ፈተናችን በዝቷል

በጋሞ ጎፋ ሀገረ ስብከት፣ በዲታ ወረዳ፣ ጋና ደሬ ቀበሌ፣ የቅዱስ ሩፋኤል ቤተ ክርስቲያን ታኅሣሥ 29 ቀን 2004 ዓ.ም. ከሌሊቱ በስድስት ሰዓት አካባቢ በእሳት ከተቃጠለ በኋላ የምእመኑ ለቅሶ ….

(አንድ አድርገን የካቲት 2 ፤ 2004 ዓ.ም)፡- 2004 ዓ.ም ዓመት ውስጥ  የቤተክርስትያናችን ፈተና ከቀን ቀን እየከፋ የሄደበት ጊዜ ላይ እንገኛለን ፤ የውስጥ ፈተናችን እንዳለ ሆኖ ከውጭ ከመናፍቃን እና ከአክራሪ ሙስሊሞች የሚቃጣብን ጥቃት እየጨመረ ይገኛል ፤ ይህ በዚህ የሚቀጥል ከሆነ መንግስት ህዝቡን ወደ ማይፈለግ የእርስ በእርስ ቀውስ ውስጥ ይከተዋል ፤ ከዚህ በፊት የተቃጠሉብን ቤተክርስትያናት ፍትህ ከመንግስት ሳናገኝ ሌላ ተጨማሪ ጥቃት እየደረሰብን ይገኛል ፤ ይህን ጉዳይ መንግስትም ሆነ ጠቅላይ ቤተክህነት ዝምታ መምረጣቸው ለምን እንደሆነ አልገባልም፤ ጠቅላይ ቤተክህቱ ሁኔታውን ተከታትሎ የደረሰውን አደጋ ለምዕመኑ ማሳወቅ ፤ ይህን ጉዳት ያደረሱትን ሰዎች ከፖሊስ ጋር በመተባበር ፍርድ ቤት የማቆም ፤ የተቃጠሉት አብያተ ክርስትያናት የሚሰሩበትን መንገድ ከሀገረ ስብከቶቹ አስተዳዳሪዎች ጋር በመሆን የማሰራት ኃላፊነት አለበት ፤ ይህን ዜና ከድህረ ገፅ ውጪ በጋዜጣ እና በመሰል የመረጃ መስተላለፊያ መንገዶች መተላለፍ እና ሌላ ተመሳሳይ ጥቃት እንዳይፈፀም ምእመኑ ቤተክርስትያን እንዲጠብቅ ሃላፊነቱን እንዲወጣ መንገድ ከፋች መሆንም ይጠበቅበታል ፤ በየጊዜው ይህ የመሰለ ጥቃት ቢደርስብንም መፍትሄ ግን የሚሰጥ አካል አላገኝንም ፤ መንግስት ሰላም እንዲያስጠብቁ የመደባቸው ፖሊሶች በዚህ ዙሪያ ተሳታፊ መሆናቸው ጥቃቱ ምን ያህል እንደሆነ ያሳየናል ፤ አሁንም ጊዜው አልመሸም ፤ ጊዜው አልሄደም ፤ ይህን ያደረጉትን ሰዎች ለሚመለከተው ክፍል በቪዲዮ እና ተያያዥነት ያላቸው መረጃዎች ከፌደራል ጉዳዮች ለተወከሉ ሰዎች ተሰጥቷቸዋል ፤ ፍትህ ላለመስጠት ዝም የተባለበትን ሁኔታ እኛን አልገባልም ፡፡

ብፁዕ አቡነ ኤልያስ የጋሞ ጎፋ ሀገረ ስብከት ሊቀ ጳጳስና የቅዱሰ ሲኖዶስ አባል፣ የሀገረ ስብከቱ የመምሪያ ሓላፊዎች፣ በአርባ ምንጭ ከተማ የሚገኙ የደብር አለቆች፣  የመንግሥት ባለሥልጣናትና የፌደራል ፖሊስ ጸጥታ አስከባሪዎች በቦታው ተገኝተው ምዕመናንን ለማረጋጋትና ለማጽናናት ችለዋል፡፡ ከዚህ በተያያዘ በወረዳው የሚገኙ አጎራባች ቀበሌዎች ውስጥ የሚኖሩ ምዕመናን ወደ ወረዳው ከተማና ቤተ ክርስቲያኑ ወደ ተቃጠለበት ቀበሌ በመድረስ ህዝቡን አጽናንተው የአብሮነት ስሜታቸውንም ሲገልጹ እንደነበር  በምስሉ ተመልክተናል፡፡

 በቅርቡ በስልጤ የቅድስት አርሴማ ቤተክርስቲያን በሙስሊሙ የደረሰባት ቃጠሎ ከውስጣችን የማይጠፋ እና መቼም ቢሆን የአጽራረ ቤተ ክርስቲያን እንቅስቃሴ የማያቋርጥ ቢሆንም ክርስቲያንና ሚስማር ሲመቱት ይጠብቃል ነውና ፤  ከቀድሞው አሁን ጠንክረን ቤተ ክርስቲያናችንን ልንጠብቅ ይገባል፡፡በአሁኑ ሰዓት ቤተክርስያን ለመስራት እንቅስቃሴ ተጀምሯል ፤ ይህን የተቃጠለውን ቤተክርስትያን በምን መልኩ ምዕመኑ እንደሚረዳ ከቀናት በኋላ አድራሻ እናስቀምጣለን፡፡

‹‹ፍትህን ከመንግስት ብናጣ ፤ ከእግዚአብሔር እውነተኛ ፍርድን አናጣም››

የምስል ምንጭ፡ -(ደቂቀ ናቡቴ)