Celebrating Poverty : በዓላት የልመና ማስፋፊያ አይደረጉ!

• ‹‹የራበውን ሰው ለዛሬ ዓሳ አብላው፣ ለሕይወት ዘመኑ እንዲጠቅመው ግን ዓሳ ማጥመድ አስተምረው፤›› የሚባለው የቻይናውያን ታዋቂ አባባል ማስታወስ እንደ ግለሰብም፣ እንደ አገርም ጠቃሚ ነው፡፡
• ሆዱን በሆዱ ይዞ የሚኖር ሕዝብ ውስጥ በአደባባይ የሚደረግ የታይታ ልገሳ ኃፍረት ይፈጥራል
• ዕርዳታ ተቀባዮች ከአቅም በላይ ሆኖባቸው በአደባባይ ልገሳ ይቀበላሉ እንጂ፣ ከኢትዮጵያዊ ኩራታቸውና ማንነታቸው ጋር የሚጋጩ ስሜቶች ይታዩባቸዋል

ሕዝባችን እንደ እምነቱ፣ ባህሉና ልማዱ የተለያዩ በዓላትን ያከብራል፡፡ በዓላት እጅግ የተከበሩና የሚወደዱ በመሆናቸውም በሕዝባችን ውስጥ የመረዳዳት ባህሉና መስተጋብሩ የዚያኑ ያህል ትልቅ ክብረት አለው፡፡ ወትሮም የተቸገረን ባለ አቅም መርዳትና በበዓላት ወቅት አብሮ መብላት፣ መጠጣትና መደሰት ዘመናትን የተሸጋገረ የሕዝባችን ፀጋ ነው፡፡ ይህ ወደር የማይገኝለት የጋራ እሴት በዘር፣ በሃይማኖት፣ በአመለካከትና በመሳሰሉት ልዩነቶች ሳይገደብ የቀጠለ አኩሪ ተግባር ነው፡፡ ከመጠን ያለፈ ጨዋነት፣ ሥነ ምግባርና ርህራሔ የሚታይበት ይህ የሕዝባችን የመረዳዳት ባህል የኢትዮጵያዊነት የአንድነትና የጥንካሬ መንፈስ ማሳያም ነው፡፡ ዛሬ አቅም ያለው የተቸገረን ሲረዳ፣ በሌላ ጊዜ ደግሞ በተራው በሌሎች ይረዳል፡፡ መስጠትና መቀበል የበላይነትና የበታችነት ማሳያ ሳይሆን፣ ይልቁንም ማኅበራዊ ኃላፊነትን መወጫ ቱባ ባህል ነው፡፡ በቀደመው ትውልድም ሆነ አሁን ባለው ዘንድ የሚከበር ተምሳሌታዊ መስተጋብር ነው፡፡ የኢትዮጵያ ሕዝብ አብሮነት መኩሪያ ነው፡፡ ከቅርብ ጊዜ ወዲህ ግን ይህ እሴት እየተሸረሸረ ነው፡፡ መነጋገር ይገባል፡፡

ሐዘን ያጠላበት የግብፅ የሆሳዕና በዓል

• ኢትዮጵያ ሐዘኗን ገለፀች

የሆሳዕና በዓልን በግብፅ ሁለት ከተሞች በሚያከብሩ የኮፕት ኦርቶዶክስ ተዋሕዶ ቤተ ክርስቲያን ምዕመናን ላይ በደረሰው የሽብር አደጋ ኢትዮጵያ ሐዘኗን ገለፀች፡፡

ባለፈው እሑድ ሚያዝያ 1 ቀን 2009 ዓ.ም. በታንታ እና እስክንድርያ ከተሞች የሆሳዕና በዓል በሥርዓተ ቅዳሴ ሲከበር በደረሰው ጥቃት 44 ንፁሃን ሲገደሉ ከ100 በላይ ጉዳት ደርሶባቸዋል፡፡ የውጭ ጉዳይ ሚኒስትር ወርቅነህ ገበየሁ (ዶ/ር) ለግብፅ አቻቸው ሚስተር ሳሜህ ሹክሪ በላኩት የሐዘን መግለጫ በንፁሃን ዜጎች ላይ የሞትና የመቁሰል አደጋ ያደረሰውን የሽብር ድርጊት አውግዘዋል፡ የግብፅ ሚዲያዎች እንደዘገቡት፣ ከካይሮ ሰሜን አቅጣጫ 130 ኪሎ ሜትር ርቀት በናይል ዴልታ ግዛት ታንታ ከተማ በምትገኘው ማር ጊዮርጊስ (ቅዱስ ጊዮርጊስ) ቤተ ክርስቲያን ውስጥ በደረሰው ፍንዳታ፣ 27 ሰዎች ሲገደሉ 78 ቆስለዋል፡፡

የኮፕቲክ ፖፕ አቡነ ቴዎድሮስ ዳግማዊ የሆሳዕናን ሥርዓተ ቅዳሴ በመሩበት በወደቧ ከተማ እስክንድርያ፣ የቅዱስ ማርቆስ ካቴድራል በደረሰው የአጥፍቶ ጠፊ ፍንዳታም ሦስት የፖሊስ መኰንኖችን ጨምሮ 17 ሲገደሉ 48 ቆስለዋል፡፡

በእስክንድርያ ቅዱስ ሚና ገዳም ሥርዓተ ቀብራቸው ወዳጅ ዘመድ በተገኘበት በማግስቱ ሲፈጸም አንዱ ሐዘንተኛ፣ ‹‹የት ሄደን እንፀልይ? የት እናምልክ? በቤተ ክርስቲያናችን ውስጥ ጥቃት እየፈጸሙብን ነው፡፡ እንድንፀልይ አይፈልጉም፤ ይሁን እንጂ በደጀ ሰላማችን መጸለይ ማምለካችንን አናቋርጥም፤›› ሲል መሰማቱን የዜና ምንጮች ዘግበዋል፡፡ በሁለቱ ከተሞች ጥቃቱን ያደረሰው ‹‹እስላማዊ መንግሥት›› በመባል የሚታወቀው ቡድን መሆኑን ራሱ ተናግሯል፡፡ አደጋውን ተከትሎ የግብፅ መንግሥት ለሦስት ወራት የሚዘልቅ የአስቸኳይ ጊዜ አዋጅ በመላ አገሪቱ አውጇል፡፡

በማስረጃነት የተያዘ፣ በግብጽ ታንታ ከተማ ቅዱስ ጊዮርጊስ ቤተክርስቲያን ውስጥ

Source:- www.ethiopianreporter.com

በፈረሰችው የቅድስት አርሴማ ቤተ ክርስቲያን ጉዳይ፣ ፓትርያርኩ የአዲስ አበባ ከተማ ከንቲባን አሳሰቡ

• “የሕዝበ ክርስቲያኑ ሮሮ ተባብሶ አቅጣጫውን ከመለወጡ በፊት ፍትሕ ርትዕ የተሞላበት ዳኝነት ይታይ” /ፓትርያርኩ/
• “ይዞታ በስጦታ ተገኘ በሚል ብቻ ቤተ ክርስቲያን ሊሠራ አይችልም” /የከንቲባው ጽ/ቤት/
• ደብሩ፣ በወረዳው ሥራ አስፈጻሚ እና የደንብ ማስከበር ሓላፊዎች ላይ ክስ መሠረተ

በአዲስ አበባ፣ የካ ክፍለ ከተማ፣ ወረዳ 12፣ አባዶ ቁጥር 1 እየተባለ በሚጠራው አካባቢ የተሠራችው፣ የቅድስት አርሴማ ቤተ ክርስቲያን፥ ድፍረት በተመላበት ኃይልና ሥልጣን፣ በወረዳው የደንብ ማስከበር ጽ/ቤት እንደፈረሰች ፓትርያርኩ የጠቀሱ ሲኾን፤ ሕዝበ ክርስቲያኑ የሚያሰማው ሮሮ ተባብሶ አቅጣጫውን ከመለወጡ በፊት፦ ፍትሕ ርትዕ የተሞላበት ዳኝነት ታይቶ፣ የፈረሰው ተጠግኖ፣ የጎደለው ተሟልቶ አገልግሎት እንዲሰጥ የሚያስችል አመራር ለሚመለከተው ክፍል እንዲተላለፍ ከንቲባ ድሪባ ኩማን አሳሰቡ።

የደብሩ ይዞታና ግንባታ፣ ሕገ ወጥ ነው፤ በሚል ቤተ ክርስቲያኒቱ እንድትፈርስ በሥር ፍርድ ቤት የተሰጠው ውሳኔ የይግባኝ ቅሬታ ቀርቦበት እንዳይፈጸም ታግዶና በቀጠሮ ላይ እያለ፣ መጋቢት 18 ቀን 2009 ዓ.ም.፣ “በሚያሳዝን ኹኔታ፣ ታቦተ ሕጉ ያለበት መቃኞ ቤተ ክርስቲያን በመፍረሱ፥ ንዋያተ ቅድሳት ተመዝብሯል፤ ምሥጢራተ ቤተ ክርስቲያንም የድፍረት ሥራ ተፈጽሞባቸዋል፤” ብለዋል ፓትርያርኩ፣ ባለፈው ሳምንት ማክሰኞ፣ ለከንቲባው በጻፉት ደብዳቤ።

የዋልድባ ገዳም መነኩሴ መታሰር አብይ ምክንያት

• ‹እኛ ራሳችንን ለሰይፍ አዘጋጅተን የተቀመጥን ሰዎች ነን ፤ እኛን ገድላችሁ ስኳር ፋብሪካውን መስራት ትችላላችሁ ፤ እኛ የዋልድባ አፈር ጠባቂ ነን እንጂ ጠባቂው መድኃኒዓለም ነው ፤ ዋልድባን ብታከብሩት ትከበራላችሁ ፤ ብታቀሉት ትቀላላችሁ ፤ እናንተ የፈለጋችሁትን ማድረግ ትችላላችሁ ፤ እኛ ይግባኝ ለክርስቶች ሰጥተናል››  የገዳሙ አባቶች ከ4 ዓመት በፊት

(አንድ አድርገን መጋቢት 26 2009 ዓ.ም)፡- አባ ገብረ ኢየሱስ በዋልድባ ገዳም ላይ መንግሥት ሊሰራ ያሰበውን የስኳር ፋብሪካ ገዳሙን በመወከል የአባቶችን ድምጽ በመያዝ ከአራት አመት በፊት በጠቅላይ ሚኒስትር ቢሮ እና በብጹ ወቅዱስ አቡነ ጳውሎስ እና ቅዱስ ሲኖዶስ ጋር መልዕክት ይዘው ከመጡት አባቶች እንዱ ናቸው ፤ እኚህ አባት ለሃይማኖታቸው ቀናኢ ለገዳማቸው እጅግ ተቆርቋሪ ከመሆናቸው የተነሳ የመንግሥትን ማስፈራሪያ ፤ የደህንነቶችን ክትትል ፤ የትግራይ መስተዳደር ክልልን ጸጥታ ቢሮ ስር ያሉ ተቋማትን ዛቻ ወደ ጎን በማለት ገዳሙ ያጠላበትን ችግር በመገንዘብ ገዳሙ ያለበትን የወቅቱን ሁኔታ ከገዳሙ ርቀው ለሚገኙ ኦርቶዶክሳዊያን እና የመገናኛ ብዙሃን በማሳወቅ ሃይማኖታዊ ግዴታቸው የተወጡ ታላቅ አባት ናቸው ፡፡ ከገዳሙ በሺህ ኪሎሜትር ርቆ የሚገኝ ምዕመን በየጊዜው ስለ ገዳሙ ወቅታዊ አቋም ትክክለኛ መረጃ የሚሰጡን አባ ገብረ ኢየሱስ ነበሩ፡፡

የዋልድባውን መነኩሴ የአባ ገብረ ኢየሱስን በመንግሥት ታጣቂዎች ታፈኑ

ጉዳዩ  የዋልድባውን መነኩሴ የአባ ገብረ ኢየሱስን በመንግሥት ታጣቂዎች መታፈን አስመልክቶ የተሰጠ መግለጫ

“. . . እንግዲህ አትፍሩአቸው የማይገለጥ የተከደነ፣ የማይታወቅም የተሰወረ ምንም የለምና። በጨለማ የምነግራችሁን በብርሃን ተናገሩ፤ በጆሮም የምትሰሙትን በሰገነት ላይ ስበኩ። ሥጋንም የሚገድሉትን ነፍስን ግን መግደል የማይቻላቸውን አትፍሩ፤ ይልቅስ ነፍስንም ሥጋንም በገሀነም ሊያጠፋ የሚቻለውን ፍሩ። . . .” ማቴዎስ ፲ ከ፳፮ - ፳፰

የኢትዮጵያ ኦርቶዶክስ ተዋሕዶ ቤተ ክርስቲያን ኃይማኖታቸውን በምንም የማይለውጡ ፣ ለእምነታቸው እራሳቸውን አሳልፈው የሚሰጡ ፣ ወንጌሉን በተግባር የሚተረጉሙና በሕይወታቸው የሚያሳዩ እውነተኞች ቅዱሳን አባቶች የነበሩባትና ያሉባት ቅድስት ቤተ ክርስቲያን ናት። እነዚህ አባቶች በሕዝብ ላይ ግፍና በደል ሲፈጸም፣ ፍርድ ሲጓደል ፣ በቤተ ክርስቲያን ላይ ጥቃትና ጉዳት ሲደርስ ምንም ሳይፈሩና ሳይሰቀቁ ሁኔታውን ለሕዝበ ክርስቲያን በማጋለጥ በየዘመኑ ከሚነሱ ዐላውያን ነገሥታት ጋር ፊት ለፊት እየተጋፈጡ በሥጋቸው መከራን በመቀበል ከፈጣሪያቸው የክብር አክሊልን ተቀዳጅተዋል። ይህንን ለማወቅና ለመረዳት የሰማዕታቱንና የጻድቃኑን ገድልና ድርሳን መመልከት በቂ ምስክር ነው።

ሙሉ በሙሉ በወርቅ የተለበጠው የጋምቤላ ኪዳነ ምሕረት ካቴድራል ታቦት የደረሰበት ጠፋ

(አዲስ አድማስ፤ ቅዳሜ፣ መጋቢት 23 ቀን 2009 ዓ.ም.)

•  ጽላቱን የሚያውቁ ካህናት በምርመራው መካተት እንዳለባቸው ተጠቁሟል
• “ጥያቄውን ለሀገረ ስብከቱ እንዳናቀርብ ሥራ አስኪያጁ ያሳስሩናል” /ምእመናኑ

በጋምቤላና ደቡብ ሱዳን አህጉረ ስብከት መንበረ ጵጵስና የምትገኘው፣ የሐመረ ኖኅ ቅድስት ኪዳነ ምሕረት ካቴድራል ዕድሜ ጠገብ ታቦት፣ የደረሰበት አለመታወቁን የከተማው ምእመናን የተናገሩ ሲሆን፤ በአቋራጭ መክበር በሚፈልጉ ስግብግቦች እጅ ሳይገባ አፋጣኝ ማጣራትና ምርመራ እንዲካሔድላቸው መንበረ ፓትርያርኩን ጠየቁ፡፡

ቤተ ክርስቲያኒቱ፣ በንጉሠ ነገሥት ዐፄ ኃይለ ሥላሴ ትእዛዝ በ1941 ዓ.ም. መታነጿንና ሙሉ በሙሉ በወርቅ የተለበጠ የኪዳነ ምሕረት ታቦትም እንዲገባ ካስደረጉ በኋላ፣ ሥርዓተ እምነታቸውን ሲፈጽሙባትና ሲማፀኑባት እንደኖሩ ምእመናኑ ጠቅሰው፤ ከየካቲት 24 ቀን ጀምሮ ግን ታቦቱ በመንበሩ ላይ እንደሌለ ከካቴድራሉ ካህናት መስማታቸውን ተናግረዋል፡፡

አስተምህሮን ይፃረራል፤ የተባለ የትግርኛ መጽሐፍ ቅዱስ ትርጉም እንዲታገድ የመቐለ ምእመናን ጠየቁ

(አዲስ አድማስ፤ ቅዳሜ፣ መጋቢት 23 ቀን 2009 ዓ.ም.)

የኢትዮጵያ ኦርቶዶክስ ተዋሕዶ ቤተ ክርስቲያንን አስተምህሮ ይፃረራል፤ ያሉት የትግርኛ ቋንቋ ትርጉም መጽሐፍ ቅዱስ ከሥርጭት እንዲታገድላቸውና እንዲወገድላቸው፣ የመቐለ ምእመናን የጠየቁ ሲሆን፤ የኢትዮጵያ መጽሐፍ ቅዱስ ማኅበር በበኩሉ፣ “ትርጉሙ፣ በቤተ ክርስቲያኗ ሊቃውንት የተሠራ ነው፤ ስሕተት አለው፤ የሚል እምነት የለንም፤” ብሏል፡፡

 

ከ40 በላይ የሆኑ ምእመናን የተፈራረሙበት ማመልከቻ፤ ለትግራይ አህጉረ ስብከት 4 ሊቃነ ጳጳሳት በግንቦት 2008 ዓ.ም ያቀረቡ ቢሆንም፤ ለጥያቄያቸው እስከ አሁን ምላሽ እንዳልተሰጣቸው ምዕመናኑ ለአዲስ አድማስ አስታውቀዋል፡፡ የኦርቶዶክስ፣ የካቶሊክ እና የወንጌላውያን ኅብረት አብያተ ክርስቲያናት አባል የሆኑበት የኢትዮጵያ መጽሐፍ ቅዱስ ማኅበር ያሳተመው ይህ መጽሐፍ ቅዱስ፤ “ከኦርቶዶክስ ተዋሕዶ አስተምህሮ በተፃራሪ፡- የክርስቶስን የባሕርይ አምላክነት የሚክድ፣ የቅድስት ሥላሴን አንድነትና ሦስትነት የሚያዛባ፣ ሥልጣነ ክህነትን የሚሽርና የማይቀበል፣ የቤተ ክርስቲያኗን ፊደልና ቁጥር አቆጣጠር የማይቀበል እንዲሁም፣ ቤተ ክርስቲያኗ የምትቀበላቸውን 81 መጽሐፍ ቅዱስ ወደ ጎን በመተው 66 መጻሕፍትን ብቻ ያካተተ በመሆኑ፣ እምነትን የሚያስክድ ነው፤ ይወገድልን፤” ብለዋል - ምዕመናኑ፡፡  መጽሐፍ ቅዱሱ ታትሞ በገበያ ላይ ከዋለ በኋላ፣ 92 በመቶ የሚሆነውን የክልሉን የኦርቶዶክስ ተዋሕዶ እምነት ተከታይ ግራ እያጋባ መሆኑንም ምዕመናኑ በማመልከቻቸው ጠቁመዋል፡፡ የቤተ ክርስቲያኒቱን ዶግማ ይፃረራል፤ የተባለው ይኸው መጽሐፍ ቅዱስ፣ ወደተለያዩ የከተማና እና የገጠር አብያተ ክርስቲያናት እንዳይሰራጭና ዳግመኛም እንዳይታተም እንዲታዘዝላቸው ምዕመናኑ ጠይቀዋል። የትርጉሙን ስሕተት የሠሩ አካላትም ተጠያቂ እንዲሆኑና ርምጃ እንዲወሰድባቸው ምዕመናኑ አያይዘው ጠይቀዋል።