰፊ የተሐድሶች ጉባኤ እንዲካሄድ አድርጓል፡፡ ይህ ጉዳይ በሊቀ ጳጳሱ እንዳይታወቅ ሰፊ የከለላ ስራ የሚሰራ በአሁኑ ሰዓት ተዘዋዋሪ ሰባኪ በመባል በአቡነ ገብርኤል የተሰየመው የክብር መንግስቱ “መ/ር” ጥላሁን ነው፡፡ በአጠቃላይ መልኩ ሲታይ ከሰኔ 28 አስከ ሰኔ 30 2005 ዓ.ም በክብረ መንግሥት ቅዱስ ሚካኤል የተደረገውም ጉባኤ በሀገረስብከቱም ይሁን በሊቀ ጳጳሱ በተጻፈ ደብዳቤ ቢታገድም እኛ የምንተዳደረው በቦርድ ነው በማለት ጉባኤው ከቤተክርስቲያንቱ ዕውቅና ወጪ ከመደረጉም በተጨማሪ አቶ በጋሻው ደሳለኝ እንደተለመደው ቅዱሳንን የመሳደብ ግብሩን በዚህም ጉባኤ እንዲቀጥል አድርጎታል፡፡ ታዲያ ከክብረ መንግሥት ቅዱስ ሚካኤል ቤተክርሰቲያን የወጡ እነ ተስፋዬ መቆያ ፤ተስፉ ፤እነ ታምራት፤ እነ ጥላሁን በሀገር ውስጥም ይሁን በወጪ ሀገር ቅድስት ቤተክርስቲያንን የማፍረስ ዓላማ ይዘው ከተነሱ ክብረመንግሥት ቅዱስ ሚካኤል ቤተክርስቲያንን ለመገንጠል ከጣሩ እነዚህ ወገኖች ማናቸው? በቅዱስ ሲኖዶስ የማይመራው የክብረ መንግሥት ቅዱስ ሚካኤልስ የማነው? የእነ ተስፉ እና የእነ ተስፋዬ መቆያ ዓላማ ክብረ መንግሥት ቅዱስ ሚካኤልን እንደ ዱባይ ቅዱስ ሚካኤል ቆርጦ ለማስቀረት ይሆን?

(በአንዳንድ ችግር ‹‹አንድ አድርገን›› ለጥቂት ሳምንታት አቋርጣ የነበረው መረጃ የማስተላለፍ ሂደት ከሳምንታት በኋላ ትቀጥላለች፡፡)