ታዖሎጊስና ቃለአዋዲ የተሰኙት መርሓ ግብሮች ከቤተ ክርስቲያኗ ህጋዊ ፈቃድ እስካልተሰጣቸው ድረስ የኦርቶዶክስ ቤተ ክርስትያንን ስም መጠቀም አይችሉም

To EBS :- እኛ የኢትዮጵያ ኦርቶዶክስ ተዋህዶ ምዕመናን ጥያቄዎቻችንን ከዚህ በታች አቅርበናል::

1. የኢትዮጵያ ኦርቶዶክስ ተዋህዶ ቤተ ክርስትያን ራሱን የቻለ ሃይማኖታዊና አስተዳደራዊ መዋቅር አላት:: ማንኛውም የቤተክርስትያኒቱን ስም ይዞ የሚወጣ የአየር ፕሮግራም የቤተ ክርስቲያኒቱን ሕጋዊ ፈቃድ ወይም ይሁንታ ማግኘት አለበት:: ወይም የቤተክርስትያኒቱ ህጋዊ መዋቅር ውስጥ ያለ አካል መሆን ይኖርበታል:: ቤተ ክርስትያኒቱ ያላከችው ማንም አካል ግን የኦርቶዶክስ ተዋሕዶን ስም ይዞ መንቀሳቀስ አይችልም:: 

በዚህም መሰረት ታዖሎጊስና ቃለአዋዲ የተሰኙት መርሓ ግብሮች ከቤተ ክርስቲያኗ ህጋዊ ፈቃድ እስካልተሰጣቸው ድረስ የኦርቶዶክስ ቤተ ክርስትያንን ስም መጠቀም አይችሉም:: ስለዚህም ከቤተ ክርስትያኒቱ አስተዳደር ህጋዊ የሆነ ማስረጃ ካላመጡ በስተቀረ በኢትዮጵያ ኦርቶዶክስ ተዋህዶ ስም መጠቀም እንዲያቆሙ ቴሌቪዝን ጣብያው አስፈላጊውን እርምጃ እንዲወስድልን እንጠይቃለን::

2. በነዚሁ የቴሌቪዝን መርሓ ግብሮች በኢትዮጵያ ኦርቶዶክስ ተዋህዶ ስም የቤተክርስቲያኒቱን ቀኖና በሚጥስ መልኩ የሚተላለፉ መልክቶችና ድርጊቶች እየተበራከቱ መጥተዋል:: ይህም የአንድን ሃይማኖት ክብርና ልዕልና የሚነካ ነው::ለምሳሌ ለመጥቀስ - በየትኛውም ኦርቶዶክሳዊ መስፈርት የእመቤታችን ስዕል ከአትራኖስ ስር አትቀመጥም:: እንዲህ አይነት በኦርቶዶክስ ስም የሚከናወኑ ኢ - ኦርቶዶክሳዊ የሆኑ ስብከቶችና ድርጊቶች የሃይማኖቱ ተከታዮች ላይ የሞራልና የስነ ልቦና ጫና እያስከተለ ነው:: ሕዝቡ ወደ ሕጋዊ ጥያቄ ከመሄዱ በፊት የኢቢኤስ አስተዳደር አስፈላጊውን እርምት እንዲሰጥልን እንጠይቃለን:: 

3. በነዚሁ ሰባክያን በነዚሁ ቴሌቪዝን መርሃ ግብሮች ላይ ባደባባይ " መንደርተኛ " በሚል የተዘለፈው የቤተ ክርስትያኒቱ ዘማሪ ይልማ በይፋ ይቅርታ እንዲጠየቅና ድጋሚም በቤተ ክርስቲያኒቱ አስተምህሮም ሆነ መምህራን ላይ ተመሳሳይ ዘለፋ እንዳይከናወን አስፈላጊውን መመርያ እንዲሰጥልን የኢቢኤስን አስተዳደር በኢትዮጵያዊና ክርስትያናዊ ትህትና እንጠይቃለን::

4. በመጨረሻም እነዚሁ ስብስቦች ለቲቪ ፕሮግራሞቻቸው ማስፈጸሚያ ይሆኑ ዘንድ በኦርቶዶክስ ቤተ ክርስትያን ስም የሚያደርጓቸው የስፓንሰር ጥያቄዎችና ልመናዎች በአስቸኳይ እንዲታገዱ እንጠይቃለን:: 

በዚሁ አጋጣሚ የኢትዮጵያ ኦርቶዶክስ ተዋህዶ ቤተ ክርስትያን አስተዳደርም፣ በቤተ ክርስቲያኒቱ ስም ስለሚተላለፉት መርሓ ግብሮች ግልጽ መግለጫ እንዲሰጥ እንጠይቃለን::ከሁሉም በላይ የኢትዮጵያ ኦርቶዶክስ ተዋህዶ ቤተ ክርስትያንን ታሪክ ፤ ዶግማና ቀኖና ከመጠበቅ እና ከማስጠበቅ አንጻር በዚህ ጉዳይ ላይ ሰፊው ምዕመን ዘርፈ -ሰፊ እንቅስቃሴ እንዲያደርግ እንጠይቃለን፡፡