‹‹ባታውቀው ነው እንጂ የሕዝቡ ባሕል ሲናደድም ያጨበጭባል››

(አንድ አድርገን 29-05-08) :-  " አቡነ ጴጥሮስ የተገደሉ ዕለት እዚያው ነበርኩ ፡፡ መጀመሪያ በእጃቸው ይዘውት የነበረውን መጽሐፍ ቅዱሳቸውን ተሳለሙት ። ቀጥለውም በያዙት መስቀል አማትበው ሕዝቡን ባረኩ ። የኪሳቸውንም ሰዓት አውጥተው ካዩ በኋላ መልሰው ከኪሳቸው ከተቱት ። ወዲያው ወታደሮች በሩምታ ተኩሰው ገደሉዋቸው ። ይህ እንደሆነ አስገዳዩ ኮሎኔል ተመልካቹን ሕዝብ አጨብጭቡ ብሎ አዘዘና ተጨበጨበ ። "

" ማታ ከአስገዳዩ ኮሎኔል ጋር ተገናኝተን ስንጫወት ‹በዚህ ቄስ መገደል እኮ ሕዝቡ ተደስቷል› አለኝ ። ‹እንዴት? › ብለው ‹አላየህም ሲያጨበጭብ› አለኝ ። እኔም ‹ባታውቀው ነው እንጂ የሕዝቡ ባሕል ሲናደድም ያጨበጭባል› አልኩት ። ‹‹እንዴት?›› ቢለኝ እጄን እያጨበጨብኩ አሳየሁት ፡፡

(ዜና ጳጳሳት ኢትዮጵያውያን ፣ ዲ/ን መርሻ አለኸኝ ፣ ገጽ 79-80)

ነገ ዕሁድ ጥር 29/2008 ዓ-ም ጠዋት 3፡00 ላይ ከ5ኪሎ ብሔራዊ ሙዚየም ጀምረን የጀግናችንን የሰማዕቱ ቅዱስ አቡነ ጴጥሮስ የምሥክር ሐውልት አጅበን ፥ ፒያሳ ወደሚገኘው የቀድሞ ክብር ቦታው ዳግም ልናቆመው እነሆ ሰዓታት ብቻ ይቀሩናል ።

ስለዚህም በዚህ መርሐ ግብር ላይ የምንገኝ ሁላችን ፥ የምሥክር ሐውልቱ እቦታው ደርሶ ከሥፍራው እንደቀደመው በሚቆምበት ሰዓት ጀግናችንን በጭብጨባ እናንግሣቸው ! ፋሽስት ኢጣሊያ አባታችንን በግፍ በገደላቸው ጊዜ ከላይ እንዳነበብነው ሕዝቡ በግድ እንዲያጨበጭብ ተደርጎ ነበር ። የሕዝቡን ባሕል ያልተረዳው የፋሽስት ሰው ግን ስንናደድና ስንቆጣ እንደምናጨበጭብ አልገባውም ነበር ።

ታዲያ ፦

- የአቡነ ጴጥሮስን በጭካኔ መገደልና የፋሽስት ጣሊያን አረመኔያዊ ተግባርን የምንቃወም መሆናችንን ለማስገንዘብ ፣

- የዛሬ 80 ዓመት በፊት በፋሽስቶቹ ተገዶ አደባባይ የወጣውና በጻድቁ ሰማዕት አቡነ ጴጥሮስ መገደል እንዲያጨበጭብ የተገደደው ሕዝብ አካልና አጋር መሆናችንን ለማሳየት ፣

- በባቡር መንገድ ሥራ ምክንያት ተነሥቶ የነበረው የምሥክር ሐውልታቸው ዳግም ተመልሶ በክብር ቦታው መቆሙ አስፈላጊና ግዴታም መሆኑን ለማረጋገጥ ፣

- እንደ እሳቸው ያለ የሕዝብና የሀገር ፍቅር የሚገደው ፥ ከራሱ በላይ ለወገኑ የሚኖር የሃይማኖት አባትና የሀገር መሪ ዛሬም የምንናፍቅ መሆናችንን ለማሳየት ፣

- ለጀግናው የጀግና ክብር ፥ ለአርበኛው የአርበኛ ዝክር መስጠትና ማድረግን ግድየለሽ በሚሆኑ የቤተ ክህነት ፣ የቤተ መንግሥት እና የማኅበረሰብ አካላት በጨዋ አካሄድ የምንቆጣና የተናደድን መሆናችንን ለማሳሰብ ፣

- በአጠቃላይ ለአቡነ ጴጥሮስ ያለንን አድናቆትና ክብር ከፍ ባለድምፅ ጀግናችንን በጭብጨባ እናንግሣቸው !

ጀግናችንን በጭብጨባ እናንግሣቸው !

ጀግናችንን በጭብጨባ እናንግሣቸው !

/የጎርባቾቭ ማስታወሻ ፣ ጥር 27 ቀን 2008 ዓ-ም/