ይህ ነገር የ5 ዓመት የትራንስፎርሜሽን እቅድ ነው ወይስ ህልም ?

መጀመሪያ ይመልከቱት (ክፍል 1)

(አንድ አድርገን የካቲት 5 ፤ 2004 ዓ.ም )፡-አርዕስቱን ሲመለከቱ ዛሬ ደሞ ምን ሊሉን ይችሉ ይሆናል ብለው ሊሆን ይችላል ፤ የመንግስት የ5 ዓመት የትራንስፎርሜሽን እቅድ ህልም ነው እያልን አይደለም ፤ ይህ እቅድ በአዳራሾቻቸው በህልም መልክ የተመለከቱት መናፍቃን አስገርመውን እንጂ ፤ በዚህ ዘመን ቀን በቀን የምንሰማው ነገር ከዚህ በፊት ያልሰማነው ፤ ያላየነው ሆኖ ክስተቶች እየገረሙን ይገኛሉ ፤ እንዴት አድርገው ማህበረሰባችንን እንደሚያሞኙት ልናመላክታችሁ ነው ይህን አርእስት የመረጥነው፡፡


እኛ ይህን ነገር የሰማነው መንግስት ባወጣው በእቅድና በትራንስፎርሜሽን እቅድ ውስጥ እና ሚዲያ እንጂ በሌላ ቦታ አይደለም ፤ ለእነሱ በህልም መልክ መታየቱ አስደምሞናል ፤ መንግስታችን ይህን እቅድ በራእይ መልክ አይተውለት ይሆን ? ይህ የመንግስት የ5 ዓመት የእቅድና ትራንስፎርሜሽን እቅድ እንጂ ህልም አይደለም ፤ የትኛው ነብይ ነው ባካችሁ ፤ ይህን አይነት ፈጠራ በአዳራሾቻቸው ውስጥ ያወሩላቸዋል እነሱም ይሰሟቸዋል ፤ ብዙ የዋህ ህዝብ ስለሰበሰቡ ጥያቄ የሚያነሳ ሰው እንኳን መሀላቸው የለም ፤ እርስዎ ይህን ተመልክተው ምን እንደሚሉ እኛ አናውቅም ፤ ብቻ ህልሙን ስናይ በጣም ስቀናል ፤ እቅድ በህልም መልክ ሲታይ የመጀመሪያ ስለሆነ ዘናም አድርጎናል ፤ በጀርባቸው ያስከተሏቸውን ነፍሳት ስናስብ ደግሞ በጣም አዝነናል ፡፡ መንግስት የትራንስፎርሜሽኑን እቅድ ሲያወጣ ብዙ ባለሙያዎች በየስራ ድርሻቸው ተካፍለውበታል ፤ ለእነሱ ደግሞ በአንድ ለሊት እቅዱን በህልም ፤ በራእይ ፤ በቴሌቪዥን እግዚአብሔር አሳይቷቸዋል(ይገርማል) ፡፡ እርስዎ በኮምፒዩተር ስክሪን የሚያዩትን ድራማ ፤ እነሱ ጋር ትልቅ እውነት ሆኖ ሲያገኙት ይገርሞታል፡፤ ይህን ነገር አማኞቻቸው በቤቱ በሲዲ መልክ እየተመለከቱት ይገኛለሉ ፤ በነብያቸውም እየተደመሙ ነው ፤ እግዚአብሔር እንደገለጠለት አስረግጠውም ይነግሮታል ፤ አሁን ይሄ ምን ይባላል?

እኛ ከዚህ በፊት በምን መንገድ ሰውን ይዘው ገደል እንደሚሰዱ ብዙ በቪዲዮና በኦዲዮ ማስረጃዎች አሉን ፤ መዝሙሮቻቸው ለምን እንደሚያስጨፍሩ ፤ ለምን ሞቅ ተደርገው እንደሚሰሩ የድምፅ ማስረጃ አለን ፤ ለስለስ ያለ የመናፍቃን መዝሙር ሰውን የመሳብ አቅሙ ደከም ስለሚል በገበያ ላይም ገብቶ ተደማጭነት ስለማይኖረው በስምምነት ሞቅ ደመቅ ያለ ነገር ከሙዚቃ ባለሙያዎች ጋር ተነጋግረው እንደሚያስገቡበት የድምፅ ማስረጃ አለን ፤ ይች ዘዴም ተሀድሶያውያኑ እኛም ዘንዳ አምጥተውት ነበር ፤ በአውደ ምህረት ላይ ትንሽ ጊዜም ዘለው ምዕመኑን አዘልለውታል ፤ እጃችሁን ‹‹ከፍ ከፍ›› እያሉ መና ሲወርድ የሚቀበል በሚመስል መልኩ ከስርዓተ ቤተክርስትያን ባፈነገጠ ሁናቴ ትንሽ መንገድ አስኪደውት ነበር ፤ ይችን ከማን እንደተወሰደች ለማወቅ የፊዚክስ ሊቅ መሆንን አይጠይቅም፡፡


በሞባይል ስልክ እንደሚጸለይላቸውም እናውቃለን ፤ቤታቸው ሆነው ስልክ ይደውላሉ  ፤ ከጉልበታቸው በርከክ ፤አይናቸውን ጨፈን አድርገው ፓስተሩ በሞባይል ሲጸልይላቸው ፤ አሜን አሜን እያሉ ጸሎቱን ያደምጣሉ( ይችህ ዘዴ በቅርብ የመጣች ነች) ፤   በስምምነት አንዱን የምንፍቅና እምነት ሶስት አራት ቦታ ከፍለው የአማኝ ቁጥር በየጊዜው እየመዘገቡ አዲስ እምነት እንዴት እንደሚፈጥሩ ፤ ከበስተጀርባ የሚከናወነውን ነገር ለተከታዩ የማይነገረውን ነገር በደንብ በመረጃ በተደገፈ መልኩ እናውቃለን ፤ የትኛው አዳራሽ የየትኛው ፓስተር እንደሆነም  እናውቃለን ፤ እነዚህን ሁሉ ማስረጃዎች ወደፊት ከስራቸው ጋር አያይዘን የምናቀርብ ይሆናል ፤ ፤የዛሬው አይነት የቪዲዮ ማስረጃ ግን ከዚህ በፊት አይተን አናውቅም ፤ ይህ ግን እኛ ካለን ወጣ ያለ ጊዜውን ያማከለ ስትራቴጂ ሆኖ ስላገኝነው ለእናንተው ልናቀርበው ወደድን ፤ 

(ክፍል 2)

 ድሮውም ከመናፍቅ ወንጀል እንጂ ወንጌል አይጠበቅም፡፡ የሚያሳዝነው ደግሞ በየቀኑ በቲቪ የሚሰሙት ነገር ባለ ሕልሙ ሲነግራቸው “ራዕይ” ብለው መቀበላቸውን ነው፡፡ ምን ያህል ዓይነ ልቡናቸው እንደታወረም ያሳያል፡፡ ለእኛ ግን ቅዱስ ጳውሎስ እንዲህ ይለናል፡- “ብዙ ጊዜ ስለ እነርሱ አልኋችሁ፥ አሁንም እንኳ እያለቀስሁ እላለሁ። መጨረሻቸው ጥፋት ነው፥ ሆዳቸው አምላካቸው ነው፥ … አሳባቸው ምድራዊ ነው። እኛ ግን አገራችን በሰማይ ነውና፥ ከዚያም ደግሞ የሚመጣ መድኃኒትን እርሱንም ጌታን ኢየሱስ ክርስቶስን እንጠባበቃለን” /ፊል.3፡18-20/፡፡

እግዚአብሔር መልካሙን መንገድ እንዲመራቸው ወደ አእምሯቸው አንዲመልሳቸው ምኞታችን ነው