አቶ አሸናፊ የጻፋቸው ኦርቶዶክሳዊ ያልሆኑ ትምህርቶች ከቤተክርስቲያ ደጃፍና ከምዕመናን እጅ የሚወገዱበት መንገድ ያሳስበናል

አንድ አድርገን ሚያዚያ 01 2007 ዓ.ም

ከሦስት ዓመት በፊት ግንቦት የቅዱስ ሲኖዶስ ጉባኤ ላይ አንድ ወሳኝ ውሳኔ መወሰኑን ይታወቃል ፤ በውሳኔውም በርካቶች ከቤተክርስቲያን ጋር የጀርባ ቅማል ሆነው ምንፍቅናቸውን ሲዘሩ የነበሩ ሰዎች በግልጽ ጉባኤ የተወገዙበት ቀሪዎቹ ደግሞ መዝገባቸው በይደር የቆየበት እንደሆነ የምናስታውሰው ነው፡፡ በጊዜው  በፕሮቴስታንቶች እየተደገፉ የቅድስት ኦርቶዶክሳዊት ተዋሕዶ ቤተ ክርስቲያንን ትምህርተ ሃይማኖት፣ ሥርዐተ እምነት፣ ክርስቲያናዊ ትውፊትና ታሪክ በኅቡእና በገሃድ ተደራጅተው ለማፍረስና ለማፋለስ እየተንቀሳቀሱ  ድርጅቶች ፍጹም ውግዘት የሚገባቸውን የፕሮቴስታንታዊ ተሐድሶ እንቅስቃሴ አራማጅ ማኅበራትና ግለሰቦች በመለየት ማኅበረ ሰላማ፣ ማኅበረ በኵር፣ የምሥራች አገልግሎት፣ አንቀጸ ብርሃን፣ የቅድስት ልደታ ለማርያም መንፈሳዊ ማኅበር፣ የኢትዮጵያ መንፈሳዊ ተሐድሶ ኅብረት፣ አሸናፊ መኰንን፣ አግዛቸው ተፈራ፣ ጽጌ ስጦታው እና ግርማ በቀለ የመሰሉት ሰዎችና ላያቸው ማር የተቀቡ ውስጣቸው ግን ነጣቂ የሆኑ ተቋማት ተለይተው መለየታቸው ይታወቃል፡፡

አቶ አሸናፊ በንስሃ ታጥቦ ወደ ቅድስት ቤተክርስቲያን ከመመለስ ይልቅ  ‹ቅዱስ አትናቴዎስ የወንጌል አገልግሎት› በማለት  ኦርቶዶክሳዊት ቤተ ክርስቲያን በምታከብራቸው  የእምነቷ አካል አድርጋ በምትዘክራቸው ፤ በቅዱስና በጻድቅ ሥም ሌላ የእምነት ተቋም  ከመሰሎቹ ጋር በታህሳስ 2006 ዓ.ም  ማቋቋሙ ይታወቃል፡፡ ይህ ሰው ከቤተክርስቲያን በአባቶች ሳይለይ በፊት የጻፋቸው መጽፍች ግን አሁንም ድረስ ለየዋሃን ምዕመናን ገንዘባቸውን ብቻ በሚያሳድዱ የመጽፍት ሻጮች አማካኝነት በየቤተ ክርስቲያኑ ደጃፍ እየተሸጡ ይገኛሉ፡፡  እኛ አሁን ላይ ግድ የሚለን የዚህ ሰው መጽፍቶች በምዕመኑ ላይ የሚያሳድሩት ተጽህኖ እና ከኦርቶዶክስ ተዋሕዶ ቤተክርስቲያን ደጃፎች ላይ የሚወገዱባቸው አግባብ ነው፡፡ አቶ አሸናፊ ከቤተክርስቲያን ሳይለይ በፊት እጅጉን የተመከረ ሰው ነበር ፤ ልቡ አንድ ጊዜ ስለደነደነ መስማትን ፍቃድ አላደረገም ነበር ፤ ስለዚህ ተመክሮ አልሰማ ያለን ሰው ፤ ከቤተክርስቲያን በቅዱስ ሲኖዶስ ተገሎ የራሱን የእምነት ተቋም ስላቋቋመ ሰው ግድ የሚለን እኛ ማነን?  ቅድሚያ  አቶ አሸናፊ  የጻፋቸው  ኦርቶዶክሳዊ ያልሆኑ ትምህርቶች ከቤተክርስቲያ ደጃፍና ከምዕመናን እጅ የሚወገዱበትመንገድ ቢያሳስበን መልካም ነው፡፡  መጽሐፍት ላነበባቸው መንገድ የማሳየት አቅማቸው ከፍተኛ ስለሆነ በመጀመሪያ በሰውየው የተጻፉ ከ30 በላይ የምንፍቅና መጻሕፍት  እና መሰል ፅሑፎች አወጋገዳቸው ሊያስጨንቀን ይገባል ፤ 

 

‹‹ቅዱስ ሲኖዶስ እነዚህን ግለሰቦች በቅዱስ ሲኖዶስ የተወገዙ መሆናቸው ታውቆ በነበረው የካህንና የክብር ስም እንዳይጠሩና በቤተክርስቲያን በማናቸውም መድረክ ላይ እንዳይሳተፉ ›› ብሎ ቢወስንም ይህ ሰው ቅዱስ ሲኖዶስ አውግዞ እና ሕፀጽ አለበት ካለ በኋለ ስለምን ‹ዲያቆን› እየተባለ ይጠራል?

በጊዜው የተወገዙት ሰባቱ  ድርጅቶች ውስጥ  ከሣቴ ብርሃን ፤ ማኅበረ ሰላማ ፤  የምሥራች አገልግሎት ፤ የቅድስት ልደታ ለማርያም መንፈሳዊ ማኅበር ፤  አንቀጸ ብርሃን (ከድርጅቱ ጋራ አሸናፊ መኰንንና ዳንኤል ተሾመ) ፤ የእውነት ቃል አገልግሎት ፤ ማኅበር በኵርና የኢትዮጵያ መንፈሳዊ ተሐድሶ ኅብረት ይገኙበታል ፡፡ ከእነዚህ በተጨማሪ ከተወገዙት 16 ሰዎች  የክህነትና የክብር ማዕርጋቸው ተሽሮ የበፊቱ አቶ የሚለው ስም ከተመለሰላቸው ውስጥ በግንባር ቀደምነት  አቶ አሸናፊ መኰንን ይገኝበታል፡፡

ይህ ሰው ለዘመናት ኦርቶዶክሳዊ በመምሰል የእኛ ያልሆነ ትምህርት ኑፋቄ የተቀላቀለበት መጽሃፍቶችን በመጻፍ በርካታ ብሮችን መሰብሰብ ከመቻሉም በተጨማሪ ምንፍቅናውን በበርካታ መጽሃፍቶች መዝራት ችሏል ፤ አሁን ግን ይህ ሰው ስራው ታውቆበት ከቤተክርስትያን ከተባረረም በኋላ የመጽሀፍት ነጋዴዎች በማወቅም ይሁን ባለማወቅ መጽሀፍቶቹ ከትክክለኛ መጽሀፍቶች ጋር በመደባለቅ በገበያ ላይ ይዘዋቸው  ይገኛሉ ፤ ስለዚህ ምዕመናን የዚህን ሰው ትምህርት እና መንገድ ቤተክርስትያን ስላወገዘች መጽሀፍቶቹን እና ትምህርቱን በማወቅም ሆነ ባለማወቅ ከመጠቀም ወደ ኋላ እንዲሉ “አንድ አድርገን” መልዕክቷን ታስተላልፋለች፡፡ ለዚህም ማስረጃ ይሆን ዘንድ መጽሀፎቹን ላያቸው ተዋህዶ ፤ ውስጣቸው ተሐድሶ የሆኑ መጻህፍት የፊት ሽፋን በመውሰድ በቀላሉ መለየት እንድትችሉ በዚህ መልክ አቅርበንላችኋል፡፡ 

”የበግ ለምድ ለብሰው ከሚመጡባችሁ በውሥጣቸው ግን ነጣቂዎች ተኵላዎች ከሆኑ ከሐሰተኞች ነቢያት ተጠንቀቁ።” የማቴዎስ ወንጌል 7፤15