ቀኝና ግራቸውን ያለዩ የ21ኛው ክፍለ ዘመን በጎች

 (አንድ አድርገን መስከረም 2 2006 ዓ.ም)፤-

የልዑል እግዚአብሔር ቸርነትና አዳኝነት ከሚገለጥባቸው ምክንያቶች ወይም መንገዶች አንዱ ጠበል ነው፡፡ በገዳማትና አድባራት ቅጽር፣ በቅጽሩ ዙርያና በአካባቢው ሰበካዎች ባሉ የጠበል ቦታዎች በፍጹም እምነት የሚቀርቡ ምእመናን በጠበል እየተጠመቁ ፈውስ ያገኛሉ፤ የእግዚአብሔር ደገኛ ተኣምራት እየተገለጸ ምሕረቱ የተደረገላቸው ሁሉ በየጊዜው ድንቅ ሥራውን እየመሰከሩ ይገኛሉ፡፡

በሥርዐተ ቤተ ክርስቲያን ማጥመቅ የሚችለው የቅስና ሥልጣነ ክህነት ያለው አባት ብቻ ነው፡፡ ቅስና የሌለው ሰው አያጠምቅም፤ አያናዝዝም፤ አይባርክም /ፍት.ነ.ፍ.መ.አን.3 ቁ.21/ ቅዱሱን ቅባት መቀባት የሚችለው የክህነት ሥልጣን ያለው ብቻ ነው፡፡ /ያዕ.5÷14/ ሀብተ መንፈስ ቅዱስ በገንዘብ አይሸጥምና አጥማቂው ካህን መማለጃ መቀበል አይገባውም፡፡ /ፍ.ነ.ፍ.መ.አን.7/

‹‹መምህር›› ግርማ ከቅ/ሲኖዶስ ዕውቅና ውጭ በሕንድ በቻይና እና በተለያዩ ሀገራት በፋብሪካ የተመረቱ ለፀጉር ድርቀት መከላከያ የሚሆንን የወይራ ዘይት ‹‹ቅባ ቅዱስ ነው›› በማለት በቅድስት ቤተ ክርስቲያን ዐጸድ ውስጥ በማከፋፈልና በመሸጥ ቤተ ክርስቲያንን የንግድ ማእከል አድርጓታል፡፡ ‹‹ርኵስ መንፈስ ያደረባችኹ እገሌ ወይም እገሊት መተት አድርጋባችኹ ነው፤ ›› በማለት እናትን ከልጇ ፤ ዘመድን ከዘመድ ፤ ጎረቤታሞችን እርስ በእርስ በጠላትነት እንዲተያዩ እስከ መጨረሻው እንዳይተማመኑ ፤ የጥርጣሬ መንፈስ በውስጣቸው እንዲያድር በማድረግ ከፍተኛ ሚና ተጫውቷል፡፡ በአንድ ወቅት ‹‹መምህር›› ግርማ ‹‹እኛ የምንጨነቀው ሰውን ለማዳን እንጂ ለቤተ ክርስቲያን ሥርዐት አይደለም፤›› በማለት በአውደ ምህረት ተናግሯል፡፡ ከዚህ በተጨማሪም ደሴ አካባቢ በጆንኛ ሞልቶ ያመጣውን መቁጠሪያ ሰዎች እንዳይገዙትና ከስርዓተ ቤተ ክርስቲያን ውጪ መሆኑን ምዕመኑ በመቃወሙ ‹‹ የዚህ ሀገር ሰውም አጋንንቱም አይታዘዙም›› በማለት በአውደ ምህረት ላይ ተናግሯል፡፡ ሰውየው ለበርካታ ጊዜያት በሕገወጥ መንገድ ሲያጠምቁበት የነበረው የአዲስ አበባው የቅዱስ እስጢፋኖስ ቤተ ክርስቲያን ለአስተዳዳሪው ባለ ሁለት መኝታ የመኖሪያ ኮንዶሚኒየም በአዲስ አበባ ለመግዛት በመስማማት መሆኑን በስተመጨረሻ ለማወቅ ተችሏል፡፡

ይህ ሰው እስከ አሁን ምዕመኑ ላይ እያደረሰው ያለው የስነልቦና ጉዳት ይህ ነው የሚባል አይደለም ፤ ቤተክርስቲያኒቱ ላይ እንደ መዥገር በመጣበቅ እያደረሰው ያለው ጉዳትም ቀላል የሚባል አይደለም ፤ ይህን ሰው ስናይ ከ20 ዓመት በፊት በአዲስ አበባ ጎዳናዎች ላይ ፤ በተለያዩ አብያተ ክርስቲያናት በመገኝት ‹‹አራት ኪሎ ዘንዶ ሊወድቅ ነው ፤ ዘንዶ ሲወድቅ ያየም አይተርፍም ››……ምናምን እያሉ መዓት ሲናገሩ የነበሩት በብዙ ሺህ የሚቆጠር ተከታይ የነበራቸው ፤  በስተመጨረሻ ‹‹እግዚአብሔር አዞኝ ነው›› በማለት ሚስት በማግባት የሦስት ልጆች አባት ለመሆን የበቁት ‹‹ባህታዊ›› ገብረመስቀልን እንድናስታውስ ያደርገናል፡፡  

እጅግ የሚገርመው ‹‹መምህር›› ግርማ እንደሚነዷቸው በሺህ የሚቆጠሩ ግራና ቀኛቸውን ያለዩ የ21ኛው ክፍለ ዘመን በጎች ‹‹ባህታዊ›› ገብረመስቀልንም የሚከተሉ ከሊቅ እስከ ደቂቅ ለቁጥር የሚያስቸግሩ እጅግ በርካታ ሰዎች ነበሯቸው፡፡ በስተመጨረሻ በ1985 ዓ.ም ግድም ኢህአዴግ ስልጣን ከያዘ ከሁለት ዓመት በኋላ ‹‹ባህታዊው›› ሕዝቡን ወዳልሆነ ጎዳና እየወሰዱ መሆኑን በመገንዘብ አሁን የአፍሪካ ሕብረት የተሰራበት ቦታ የቀድሞ ከልቸሌ ዘብጥያ ወርደዋል፡፡ የእስር ቤቱ ጠባቂዎች ጸጉራቸውን በመላጨት ለተከታዮቻቸው አንዷን ዘለላ በ50ብር ሲሸጡላቸው እንደነበር ይታወቃል፡፡

ከሁለት ዓመት በፊት ‹‹ባሕታዊ›› ገብረ መስቀል በደብረብርሃን ወይንዬ ተክለ ሃይማኖት ቤተክርስቲያን በዓል ለማክበር በሄዱበት ወቅት ከቤተክርስቲያኑ በስተ ደቡብ በኩል ከ20 ዓመት በፊት ቆመው ድርሳን ሲያደርሱ ብርሃን ከሰማይ ግጥም ብሎ በመውረድ ቤቷን ሞልቷት እንደነበር ፤ በማንበብ የጧፍ ብርሃን እንደማያስፈልጋቸው በአንደበታቸው ሲናገሩ ሰምተናል፡፡(እስከ አሁን ‹‹መምህር›› ግርማ ብርሃን ከሰማይ አወረድኩ ሲሉ አልሰማንም ..ወደፊት ግን ላለማለታቸው እርግጠኞች ሆነን መናገር አንችልም ፡፡)

 ይህ ሕገወጥ አካሄድ በዚሁ ከቀጠለ የ‹‹ባህታዊው››ን አንዷን ዘለላ ጸጉር በ50 ብር የገዛው  ሕዝብ አሁን የ‹‹መምህር›› ግርማን በስንት ይገዛው ይሆን…?

ማስተዋሉን ይስጠን

ሰውየው ሕጋዊ መሆናቸውን ለማሳወቅ የበተኑት ከቤተ ክህነት ያልወጣ ሕገወጥ ደብዳቤ 

የመንበረ ፓትርያርክ ልዩ ጽ/ቤት መልስ