እነሆ ቤተ ክርስቲያን ዛሬ ደስ አላት

አንድ አድርገን ታኅሳስ 15 2007 ዓ.ም

የአዲስ አበባ ዩኒቨርሲቲ የሕክምና ትምህርት ክፍል የተቋቋመው የዛሬ 50 ዓመት በ1957 ዓ.ም በስድስት ተማሪዎች ብቻ ነበር፡፡ ዛሬ ከአምስት አስርት ዓመታት በኋላ በታሪኩ ከፍተኛ የሆኑት 287 ሐኪሞችን ባሳለፍነው ሳምንት ታኅሳስ 12 2007 ዓ.ም 50ኛ ዓመቱን በሚያከብርበት ልዩ ጊዜ ማስመረቅ ችሏል፡፡ ከተመረቁት ተማሪዎች መካከል ከ140 ተማሪዎች በላይ የማእረግ ተመራቂዎች ነበሩ፡፡ እነሆ በዚህ ዓመት ከተመረቁት ከ100 በላይ ሐኪሞች በስርዓተ ቤተ ክርስቲያን በግቢ ጉባኤ ታቅፈው ትምህርታቸውን ከእምነታቸው አንድ በማድረግ ቀን በትምህርት ለሊት በአገልግሎትና በስራ ላለፉት ስድስት እና ሰባት ዓመታትን በርካታ ውጣውረዶች ካሳለፉ በኋላ የዘመናት ህልማቸውን እንደ እግዚአብሔር መልካም ፍቃድ ሊያዩ ችለዋል፡፡

እነሆ ቤተ ክርስቲያን ዛሬ ደስ አላት የሚተጉ፣ የሚጸልዩ፣ የሚቀድሱ ፤ የሚያስቀድሱ፣ እግዚአብሔር ይማርህ የሚሉ፣ የሚጾሙ፣ የሚዘምሩ፣ የሚያስተምሩ፣ የሚማሩ፣ ‹ብረሳሽ ቀኜ ትርሳኝ› የሚሉ፣ የሚላኩ፣ የሚታዘዙ ፤ የሰዎችን ችግር የሚፈቱ በርካታ ሐኪሞችን አገኘች፡፡ በጥቁር አንበሳ ግቢ ጉባኤ ታሪክ በመንፈሳዊ ትምህርትም የጸኑ እንደዚህ ብዙ ተመራቂ ሐኪሞችን ታይቶ አይታወቅም፡፡ ከዘንድሮው ተመራቂ ሐኪሞች መሐል 32ቱ/ወይም ከዚያ በላይ/ ወረብ አቅራቢ ተመራቂዎች ነበሩ፡፡ ይህን ያህል ወረብ አቅራቢ ይቅርና ተመራቂ እንኳን ማግኘት በቀደሙት ዓመታት አስቸጋሪ ነበር፡፡ በግቢ ጉባኤ በመንፈሳዊ ትምህርትም ጸንተው በመስቀልና በመጽሔት የተመረቁት ደግሞ ከ80 በላይ ሐኪሞች ናቸው፡፡

እግዚአብሔር ይባርካችሁ ፤ የአገልግሎት ዘመናችሁን ይባርክላችሁ ፤ 

እንኳን ደስ አላችሁ፡፡