መንግሥት ሃይማኖታዊ መልዕክቶችን የሚከለክል ሕግ ለማውጣት እያሰበ ነው

(አንድ አድርገን መስከረም 23 2004 ዓ.ም)፡- ከወራት በፊት በየአብያተክርስቲያናቱ በር ላይ ማንም ሳይፈቅድላቸው የምዕመኑን ጆሮ የሚያደነቁሩ  የነጋዴዎችን ጉዳይ በማንሳት በቅርቡ ህግ እንደሚወጣላቸው “አንድ አድርገን” ላይ አንዲት ጽሁፍ መከተባችን ይታወሳል ፤  በአሁኑ ሰዓት ይህ ጉዳይ ሌሎች ነገሮች ተጨምረውበት አዲስ ህግ ሊወጣ መሆኑን ሪፖርተር ጋዜጣ በ23/01/2004 ባወጣው እትሙ ላይ አስነብቦናል ፤ ይህ ህግ በጣም ብዙ ጠቃሚ ነገሮች እንደሚኖሩት ይታሰባል ፤ በየደብሩ ያለፍቃድ የካሴትና የሲዲዎች ሽያጮችን የሚያስቀር ይሆናል ፤ አንዳንድ ሰባኪያን በተለያየ እምነት የሚገኙ ስለሌላው እምነት በሚናገሩት ነገር ተጠያቂ የሚያደርጉ ነገሮች ይካተቱበታል ፤ እንደ ፓስተር ዳዊት ያለን ሰው የሌላውን እምነት የማያከብር ጎረምሳ የሚጠየቅበት አንቀፆች ይኖሩታል ፤ የማህበረሰቡን ሰላም ለማስጠበቅ ሲባል በየቦታው ያለፍቃድ የሚደረጉ ሃይማኖታዊ የካሴት ሽያጮች ፤ የሞንታርቦ ጩህቶችን የሚቀንስ ይሆናል ፤ በተለያዩ የመንግስት እና የህዝብ አገልግሎት ሰጪ ተቋማት ውስጥ ሃይማኖታዊ ጉዳዮችን  የሚያንጸባርቁ ጥቅሶች ንግግሮች እና መሰል ነገሮች መስመር ያበጅላቸዋል ተብሏል ፤ ለማንኛውም ይህ ህግ የሚያመጣው መልካም ነገሮች እንዳሉት ሁላ ትንሽ ጫናም ሊፈጥር እንደሚችል ባለሙያዎች ይናገራሉ ፤ በአሁኑም ሰዓት የተለያዩ የእምነት ተቋማት ጋር ለማወያየት መርሀ ግብር መያዙን ሰምተናል ፤ ይህ ጉዳይ በዋናነት የፌደራል ጉዳዮችን መስሪያ ቤት እና የተለያዩ የእምነት ተቋማት ይሳተፉበታል ተብሎ ይጠበቃል፡፡ ትልቁ ነገር አብያተክርስቲያናት የንግድ ቦታ እንዳይሆኑ ይከለክላል ፤ ቤተክርስቲያን ሳትፈቅድ ማንም በማንኛውም ጊዜ በሯ ላይ ቆሞ ንግድ ማካሄድ አይቻልም ፤ ያለፍቃድ ንግድ  ሲያካሂዱ የተገኙትን ሰዎች ከ10ሺህ ብር ጀምሮ መቀጫ ይኖረዋል ፤ ይህ የኛ ያልሆኑት ወገኖች ካሴቶቻቸውን እንደ በፊቱ ንግስን እየጠበቁና የሚያካሂዱትን ንግድ ያስቆማል ተብሎ ይጠበቃል  ፡፡

ከሪፖርተር ጋዜጣ የተገኝ (በዮናስ አብይ)

በአገሪቱ ውስጥ በከፍተኛ ሁኔታ እየተስፋፉና ሃይማኖታዊ ግጭቶችን እየፈጠሩ ነው የሚባሉ ማናቸውም ሃይማኖታዊ መልዕክቶችን የሚያስተላልፉ ምስሎች፣ ጥቅሶች፣ ድምፅን የሚበክሉ የጐዳና ላይ ስብከቶችና መዝሙሮች፣ ከሕዝባዊ ቦታዎች የሚከለክል አዲስ ሕግ አውጥቶ በሥራ ላይ ለማዋል እየተንቀሳቀሰ መሆኑን መንግሥት አስታወቀ፡፡ ሃይማኖታዊ ጉዳዮች የሚመለከቱት የፌዴራል ጉዳዮች ሚኒስቴር፣ ሃይማኖት ጥልቅና ጥንቃቄ የሚያሻው ጉዳይ በመሆኑ፣ ከተለያዩ ባለድርሻ አካላት ጋር በጥልቀት እየመረመረው መሆኑንም ገልጿል፡፡

በፌዴራል ጉዳዮች ሚኒስቴር የሕዝብ ግንኙነት ኃላፊ የሆኑት አቶ አበበ ወርቁ በተለይ ለሪፖርተር እንደገለጹት፣ መንግሥት በአሁኑ ጊዜ ሃይማኖታዊ መልዕክት ያላቸውን ይዘቶች በተመለከተ፣ የአምልኮ ሥርዓት ምን መምሰል እንዳለበትና የድምፅ ብክለትን ጨምሮ የሚፈጠሩ ችግሮችን ከሕዝባዊ ቦታ እንዴት ማራቅ እንደሚቻል፣ ሕግ እንደሚያስፈልግ ከምንጊዜውም በላይ እያሰበበትና እየተዘጋጀ ነው፡፡

“በማናቸውም አገልግሎት መስጫ ተቋማት እንደ ታክሲ፣ ሆቴሎች፣ ሕዝባዊ ተቋማትና አደባባዮች ላይ የሚለጠፉ ሃይማኖታዊ ነክ መልዕክቶችን፣ ሕዝብን ከሕዝብ፣ ሃይማኖትን ከሃይማኖት ሊያጋጩ የሚችሉ በኤሌክትሮኒክስ የሚተላለፉ መልዕክቶች በሙሉ በሕግ ተደንግገው የሚከለከሉበት ሥራ በመሠራት ላይ ነው፤” ብለዋል አቶ አበበ፡፡

“የሃይማኖት ጉዳይ ጠለቅ ያለ ነገር ስለሆነ ጠለቅ ያለ ሕግና ደንብ ያስፈልገዋል፡፡ ስለሆነም የአዋጁንና የደንቡን ይዘት እያዘጋጀን ለሚመለከታቸው አካላት እያሳየን ነው፡፡ የድምፅ ብክለትን በተመለከተ አዋጁና ደንቡ በማውጣት ሥርዓት ለማስያዝ እየተሠራ ነው፤” ሲሉ አስረድተዋል፡፡

ነገር ግን እስካሁን ድረስ ቃል በቃል የሚጠቀስ ዝርዝር ይዘት ያለው ረቂቅ ሕግ ወይም አዋጅ ገና እንዳልተዘጋጀ አቶ አበበ ለሪፖርተር አስታውቀዋል፡፡

“ለምሳሌ ታክሲዎችንና ሆቴሎችን ብናይ የሕዝብ ተቋማት እንደሆኑ ይታወቃል፡፡ አገልግሎታቸውም ለሁሉም የኅብረተሰብ ክፍሎች መሆኑ እየታወቀ በውስጣቸው የአንድን ሃይማኖት ፍላጐት ብቻ የሚያንፀባርቁ መልዕክቶች ይተላለፍባቸዋል፡፡ እነዚህ አገልግሎቶች የሕዝብ መጠቀሚያ እንጂ የማንም ሃይማኖት ተከታይ መጠቀሚያ ብቻ መሆን የለባቸውም፡፡ በእነዚህ ቦታዎች የሚለጠፉ መልዕክቶች የአንዱን ሃይማኖት ከፍ አድርገው የሌላውን ማንኳሰስ የሚታይባቸው ነው፡፡ በመሆኑም ከፈቃድ አሰጣጥ ጀምሮ ሕዝብን ከሕዝብ ሊያጋጩ በማይችል ሁኔታ አገልግሎት እንደሚሰጡ መታሰብ አለበት፤” ሲሉ አስረድተዋል፡፡