“ፕሮፌሰር መስፍን የድብትርናን ሹመት የሚሰጡ በሆኑና በተቀበልኳቸው ደስታውን አልችለውም” ዲ/ን ዳንኤል ክብረት

•   የኢትዮጵያ ታሪክ ከሸፈ ሊባል አይቻልም ፤ የኢትዮጵያ ታሪክ እኮ የተጻፈው ብቻ አይደለም ፤ ያልተጻፈ ብዙ ታሪክ አለ፡፡
•  ፕሮፌሰር መርዕድ ሲሞቱ ፤ ፕሮፌሰር ታደሰ አልጋ ላይ ሲውሉ ጠብቆ የእነሱ ስራ ላይ ሂስ ማቅረብ ተገቢ አይደለም፡፡
• ደርግ እኮ ከወደቀ 21 ዓመታት ተቆጥሯል፡፡ ታዲያ ለምን ከደርግ ውድቀት በኋላ መጽሀፉን ሳያሳትሙት ቆዩ? ስለ ኢትዮጵያ ታሪክ በምልአት ዛሬ ልትናገር አትችልም ፤ የኢትዮጵያን ታሪክ በአንድ ሰው እድሜ አትጨርሰውም፡፡
•  የኢትዮጵያ ሕዝብ ተረድቼዋለሁ የማትለው ልዩ ሕዝብ ነው፡፡ አንድን ጉዳይ በቃ ጨርሷል ስትል ብድግ የሚል ፤ ተኝቷል ስትለው የሚነሳ ነው ፤ ከ1997 ዓ.ም በፊት የነበረውን 97 ላይ ለምንድነው ብድግ ያለው? ለሚለው እንኳን ተንትኖ የሚነግርህ የለም::
•   መስፍን በቁጣ ስሜት ለኔ መልስ በማለት የጻፉት ጽሁፍ ምላሽ ያልሰጠሁት ለእሳቸው አክብሮት ስላለኝ ነው፡፡

(አንድ አድርገን መጋቢት 5 2005 ዓ.ም)፡- በዚህ ሰሞን የብዙዎች መነጋገሪያ ከሆነው ጉዳይ ውስጥ የዲ/ን ዳንኤልና የፕሮፌሰር መስፍን ጉዳይ መሆኑ ይታወቃል ፡፡ ፕሮፌሰሩ በ83 እድሜ ዘመናቸው በኢትዮጵያ ታሪክ ላይ ያዩትንና ያስተዋሉትን  በመጽሀፍ መልክ ለንባብ አብቅተዋል ፡፡ ዲ/ን ዳንኤልም ፕሮፌሰሩ የጻፉት መጽሀፍን በራሱ እይታ ተችቷል ፡፡ ይህ ጽሁፍ መጻፉ ፤ ለሂስ መቅረቡና ሰዎች የራሳቸው አስተያየት መስጠታቸው ተገቢ ቢሆንም ጥቂት አስተያየት ሰጪዎችና ሂስ አቅራቢዎች “ዲያቆን” የሚለውን ማዕረግ ከየት እንደተገኝ ፤ ለዲ/ን ዳንኤል ማን እንደሰጠው ያላስተዋሉ የፕሮፌሰሩን ወይም የዲ/ን ዳንኤልን ሃሳብ ከመሞገት ይልቅ ወደ ሰዎቹ ማዕረግ እና ስብዕና ላይ ያተኮረ አስተያየት ሲሰጡ ተስተውሏል ፡፡ ፕሮፌሰር መስፍንም የፕሮፌሰርነትን መአረግ ከመሬት ወድቆ እንዳላገኙት ሁሉ በኢትዮጵያ ኦርቶዶክስ ተዋህዶ ቤተክርስቲያንም የዲያቆንነት ማዕረግ ዝም ብሎ አይሰጥም ፡፡ ትንሽ ቢመስል ዋጋ ተከፍሎበታል ፡፡ ቤተክርስቲያን ለአንድ አገልጋይ የምትሰጠውን ማዕረግ አንቋሾ ፤ አውርዶ ፤ እንደማይገባው አድርጎ አስተያየት መስጠት “ባለቤቱን(ማዕረግ ሰጪውን)  ካልናቁ ….” ነው የሚሆነው፡፡ አንድ ሰው ስለ ዲ/ን ዳንኤል በሰጠው አስተያየት ላይ የፈለገው ማለት ይችላል ፤ ማዕረጉን ግን ከፍ ዝቅ ማድረግ ተገቢ ነው ብለን አናምንም ፡፡ ለማንኛውም የዲ/ን ዳንኤል አስተያየትን በአንባቢያ ጥያቄ መሰረት ከላይፍ መጽሄት ላይ በመውሰድ  እንዲህ አቅርበነዋል፡፡

ታሪክን የኋሊት “አቡነ ማትያስ ለቅዱስ ሲኖዶስ ያቀረቡት አቤቱታ”

• ብዙ መከራ ውስጥ ተዘፍቃ የምትገኝው በአሜሪካ የኢትዮጵያ ኦርቶዶክስ ተዋህዶ ቤተክርስቲያን ሀገረ ስብከት ሲኖዶሳዊ ፍትሕ ርትዕን ትጠብቃለች፡፡
• የእግዚአብሔር ባለ አደራ መሆን ቀላል ስላይደለ እያንዳንዳችን በእግዚአብሔር ፤ በታሪክና በሃይማኖት በምንመራቸው ምዕመናን ዘንድ በኃላፊነት እንጠየቃለን፡፡ ጌታ ቅዱስ ጴጥሮስን “ለዐይኬ አባግዕ” በማለት እየደጋገመ አደራ ያለው ምግብናውን በቀላሉ እንዳያየውና ቸልተኛ ሆኖ አደራውን እንዳይዘነጋ ነው፡፡
•   ፓትርያርኩ በተቃራኒ መንገድ በመጓዝ ምን አይነት ጥቅምና የኅሊና ደስታ እንደሚሰጣቸው በፍጹም ሊገባን አልቻለም፡፡
•  ቆቡ እንደው አንድ ጊዜ ከተሰቀለ በኋላ በቀላሉ የሚወርድ ወይም የሚሻሻል አይደለም፡፡ “ታሞ ከመማቀቅ አስቀድሞ መጠንቀቅ” (የጳጳሳትን ሹመትን በተመለከት ለቅዱስ ሲኖዶስ ያሳሰቡት)
•  በስመ ሲኖዶስ  የሚጠቀሙት ባለስልጣኖች ሲኖዶሱን ባያሰድቡ መልካም ነው፡፡
•  አንድ ወታደር በቂ የሆነ ትጥቅና ስንቅ ሳይሰጠው የጀነራልነት ማዕረግ ብቻ አሸክመው ወደ ጦር ሜዳ ቢልኩት ከጠላት ጋር ተፋልሞ የአገር ዳር ድንበር ማስከበር አይችልም፡፡ (ዝኒ ከማሁ) መንፈሳዊ ወታደርም ከዚህ የተለየ አይለም፡፡

(አንድ አድርገን መጋቢት 3 2005 ዓ.ም)፡-  በአሁኑ ሰዓት ስድስተኛ ፓትርያርክ አድርጋ ቤተክርስቲያን የሾመቻቸው አባት ከአመታት በፊት የሰሜን አሜሪካ ሊቀ ጳጳስ ሆነው ማገልገላቸው ይታወቃል፡፡ በወቅቱ በርካታ አስተዳደራዊ ግድፈቶችን ተመልክተው ማለፍ ያልቻሉት አቡነ ማትያት ለቅዱስ ሲኖዶስ የሚደርስ 20 ገጽ ደብዳቤዎችን ከበርካታ አባሪ ማስረጃ ደብዳቤዎች ጋር ለወቅቱ የቅዱስ ሲኖዶሱ ዋና ጸሀፊ ለብጹዕ አቡነ ኒቆዲሞስ ጥቅምት 12 1992 ዓ.ም አድርገው ልከው ነበር፡፡ ይህ የተላከው ሰነድ ቅዱስ ሲኖዶስ ተነጋግሮበት ውሳኔ እንዲሰጥበት መሆኑን አቡነ ማትያስ ይገልጻሉ ፡፡ ነገር ግን ከቅዱስ ሲኖዶስ ጽህፈት ቤት ያገኙት መልስ ቢኖር “አልደረሰንም” የሚል ነበር፡፡ ይህ በሴራ ለቅዱስ ሲኖዶስ ጉባኤ እንዳይቀርብ የተደረገው ደብዳቤ የግል ጋዜጦች እንዲያወጡትን በፓትርያርኩ እና በዙሪያቸው ያሉ ሰዎች  እያደረጉ ያለውን ነገር ህዝቡ እንዲያውቅ ለማድረግ በአስቸኳይ የፖስታ አገልግሎት በወቅቱ ህትመት ላይ ለነበረው “ኢትኦጵ” መጽሄት ዋና አዘጋጅ ለአቶ ተስፋዬ ተገኝ ከተላከው ሰነድ እና በጊዜው ለህትመት ከበቃው ጋዜጣ ላይ መለስ ብለን አቡነ ማትያስ ምን አይነት ስሞታዎችንና ቅሬታዎችን ለሲኖዶስ እንዳቀረቡ ለማየት እንሞክራለን፡፡

ብጹዕ ወቅዱስ አቡነ ማትያስ ጠቅላይ ሚኒስትር ኃ/ማርያም ደሳለኝን አነጋገሩ

• አቶ ኃ/ማርያም ለለቅዱስነታቸው የኢትዮጵያ ኦርቶዶክስ ተዋህዶ ቤተክርስቲያን ካላት ተሰሚነት አንጻር በኢትዮጵያ እና በኤርትና መካከል ሰላም እንዲሰፍን የበኩሏን አስተዋጽኦ ታበረክት ዘንድ ጠይቀዋል

(አንድ አድርገን መጋቢት 2 2005 ዓ.ም)፡- ብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት ቤተክርስቲያኒቷ ስድስተኛ ፓትርያርክ አድርጋ ከሾመቻቸው በኋላ ስራቸውን በይፋ ከጀመሩ ዛሬ ስምተኛ ቀናቸው ይዘዋል ፡፡ አቡነ ማትያስ ከብጹአን ሊቃነ ጳጳሳት ጋር በመሆን ባሳለፍነው ሳምንት የኢፌድሪ ፕሬዝዳንት ግርማ ወ/ጊዮርጊስን በቢሯቸው ተገኝተው ስለ ወቅቱ የቤተክርስቲያኒቱ ሁኔታ እና ቤተክርስቲያኒቱ ለሀገሪቱ አየሰራቻቸው ያሉትን ማህበራዊ እና መንፈሳዊ ጉዳዮች ላይ ፕሬዝዳንቱን ማነጋገራቸው ይታወቃል፡፡ ቅዱስነታቸው በመቀጠልም የሀገሪቱን ጠቅላይ ሚኒስትር አቶ ኃ/ማርያም ደሳለኝን በቢሯቸው በመገኝት እንዳነጋገሩ ለማወቅ ተችሏል፡፡

በንግራቸው ላይ አገሪቱ የያዘችው የልማት ጎዳና ማስቀጠል ይቻል ዘንድ የኢትዮጵያ ኦርቶዶክስ ተዋህዶ ቤተክርቲያን  የምታካሂደውን ዘርፈ ብዙ  ልማት አጠናክራ እንደምትቀጥል ብጹዕ ወቅዱስ አቡነ ማትያስ ለጠቅላይ ሚኒስትሩ ገልጸዋል፡፡ ቅዱስነታቸው ከውይይቱ በኋላ ለጋዜጠኞች እንደገለጹት ቤተክርስቲያኒቱ ከመንግሥት ጎን በመቆም  በአገሪቱ የሚካሄደውን ልማት  እንዲቀጥል የበኩሏን አስተዋጽ ታደርጋለች ብለዋል፡፡ በመላው ሃገሪቱ የሚገኙ አማኞች ከሌሎች የእምነት ተቋማት ጋር  በመተባበር በልማት ስራዎች እንዲሳተፉ እና ለሀገሪቱም እድገት አሻራቸው እንዲጥሉ ጥሪያቸውን አስተላልፈዋል፡፡

“ቤተ ክርስቲያን ከፖለቲካ ተጽእኖ ነጻ ሆና አታውቅም” ዲያቆን ዳንኤል ክብረት

• መንግሥት ሙስናን ለመቀነስ የባለስልጣናትን ንብረት እንደመዘገበ ሁላ ቤተክርስቲያኒቱ የጳጳሳቱን ንብረት መመዝገብ ይኖርባታል፡፡
• እስከ አሁን ብዙ ንብረት  በመያዝና በማስቀመጥ ክስ ያልተሰማባቸው አባት አቡነ ጳውሎስ ናቸው፡፡
• ታምራት ላይኔ ጥገኝነት ለመጠየቅ ተናገረ የተባለውን ነገር እንደ ታሪካዊ ማስረጃ ለመውሰድ በግሌ እቸገራለሁ፡፡ ይህንን ካደረገ ቤተክርስቲያኒቱን ይቅርታ መጠየቅና ለተፈጠረው ቀውስም ሃላፊነት መውሰድ ይኖርበታል፡፡
• የ6ኛ ፓትርያርክ ምርጫው ከመንፈሳዊነት ወጣ ባለ መልኩ የምረጡኝ አይነት የምርጫ ቅስቀሳዎች ነበሩ፡፡
• እሳት በተነሳ ቁጥር ቦታህን እየለቀክ ከተሰደድክ ለችግሩ መፍትሄ መስጠት አትችልም፡፡
• እርቀ ሰላሙ እንዲጀመር መንገድ የጠረጉት አቡነ ማትያስ ናቸው ፤ አቡነ ጳውሎስንና አቡነ መርቆሪዎስን ብቻቸውን ለማገናኝት እቅድ ነበራቸው ፡፡

 (አንድ አድርገን መጋቢት 2 2005 ዓ.ም)፡- ዲያቆን ዳንኤል ክብረት ከወቅቱ የቤተክርስቲያን ጉዳይን በሚመለከት ከላይፍ መጽሄት የመጋቢት ወር እትም ቁጥር 102 ጋር አጭር ቆይታ አድርጎ ነበር ፡፡ ዲያቆን ዳንኤል ቆይታው ይህን ይመስላል…. ያንብቡት

“ተሀድሶን” ጠርገን ሳናስወጣ “ተዋህዶ” የሚሉ ደግሞ ብቅ ብለዋል

(አንድ አድርገን የካቲት 28 2005 ዓ.ም )፡- ከአመት በፊት በመንበረ ጸባኦት ቅድስት ሥላሴ ካቴድራል ጀርባ  ኤልያስ ወደ ምድር ወርዷል ፤ ትክክለኛ ሰንበት ቅዳሜ እንጂ እሁድ አይደለም ፤ “የኢትዮጵያ ኦርቶዶክስ ተዋሕዶ አማኞች” መባል አንፈልግም እኛ “የኢትዮጵያ ተዋህዶ አማኞች” ነን “ኦርቶዶክስ” የሚለው ስም ተለጥፎብን ነው እንጂ እኛን የሚገልጽ አይደለም ፤  የአሁኗ የኢትዮጵያ ኦርቶዶክስ ተዋህዶ እምነት ስርዓተ ቤተክርስቲያን አንዳድን ቦታ ላይ ትክክል አይደለችም ፤ ስለ አማላጅነትና መሰል ከኢትዮጵያ ኦርቶዶክስ ተዋህዶ እምነት ጋር የሚጣረስ ሃሳብ ያላቸው ቡድኖች በአሁኑ ሰዓት በመሀል አዲስ አበባ “ማኅበረ ስላሴ ዘደቂቀ ኤልያስ አሃቲ የሰማይ ጉባኤ ዘቅድስት ቤተክርስቲያን ቅድመ መንበሩ ለእግዚነ ወእመፍጥረት ወላዲተ አምላክ” በሚል ስም ምእመኑን ግራ እያጋቡት ይገኛሉ፡፡

 እነዚህ ቡድኖች  “ታላቁና የሚያስፈራው የእግዚአብሔር ቀን ሳይመጣ ነቢዩን ኤልያስን እልክላችኋለሁ።” ትንቢተ ሚልክያስ  4፤5 “ኤልያስማ አስቀድሞ ይመጣል ሁሉንም ያቀናናል” የማርቆስ ወንጌል 9 ፤12 የሚሉትን የመጽፍ ቅዱስ ቃል መሰረት በማድረግ ነብዩ ኤልያስ ወደ ምድር ጳግሜ 5 2003 ዓ.ም እንደመጣ አብዝተው ይሰብካሉ ፡፡ ቦታው መሃል አራት ኪሎ ሲሆን በርካቶችን በተለያዩ በራሪ ወረቀቶች በመሳብ ላይ ይገኛሉ ፡፡  ቦታው ድረስ ሄደን እንደተመለከትነው አርቲስት ጀማነሽ ሰለሞንን የመሰሉ አርቲስቶች ፤ ቆብ ያጠለቁ መነኮሳትና ለማገልገል የሚፋጠኑ ወጣቶች በቦታው ላይ መመልከት ችለናል ፡፡ ተሀድሶያውያንም ሆኑ አሁን ላይ “ተዋሕዶ” ብለው ራሳቸውን ከእኛ ጋር እጅጉን በማመሳሰል የተነሱት ሰዎች መጨረሻቸው መንጋውን ከበረቱ ማስወጣት ነው፡፡ አሁን ላይ “ተዋሕዶ” የሚለውን ትርጉም ከአባቶች እንዳገኝነው በማለት የራሳቸውን ፍልስፍና ምዕመኑን እየጋቱት ይገኛሉ ፤ ጥቂቶች እስከ አሁን ኦርቶዶክስ ተዋህዶ መባል አልነበረብንም በማለት የጉባኤያቸው ተካፋይ መሆን ጀምረዋል ፡፡ እያየን ያለነው ነገር የኦርቶዶክስ ተዋህዶ ቤተክርስቲያን አማኞችን አንገታቸው ላይ የሚያስሩት ክር ትክክል አይደለም ፤ “ከሰማይ የተሰጠው አረንጓዴ ቢጫ ቀይ ቀለም ክር ነው” በማለት ምዕመኑን የበፊቱን እያስወለቁ አዲሱን የራሳቸውን ክር እያጠለቁለት ይገኛሉ… ይሄ ነገር ዛሬ ዝም ከተባለ ነገ በዝተው የባሰ ቀውስ እንዳያመጡም ስጋት አለን …ለማንኛውም በዚህ አመለካከት  የተጠመቀችው ለምስክርነትም በቃው የምትለው አርቲስት ጀማነሽ ምን እንደምትል ከየካቲት ወር እትም ከሚሺሪያ መጽሄት ጋር ያደረገችው ሙሉ ቃለ መጠይቅ ብሎጋችን ላይ ለጥፈንልዎታል ያንብቡት….

ጥቂት ከቃለ መጠይቁ የተወሰደ

• ኦርቶዶክስ ሽፋን ነው፡፡ ቅባት ፤ ጸጋ ፤ ዘጠኝ መለኮት እያሉ በግድ አብረው ኦርቶዶክስ በሚል ሰንሰለት ከተዋሕዶ ጋር ጠፍረው አስረው አንድ ላይ ያስቀመጧቸው እምነቶች መሆናቸውን ተረድቻለሁ፡፡
• ኦርቶዶክስ ማለት ጸጋን ቅባትንም ዘጠኝ መለኮትንም የሚጠቀልል ከሆነ እኔ ኦርቶዶክስ አይደለሁም ፡፡ አልፈልገውም ፤ አልቀበል፤ እኔ ተዋህዶ ብቻ ነኝ፡፡
• የኢትዮጵያ ኦርቶዶክስ ተዋሕዶ ቤተክርስቲያን ሲባል ቀጥተኛዋ ተዋሕዶ  የሚሉ ስለሚመስለኝ እኔም በዚያ ስም ራሴን ስጠራ ነው የኖርኩትኝ፡፡ በቅዱስ ኤልያስ አዋጅ ላይ ነው ያየሁት ፡፡ የቅዱስ ኤልያስ አዋጅም “እነዚህ እምነቶች የክርስትና እምነት ስላሆኑ ከተዋህዶ ጋር አንድነት ስለሌላቸው የኢትዮጵያ ቤተክርስቲያን ሲኖዶሱ ንስጥሮስን እንዳወገዙ ፤ አርዮስን እንዳወገዙ በእምነትም በዶግማም ስለማይመሳሰል አውግዛችሁ ልትለዩ ይገባል” የሚል ታላቅ አዋጅ ነው ያየሁት ፡፡ ይህን ግን ሲኖዶሱ አልተቀበለውም፡፡
• ከአሁን ወዲያ ደግሞ እውነተኛውን ነገር እስካወቅን ድረስ  አንደ አባቶቻችን “የለም ፤ አይሆንም ፤ አንድ አይደለንም” ብሎ መቆም ደግሞ የኛ ፋንታ ነው፡፡
• ተዋሕዶ ነን ብላችሁ ልዩነት ስትፈጥሩ ተሃድሶ እንደሚባለው ሊፈረጅ ይችላል የሚል ስጋት የለሽም? (ከጋዜጠኛ የቀረበላት ጥያቄ)
• ቅባት ጸጋ የሚባሉት እኛን ተዋህዶ በመሆናችን የከሰሱን እና ወንጀለኛ የደረጉን ናቸው ፤ በሙሉ ገዳም ውስጠ ያሉት በዚህ ተይዘዋል ፤ ጥቂት ተዋህዶ አማኞች  በስቃይ የሚኖሩ አሉ፡፡
• በአሁን ጊዜ ብዙ ሃይማኖቶች አሉ ፤ እውነት ግን ያለው በአንድ መንገድ ብቻ ነው ፤ አሷም ተዋህዶ ናት፡፡
• ስንት ገዳም ገብቼ የስንት አባቶችን መስቀል ተሳልሜአለሁ ፡፡ ሳስበው ይዘገንነኛል ፡፡ ዋልድባን የሚያህል ቅዱስ ገዳም ነው በእንደዚህ አይነቶች ተሞልቶ ያገኝሁት፡፡ ዋልድባን የሚያህል የቅዱሳን አባቶች መቀመጫ ገዳም “ዘጠኝ መለኮት” የሚሉ መናፍቃን ግማሹን ይዘው እንዳሉበት አላውቅም ነበር፡፡
• “ታላቁ የእግዚአብሔር ቀን ከመምጣቱ በፊት የአባቶችን ልብ ወደ ልጆች የልጆችን ልብ ወደ አባቶች ይመልስ ዘንድ  ቅዱስ ኤልያስን እልክላችኋለሁ” ይላል አሁን ኤልያስ የመጣው ይህን ሊገልጥ ነው፡፡
• እግዚአብሔር ከዚህ መስመር (ተዋሕዶ) ከሚያስወጣኝ ቢገለኝ እመርጣለሁ፡፡
• ሶሪያ ትንቢተ ኢሳያስ ላይ እንደሚላት እየወደመች ነው ፤ አሜሪካ እንደምትጠፋ ራዕይ ላይ ተጽፏል

TO READ IN PDF CLICK HERE

የ6ተኛው ፓትርያርክ በዓለ ሲመት በፎቶና በቪዲዮ

የብፁዕ ወቅዱስ አቡነ ማትያስ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት በዓለ ሲመት ቪዲዮ ለመመልከት ይህን ይጫኑ

ብጹዕ ወቅዱስ አቡነ ማትያስ የኢፌድሪ ፕሬዝዳንትን በማነጋገር ስራቸውን ጀመሩ

(አንድ አድርገን የካቲት 27 2005 ዓ.ም)፡- ባሳለፍነው ሳምንት ዕለተ ሀሙስ በ500 ድምጽ የተመረጡት በእለተ ሰንበት ሲመተ ፕትርክናቸውን ያገኙት 6^ተኛው ፓትርያርክ ብጹዕ አቡነ ማትያስ ይፋዊ ስራቸውን ትላንት የኢፌዲሪን ፕሬዚዳንት አቶ ግርማ ወ/ጊዮርጊስን  በቤተመንግሥት በማነጋገር  መጀመራቸውን ለማወቅ ተችሏል፡፡ የኢትዮጵያ ኦርቶዶክሰ ተዋሕዶ ቤተ ክርስቲያንን በመወከል አምስት ያህል አባቶች ከአዲሱ ፓትርያርክ ጋር በብሔራዊ ቤተመንግሥት በመገኝት በርካታ ጉዳዮችን ከፕሬዝዳንቱ ጋር መነጋገራቸውን ለማወቅ ተችሏል፡፡ፓትርያርኩ ከውጭ ከሚገኙ አባቶች ጋር እርቀ ሰላሙ እንደሚቀጥል ፤ ቤተክርስቲያኒቱ በሀገሪቱ ላይ እያደረገች ያለችውን አስተዋጽኦ አጠናክራ እንደምትቀጥል ለፕሬዝዳንቱ ገልጸውላቸዋል፡፡ እንደ ቅዱስነታቸው ገለጻ የኢትዮጵያ ኦርቶዶክስ ተዋህዶ ቤተክርስቲያን ከሀገሪቱ ባለፈም በአለም አቀፍ እንቅስቃሴዎች የበኩሏን ድርሻ እንደምትወጣ ተናግረዋል፡፡ በስተመጨረሻም የኢትዮጵያ ኦርቶዶክስ ተዋህዶ ቤተክርስቲያን የጀመረቻቸውን ዘርፈ ብዙ ስራዎች እንደምትቀጥል ተስፋቸው እንደሆነ ፕሬዝዳንቱ ገልጸዋል፡፡

ፓትርያርኩ በተሾሙበት ቀን በቤተክህነት የተበተነው ሰነድ

(አንድ አድገን የካቲት 26 2005 ዓ.ም)፡- ባሳለፍነው እሁድ የኢትዮጵያ ኦርቶዶክስ ተዋህዶ ቤተክርስቲያን 6ተኛውን ፓትርያርክ በቅድስት ሥላሴ ካቴድራል መሾሟ ይታወቃል ፡፡ በቦታው ላይ ሰዎች ተገኝተው ስርዓቱን በሚከታተሉበት ሰዓት ከአውደ ምህረቱ ላይ ሁለት አይነት መጽፎች ለምዕመኑ ሲበተኑ ነበር ፤ አንደኛው የብጹዕ ወቅዱስ አቡነ ማቲያስ የህይወት ታሪክን የያዘ ከ50 ገጽ በላይ የሆነ መጽሀፍ ሲሆን ሁለተኛው ደግሞ የቅዱስ ሲኖዶስ ጽህፈት ቤት “አራተኛው ፓትርያርክና ከእሳቸው ጋር ባሉት አባቶች የተፈጸመው ስህተትን የሚያጋልጥ መረጃ በጽሁፍ ፤ በመገናኛ ብዙሃን እና በተለያዩ ጉባኤዎች ለሕዝቡ ይፋ ይደረጋል” ባለው መሰረት ከ52 ገጽ በላይ ያለው አራተኛው ፓትርያርክ አጠፉ ያላቸውን ስህተቶች ነቅሶ የሚያወጣ ጽሁፎች ናቸው፡፡ በዚህ ወቅት በሰዎች ዘንድ ሲነሳ ከነበረው ጥያቄ አንዱ “እንዴት በሁለት ቀን ልዩነት የአቡነ ማቲያስን የህይወት ታሪክ እንዲህ ሊጻፍ ይችላል? የሚለው አንዱ ነው ፡፡ የ6ተኛው ፓትርያርክ ውጤቱ ሀሙስ ድምጽ ተሰጥቶ ፤ ሀሙስ  ከሰዓት ታውቆ አርብና ቅዳሜን የአንድን ሰው ታሪክ ጽፎ ፤ አስፈላጊ ሰነዶችን አደራጅቶ፤ እርማት አድርጎ ማተሚያ ቤት ገብቶ  ለእሁድ ሲመት ደረሰ ማለት “ዶሮን ሲያታልሏት …” ነገር ነው የሚሆነው፡፡ስለዚህ የህይወት ታሪካቸው ቀድሞ ነው የተዘጋጀው ለማለት ያስደፍራል፡፡

በሌላ በኩል ቅዱስ ፓትርያርኩ “እርቀ ሰላሙ ይቀጥላል” እያሉ ባሉበት ሰዓት ስለ አራተኛው ፓትርያርክ ይህን አይነት ሰነድ ማውጣት ለምን አስፈለገ ? በማለት ጥያቄ የሚጠይቁ ሰዎች አልታጡም፡፡ የተበተነውን ሰነድ ካነበቡ በኋላ እውን ሁለቱ ሲኖዶሶች እርቀ ሰላሙን ይፈልጉታልን ? በማለት የሚጠይቁ ሰዎችንም ተመልክተናል፡፡ ከዚህ በተጨማሪ ሰነዱ ፍጹም ኦርቶዶክሳዊ ያልሆነ በርካታ ሽሙጦች ፤ ፖለቲካዊ አካሄዶችና  መባል የሌለባቸው ነገሮችን ይዞ ተመልክተናል ፡፡ለምሳሌ አንድ ቦታ ላይ አራተኛው ፓትርያርክ ከመንግስቱ ኃ/ማርያር ጋር ሰላምታ ሲለዋወጡ ፎቶ ያስቀምጥና “የቀድሞ አራተኛ ፓትርያርክ ከደርግ ሊቀ መንበር አብዮታዊ ቡራኬ ሲቀበሉ” በማለት ከፎቶ ስር ሰፍሯል፡፡ ከዚህ በተጨማሪም አራተኛው ፓትርያርክ ደርግ ህዝብ ሲጨፈጭፍ ዝም ብለው ተመልክተዋል በማለት መንግስት ጥፋት ሲያጠፋ አለመናገር በእሳቸው የተጀመረ ያስመስለዋል፡፡ አቡነ ጳውሎስ ከቅድስተ ማርያርም የዩኒቨርሲቲ ተማሪዎች ታፍሰው ሲወሰዱ መቼ ተናገሩ ? ዋልድባ አባቶች ሲንገላቱ ማን አቤት አለላቸው ? በ97 ያ ሁሉ ነገር ሲደረግ ፓትርያርኩ ዝም በማለታቸው በ1998 ዓ.ም የመስቀል በዓል ላይ ፓትርያርኩን ህዝቡ “ይሁዳ…” “ይሁዳ ..” ሲላቸው  እኛም በአይናችን በዘመናችን ያየነው ነገር ነው፡፡ መጥቀስ ካስፈለገ ብዙ መጥቀስ ይቻላል ፡፡ እርቀ ሰላሙን ቢፈልጉት ኖሮ ይህን ሰነድ ባላወጡት ነበር፡፡ አራተኛውን ፓትርያርክ ብቻ በመክሰስ ራስን ነጻ ማድረግ አይቻልም ……. ሰነዱ ብዙ የጽሁፍ ማስረጃዎችን ይዟል፤ በዘመኑ ምን እንደተደረገ ለማሳየትም ይሞክራል ፤ የቤተክህነት ሰው ሳይሆን አብዮታዊ ዲሞክራሲን የተጠመቀ ሰው የጻፈውም ይመስላል ፤ አንድ ወዳጄ “አዲስ ራዕይ” መጽሄት ቤተክህነት መጻፍ ጀመረች እንዴ ብሎኛል፡፡ ለማንኛውም አንድ አድርገን ይህን የተበተነውን ሰነድ በቅርብ ሆነው ማግኝት ለማይችሉ ምዕመናን ስካን በማድረግ ለአንባቢያን አቅርባለች፡፡

ሰነዱን ለማንበብ ይህን ይጫኑ

ያንቡት አስተያየትዎን በሰነዱ ላይ ብቻ ይስጡ

አላማችን መረጃዎችን ሰዎች ዘንድ ማድረስ ነው::

‹‹ውጭ አገር ካሉት ወንድሞቻችን ጋራ እርቀ ሰላም ማድረጉ አሁንም ይቀጥላል›› ብፁዕ ወቅዱስ አቡነ ማትያስ

(Reporter ):- የኢትዮጵያ ኦርቶዶክስ ተዋሕዶ ቤተ ክርስቲያን ስድስተኛው ፓትርያርክ ሆነው ባለፈው ሐሙስ የተመረጡት ብፁዕ ወቅዱስ አቡነ ማትያስ በውጭ አገር ካሉት ጳጳሳት ጋራ እርቀ ሰላም ማድረጉ አሁንም ይቀጥላል አሉ፡፡

የኢትዮጵያ ኦርቶዶክስ ቤተ ክርስቲያን ምእመናንን ለማገልገል፣ ለማስተማር፣ ፍቅርና አንድነትን ለማጠናከርም ተግተው እንደሚቀጥሉበት አስታውቀዋል፡፡

በጠቅላይ ቤት ክህነት አዳራሽ የካቲት 21 ቀን 2005 ዓ.ም. በተደረገው የስድስተኛው ፓትርያርክ ምርጫ ከፍተኛውን 500 ድምፅ በማግኘት የተመረጡት ብፁዕ ወቅዱስ አቡነ ማትያስ፣ ከምርጫው ፍፃሜ በኋላ በተለይ ለሪፖርተር በሰጡት ቃለ ምልልስ አሜሪካ ከሚገኙትና ከአራተኛው ፓትርያርክ ጋር ሆነው ከተለዩት ጳጳሳት ጋር ንግግሩ እንደሚቀጥል ተናግረዋል፡፡

‹‹ከአሁን ቀደም እርቁ ተሞክሯል፡፡ ውጭ አገር ካሉት ወንድሞቻችን ጋራ እርቀ ሰላም ለማድረግ በተደጋጋሚ ተሞክሯል፡፡ አሁንም ቢሆን ቅዱስ ሲኖዶስ በወሰነው መሠረት ይቀጥላል፤›› ብለዋል፡፡

የአዲሱ የኢትዮጵያ ኦርቶዶክስ ፓትርያርክ በዓለ ሲመት እሑድ ተፈጸመ

(Reporter ):- የኢትዮጵያ ኦርቶዶክስ ተዋሕዶ ቤተ ክርስቲያን ስድስተኛ ፓትርያርክ ብፁዕ ወቅዱስ አቡነ ማትያስ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም  ወዕጨጌ ዘመንበረ ተክለ ሃይማኖት  በዓለ ሲመት እሑድ የካቲት 24 ቀን 2005 ዓ.ም. በአዲስ አበባ መንበረ ጸባዖት ቅድስት ሥላሴ ካቴድራል  ተፈጸመ፡፡